Read Isaiah 31 side by side with translations · The Final Bible
1 ⲟⲩⲟⲓ ⲛⲛⲉⲧⲃⲏⲕ ⲉⲡⲉⲥⲏⲧ ⲉⲕⲏⲙⲉ ⲛⲥⲁⲃⲟⲏⲑⲓⲁ ⲛⲉⲧⲕⲱ ⲛϩⲧⲏⲩ ⲉϩⲉⲛϩⲧⲱⲱⲣ ⲙⲛϩⲉⲛϩⲁⲣⲙⲁ ⲛⲁϣⲱⲟⲩ ⲅⲁⲣ ⲁⲩⲱ ⲉϫⲛⲛⲉϩⲧⲱⲱⲣ ⲉⲧⲟϣ ⲉⲙⲁⲧⲉ ⲁⲩⲱ ⲛⲉⲩⲛⲁϩⲧⲉ ⲁⲛ ⲡⲉ ⲉⲡⲉⲧⲟⲩⲁⲁⲃ ⲙⲡⲓⲥⲣⲁⲏⲗ ⲁⲩⲱ ⲙⲡⲟⲩϣⲓⲛⲉ ⲛⲥⲁⲡⲛⲟⲩⲧⲉ
2 ⲁⲩⲱ ⲛⲧⲟϥ ⲟⲩⲥⲟⲫⲟⲥ ⲡⲉ ⲁϥⲉⲓⲛⲉ ⲉϫⲱⲟⲩ ⲛϩⲉⲛⲡⲉⲧϩⲟⲟⲩ ⲁⲩⲱ ⲛⲛⲉⲩⲁⲑⲁⲓⲧⲉⲓ ⲙⲡⲉϥϣⲁϫⲉ ⲁⲩⲱ ϥⲛⲁⲧⲱⲟⲩⲛ ⲉϫⲛⲛⲏⲓ ⲛⲛⲣⲱⲙⲉ ⲙⲡⲟⲛⲏⲣⲟⲥ ⲁⲩⲱ ⲉϫⲛⲧⲉⲩϩⲉⲗⲡⲓⲥ ⲉⲧϣⲟⲩⲉⲓⲧ
3 ⲟⲩⲣⲱⲙⲉ ⲛⲣⲙⲛⲕⲏⲙⲉ ⲛⲟⲩⲛⲟⲩⲧⲉ ⲁⲛ ϩⲉⲛⲥⲁⲣⲝ ⲛϩⲧⲟ ⲁⲩⲱ ϩⲉⲛⲃⲟⲏⲑⲓⲁ ⲁⲛ ⲛⲉ ⲡϫⲟⲉⲓⲥ ⲇⲉ ⲛⲁⲉⲓⲛⲉ ⲛⲧⲉϥϭⲓϫ ⲉϩⲣⲁⲓ ⲉϫⲱⲟⲩ ⲁⲩⲱ ⲥⲉⲛⲁϩⲓⲥⲉ ⲛϭⲓⲛⲉⲧⲃⲟⲏⲑⲉⲓ ⲉⲣⲟⲟⲩ ⲁⲩⲱ ⲥⲉⲛⲁⲧⲁⲕⲟ ⲧⲏⲣⲟⲩ ϩⲓⲟⲩⲥⲟⲡ
4 ϫⲉⲧⲁⲓ ⲧⲉ ⲧϩⲉ ⲛⲧⲁⲡϫⲟⲉⲓⲥ ϫⲟⲟⲥ ⲛⲁⲓ ϫⲉⲛⲧϩⲉ ⲉϣⲁⲣⲉⲡⲙⲟⲩⲓ ⲱϣ ⲉⲃⲟⲗ ⲏ ⲡⲙⲁⲥ ⲙⲙⲟⲩⲓ ⲉϫⲛⲧⲡⲁϩⲥ ⲉⲧϥⲛⲁⲧⲁϩⲟⲥ ⲁⲩⲱ ⲛⲉϥⲱϣ ⲉⲃⲟⲗ ⲉϫⲱⲥ ϣⲁⲛⲧⲉⲛⲧⲟⲟⲩ ⲙⲟⲩϩ ⲉⲃⲟⲗ ϩⲛⲧⲉⲥⲙⲏ ⲙⲡⲉϥϭⲱⲛⲧ ⲁⲩⲱ ⲛⲥⲉϣⲧⲟⲣⲧⲣ ⲉⲧⲃⲉⲡⲁϣⲁⲓ ⲙⲡⲉϥϭⲱⲛⲧ ⲧⲁⲓ ⲧⲉ ⲧϩⲉ ⲉⲧⲉⲣⲉⲡϫⲟⲉⲓⲥ ⲥⲁⲃⲁⲱⲑ ⲛⲏⲩ ⲉⲡⲉⲥⲏⲧ ⲉⲥⲱⲣ ⲉⲃⲟⲗ ⲉϫⲙⲡⲧⲟⲟⲩ ⲛⲥⲓⲱⲛ ⲉϫⲛⲛⲉⲥⲧⲟⲟⲩ
5 ⲛⲧϩⲉ ⲛϩⲉⲛϩⲁⲗⲏⲧ ⲉⲩϩⲏⲗ ⲧⲁⲓ ⲧⲉ ⲧϩⲉ ⲡϫⲟⲉⲓⲥ ⲛⲁⲣⲛⲁϣⲧⲉ ⲉⲧϩⲓⲉⲣⲟⲩⲥⲁⲗⲏⲙ ⲁⲩⲱ ϥⲛⲁⲛⲟⲩϩⲙ ⲛϥⲧⲟⲩϫⲟ ⲁⲩⲱ ⲛϥⲧⲁⲛϩⲟ
6 ⲕⲉⲧⲧⲏⲩⲧⲛ ⲛⲉⲧⲙⲉⲉⲩⲉ ⲉⲡϣⲟϫⲛⲉ ⲉⲧϩⲏⲡ ⲁⲩⲱ ⲛⲁⲛⲟⲙⲟⲛ
7 ϫⲉϩⲙⲡⲉϩⲟⲟⲩ ⲉⲧⲙⲙⲁⲩ ⲛⲣⲱⲙⲉ ⲛⲁϥⲓ ⲉⲃⲟⲗ ⲙⲙⲟⲟⲩ ⲛⲛⲉⲩⲙⲟⲩⲛⲅ ⲛϭⲓϫ ⲛϩⲁⲧ ⲙⲛⲛⲛⲟⲩⲃ ⲛⲉⲛⲧⲁⲛⲉⲩⲧⲏⲏⲃⲉ ⲧⲁⲙⲓⲟⲟⲩ
8 ⲁⲩⲱ ⲁⲥⲥⲟⲩⲣ ⲛⲁϩⲉ ϩⲛⲟⲩⲥⲏⲃⲉ ⲛⲣⲱⲙⲉ ⲁⲛ ⲟⲩⲇⲉ ⲛⲟⲩⲥⲏⲃⲉ ⲛⲣⲱⲙⲉ ⲁⲛ ⲧⲉⲧⲛⲛⲁⲟⲩⲟⲙϥ ⲁⲩⲱ ϥⲛⲁⲡⲱⲧ ⲉⲃⲟⲗ ⲁⲛ ϩⲏⲧⲥ ⲛⲟⲩⲥⲏⲃⲉ ⲛϩⲣϣⲓⲣⲉ ⲥⲉⲛⲁϣⲱⲡⲉ ⲉⲩϭⲟⲧⲡ
9 ⲥⲉⲛⲁϣⲟϫⲡⲟⲩ ⲅⲁⲣ ϩⲛⲟⲩⲡⲉⲧⲣⲁ ⲛⲧϩⲉ ⲛⲟⲩϣⲗϩ ⲁⲩⲱ ⲛⲥⲉϭⲱⲧⲡ ⲡⲉⲧⲡⲏⲧ ⲇⲉ ⲥⲉⲛⲁϭⲟⲡϥ ⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉⲛⲁⲓⲁⲧϥ ⲙⲡⲉⲧⲉⲟⲩⲛⲧϥⲟⲩⲥⲡⲉⲣⲙⲁ ϩⲛⲥⲓⲱⲛ ⲁⲩⲱ ϩⲉⲛⲣⲙⲛⲏⲓ ϩⲛⲧϩⲓⲉⲣⲟⲩⲥⲁⲗⲏⲙ
Isaiah 30 · Isaiah 32 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)