Isaiah 21 — Coptic (Sahidic)

1 ⲡϣⲁϫⲉ ⲛⲧⲉⲡϫⲁⲓⲉ ⲛⲧϩⲉ ⲛⲟⲩϩⲁⲧⲏⲩ ϩⲓⲧⲛⲟⲩϫⲁⲓⲉ ⲛⲥⲉⲓ ⲉⲃⲟⲗ ϩⲙⲡϫⲁⲓⲉ ⲉⲥⲛⲏⲩ ⲉⲃⲟⲗ ϩⲙⲡⲕⲁϩ

2 ⲡϩⲟⲣⲟⲙⲁ ⲟ ⲛϩⲟⲧⲉ ⲁⲩⲱ ⲁⲩϫⲱ ⲛⲁⲓ ⲛⲟⲩϩⲱⲃ ⲉϥⲛⲁϣⲧ ⲡⲉⲧⲁⲑⲉⲧⲉⲓ ϥⲛⲁⲁⲑⲁⲓⲧⲉⲓ ⲁⲩⲱ ⲡⲉⲧⲁⲛⲟⲙⲉⲓ ϥⲛⲁⲁⲛⲟⲙⲉⲓ ⲛϩⲏⲧ ⲛⲉⲗⲁⲙⲓⲧⲏⲥ ⲙⲛⲛⲃⲁⲓϣⲓⲛⲉ ⲙⲡⲣⲣⲟ ⲛⲙⲡⲉⲣⲥⲏⲥ ⲛⲏⲩ ⲉϩⲣⲁⲓ ⲉϫⲱⲓ ⲧⲉⲛⲟⲩ ϯⲛⲁⲁϣ ⲁϩⲟⲙ ⲧⲁⲡⲁⲣⲁⲕⲁⲗⲉⲓ ⲙⲙⲟⲓ

3 ϫⲉⲁⲧⲁϯⲡⲉ ⲙⲟⲩϩ ⲛⲥⲱϣⲙ ⲁⲩⲱ ⲁⲛⲛⲁⲁⲕⲉ ⲧⲁϩⲟⲓ ⲛⲧϩⲉ ⲛⲧⲉⲧⲛⲁⲙⲓⲥⲉ ⲁⲓϫⲓ ⲛϭⲟⲛⲥ ⲙⲡⲓⲥⲱⲧⲙ ⲁⲓϭⲉⲡⲏ ⲉⲧⲙⲛⲁⲩ ⲉⲃⲟⲗ

4 ⲁⲡⲁϩⲏⲧ ⲡⲗⲁⲛⲁ ⲁⲩⲱ ⲧⲁⲁⲛⲟⲙⲓⲁ ⲱⲙⲥ ⲙⲙⲟⲓ ⲁⲧⲁⲯⲩⲭⲏ ϩⲉ ⲉⲩϩⲟⲧⲉ

5 ⲥⲟⲃⲧⲉ ⲛⲟⲩⲧⲣⲁⲡⲉⲍⲁ ⲥⲱ ⲟⲩⲱⲙ ⲧⲱⲟⲩⲛ ⲛⲁⲣⲭⲱⲛ ⲥⲟⲃⲧⲉ ⲛϩⲉⲛⲑⲏⲣⲟⲛ

6 ϫⲉⲧⲁⲓ ⲧⲉ ⲧϩⲉ ⲛⲧⲁⲡϫⲟⲉⲓⲥ ϫⲟⲟⲥ ⲛⲁⲓ ϫⲉⲃⲱⲕ ⲛⲅⲧⲁϩⲟ ⲛⲁⲕ ⲉⲣⲁⲧϥ ⲛⲟⲩⲥⲕⲟⲡⲟⲥ ⲁⲩⲱ ⲡⲉⲧⲕⲛⲁⲛⲁⲩ ⲉⲣⲟϥ ⲁϫⲓϥ

7 ⲁⲩⲱ ⲁⲓⲛⲁⲩ ⲉⲁⲛⲁⲃⲁⲧⲏⲥ ⲥⲛⲁⲩ ⲛϩⲧⲟ ⲁⲩⲱ ⲟⲩⲁⲛⲁⲃⲁⲧⲏⲥ ⲛⲉⲓⲱ ⲙⲛⲟⲩⲁⲛⲁⲃⲁⲧⲏⲥ ⲛϭⲁⲙⲟⲩⲗ ⲥⲱⲧⲙ ⲉⲩⲛⲟϭ ⲛϣⲁϫⲉ

8 ⲁⲩⲱ ⲙⲟⲩⲧⲉ ⲉⲟⲩⲣⲓⲁⲥ ⲉⲡⲛⲁⲩ ⲙⲡϫⲟⲉⲓⲥ ⲁⲩⲱ ⲡⲉϫⲁϥ ϫⲉⲁⲓⲁϩⲉⲣⲁⲧ ⲙⲡⲉϩⲟⲟⲩ ⲧⲏⲣϥ ⲉϫⲛⲧⲡⲁⲣⲉⲙⲃⲟⲗⲏ ⲁⲛⲟⲕ ⲁⲓⲁϩⲉⲣⲁⲧ ⲛⲧⲉⲩϣⲏ ⲧⲏⲣⲥ

9 ⲁⲩⲱ ⲉⲓⲥ ϩⲏⲏⲧⲉ ⲛⲧⲟϥ ϥⲛⲏⲩ ⲉϥⲁⲗⲉ ⲉϩⲣⲁⲓ ⲉϫⲛⲟⲩⲕⲁⲣⲟⲩⲭⲓⲟⲛ ⲁⲩⲱ ⲁϥⲟⲩⲱϣⲃ ⲡⲉϫⲁϥ ϫⲉⲁⲧⲃⲁⲃⲩⲗⲱⲛ ϩⲉ ⲁⲩⲱ ⲛⲉⲥⲧⲟⲩⲱⲧ ⲧⲏⲣⲟⲩ ⲙⲛⲛⲉⲥⲙⲟⲩⲛⲅ ⲛϭⲓϫ ⲧⲏⲣⲟⲩ ⲁⲩⲟⲩⲱϣϥ ⲉϩⲣⲁⲓ ⲉϫⲙⲡⲕⲁϩ

10 ⲥⲱⲧⲙ ⲛⲉⲧⲥⲉⲉⲡⲉ ϫⲓⲥⲙⲏ ⲛⲉⲧⲙⲟⲕϩ ⲛϩⲏⲧ ⲁⲓⲥⲱⲧⲙ ⲉⲩⲥⲙⲏ ⲉⲃⲟⲗ ϩⲓⲧⲙⲡϫⲟⲉⲓⲥ ⲥⲁⲃⲁⲱⲑ ⲡⲛⲟⲩⲧⲉ ⲙⲡⲓⲥⲣⲁⲏⲗ ⲁϥⲧⲁⲙⲱⲧⲛ

11 ⲡϩⲟⲣⲟⲙⲁ ⲛⲧⲓⲇⲟⲩⲙⲁⲓⲁ ⲙⲟⲩⲧⲉ ⲛⲁⲓ ⲉⲃⲟⲗ ϩⲓⲧⲛⲥⲏⲉⲓⲣ ⲁϫⲓⲥ ϫⲉⲁϩⲣⲟⲕ ⲕⲱϣ ⲉⲃⲟⲗ ϩⲁⲣⲉϩ ⲉⲙⲙⲁ ⲛⲣⲟⲉⲓⲥ

12 ϩⲁⲣⲉϩ ⲉϩⲧⲟⲟⲩⲉ ⲙⲛⲧⲉⲩϣⲏ ⲉⲕϣⲁⲛϣⲓⲛⲉ ϣⲓⲛⲉ ⲛⲅⲟⲩⲱϩ ϩⲁϩⲧⲏⲓ

13 ϩⲙⲡⲉⲇⲣⲩⲙⲟⲥ ϥⲛⲁⲛⲕⲟⲧⲕ ⲉⲣⲟⲩϩⲉ ϩⲛⲇⲁⲓⲇⲁⲛ

14 ⲁⲛⲓⲛⲉ ⲛⲟⲩⲙⲟⲟⲩ ⲉⲧⲱⲙⲛⲧ ⲉⲡⲉⲧⲟⲃⲉ ⲧⲱⲙⲛⲧ ⲉⲡⲉⲧⲡⲏⲧ ⲙⲛϩⲉⲛⲟⲉⲓⲕ ⲛⲉⲧⲟⲩⲏϩ ϩⲛⲧⲉⲭⲱⲣⲁ ⲛⲑⲁⲓⲙⲁⲛ

15 ⲉⲧⲃⲉⲡⲁϣⲁⲓ ⲛⲛⲉⲧⲡⲏⲧ ⲙⲛⲡⲁϣⲁⲓ ⲛⲛⲉⲧⲥⲟⲣⲙ ⲁⲩⲱ ⲉⲧⲃⲉⲡⲁϣⲁⲓ ⲛⲧⲥⲏⲃⲉ ⲁⲩⲱ ⲉⲧⲃⲉⲡⲁϣⲁⲓ ⲛⲙⲡⲓⲧⲉ ⲉⲧϫⲟⲗⲕ ⲁⲩⲱ ⲉⲧⲃⲉⲡⲁϣⲁⲓ ⲛⲛⲉⲛⲧⲁⲩϩⲉ ϩⲙⲡⲡⲟⲗⲉⲙⲟⲥ

16 ϫⲉⲧⲁⲓ ⲧⲉ ⲧϩⲉ ⲛⲧⲁⲡϫⲟⲉⲓⲥ ϫⲟⲟⲥ ⲛⲁⲓ ϫⲉⲉⲧⲉⲓⲕⲉⲣⲟⲙⲡⲉ ⲛⲧϩⲉ ⲛⲟⲩⲣⲟⲙⲡⲉ ⲛϫⲁⲓⲃⲉⲕⲏ ⲛϥⲱϫⲛ ⲛϭⲓⲡⲉⲟⲟⲩ ⲛⲛϣⲏⲣⲉ ⲛⲕⲏⲇⲁⲣ

17 ⲁⲩⲱ ⲡⲥⲉⲉⲡⲉ ⲛⲙⲡⲓⲧⲉ ⲉⲧϫⲟⲟⲣ ⲛⲛϣⲏⲣⲉ ⲛⲕⲏⲇⲁⲣ ⲥⲉⲛⲁⲥⲃⲟⲕ ϫⲉⲁⲡϫⲟⲉⲓⲥ ⲡⲛⲟⲩⲧⲉ ⲙⲡⲓⲥⲣⲁⲏⲗ ϣⲁϫⲉ