Read Isaiah 66 side by side with translations · The Final Bible
1 ⲧⲁⲓ ⲧⲉ ⲧϩⲉ ⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲥ ϫⲉⲧⲡⲉ ⲡⲉ ⲡⲁⲑⲣⲟⲛⲟⲥ ⲡⲕⲁϩ ⲇⲉ ⲡϩⲩⲡⲟⲡⲟⲇⲓⲟⲛ ⲛⲛⲁⲟⲩⲉⲣⲏⲧⲉ ⲁϣ ⲡⲉ ⲡⲏⲓ ⲉⲧⲉⲧⲛⲁⲕⲱⲧϥ ⲛⲁⲓ ⲏ ⲁϣ ⲡⲉ ⲡⲁⲙⲁ ⲛⲙⲧⲟⲛ
2 ⲛⲁⲓ ⲅⲁⲣ ⲧⲏⲣⲟⲩ ⲧⲁϭⲓϫ ⲁϥⲧⲁⲙⲓⲟⲟⲩ ⲁⲩⲱ ⲛⲟⲩⲓ ⲛⲉ ⲛⲁⲓ ⲧⲏⲣⲟⲩ ⲡⲉϫⲉⲡϫⲟⲉⲓⲥ ⲁⲩⲱ ⲉⲓⲛⲁϭⲱϣⲧ ⲉϫⲛⲛⲓⲙ ⲛⲥⲁⲉϫⲛⲡⲉⲧⲑⲃⲃⲓⲏⲩ ⲙⲛⲡⲣⲙⲣⲁϣ ⲁⲩⲱ ⲉⲧⲥⲧⲱⲧ ϩⲏⲧⲟⲩ ⲛⲛⲁϣⲁϫⲉ
3 ϫⲉⲡⲁⲛⲟⲙⲟⲥ ⲇⲉ ⲉⲧⲕⲱⲛⲥ ⲛⲁⲓ ⲛⲟⲩⲙⲁⲥⲉ ⲉϥⲟ ⲛⲧϩⲉ ⲙⲡⲉⲧϩⲱⲧⲃ ⲛⲟⲩⲟⲩϩⲟⲣ ⲁⲩⲱ ⲡⲉⲧⲧⲁⲗⲉⲥⲁⲙⲓⲧ ⲛⲁⲓ ⲉϩⲣⲁⲓ ⲉϥⲟ ⲛⲧϩⲉ ⲛⲟⲩⲥⲛⲟϥ ⲛⲣⲓⲣ ⲡⲉⲧϯ ⲛⲟⲩⲗⲓⲃⲁⲛⲟⲥ ⲉⲩⲣⲡⲙⲉⲉⲩⲉ ⲉϥⲟ ⲛⲧϩⲉ ⲙⲡⲉⲧϫⲓⲟⲩⲁ ⲁⲩⲱ ⲛⲧⲟⲟⲩ ⲁⲩⲥⲱⲧⲡ ⲛⲛⲉⲩϩⲓⲟⲟⲩⲉ ⲙⲛⲛⲉⲩⲙⲛⲧϣⲁϥⲧⲉ ⲙⲛⲛⲉⲩⲃⲟⲧⲉ ⲛⲁⲓ ⲉⲛⲧⲁⲧⲉⲩⲯⲩⲭⲏ ⲟⲩⲁϣⲟⲩ
4 ⲁⲛⲟⲕ ϩⲱ ϯⲛⲁⲥⲱⲧⲡ ⲛⲛⲉⲩϫⲏⲣ ⲁⲩⲱ ⲛⲧⲁⲧⲱⲱⲃⲉ ⲛⲁⲩ ⲛⲛⲉⲩⲛⲟⲃⲉ ϫⲉⲁⲓⲙⲟⲩⲧⲉ ⲉⲣⲟⲟⲩ ⲁⲩⲱ ⲙⲡⲟⲩⲥⲱⲧⲙ ⲉⲣⲟⲓ ⲁⲓϣⲁϫⲉ ⲁⲩⲱ ⲙⲡⲟⲩϫⲓⲥⲙⲏ ⲁⲩⲱ ⲁⲩⲉⲓⲣⲉ ⲛⲙⲡⲉⲧϩⲟⲟⲩ ⲙⲡⲁⲙⲧⲟ ⲉⲃⲟⲗ ⲁⲩⲱ ⲁⲩⲥⲱⲧⲡ ⲛⲛⲉⲧⲉⲛϯⲁϣⲟⲩ ⲁⲛ
5 ⲥⲱⲧⲙ ⲉⲡϣⲁϫⲉ ⲙⲡϫⲟⲉⲓⲥ ⲛⲉⲧⲥⲧⲱⲧ ϩⲏⲧϥ ⲙⲡⲉϥϣⲁϫⲉ ⲁϫⲓⲥ ⲉⲛⲉⲧⲙⲟⲥⲧⲉ ⲙⲙⲱⲧⲛ ϫⲉⲛⲉⲛⲥⲛⲏⲩ ⲁⲩⲱ ⲛⲉⲧⲃⲱⲧⲉ ⲙⲙⲱⲧⲛ ϫⲉⲕⲁⲥ ⲉⲣⲉⲡⲣⲁⲛ ⲙⲡϫⲟⲉⲓⲥ ϫⲓⲉⲟⲟⲩ ⲁⲩⲱ ⲛϥⲟⲩⲱⲛϩ ⲉⲃⲟⲗ ϩⲙⲡⲉⲩⲟⲩⲛⲟϥ ⲛⲧⲉⲛⲏϫⲓϣⲓⲡⲉ ⲉⲣϣⲁⲛⲡϫⲟⲉⲓⲥ ⲉⲓ ϩⲙⲡⲉϥⲟⲩⲛⲟϥ ⲧⲟⲧⲉ ⲛⲁⲓ ⲛⲁϫⲓϣⲓⲡⲉ
6 ⲡⲉϩⲣⲟⲟⲩ ⲛⲟⲩⲁϣϣⲕⲁⲕ ⲉⲃⲟⲗ ϩⲛⲟⲩⲡⲟⲗⲓⲥ ⲡⲉϩⲣⲟⲟⲩ ⲉⲃⲟⲗ ϩⲙⲡⲉⲣⲡⲉ ⲙⲡϫⲟⲉⲓⲥ ⲉϥⲧⲱⲱⲃⲉ ⲛⲟⲩⲧⲱⲱⲃⲉ ⲛⲛⲉⲧϯⲟⲩⲃⲏϥ
7 ⲉⲙⲡⲁⲧⲉⲧⲉⲧⲛϯⲛⲁⲁⲕⲉ ⲙⲓⲥⲉ ⲉⲙⲡⲁⲧⲉⲡⲉⲧⲕⲁⲥ ⲛⲛⲛⲁⲁⲕⲉ ⲉⲓ ⲁⲥⲣⲃⲟⲗ ⲁⲥϫⲡⲟ ⲛⲟⲩϩⲟⲟⲩⲧ
8 ⲛⲓⲙ ⲡⲉⲛⲧⲁϥⲥⲱⲧⲙ ⲉϩⲱⲃ ⲛⲧⲉⲓⲙⲓⲛⲉ ⲁⲩⲱ ⲛⲓⲙ ⲡⲉⲛⲧⲁϥⲛⲁⲩ ⲛⲧⲉⲓϩⲉ ϫⲉⲛⲉⲁⲩⲥϩⲓⲙⲉ ϯⲛⲁⲁⲕⲉ ϩⲛⲟⲩϩⲟⲟⲩ ⲛⲟⲩⲱⲧ ⲏ ⲁⲩϫⲡⲟ ⲛⲟⲩϩⲉⲑⲛⲟⲥ ϩⲓⲟⲩⲥⲟⲡ ϫⲉⲁⲥⲓⲱⲛ ϯⲛⲁⲁⲕⲉ ⲁⲥϫⲡⲟ ⲛⲛⲉⲥϣⲏⲣⲉ
9 ⲁⲛⲟⲕ ⲇⲉ ⲁⲓϯ ⲙⲡⲓϭⲱϣⲧ ⲉⲃⲟⲗ ⲁⲩⲱ ⲙⲡⲉⲣⲡⲁⲙⲉⲉⲩⲉ ⲡⲉϫⲉⲡϫⲟⲉⲓⲥ ⲉⲓⲥ ϩⲏⲏⲧⲉ ⲙⲏ ⲁⲛⲟⲕ ⲁⲛ ⲡⲉⲛⲧⲁⲓⲧⲁⲙⲓⲉⲧⲉⲧⲙⲓⲥⲉ ⲙⲛⲧⲉⲥⲧⲉⲓⲣⲁ ⲡⲉϫⲉⲡϫⲟⲉⲓⲥ
10 ⲉⲩⲫⲣⲁⲛⲉ ⲧϩⲓⲉⲣⲟⲩⲥⲁⲗⲏⲙ ⲁⲩⲱ ⲁⲣⲓϣⲁ ⲧⲏⲣⲧⲛ ⲛⲉⲧⲟⲩⲏϩ ϩⲣⲁⲓ ⲛϩⲏⲧⲥ ⲣⲁϣⲉ ϩⲛⲟⲩⲣⲁϣⲉ ⲧⲏⲣⲧⲛ ⲛⲉⲛⲧⲁⲩⲣϩⲏⲃⲉ ⲉϫⲱⲥ
11 ϫⲉⲕⲁⲥ ⲉⲧⲉⲛⲉⲃⲱⲕ ⲉϩⲟⲩⲛ ⲛⲧⲉⲧⲛⲥⲱⲛⲅ ⲛⲧⲉⲧⲛⲥⲉⲓ ⲉⲃⲟⲗ ϩⲛⲧⲉⲕⲓⲃⲉ ⲙⲡⲉⲥⲥⲟⲗⲥⲗ ϫⲉⲕⲁⲥ ⲉⲧⲉⲧⲛⲉϫⲓⲉⲕⲓⲃⲉ ⲛⲧⲉⲧⲛⲧⲣⲩⲫⲁ ⲉⲃⲟⲗ ϩⲛⲧⲉϩⲓⲏ ⲙⲡⲉⲥⲉⲟⲟⲩ
12 ϫⲉⲛⲁⲓ ⲛⲉ ⲉⲛⲧⲁⲡϫⲟⲉⲓⲥ ϫⲟⲟⲩ ϫⲉⲉⲓⲥϩⲏⲏⲧⲉ ⲁⲛⲟⲕ ϯⲛⲁⲣⲓⲕⲉ ⲉϫⲱⲟⲩ ⲙⲡⲉⲟⲟⲩ ⲛⲛϩⲉⲑⲛⲟⲥ ⲛⲧϩⲉ ⲛⲟⲩⲓⲉⲣⲟ ⲛⲉⲓⲣⲏⲛⲏ ⲁⲩⲱ ⲛⲧϩⲉ ⲛⲟⲩⲙⲟⲟⲩ ⲛⲥⲱⲣⲙ ⲉϥⲥⲱⲕ ⲙⲡⲉⲟⲟⲩ ⲛⲛϩⲉⲑⲛⲟⲥ ⲥⲉⲛⲁϥⲓ ⲇⲉ ⲛⲛⲉⲩϣⲏⲣⲉ ϩⲓϫⲛⲛⲉⲩⲛⲁⲛⲁϩⲃ ⲁⲩⲱ ⲛⲥⲉⲥⲗⲥⲱⲗⲟⲩ ϩⲓⲛⲉⲩⲡⲁⲧ
13 ϫⲉⲛⲧϩⲉ ⲛⲟⲩⲁ ⲉⲣⲉⲧⲉϥⲙⲁⲁⲩ ⲛⲁⲥⲉⲡⲥⲱⲡϥ ⲧⲁⲓ ⲧⲉ ⲧϩⲉ ⲉϯⲛⲁⲥⲉⲡⲥⲡⲧⲏⲩⲧⲛ ⲁⲩⲱ ⲥⲉⲛⲁⲥⲗⲥⲗⲧⲏⲩⲧⲛ ϩⲛⲧϩⲓⲉⲣⲟⲩⲥⲁⲗⲏⲙ
14 ⲛⲧⲉⲧⲛⲛⲁⲩ ⲛⲧⲉⲡⲉⲧⲛϩⲏⲧ ⲣⲁϣⲉ ⲛⲧⲉⲛⲉⲧⲛⲕⲉⲉⲥ ϯⲟⲩⲱ ⲛⲧϩⲉ ⲛⲟⲩⲛⲧⲏϭ ⲉϥⲣⲱⲧ ⲁⲩⲱ ⲧϭⲓϫ ⲙⲡϫⲟⲉⲓⲥ ⲛⲁⲟⲩⲱⲛϩ ⲉⲃⲟⲗ ⲛⲛⲉⲧϣⲙϣⲉ ⲛⲁϥ ⲛϥⲛⲟⲩϭⲥ ⲉϫⲛⲛⲉⲧⲟ ⲛⲁⲧⲥⲱⲧⲙ ⲛⲥⲱϥ
15 ⲉⲓⲥ ⲡϫⲟⲉⲓⲥ ⲅⲁⲣ ⲛⲏⲩ ⲛⲧϩⲉ ⲛⲟⲩⲕⲱϩⲧ ⲁⲩⲱ ⲛⲉϥϩⲁⲣⲙⲁ ⲛⲧϩⲉ ⲛⲟⲩϩⲁⲧⲏⲩ ⲛϥⲧⲱⲱⲃⲉ ⲛⲟⲩⲕⲃⲁ ϩⲛⲟⲩϭⲱⲛⲧ ⲁⲩⲱ ⲟⲩϫⲱⲱⲣⲉ ⲉⲃⲟⲗ ϩⲛⲟⲩϣⲁϩ ⲛⲥⲁⲧⲉ
16 ⲥⲉⲛⲁⲕⲣⲓⲛⲉ ⲅⲁⲣ ⲙⲡⲕⲁϩ ⲧⲏⲣϥ ϩⲙⲡⲕⲱϩⲧ ⲙⲡϫⲟⲉⲓⲥ ⲁⲩⲱ ⲥⲁⲣⲝ ⲛⲓⲙ ϩⲛⲧⲉϥⲥⲏϥⲉ ⲟⲩⲛϩⲁϩ ⲛϩⲁⲧⲃⲉⲥ ⲛⲁϣⲱⲡⲉ ⲉⲃⲟⲗ ϩⲓⲧⲛⲡϫⲟⲉⲓⲥ
17 ⲛⲉⲧϫⲓⲟⲩⲟⲡ ⲁⲩⲱ ⲛⲉⲧⲃⲃⲟ ⲙⲙⲟⲟⲩ ⲉⲛⲉϣⲛⲏ ⲁⲩⲱ ⲛⲉⲧⲟⲩⲉⲙⲁϥ ⲛⲣⲓⲣ ϩⲓⲣⲛ ⲛⲣⲟ ⲁⲩⲱ ⲛⲃⲟⲧⲉ ⲙⲛⲡⲡⲓⲛ ⲙⲛⲡⲁⲕⲁⲑⲁⲣⲧⲟⲛ ⲥⲉⲛⲁⲱϫⲛ ϩⲓⲟⲩⲥⲟⲡ ⲡⲉϫⲉⲡϫⲟⲉⲓⲥ
18 ⲁⲩⲱ ⲁⲛⲟⲕ ϯⲥⲟⲟⲩⲛ ⲛⲛⲉⲩϩⲃⲏⲩⲉ ⲙⲛⲛⲉⲩⲙⲉⲉⲩⲉ ϯⲛⲏⲩ ⲉⲥⲱⲟⲩϩ ⲉϩⲟⲩⲛ ⲛⲛϩⲉⲑⲛⲟⲥ ⲧⲏⲣⲟⲩ ⲙⲛⲛⲁⲥⲡⲉ ⲁⲩⲱ ⲥⲉⲛⲏⲩ ⲛⲥⲉⲛⲁⲩ ⲉⲡⲁⲉⲟⲟⲩ
19 ⲁⲩⲱ ϯⲛⲁϣⲱϫⲡ ⲛⲟⲩⲙⲁⲉⲓⲛ ⲉϫⲱⲟⲩ ⲁⲩⲱ ϯⲛⲁϫⲟⲟⲩ ⲉⲃⲟⲗ ⲛϩⲏⲧⲟⲩ ⲛⲉⲧⲧⲟⲩϫⲏⲩⲧ ⲉⲛϩⲉⲑⲛⲟⲥ ϩⲛⲑⲁⲣⲥⲓⲥ ⲙⲛⲡϩⲟⲩⲇ ⲙⲛⲗⲟⲩⲇ ⲙⲛⲙⲟⲥⲟⲭ ⲙⲛⲑⲟⲃⲉⲗ ⲙⲛⲑⲉⲗⲗⲁⲥ ⲁⲩⲱ ⲉⲛⲛⲏⲥⲟⲥ ⲉⲧⲟⲩⲏⲩ ⲛⲁⲓ ⲉⲧⲉⲙⲡⲟⲩⲥⲉⲧⲙⲡⲁⲣⲁⲛ ⲟⲩⲇⲉ ⲙⲡⲟⲩⲛⲁⲩ ⲉⲛⲁϩⲃⲏⲩⲉ ⲙⲛⲡⲁⲉⲟⲟⲩ ⲁⲩⲱ ⲥⲉⲛⲁϫⲱ ⲙⲡⲁⲉⲟⲟⲩ ϩⲛⲛϩⲉⲑⲛⲟⲥ
20 ⲁⲩⲱ ⲥⲉⲛⲁⲉⲓⲛⲉ ⲛⲛⲉⲧⲛⲥⲛⲏⲩ ⲉⲃⲟⲗ ϩⲛⲛϩⲉⲑⲛⲟⲥ ⲧⲏⲣⲟⲩ ⲛⲇⲱⲣⲟⲛ ⲙⲡϫⲟⲉⲓⲥ ⲡⲛⲟⲩⲧⲉ ⲙⲛϩⲉⲛϩⲧⲟ ⲙⲛϩⲉⲛϩⲁⲣⲙⲁ ⲙⲛϩⲉⲛⲕⲁⲣⲟⲩⲭⲓⲟⲛ ⲙⲙⲁⲥⲡⲟⲣⲕ ⲙⲛϩⲉⲛⲃⲣϭⲟⲟⲩⲧ ⲉⲧϩⲓⲉⲣⲟⲩⲥⲁⲗⲏⲙ ⲧⲡⲟⲗⲓⲥ ⲉⲧⲟⲩⲁⲁⲃ ⲡⲉϫⲉⲡϫⲟⲉⲓⲥ ⲛⲧϩⲉ ⲉϣⲁⲣⲉⲛϣⲏⲣⲉ ⲙⲡⲓⲥⲣⲁⲏⲗ ⲧⲁⲗⲟ ⲉϩⲣⲁⲓ ⲛⲁⲓ ϩⲛⲟⲩⲛⲟϥ ⲙⲛϩⲉⲛⲯⲁⲗⲙⲟⲥ ⲉⲡⲏⲓ ⲙⲡϫⲟⲉⲓⲥ
21 ⲁⲛⲟⲕ ϩⲱ ϯⲛⲁϫⲓ ⲛⲁⲓ ⲛϩⲉⲛⲟⲩⲏⲏⲃ ⲉⲃⲟⲗ ⲛϩⲏⲧⲟⲩ ⲙⲛϩⲉⲛⲗⲉⲩⲓⲧⲏⲥ ⲡⲉϫⲉⲡϫⲟⲉⲓⲥ
22 ⲛⲧϩⲉ ⲅⲁⲣ ⲛⲧⲡⲉ ⲛⲃⲣⲣⲉ ⲙⲛⲡⲕⲁϩ ⲛⲃⲣⲣⲉ ⲉϯⲛⲁⲧⲁⲙⲓⲟⲟⲩ ⲥⲉϭⲱ ⲙⲡⲁⲙⲧⲟ ⲉⲃⲟⲗ ϣⲁⲉⲛⲉϩ ⲡⲉϫⲉⲡϫⲟⲉⲓⲥ ⲧⲁⲓ ⲧⲉ ⲧϩⲉ ⲉⲧⲉⲣⲉⲡⲉⲧⲛⲥⲡⲉⲣⲙⲁ ⲛⲁⲁϩⲉ ⲉⲣⲁⲧϥ ⲙⲛⲡⲉⲧⲛⲣⲁⲛ ⲡⲉϫⲉⲡϫⲟⲉⲓⲥ
23 ⲁⲩⲱ ⲥⲛⲁϣⲱⲡⲉ ⲛⲟⲩⲉⲃⲟⲧ ⲉⲃⲟⲗ ϩⲛⲟⲩⲉⲃⲟⲧ ⲁⲩⲱ ⲟⲩⲥⲁⲃⲃⲁⲧⲟⲛ ⲉⲃⲟⲗ ϩⲛⲟⲩⲥⲁⲃⲃⲁⲧⲟⲛ ⲛⲧⲉⲥⲁⲣⲝ ⲛⲓⲙ ⲉⲓ ⲙⲡⲁⲙⲧⲟ ⲉⲃⲟⲗ ⲉⲟⲩⲱϣⲧ ϩⲛⲧϩⲓⲉⲣⲟⲩⲥⲁⲗⲏⲙ ⲡⲉϫⲉⲡϫⲟⲉⲓⲥ ⲡⲛⲟⲩⲧⲉ
24 ⲁⲩⲱ ⲥⲉⲛⲏⲩ ⲉⲃⲟⲗ ⲛⲥⲉⲛⲁⲩ ⲉⲛϣⲁⲩ ⲛⲛⲣⲱⲙⲉ ⲉⲛⲧⲁⲩⲡⲁⲣⲁⲃⲁ ⲛϩⲏⲧ ⲡⲉⲩϥⲛⲧ ⲅⲁⲣ ⲛⲁⲙⲟⲩ ⲁⲛ ⲁⲩⲱ ⲙⲡⲉⲩⲕⲱϩⲧ ⲛⲁϫⲉⲛⲁ ⲁⲛ ⲛⲥⲉϣⲱⲡⲉ ⲉⲣⲉⲥⲁⲣⲝ ⲛⲓⲙ ⲛⲁⲩ ⲉⲣⲟⲟⲩ
Isaiah 65 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)