Read Isaiah 2 side by side with translations · The Final Bible
1 ⲡϣⲁϫⲉ ⲛⲧⲁϥϣⲱⲡⲉ ⲉϫⲛⲏⲥⲁⲓⲁⲥ ⲡϣⲏⲣⲉ ⲛϩⲁⲙⲟⲥ ⲉⲧⲃⲉⲧⲓⲟⲩⲇⲁⲓⲁ ⲙⲛⲧϩⲓⲉⲣⲟⲩⲥⲁⲗⲏⲙ
2 ϫⲉⲡⲧⲟⲟⲩ ⲙⲡϫⲟⲉⲓⲥ ⲛⲁϣⲱⲡⲉ ⲉϥⲟⲩⲟⲛϩ ⲉⲃⲟⲗ ϩⲛⲧϩⲁⲏ ⲛⲛⲉϩⲟⲟⲩ ⲁⲩⲱ ⲡⲏⲓ ⲙⲡⲛⲟⲩⲧⲉ ⲉϫⲛⲧⲁⲡⲉ ⲛⲛⲧⲟⲟⲩ ⲁⲩⲱ ϥⲛⲁϫⲓⲥⲉ ⲉϫⲛⲛⲥⲓⲃⲧ ⲁⲩⲱ ⲛϩⲉⲑⲛⲟⲥ ⲧⲏⲣⲟⲩ ⲛⲏⲩ ⲉϫⲱϥ
3 ⲁⲩⲱ ⲙⲙⲏⲏϣⲉ ⲉⲧⲛⲁϣⲱⲟⲩ ⲛⲁⲙⲟⲟϣⲉ ⲛⲥⲉϫⲟⲟⲥ ϫⲉⲁⲙⲏⲉⲓⲧⲛ ⲛⲧⲛⲃⲱⲕ ⲉϩⲣⲁⲓ ⲉⲡⲧⲟⲟⲩ ⲙⲡϫⲟⲉⲓⲥ ⲁⲩⲱ ⲉϩⲣⲁⲓ ⲉⲡⲏⲓ ⲙⲡⲛⲟⲩⲧⲉ ⲛⲓⲁⲕⲱⲃ ⲛϥϫⲱ ⲛⲁⲛ ⲛⲧⲉϥϩⲓⲏ ⲛⲧⲛⲙⲟⲟϣⲉ ϩⲣⲁⲓ ⲛϩⲏⲧⲥ ⲉⲣⲉⲡⲛⲟⲙⲟⲥ ⲅⲁⲣ ⲛⲏⲩ ⲉⲃⲟⲗ ϩⲛⲥⲓⲱⲛ ⲁⲩⲱ ⲡϣⲁϫⲉ ⲙⲡϫⲟⲉⲓⲥ ⲉⲃⲟⲗ ϩⲛⲧϩⲓⲉⲣⲟⲩⲥⲁⲗⲏⲙ
4 ⲁⲩⲱ ϥⲛⲁⲕⲣⲓⲛⲉ ⲛⲧⲙⲏⲧⲉ ⲛϩⲉⲛϩⲉⲑⲛⲟⲥ ⲉⲛⲁϣⲱⲟⲩ ⲁⲩⲱ ϥⲛⲁϫⲡⲓⲟ ⲛⲟⲩⲗⲁⲟⲥ ⲉϥⲟϣ ⲛⲥⲉⲟⲩⲱⲧϩ ⲛⲛⲉⲩⲥⲏϥⲉ ⲉϩⲉⲛϩⲃⲃⲉ ⲁⲩⲱ ⲛⲉⲩϫⲃⲏⲗ ⲉϩⲉⲛⲟϩⲥ ⲛⲧⲉⲧⲙϩⲉⲑⲛⲟⲥ ⲁⲙⲁϩⲧⲉ ⲛⲥⲏϥⲉ ⲉϫⲛϩⲉⲑⲛⲟⲥ ⲁⲩⲱ ⲛⲥⲉⲧⲙϫⲓⲥⲃⲱ ϭⲉ ⲉⲙⲓϣⲉ
5 ⲧⲉⲛⲟⲩ ϭⲉ ⲛⲧⲟⲕ ⲡⲏⲓ ⲛⲓⲁⲕⲱⲃ ⲁⲙⲏⲉⲓⲧⲛ ⲛⲧⲛⲃⲱⲕ ϩⲙⲡⲟⲩⲟⲉⲓⲛ ⲙⲡϫⲟⲉⲓⲥ
6 ⲁϥⲃⲱϣ ⲅⲁⲣ ⲙⲡⲉϥⲗⲁⲟⲥ ⲡⲏⲓ ⲙⲡⲓⲥⲣⲁⲏⲗ ϫⲉⲁⲧⲉⲩⲭⲱⲣⲁ ⲙⲟⲩϩ ⲛⲣⲉϥϫⲓⲙⲁⲉⲓⲛ ⲛⲧϩⲉ ⲛⲧⲁⲛⲁⲗⲗⲟⲫⲩⲗⲟⲥ ⲛⲧϩⲉ ⲛϣⲟⲣⲡ ⲁⲩⲱ ⲁϩⲁϩ ⲛϣⲏⲣⲉ ⲛⲁⲗⲗⲟⲫⲩⲗⲟⲥ ϣⲱⲡⲉ ⲛⲁⲩ
7 ⲁⲧⲉⲩⲭⲱⲣⲁ ⲙⲟⲩϩ ⲛϩⲁⲧ ϩⲓⲛⲟⲩⲃ ⲁⲩⲱ ⲛⲉⲙⲛⲏⲡⲉ ⲛⲛⲉⲩⲁϩⲱⲱⲣ ⲁⲩⲱ ⲁⲡⲉⲩⲕⲁϩ ⲙⲟⲩϩ ⲛϩⲧⲟ ϩⲓϩⲟⲣⲙⲁ ⲁⲩⲱ ⲛⲉⲙⲛⲏⲡⲉ ⲛⲛⲉⲩϩⲁⲣⲙⲁ
8 ⲁⲩⲱ ⲁⲡⲕⲁϩ ⲙⲟⲩϩ ⲉⲃⲟⲗ ϩⲛⲛⲉⲃⲟⲧⲉ ⲛⲛⲉϩⲃⲏⲩⲉ ⲛⲛⲉⲩϭⲓϫ ⲁⲩⲱ ⲁⲩⲟⲩⲱϣⲧ ⲛⲛⲉⲛⲧⲁⲛⲉⲩⲧⲏⲏⲃⲉ ⲧⲁⲙⲓⲟⲟⲩ
9 ⲁⲡⲣⲱⲙⲉ ⲡⲁϩⲧϥ ⲁⲡϩⲣϣⲓⲣⲉ ⲑⲃⲃⲓⲟ ⲁⲩⲱ ⲛⲛⲁⲕⲁⲁⲩ ⲉⲃⲟⲗ
10 ⲧⲉⲛⲟⲩ ⲇⲉ ⲃⲱⲕ ⲉϩⲟⲩⲛ ⲉⲛⲡⲉⲧⲣⲁ ⲛⲧⲉⲧⲛϩⲉⲡⲧⲏⲩⲧⲛ ϩⲙⲡⲕⲁϩ ⲙⲡⲉⲙⲧⲟ ⲉⲃⲟⲗ ⲛⲧϩⲟⲧⲉ ⲙⲡϫⲟⲉⲓⲥ ⲁⲩⲱ ⲙⲡⲉⲙⲧⲟ ⲉⲃⲟⲗ ⲙⲡⲉⲟⲟⲩ ⲛⲧⲉϥϭⲟⲙ ϩⲟⲧⲁⲛ ⲉϥϣⲁⲛⲧⲱⲟⲩⲛ ⲉⲟⲩⲱϣϥ ⲙⲡⲕⲁϩ
11 ⲛⲃⲁⲗ ⲅⲁⲣ ⲙⲡϫⲟⲉⲓⲥ ϫⲟⲥⲉ ⲡⲣⲱⲙⲉ ⲇⲉ ⲑⲃⲃⲓⲏⲩ ⲁⲩⲱ ⲡϫⲓⲥⲉ ⲛⲛⲣⲱⲙⲉ ⲛⲁⲑⲃⲃⲓⲟ ⲛⲧⲉⲡϫⲟⲉⲓⲥ ⲙⲁⲩⲁⲁϥ ϫⲓⲥⲉ ϩⲙⲡⲉϩⲟⲟⲩ ⲉⲧⲙⲙⲁⲩ
12 ⲡⲉϩⲟⲟⲩ ⲅⲁⲣ ⲙⲡϫⲟⲉⲓⲥ ⲥⲁⲃⲁⲱⲑ ⲛⲏⲩ ⲉϫⲛⲣⲉϥⲥⲱϣ ⲛⲓⲙ ϩⲓϫⲁⲥⲓϩⲏⲧ ⲁⲩⲱ ⲉϫⲛⲟⲩⲟⲛ ⲛⲓⲙ ⲉⲧϫⲟⲥⲉ ⲁⲩⲱ ⲉⲧϩⲗⲟⲩⲗⲱⲟⲩ ⲁⲩⲱ ⲛⲥⲉⲑⲃⲃⲓⲟ
13 ⲁⲩⲱ ⲉϫⲛⲕⲉⲇⲣⲟⲥ ⲛⲓⲙ ⲙⲡⲗⲓⲃⲁⲛⲟⲥ ⲉⲧϫⲟⲥⲉ ⲁⲩⲱ ⲉⲧϩⲗⲟⲩⲗⲱⲟⲩ ⲁⲩⲱ ⲉϫⲛϣⲏⲛ ⲛⲓⲙ ⲛⲃⲁⲗⲁⲛⲟⲥ ⲛⲧⲉⲧⲃⲁⲥⲁⲛ
14 ⲁⲩⲱ ⲉϫⲛⲧⲟⲟⲩ ⲛⲓⲙ ⲙⲛⲥⲓⲃⲧ ⲛⲓⲙ ⲉⲧϫⲟⲥⲉ
15 ⲁⲩⲱ ⲉϫⲙⲡⲩⲣⲅⲟⲥ ⲛⲓⲙ ⲉⲧϫⲟⲥⲉ ⲁⲩⲱ ⲉϫⲛⲥⲟⲃⲧ ⲛⲓⲙ ⲉⲧϫⲟⲥⲉ
16 ⲁⲩⲱ ⲉϫⲛϫⲟⲉⲓ ⲛⲓⲙ ⲛⲧⲑⲁⲗⲁⲥⲥⲁ ⲁⲩⲱ ⲉϫⲙⲡⲛⲁⲩ ⲛϫⲟⲉⲓ ⲛⲓⲙ ⲛⲧⲉⲡⲥⲁ
17 ⲛⲧⲉⲡⲣⲱⲙⲉ ⲛⲓⲙ ⲑⲃⲃⲓⲟ ⲛⲧⲉⲡϫⲓⲥⲉ ⲛⲛⲣⲱⲙⲉ ϩⲉ ⲛⲧⲉⲡϫⲟⲉⲓⲥ ϫⲓⲥⲉ ⲙⲁⲩⲁⲁϥ ϩⲙⲡⲉϩⲟⲟⲩ ⲉⲧⲙⲙⲁⲩ
18 ⲁⲩⲱ ⲥⲉⲛⲁϩⲱⲡ ⲛⲛⲉⲩⲙⲟⲩⲛⲅ ⲛϭⲓϫ ⲧⲏⲣⲟⲩ
19 ⲉⲁⲩϫⲓⲧⲟⲩ ⲉϩⲟⲩⲛ ⲉⲛⲉⲙϩⲁⲁⲩ ⲙⲛⲙⲡⲱϩ ⲛⲙⲡⲉⲧⲣⲁ ⲁⲩⲱ ⲉⲛⲉⲛⲉϣⲕⲟⲗ ⲙⲡⲕⲁϩ ⲙⲡⲉⲙⲧⲟ ⲉⲃⲟⲗ ⲛⲧϩⲟⲧⲉ ⲙⲡϫⲟⲉⲓⲥ ⲁⲩⲱ ⲉⲃⲟⲗ ϩⲙⲡⲉⲟⲟⲩ ⲛⲧⲉϥϭⲟⲙ ⲉϥϣⲁⲛⲧⲱⲟⲩⲛ ⲉⲟⲩⲉϣϥⲡⲕⲁϩ
20 ϩⲙⲡⲉϩⲟⲟⲩ ⲅⲁⲣ ⲉⲧⲙⲙⲁⲩ ⲡⲣⲱⲙⲉ ⲛⲁⲛⲟⲩϫⲉ ⲉⲃⲟⲗ ⲛⲛⲉϥⲃⲟⲧⲉ ⲛϩⲁⲧ ⲙⲛⲛⲛⲟⲩⲃ ⲛⲧⲁⲩⲧⲁⲙⲓⲟⲟⲩ ⲉⲟⲩⲱϣⲧ ⲛⲙⲡⲉⲧϣⲟⲩⲉⲓⲧ ⲙⲛⲛϭⲓⲛϭⲗⲱ
21 ⲉⲃⲱⲕ ⲉϩⲟⲩⲛ ⲉⲛⲉϣⲕⲟⲗ ⲛⲧⲡⲉⲧⲣⲁ ⲉⲧⲛⲁϣⲧ ⲁⲩⲱ ⲉⲛⲟⲩⲱϣ ⲛⲙⲡⲉⲧⲣⲁ ⲙⲡⲉⲙⲧⲟ ⲉⲃⲟⲗ ⲛⲧϩⲟⲧⲉ ⲙⲡϫⲟⲉⲓⲥ ⲁⲩⲱ ⲉⲃⲟⲗ ⲙⲡⲉⲟⲟⲩ ⲛⲧⲉϥϭⲟⲙ ⲉϥϣⲁⲛⲧⲱⲟⲩⲛ ⲉⲟⲩⲉϣϥⲡⲕⲁϩ
Isaiah 1 · Isaiah 3 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)