Read Isaiah 26 side by side with translations · The Final Bible
1 ϩⲙⲡⲉϩⲟⲟⲩ ⲉⲧⲙⲙⲁⲩ ⲥⲉⲛⲁϫⲱ ⲙⲡⲓϫⲱ ⲉϫⲙⲡⲕⲁϩ ⲛⲧⲓⲟⲩⲇⲁⲓⲁ ⲉⲩϫⲱ ⲙⲙⲟⲥ ϫⲉⲉⲓⲥⲧⲡⲟⲗⲓⲥ ⲉⲧϫⲟⲥⲉ ⲙⲛⲡⲉⲧⲛⲟⲩϫⲁⲓ ϥⲛⲁⲕⲱ ⲛⲟⲩⲥⲟⲃⲧ ⲙⲛⲡⲉⲧⲕⲧⲏⲩ ⲉⲡⲥⲟⲃⲧ
2 ⲁⲟⲩⲱⲛ ⲛⲙⲡⲩⲗⲏ ⲙⲁⲣⲉⲡⲗⲁⲟⲥ ⲃⲱⲕ ⲉϩⲟⲩⲛ ⲉⲧϩⲁⲣⲉϩ ⲉⲧⲇⲓⲕⲁⲓⲟⲥⲩⲛⲏ ⲁⲩⲱ ⲉⲧϩⲁⲣⲉϩ ⲉⲧⲙⲉ
3 ⲉⲧϭⲟⲗϫ ϩⲛⲧⲙⲉ ⲁⲩⲱ ⲉⲧϩⲁⲣⲉϩ ⲉϯⲣⲏⲛⲏ
4 ϫⲉⲁⲩϩⲉⲗⲡⲓⲍⲉ ⲉⲣⲟⲕ ⲡϫⲟⲉⲓⲥ ϣⲁⲉⲛⲉϩ ⲡⲛⲟⲩⲧⲉ ⲡⲛⲟϭ ϣⲁⲉⲛⲉϩ
5 ⲁⲕⲉⲓⲛⲉ ⲉⲡⲉⲥⲏⲧ ⲛⲛⲉⲧⲟⲩⲏϩ ϩⲛⲛⲉϫⲟⲥⲉ ⲁⲕⲑⲃⲃⲓⲟⲟⲩ ⲕⲛⲁⲧⲁⲩⲟ ⲉⲡⲉⲥⲏⲧ ⲛⲙⲡⲟⲗⲓⲥ ⲉⲧϫⲟⲥⲉ ⲁⲩⲱ ⲕⲛⲁⲛⲧⲟⲩ ⲉⲡⲉⲥⲏⲧ ϣⲁⲡⲕⲁϩ
6 ⲁⲩⲱ ⲛⲟⲩⲉⲣⲏⲧⲉ ⲛⲛⲣⲙⲣⲁϣ ⲛⲁϩⲟⲙⲟⲩ ⲙⲛⲛⲁⲛⲉⲧⲑⲃⲃⲓⲏⲩ
7 ⲧⲉϩⲓⲏ ⲛⲛⲣⲙⲛⲛⲟⲩⲧⲉ ⲁⲥϣⲱⲡⲉ ⲥⲉⲥⲟⲩⲧⲱⲛ ⲁⲩⲱ ⲉⲥⲥⲃⲧⲱⲧ ⲛϭⲓⲧⲉϩⲓⲏ ⲛⲛⲣⲙⲛⲛⲟⲩⲧⲉ
8 ⲧⲉϩⲓⲏ ⲅⲁⲣ ⲙⲡϫⲟⲉⲓⲥ ⲡⲉ ⲡϩⲁⲡ ⲁⲛϩⲉⲗⲡⲓⲍⲉ ⲉⲡⲉϥⲣⲁⲛ ⲁⲩⲱ ⲉⲡⲣⲡⲙⲉⲉⲩⲉ
9 ⲉⲧⲉⲣⲉⲧⲉⲛⲯⲩⲭⲏ ⲟⲩⲁϣϥ ⲡⲁⲡⲛⲉⲩⲙⲁ ⲛⲁϣⲟⲣⲡϥ ϫⲓⲛⲧⲉⲩϣⲏ ϥⲛⲁϣⲟⲣⲡϥ ⲉⲣⲟⲕ ⲡⲛⲟⲩⲧⲉ ϫⲉϩⲉⲛⲟⲩⲟⲉⲓⲛ ⲛⲉ ⲛⲉⲕⲡⲣⲟⲥⲧⲁⲅⲙⲁ ϩⲓϫⲙⲡⲕⲁϩ
10 ⲁⲡⲁⲥⲉⲃⲏⲥ ⲅⲁⲣ ⲱϫⲛ ⲙⲛⲟⲩⲟⲛ ⲛⲓⲙ ⲉⲧⲛϥϫⲓⲥⲃⲱ ⲁⲛ ⲉⲣⲧⲇⲓⲕⲁⲓⲟⲥⲩⲛⲏ ϩⲓϫⲙⲡⲕⲁϩ ⲉⲣⲧⲙⲉ ⲙⲁⲣⲟⲩϥⲓ ⲙⲡⲁⲥⲉⲃⲏⲥ ϫⲉⲛⲛⲉϥⲛⲁⲩ ⲉⲡⲉⲟⲟⲩ ⲙⲡⲛⲟⲩⲧⲉ
11 ⲡϫⲟⲉⲓⲥ ⲡⲛⲟⲩⲧⲉ ⲡⲉⲕϭⲃⲟⲓ ϫⲟⲥⲉ ⲁⲩⲱ ⲛⲉⲩⲥⲟⲟⲩⲛ ⲁⲛ ⲡⲉ ⲉⲁⲩⲉⲓⲙⲉ ⲇⲉ ⲥⲉⲛⲁϫⲓϣⲓⲡⲉ ⲟⲩⲛⲟⲩⲕⲱϩ ⲛⲁⲧⲁϩⲉⲡⲗⲁⲟⲥ ⲛⲁⲧⲥⲃⲱ ⲧⲉⲛⲟⲩ ⲡⲕⲱϩⲧ ⲛⲁⲟⲩⲱⲙ ⲛⲛϫⲁϫⲉ
12 ⲡϫⲟⲉⲓⲥ ⲡⲛⲟⲩⲧⲉ ⲙⲁ ⲛⲁⲛ ⲛⲟⲩⲉⲓⲣⲏⲛⲏ ⲁⲕⲧⲟⲟⲃⲟⲩ ⲛⲁⲛ ⲕⲁⲧⲁⲛⲉⲛϩⲃⲏⲩⲉ
13 ⲡϫⲟⲉⲓⲥ ⲡⲉⲛⲛⲟⲩⲧⲉ ⲕⲁⲁⲛ ⲛⲁⲕ ⲛⲧⲛⲥⲟⲟⲩⲛ ⲁⲛ ⲛⲕⲉⲟⲩⲁ ⲛⲃⲗⲗⲁⲕ ⲧⲛⲧⲁⲩⲟ ⲙⲡⲉⲕⲣⲁⲛ
14 ⲛⲉⲧⲙⲟⲟⲩⲧ ⲇⲉ ⲛⲛⲉⲩⲛⲁⲩ ⲉⲡⲱⲛϩ ⲁⲩⲱ ⲛⲛⲉⲛⲥⲁⲉⲓⲛ ⲧⲱⲟⲩⲛ ⲉⲧⲃⲉⲡⲁⲓ ⲁⲕⲉⲓⲛⲉ ⲉϫⲱⲟⲩ ⲁⲩⲱ ⲁⲕⲧⲁⲕⲟⲟⲩ ⲁⲩⲱ ⲁⲕϥⲓϩⲟⲟⲩⲧ ⲛⲓⲙ ⲛⲧⲁⲩ
15 ⲟⲩⲱϩ ⲉⲣⲟⲟⲩ ⲛϩⲉⲛⲡⲉⲧϩⲟⲟⲩ ⲡϫⲟⲉⲓⲥ ⲟⲩⲉϩⲡⲉⲧϩⲟⲟⲩ ⲉⲛⲉⲧⲧⲁⲓⲏⲩ ⲧⲏⲣⲟⲩ ⲙⲡⲕⲁϩ
16 ⲡϫⲟⲉⲓⲥ ⲁⲓⲣⲡⲉⲕⲙⲉⲉⲩⲉ ϩⲛⲧⲉⲑⲗⲓⲯⲓⲥ ⲁⲧⲉⲕⲥⲃⲱ ϣⲱⲡⲉ ⲛⲁⲓ ⲛⲟⲩⲕⲟⲩⲓ ⲛⲑⲗⲓⲯⲓⲥ
17 ⲁⲩⲱ ⲛⲧϩⲉ ⲛⲧⲉⲧϯⲛⲁⲁⲕⲉ ⲉⲧϩⲏⲛ ⲉϩⲟⲩⲛ ⲉⲙⲓⲥⲉ ⲉⲁⲥϫⲓϣⲕⲁⲕ ⲉⲃⲟⲗ ⲉϫⲛⲧⲉⲥⲛⲁⲁⲕⲉ ⲧⲁⲓ ⲧⲉ ⲧϩⲉ ⲛⲧⲁⲛϣⲱⲡⲉ ⲙⲡⲉⲕⲙⲉⲣⲓⲧ ⲉⲧⲃⲉⲧⲉⲕϩⲟⲧⲉ ⲡϫⲟⲉⲓⲥ
18 ⲁⲛⲱⲱ ⲁⲛϯⲛⲁⲁⲕⲉ ⲁⲛⲙⲓⲥⲉ ⲁⲕⲉⲓⲣⲉ ⲛⲟⲩⲡⲛⲉⲩⲙⲁ ⲛⲟⲩϫⲁⲓ ⲉϩⲣⲁⲓ ⲉϫⲙⲡⲕⲁϩ ⲁⲗⲗⲁ ⲛⲉⲧⲟⲩⲏϩ ϩⲓϫⲙⲡⲕⲁϩ ⲛⲁϩⲉ
19 ⲛⲉⲧⲙⲟⲟⲩⲧ ⲛⲁⲧⲱⲟⲩⲛ ⲙⲛⲛⲉⲧϩⲛ ⲛⲙϩⲁⲁⲩ ⲁⲩⲱ ⲛⲉⲧϩⲙ ⲡⲕⲁϩ ⲛⲁⲉⲩⲫⲣⲁⲛⲉ ⲟⲩⲧⲁⲗϭⲟ ⲅⲁⲣ ⲛⲁⲩ ⲧⲉ ϯⲱⲧⲉ ⲧⲏ ⲉⲃⲟⲗ ϩⲓⲧⲟⲟⲧⲕ ⲡⲕⲁϩ ⲇⲉ ⲛⲛⲁⲥⲉⲃⲏⲥ ⲛⲁϩⲉ
20 ⲙⲟⲟϣⲉ ⲡⲁⲗⲁⲟⲥ ⲛⲅⲃⲱⲕ ⲉϩⲟⲩⲛ ⲉⲛⲉⲕⲧⲁⲙⲉⲓⲟⲛ ⲛⲅϣⲧⲁⲙ ⲙⲡⲉⲕⲣⲟ ϩⲟⲡⲕ ⲛⲟⲩⲕⲟⲩⲓ ϩⲟⲥⲟⲛ ϩⲟⲥⲟⲛ ϣⲁⲛⲧⲉⲧⲟⲣⲅⲏ ⲙⲡϫⲟⲉⲓⲥ ⲥⲓⲛⲉ
21 ⲉⲓⲥ ⲡϫⲟⲉⲓⲥ ⲅⲁⲣ ⲛⲁⲛⲧⲉϥⲟⲣⲅⲏ ⲉⲃⲟⲗ ϩⲙⲡⲉⲧⲟⲩⲁⲁⲃ ⲉϫⲛⲛⲉⲧⲟⲩⲏϩ ϩⲓϫⲙⲡⲕⲁϩ ⲁⲩⲱ ⲡⲕⲁϩ ⲛⲁϭⲱⲗⲡ ⲉⲃⲟⲗ ⲙⲡⲉϥⲥⲛⲟϥ ⲁⲩⲱ ⲛϥⲛⲁϩⲱⲃⲥ ⲁⲛ ⲛⲛⲉⲧϩⲟⲧⲃ
Isaiah 25 · Isaiah 27 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)