Isaiah 64 — Coptic (Sahidic)

1 ⲉⲕϣⲁⲛⲟⲩⲱⲛ ⲛⲧⲡⲉ ⲡⲉⲥⲧⲱⲧ ⲛⲁϫⲓ ⲛⲛⲧⲟⲟⲩ ⲉⲃⲟⲗ ⲙⲙⲟⲕ ⲁⲩⲱ ⲥⲉⲛⲁⲃⲱⲗ ⲉⲃⲟⲗ ⲛⲧϩⲉ ⲉϣⲁⲣⲉⲟⲩⲙⲟⲩⲗϩ ⲃⲱⲗ ⲉⲃⲟⲗ ⲛⲛⲁϩⲣⲛⲟⲩⲕⲱϩⲧ ⲁⲩⲱ ⲡⲕⲱϩⲧ ⲛⲁⲣⲱⲕϩ ⲛⲛϫⲁϫⲉ ⲁⲩⲱ ⲡⲣⲁⲛ ⲙⲡϫⲟⲉⲓⲥ ⲛⲁⲟⲩⲱⲛϩ ⲉⲃⲟⲗ ϩⲛⲛϫⲁϫⲉ ⲛϩⲉⲑⲛⲟⲥ ⲛⲁϣⲧⲟⲣⲧⲣ ϩⲏⲧⲕ

2 ϩⲟⲧⲁⲛ ⲉⲕϣⲁⲛⲉⲓⲣⲉ ⲛⲛⲉⲧϩⲁ ⲉⲟⲟⲩ ⲡⲉⲥⲧⲱⲧ ⲛⲁϫⲓⲛⲧⲟⲟⲩ ⲉⲃⲟⲗ ⲙⲙⲟⲕ

3 ϫⲓⲛⲉⲛⲉϩ ⲙⲡⲉⲛⲥⲱⲧⲙ ⲟⲩⲇⲉ ⲙⲡⲉⲛⲉⲛⲃⲁⲗ ⲛⲁⲩ ⲉⲕⲉⲛⲟⲩⲧⲉ ⲛⲃⲗⲗⲁⲕ ⲁⲩⲱ ⲛⲉⲕϩⲃⲏⲩⲉ ⲉⲧⲕⲛⲁⲁⲁⲩ ⲛⲛⲉⲧϩⲩⲡⲟⲙⲉⲓⲛⲉ ⲉⲣⲟⲕ

4 ⲡⲛⲉⲩⲙⲁ ⲅⲁⲣ ⲛⲁⲧⲱⲙⲛⲧ ⲉⲛⲉⲧⲉⲓⲣⲉ ⲛⲧⲙⲛⲧⲙⲉ ⲁⲩⲱ ⲥⲉⲛⲁⲣⲡⲙⲉⲉⲩⲉ ⲛⲛⲉⲕϩⲓⲟⲟⲩⲉ ⲉⲓⲥ ϩⲏⲏⲧⲉ ⲛⲧⲟⲕ ⲁⲕⲛⲟⲩϭⲥ ⲉⲣⲟⲛ ⲡϫⲟⲉⲓⲥ ⲁⲩⲱ ⲁⲛⲣⲛⲟⲃⲉ ⲉⲧⲃⲉⲡⲁⲓ ⲁⲛⲡⲗⲁⲛⲁ

5 ⲁⲩⲱ ⲁⲛϣⲱⲡⲉ ⲛⲧϩⲉ ⲛϩⲉⲛⲁⲕⲁⲑⲁⲣⲧⲟⲥ ⲧⲏⲣⲛ ⲉⲣⲉⲧⲉⲛⲇⲓⲕⲁⲓⲟⲥⲩⲛⲏ ⲧⲏⲣⲥ ⲛⲧϩⲉ ⲛⲟⲩⲧⲟⲉⲓⲥ ⲛϣⲣⲱ ⲁⲩⲱ ⲁⲛⲥⲣⲟϥⲣⲉϥ ⲛⲧϩⲉ ⲛⲛⲓϭⲱⲃⲉ ⲉⲧⲃⲉⲛⲉⲛⲁⲛⲟⲙⲓⲁ ⲧⲁⲓ ⲧⲉ ⲧϩⲉ ⲉⲧⲉⲣⲉⲡⲧⲏⲩ ⲛⲁϥⲓⲧⲛ

6 ⲁⲩⲱ ⲙⲛⲡⲉⲧⲉⲡⲓⲕⲁⲗⲉⲓ ⲙⲡⲉⲕⲣⲁⲛ ⲁⲩⲱ ⲡⲉⲧⲣⲡⲙⲉⲉⲩⲉ ⲛϣⲟⲡⲕ ⲉⲣⲟϥ ϫⲉⲁⲕⲕⲧⲟ ⲙⲡⲉⲕϩⲟ ⲉⲃⲟⲗ ⲙⲙⲟⲛ ⲁⲩⲱ ⲁⲕⲡⲁⲣⲁⲇⲓⲇⲟⲩ ⲙⲙⲟⲛ ⲉⲧⲃⲉⲛⲉⲛⲛⲟⲃⲉ

7 ⲧⲉⲛⲟⲩ ϭⲉ ⲡϫⲟⲉⲓⲥ ⲛⲧⲟⲕ ⲡⲉ ⲡⲉⲛⲉⲓⲱⲧ ⲁⲛⲟⲛ ⲇⲉ ⲁⲛⲟⲛ ⲡⲟⲙⲉ ⲛⲛⲉϩⲃⲏⲩⲉ ⲛⲛⲉⲕϭⲓϫ ⲧⲏⲣⲛ

8 ⲙⲡⲣⲛⲟⲩϭⲥ ⲉⲣⲟⲛ ⲉⲙⲁⲧⲉ ⲁⲩⲱ ⲙⲡⲣⲣⲡⲙⲉⲉⲩⲉ ⲛⲛⲉⲛⲛⲟⲃⲉ ϩⲙⲡⲟⲩⲟⲉⲓϣ ⲁⲗⲗⲁ ⲛⲧⲟⲕ ⲡϫⲟⲉⲓⲥ ϫⲉⲁⲛⲟⲛ ⲧⲏⲣⲛ ⲁⲛⲟⲛ ⲡⲉⲕⲗⲁⲟⲥ

9 ⲁⲥⲓⲱⲛ ⲧⲡⲟⲗⲓⲥ ⲙⲡⲉⲕⲙⲁ ⲉⲧⲟⲩⲁⲁⲃ ⲣϫⲁⲓⲉ ⲁⲩⲱ ⲁⲧϩⲓⲉⲣⲟⲩⲥⲁⲗⲏⲙ ⲣⲧϩⲉ ⲛⲛⲉⲧϣⲏϥ

10 ⲁⲡⲉⲛⲏⲓ ⲉⲧⲟⲩⲁⲁⲃ ϣⲱⲡⲉ ⲉⲡⲥⲁϩⲟⲩ ⲁⲩⲱ ⲡⲉⲟⲟⲩ ⲛⲧⲁⲛⲉⲛⲉⲓⲟⲧⲉ ⲥⲙⲟⲩ ⲉⲣⲟϥ ⲁϥϣⲱⲡⲉ ⲉϥⲣⲟⲕϩ ⲁⲩⲱ ⲁⲛⲙⲁ ⲧⲏⲣⲟⲩ ⲉⲧⲧⲁⲉⲓⲏⲩ ϩⲉ

11 ⲉϫⲛⲛⲁⲓ ⲧⲏⲣⲟⲩ ⲁⲕⲁⲛⲉⲭⲉⲡϫⲟⲉⲓⲥ ⲁⲩⲱ ⲁⲕⲕⲁⲣⲱⲕ ⲁⲩⲱ ⲁⲕⲑⲃⲃⲓⲟⲛ ⲉⲙⲁⲧⲉ