Isaiah 43 — Coptic (Sahidic)

1 ⲧⲉⲛⲟⲩ ⲧⲁⲓ ⲧⲉ ⲧϩⲉ ⲉⲧⲉⲣⲉⲡϫⲟⲉⲓⲥ ⲡⲛⲟⲩⲧⲉ ϫⲱ ⲙⲙⲟⲥ ⲡⲉⲛⲧⲁϥⲧⲁⲙⲓⲟⲕ ⲓⲁⲕⲱⲃ ⲡⲉⲛⲧⲁϥⲡⲗⲁⲥⲥⲉ ⲙⲙⲟⲕ ⲡⲓⲥⲣⲁⲏⲗ ⲙⲡⲣⲣϩⲟⲧⲉ ϫⲉⲁⲓⲥⲟⲧⲡⲕ ⲁⲓⲙⲟⲩⲧⲉ ⲉⲣⲟⲕ ⲙⲡⲁⲣⲁⲛ ⲛⲧⲕ ⲡⲱⲓ

2 ⲕⲁⲛ ⲉⲕϣⲁⲛϫⲓⲟⲟⲣ ⲛⲟⲩⲙⲟⲟⲩ ϯⲛⲙⲙⲁⲕ ⲁⲩⲱ ⲛⲉⲓⲉⲣⲱⲟⲩ ⲛⲁⲟⲙⲥⲕ ⲁⲛ ⲁⲩⲱ ⲉⲕϣⲁⲛⲉⲓ ⲉⲃⲟⲗ ϩⲓⲧⲛⲟⲩⲥⲟⲧⲉ ⲛⲛⲉⲕϫⲟⲩϥ ⲛⲛⲉⲟⲩϣⲁϩⲣⲟⲕϩⲕ

3 ϫⲉⲁⲛⲟⲕ ⲡⲉ ⲡϫⲟⲉⲓⲥ ⲡⲉⲕⲛⲟⲩⲧⲉ ⲡⲉⲧⲟⲩⲁⲁⲃ ⲙⲡⲓⲥⲣⲁⲏⲗ ⲡⲉⲧⲛⲟⲩϩⲙ ⲙⲙⲟⲕ ⲉⲓⲥ ϩⲏⲏⲧⲉ ⲁⲓⲣⲕⲏⲙⲉ ⲛⲁⲕ ⲛϣⲃⲃⲓⲱ ⲁⲩⲱ ⲛⲉϭⲟⲟϣ ⲙⲛⲥⲟⲩⲁⲛ ⲉⲡⲉⲕⲙⲁ

4 ϫⲓⲛⲧⲁⲕϣⲱⲡⲉ ⲉⲕⲧⲁⲓⲏⲩ ⲙⲡⲁⲙⲧⲟ ⲉⲃⲟⲗ ⲁⲕϫⲓⲉⲟⲟⲩ ⲁⲩⲱ ⲁⲛⲟⲕ ⲁⲓⲙⲉⲣⲓⲧⲕ ϯⲛⲁϯ ⲛϩⲉⲛⲣⲱⲙⲉ ⲉⲛⲁϣⲱⲟⲩ ⲉⲡⲉⲕⲙⲁ ⲁⲩⲱ ϩⲉⲛⲁⲣⲭⲱⲛ ϩⲁⲧⲉⲕⲁⲡⲉ

5 ⲙⲡⲣⲣϩⲟⲧⲉ ϫⲉϯϣⲟⲟⲡ ⲛⲙⲙⲁⲕ ϯⲛⲁⲉⲓⲛⲉ ⲙⲡⲉⲕⲥⲡⲉⲣⲙⲁ ϫⲓⲛⲙⲙⲁ ⲛϣⲁ ⲁⲩⲱ ϯⲛⲁⲥⲟⲟⲩϩⲕ ⲉϩⲟⲩⲛ ϫⲓⲛⲙⲙⲁ ⲛϩⲱⲧⲡ

6 ϯⲛⲁϫⲟⲟⲥ ⲙⲡⲉⲙϩⲡ ϫⲉⲁⲛⲓⲥⲟⲩ ⲁⲩⲱ ⲡⲉⲙⲛⲧ ϫⲉⲙⲡⲣⲁⲙⲁϩⲧⲉ ⲙⲙⲟⲟⲩ ⲁⲛⲓⲛⲉ ⲛⲛⲁϣⲏⲣⲉ ⲉⲃⲟⲗ ϩⲙⲡⲕⲁϩ ⲉⲧⲟⲩⲏⲩ ⲁⲩⲱ ⲛⲁϣⲉⲉⲣⲉ ϫⲓⲛⲁⲣⲏϫϥ ⲙⲡⲕⲁϩ

7 ⲟⲩⲟⲛ ⲛⲓⲙ ⲛⲧⲁⲩⲙⲟⲩⲧⲉ ⲉϫⲱⲟⲩ ⲙⲡⲁⲣⲁⲛ ⲛⲧⲁⲓⲧⲥⲁⲙⲓⲟϥ ⲅⲁⲣ ϩⲙⲡⲁⲉⲟⲟⲩ ⲁⲩⲱ ⲁⲓⲡⲗⲁⲥⲥⲉ ⲙⲙⲟϥ ⲁⲓⲧⲁⲙⲓⲟϥ

8 ⲁⲓⲉⲓⲛⲉ ⲉⲃⲟⲗ ⲛⲟⲩⲗⲁⲟⲥ ⲛⲃⲗⲗⲉ ⲁⲩⲱ ⲛⲉⲧⲉⲟⲩⲛⲃⲁⲗ ⲙⲙⲟⲟⲩ ⲟⲛ ⲃⲗⲗⲉ ⲁⲩⲱ ⲛⲉⲩⲙⲁⲁϫⲉ ⲧⲏⲙ

9 ⲁⲛϩⲉⲑⲛⲟⲥ ⲧⲏⲣⲟⲩ ⲥⲱⲟⲩϩ ⲉϩⲟⲩⲛ ϩⲓⲟⲩⲥⲟⲡ ⲁⲩⲱ ⲛⲁⲣⲭⲱⲛ ⲉⲧⲛϩⲏⲧⲟⲩ ⲛⲁⲥⲱⲟⲩϩ ⲛⲓⲙ ⲡⲉⲧⲛⲁϫⲱ ⲛⲛⲁⲓ ⲏ ⲛⲓⲙ ⲡⲉⲧⲛⲁϫⲱ ⲛⲏⲧⲛ ⲛⲛϫⲓⲛ ϣⲟⲣⲡ ⲙⲁⲣⲟⲩⲉⲓⲛⲉ ⲛⲉⲩⲙⲛⲧⲣⲉ ⲛⲥⲉⲧⲙⲁⲓⲟ ⲁⲩⲱ ⲙⲁⲣⲉⲟⲩϫⲓⲙⲉ

10 ϣⲱⲡⲉ ⲛⲁⲓ ⲙⲙⲛⲧⲣⲉ ⲁⲩⲱ ⲁⲛⲟⲕ ⲡⲉ ⲡⲙⲛⲧⲣⲉ ⲡⲉϫⲉⲡⲛⲟⲩⲧⲉ ⲁⲩⲱ ⲡⲁϣⲏⲣⲉ ⲡⲁⲓ ⲛⲧⲁⲓⲥⲟⲧⲡϥ ϫⲉⲕⲁⲥ ⲉⲧⲉⲧⲛⲉⲥⲟⲟⲩⲛ ⲛⲧⲉⲧⲛⲉⲓⲙⲉ ⲛⲧⲉⲧⲛⲡⲓⲥⲧⲉⲩⲉ ϫⲉⲁⲛⲟⲕ ⲡⲉ ⲡⲛⲟⲩⲧⲉ ⲙⲡⲉⲕⲉⲛⲟⲩⲧⲉ ϣⲱⲡⲉ ϩⲁⲧⲁϩⲏ ⲁⲩⲱ ⲙⲛϭⲉⲙ ⲛⲥⲱⲓ

11 ⲁⲛⲟⲕ ⲡⲉ ⲡϫⲟⲉⲓⲥ ⲡⲛⲟⲩⲧⲉ ⲁⲩⲱ ⲙⲛⲕⲉⲟⲩⲁ ⲛⲃⲗⲗⲁⲓ ⲉϥⲧⲁⲛϩⲟ

12 ⲁⲓⲧⲁⲙⲱⲧⲛ ⲁⲩⲱ ⲁⲓⲛⲁϩⲙⲧⲏⲩⲧⲛ ⲁⲓϫⲡⲓⲱⲧⲛ ⲁⲩⲱ ⲙⲛⲙⲙⲛⲧϣⲙⲙⲟ ⲛϩⲏⲧⲧⲏⲩⲧⲛ ⲛⲧⲱⲧⲛ ⲛⲉ ⲛⲁⲙⲛⲧⲣⲉ ⲁⲩⲱ ⲁⲛⲟⲕ ⲡⲉ ⲡⲙⲛⲧⲣⲉ ⲡⲉϫⲉⲡϫⲟⲉⲓⲥ ⲡⲛⲟⲩⲧⲉ

13 ⲉⲧⲓ ⲛϫⲓⲛ ⲛϣⲟⲣⲡ ⲁⲩⲱ ⲙⲛⲡⲉⲧⲛⲁⲣⲃⲟⲗ ⲉⲛⲁϭⲓϫ ϯⲛⲁⲉⲓⲣⲉ ⲛⲧⲉⲛⲓⲙ ⲧⲥⲧⲟⲓ ⲉⲃⲟⲗ

14 ⲧⲁⲓ ⲧⲉ ⲧϩⲉ ⲉⲧⲉⲣⲉⲡϫⲟⲉⲓⲥ ⲡⲛⲟⲩⲧⲉ ϫⲱ ⲙⲙⲟⲥ ⲡⲉⲧⲥⲱⲧⲉ ⲙⲙⲱⲧⲛ ⲡⲉⲧⲟⲩⲁⲁⲃ ⲙⲡⲓⲥⲣⲁⲏⲗ ⲉⲧⲃⲉⲧⲏⲩⲧⲛ ϯⲛⲁϫⲟⲟⲩ ⲉⲧⲃⲁⲃⲩⲗⲱⲛ ⲧⲁⲧⲟⲩⲛⲉⲥⲛⲉⲧⲡⲏⲧ ⲧⲏⲣⲟⲩ ⲁⲩⲱ ⲥⲉⲛⲁⲙⲟⲩⲣ ⲛⲛⲉⲭⲁⲗⲇⲁⲓⲟⲥ ⲛϩⲉⲛϫⲏⲩ

15 ⲁⲛⲟⲕ ⲡⲉ ⲡϫⲟⲉⲓⲥ ⲡⲉⲧⲛⲛⲟⲩⲧⲉ ⲉⲧⲟⲩⲁⲁⲃ ⲡⲉⲛⲧⲁϥⲉⲓⲣⲉ ⲙⲡⲓⲥⲣⲁⲏⲗ ⲛⲣⲣⲟ ⲉϫⲱⲧⲛ

16 ⲧⲁⲓ ⲧⲉ ⲧϩⲉ ⲉⲧⲉⲣⲉⲡϫⲟⲉⲓⲥ ⲡⲛⲟⲩⲧⲉ ϫⲱ ⲙⲙⲟⲥ ⲡⲉⲛⲧⲁϥϯ ⲛⲁⲕ ⲛⲟⲩϩⲓⲏ ϩⲛⲧϩⲁⲗⲁⲥⲥⲁ ⲁⲩⲱ ⲟⲩϩⲓ ⲙⲙⲟⲟϣⲉ ϩⲛⲟⲩⲙⲟⲟⲩ ⲉϥⲟϣ

17 ⲡⲉⲛⲧⲁϥⲉⲓⲛⲉ ⲉⲃⲟⲗ ⲛϩⲉⲛϩⲁⲣⲙⲁ ⲙⲛϩⲉⲛϩⲧⲱⲱⲣ ⲙⲛⲟⲩⲙⲏⲏϣⲉ ⲉⲛⲁϣⲱϥ ⲁⲗⲗⲁ ⲁⲩⲛⲕⲟⲧⲕ ⲁⲩⲱ ⲛⲥⲉⲛⲁⲧⲱⲟⲩⲛ ⲁⲛ ⲁⲩⲱϣⲙ ⲛⲧϩⲉ ⲛⲟⲩⲥⲟⲗ ⲉⲁϥⲱϣⲙ

18 ⲙⲡⲣⲣⲡⲙⲉⲉⲩⲉ ⲛⲛⲁⲣⲭⲁⲓⲟⲛ ⲁⲩⲱ ⲙⲡⲣⲱⲡ ⲛⲛⲉϩⲟⲩⲁⲧⲉ

19 ⲉⲓⲥ ϩⲏⲏⲧⲉ ϯⲛⲁⲣϩⲉⲛⲃⲣⲣⲉ ⲛⲁⲓ ⲧⲉⲛⲟⲩ ⲉⲧⲛⲁⲟⲩⲱⲛϩ ⲉⲃⲟⲗ ⲁⲩⲱ ⲛⲧⲉⲧⲛⲥⲟⲩⲱⲛⲟⲩ ϯⲛⲁⲧⲁⲙⲓⲟ ⲛⲟⲩϩⲓⲏ ϩⲓⲡϫⲁⲓⲉ ⲁⲩⲱ ϩⲉⲛⲓⲉⲣⲱⲟⲩ ϩⲙⲡⲙⲁ ⲉⲧⲉⲙⲛⲙⲟⲟⲩ ⲛϩⲏⲧϥ

20 ⲛⲉⲑⲏⲣⲓⲟⲛ ⲛⲧⲥⲱϣⲉ ⲛⲁⲥⲙⲟⲩ ⲉⲣⲟⲓ ⲛⲥⲓⲣⲏⲛⲟⲥ ⲙⲛⲛϣⲏⲣⲉ ⲛⲛⲉⲥⲧⲣⲟⲩⲑⲟⲥ ϫⲉⲁⲓϯ ⲛⲟⲩⲙⲟⲟⲩ ϩⲓⲡϫⲁⲓⲉ ⲁⲩⲱ ϩⲉⲛⲓⲉⲣⲱⲟⲩ ϩⲙⲡⲙⲁ ⲉⲧⲉⲙⲛⲙⲟⲟⲩ ⲛϩⲏⲧϥ ⲉⲧⲥⲟ ⲙⲡⲁⲅⲉⲛⲟⲥ

21 ⲡⲁⲗⲁⲟⲥ ⲛⲥⲱⲧⲡ ⲛⲧⲁⲓϫⲡⲟϥ ⲉϫⲱ ⲛⲛⲁⲁⲣⲉⲧⲏ

22 ⲛⲧⲁⲓⲙⲟⲩⲧⲉ ⲉⲣⲟⲕ ⲁⲛ ⲧⲉⲛⲟⲩ ⲓⲁⲕⲱⲃ ⲁⲩⲱ ⲙⲡⲉⲓϩⲉϩⲁⲥⲧⲕ ⲡⲓⲥⲣⲁⲏⲗ

23 ⲡⲧⲁⲗⲟ ⲛⲛⲉⲥⲟⲟⲩ ⲙⲡⲉⲕϣⲟⲩⲥⲟⲟⲩϣⲉ ⲛⲛⲉⲩϣⲟⲟⲡ ⲛⲁⲓ ⲁⲛ ⲁⲩⲱ ⲛⲧⲁⲕϯⲉⲟⲟⲩ ⲛⲁⲓ ⲁⲛ ϩⲛⲛⲉⲕⲑⲩⲥⲓⲁ ⲟⲩⲇⲉ ⲛⲧⲁⲕⲣϩⲙϩⲁⲗ ⲛⲁⲓ ⲁⲛ ϩⲛⲛⲉⲕⲑⲩⲥⲓⲁ ⲟⲩⲇⲉ ⲙⲡⲓϩⲁⲥⲧⲕ ϩⲛⲟⲩⲗⲓⲃⲁⲛⲟⲥ

24 ⲟⲩⲇⲉ ⲙⲡⲉⲕϣⲱⲡ ⲛⲟⲩϣⲟⲩϩⲏⲛⲉ ⲛⲁⲓ ϩⲁϩⲟⲙⲛⲧ ⲟⲩⲇⲉ ⲙⲡⲓⲉⲡⲓⲑⲩⲙⲉⲓ ⲉⲡⲱⲧ ⲛⲛⲉⲕⲑⲩⲥⲓⲁ ⲁⲗⲗⲁ ϩⲣⲁⲓ ϩⲛⲛⲉⲕⲛⲟⲃⲉ ⲙⲛⲛⲉⲕϫⲓⲛϭⲟⲛⲥ ⲁⲕⲣ ϩⲓϫⲱⲓ

25 ⲁⲛⲟⲕ ⲡⲉ ⲁⲛⲟⲕ ⲡⲉ ⲉⲧⲃⲱⲧⲉ ⲉⲃⲟⲗ ⲛⲛⲉⲕⲛⲟⲃⲉ ⲁⲩⲱ ⲛⲛⲁⲣⲡⲉⲩⲙⲉⲉⲩⲉ

26 ⲛⲧⲟⲕ ⲇⲉ ⲁⲣⲓⲡⲙⲉⲉⲩⲉ ⲛⲧⲛϫⲓϩⲁⲡ ϫⲱ ⲛⲛⲉⲕⲁⲛⲟⲙⲓⲁ ⲛϣⲟⲣⲡ ⲧⲁⲣⲉⲕⲧⲙⲁⲓⲟ

27 ⲛⲉⲧⲛⲉⲓⲟⲧⲉ ⲉⲧϩⲁⲧⲉⲧⲛϩⲉ ⲙⲛⲛⲉⲧⲛⲁⲣⲭⲱⲛ ⲁⲩⲁⲛⲟⲙⲉⲓ ⲉⲣⲟⲓ

28 ⲁⲩⲱ ⲁⲛⲉⲧⲛⲁⲣⲭⲱⲛ ⲥⲱϣϥ ⲛⲛⲁⲡⲉⲧⲟⲩⲁⲁⲃ ⲁⲩⲱ ⲁⲓϯ ⲛⲓⲁⲕⲱⲃ ⲉⲧⲁⲕⲟϥ ⲁⲩⲱ ⲡⲓⲥⲣⲁⲏⲗ ⲉⲩⲛⲟϭⲛⲉϭ