Isaiah 62 — Coptic (Sahidic)

1 ⲛϯⲛⲁⲕⲁⲣⲱⲓ ⲁⲛ ⲉⲧⲃⲉⲥⲓⲱⲛ ⲁⲩⲱ ⲛϯⲛⲁⲕⲁⲧⲟⲟⲧ ⲉⲃⲟⲗ ⲁⲛ ⲉⲧⲃⲉⲧϩⲓⲉⲣⲟⲩⲥⲁⲗⲏⲙ ϣⲁⲛⲧⲉⲧⲁⲇⲓⲕⲁⲓⲟⲥⲩⲛⲏ ⲉⲓ ⲉⲃⲟⲗ ⲛⲧϩⲉ ⲙⲡⲟⲩⲟⲉⲓⲛ ⲁⲩⲱ ⲡⲁⲟⲩϫⲁⲓ ⲛⲁⲙⲟⲩϩ ⲛⲧϩⲉ ⲛⲟⲩⲗⲁⲙⲡⲁⲥ

2 ⲁⲩⲱ ⲛϩⲉⲑⲛⲟⲥ ⲛⲁⲛⲁⲩ ⲉⲧⲟⲩⲇⲓⲕⲁⲓⲟⲥⲩⲛⲏ ⲁⲩⲱ ⲛⲣⲣⲱⲟⲩ ⲉⲡⲟⲩⲉⲟⲟⲩ ⲁⲩⲱ ⲧⲉⲛⲁⲙⲟⲩⲧⲉ ⲉⲡⲟⲩⲣⲁⲛ ⲛⲃⲣⲣⲉ ⲉⲧⲉⲣⲉⲡϫⲟⲉⲓⲥ ⲛⲁⲙⲟⲩⲧⲉ ⲉⲣⲟⲙⲙⲟϥ

3 ⲁⲩⲱ ⲧⲉⲛⲁϣⲱⲡⲉ ⲛⲕⲗⲟⲙ ⲛⲥⲁϩⲛⲧϭⲓϫ ⲙⲡϫⲟⲉⲓⲥ ⲁⲩⲱ ⲛϭⲣⲏⲡⲉ ⲙⲙⲛⲧⲣⲣⲟ ϩⲛⲧϭⲓϫ ⲙⲡⲟⲩⲛⲟⲩⲧⲉ

4 ⲁⲩⲱ ⲛⲥⲉⲛⲁⲙⲟⲩⲧⲉ ⲉⲣⲟⲁⲛ ϫⲓⲛⲙⲡⲉⲓⲛⲁⲩ ϫⲉⲧⲉⲛⲧⲁⲩⲕⲁⲁⲥ ⲛⲥⲱϥ ⲁⲩⲱ ⲛⲧⲟ ⲛⲥⲉⲛⲁⲙⲟⲩⲧⲉ ⲁⲛ ⲉⲡⲟⲩⲕⲁϩ ϫⲉⲡϫⲁⲓⲉ ⲛⲧⲟ ⲅⲁⲣ ⲥⲉⲛⲁⲙⲟⲩⲧⲉ ⲉⲣⲟϫⲉⲡⲁⲟⲩⲱϣ ⲁⲩⲱ ⲡⲟⲩⲕⲁϩ ϫⲉⲧⲟⲓⲕⲟⲩⲙⲉⲛⲏ

5 ⲁⲩⲱ ⲛⲧϩⲉ ⲛⲟⲩϩⲣϣⲓⲣⲉ ⲉϥⲟⲩⲏϩ ⲙⲛⲟⲩⲡⲁⲣⲑⲉⲛⲟⲥ ⲧⲁⲓ ⲧⲉ ⲧϩⲉ ⲉⲧⲉⲣⲉⲛⲟⲩϣⲏⲣⲉ ⲛⲁⲟⲩⲱϩ ⲛⲙⲙⲉ ⲁⲩⲱ ⲛⲧϩⲉ ⲉϣⲁⲣⲉⲟⲩⲡⲁⲧϣⲉⲗⲉⲉⲧ ⲉⲩⲫⲣⲁⲛⲉ ⲉϫⲛⲧⲉϥϣⲉⲗⲉⲉⲧ ⲧⲁⲓ ⲧⲉ ⲧϩⲉ ⲉⲧⲉⲣⲉⲡϫⲟⲉⲓⲥ ⲛⲁⲉⲩⲫⲣⲁⲛⲉ ⲉϩⲣⲁⲓ ⲉϫⲱ

6 ⲁⲩⲱ ⲁⲓⲥⲙⲓⲛⲉ ⲛⲉ ⲛϩⲉⲛⲣⲉϥϩⲁⲣⲉϩ ⲉϩⲣⲁⲓ ⲉϫⲛⲛⲟⲩⲥⲟⲃⲧ ⲧϩⲓⲉⲣⲟⲩⲥⲁⲗⲏⲙ ⲙⲡⲉϩⲟⲟⲩ ⲧⲏⲣϥ ⲙⲛⲧⲉⲩϣⲏ ⲧⲏⲣⲥ ⲛⲁⲓ ⲉⲧⲉⲛⲥⲉⲛⲁⲕⲁⲣⲱⲟⲩ ⲁⲛ ⲛⲟⲩⲟⲉⲓϣ ⲛⲓⲙ ⲉⲩⲉⲓⲣⲉ ⲙⲡⲙⲉⲉⲩⲉ ⲙⲡϫⲟⲉⲓⲥ

7 ⲙⲛⲡⲉⲧⲉⲓⲛⲉ ⲅⲁⲣ ⲙⲙⲱⲧⲛ ⲉⲣϣⲁⲛⲧϩⲓⲉⲣⲟⲩⲥⲁⲗⲏⲙ ⲥⲟⲟⲩⲧⲛ ⲛⲥⲉⲓⲣⲉ ⲛⲟⲩϣⲟⲩϣⲟⲩ ϩⲓϫⲙⲡⲕⲁϩ

8 ⲁⲡϫⲟⲉⲓⲥ ⲱⲣⲕ ⲙⲡⲉϥⲉⲟⲟⲩ ⲁⲩⲱ ⲛⲧϭⲟⲙ ⲙⲡⲉϥϭⲃⲟⲓ ϫⲉⲉⲛⲉϯⲛⲁϯ ϫⲓⲛⲧⲉⲛⲟⲩ ⲙⲡⲟⲩⲥⲟⲩⲟ ⲙⲛⲛⲟⲩϩⲣⲏⲩⲉ ⲛⲛⲟⲩϫⲁϫⲉ ⲁⲩⲱ ϫⲉⲉⲛⲉⲟⲩⲛϣⲙⲙⲟ ϫⲓⲛⲧⲉⲛⲟⲩ ⲛⲁⲥⲉⲡⲟⲩⲏⲣⲡ ⲉⲛⲧⲁϣⲡϩⲓⲥⲉ ⲉⲣⲟϥ

9 ⲁⲗⲗⲁ ⲛⲉⲧⲥⲱⲟⲩϩ ⲙⲙⲟⲟⲩ ⲉϩⲟⲩⲛ ⲛⲉⲧⲛⲁⲟⲩⲟⲙⲟⲩ ⲁⲩⲱ ⲛⲥⲉⲥⲙⲟⲩ ⲉⲡϫⲟⲉⲓⲥ ⲁⲩⲱ ⲛⲉⲧⲥⲱⲟⲩϩ ⲙⲙⲟⲟⲩ ⲉϩⲟⲩⲛ ⲛⲉⲧⲛⲁⲥⲟⲟⲩ ⲛⲥⲉⲟⲩⲟⲙⲟⲩ ϩⲣⲁⲓ ϩⲛⲛⲁⲁⲩⲗⲏ ⲉⲧⲟⲩⲁⲁⲃ

10 ⲃⲱⲕ ⲉϩⲟⲩⲛ ϩⲓⲧⲛⲛⲁⲡⲩⲗⲏ ⲛⲧⲉⲧⲛⲥⲙⲛϩⲓⲏ ⲙⲡⲁⲗⲁⲟⲥ ⲛⲧⲉⲧⲛⲛⲟⲩϫⲉ ⲉⲃⲟⲗ ⲛⲛⲱⲛⲉ ⲉⲧϩⲓⲧⲉϩⲓⲏ ϥⲓ ⲛⲟⲩⲙⲁⲉⲓⲛ ⲉⲛϩⲉⲑⲛⲟⲥ

11 ⲉⲓⲥ ⲡϫⲟⲉⲓⲥ ⲅⲁⲣ ⲁϥⲧⲣⲉϥⲥⲱⲧⲙ ϫⲓⲛⲁⲣⲏϫϥ ⲙⲡⲕⲁϩ· ⲁϫⲓⲥ ⲛⲧϣⲉⲉⲣⲉ ⲛⲥⲓⲱⲛ ϫⲉⲉⲓⲥⲡⲟⲩⲥⲱⲧⲏⲣ ⲛⲏⲩ ⲛⲉ ⲉⲣⲉⲡⲉϥⲃⲉⲕⲉ ⲛⲧⲟⲟⲧϥ ⲁⲩⲱ ⲉⲣⲉⲡⲉϥϩⲱⲃ ϩⲁⲧⲉϥϩⲏ

12 ⲁⲩⲱ ϥⲛⲁⲙⲟⲩⲧⲉ ⲉⲣⲟϥ ⲛⲟⲩⲗⲁⲟⲥ ⲉϥⲟⲩⲁⲁⲃ ⲉⲁⲩⲥⲟⲧϥ ϩⲓⲧⲙⲡϫⲟⲉⲓⲥ ⲛⲧⲟ ⲇⲉ ⲥⲉⲛⲁⲙⲟⲩⲧⲉ ⲉⲣⲟϫⲉⲧⲡⲟⲗⲓⲥ ⲉⲧⲟⲩϣⲓⲛⲉ ⲛⲥⲱⲥ ⲁⲩⲱ ⲧⲉⲛⲧⲁⲩⲕⲁⲁⲥ ⲁⲛ