Read Isaiah 18 side by side with translations · The Final Bible
1 ⲟⲩⲟⲓ ⲛⲛⲧⲛϩ ⲛⲛⲉϫⲏⲩ ⲙⲡⲕⲁϩ ⲉⲧϩⲓ ⲡⲉⲕⲣⲟ ⲛⲛⲉⲓⲉⲣⲱⲟⲩ ⲛⲛⲉϭⲟⲟϣ
2 ⲡⲉⲧϫⲟⲟⲩ ⲛϩⲉⲛⲟⲩⲱ ϩⲛⲧϩⲁⲗⲁⲥⲥⲁ ⲁⲩⲱ ϩⲉⲛⲉⲡⲓⲥⲧⲟⲗⲏ ⲛϫⲱⲱⲙⲉ ϩⲓϫⲙⲡⲙⲟⲟⲩ ⲛⲃⲁⲓϣⲓⲛⲉ ⲅⲁⲣ ⲛⲁⲙⲟⲟϣⲉ ⲉⲩⲁⲥⲱⲟⲩ ϣⲁⲟⲩϩⲉⲑⲛⲟⲥ ⲉϥϫⲟⲥⲉ ⲁⲩⲱ ⲛϣⲙⲙⲟ ⲛⲗⲁⲟⲥ ⲁⲩⲱ ⲟⲩϩⲉⲑⲛⲟⲥ ⲉϥⲛⲁϣⲧ ⲛⲁⲧϩⲉⲗⲡⲓⲥ ⲉⲁⲩⲑⲃⲃⲓⲟϥ ⲧⲉⲛⲟⲩ ⲛⲓⲉⲣⲱⲟⲩ ⲧⲏⲣⲟⲩ ⲙⲡⲕⲁϩ
3 ⲛⲁⲣⲧϩⲉ ⲛⲟⲩⲭⲱⲣⲁ ⲉⲥϭⲟⲣϭ ⲧⲉⲩⲭⲱⲣⲁ ⲛⲁϭⲱⲣϭ ⲛⲧϩⲉ ⲛⲟⲩⲙⲁⲉⲓⲛ ⲉⲩϥⲓ ⲙⲙⲟϥ ϩⲓⲟⲩⲧⲟⲟⲩ ⲁⲩⲱ ⲥⲉⲛⲁⲥⲟⲧⲙⲉϥ ⲛⲧϩⲉ ⲛⲟⲩϩⲣⲟⲟⲩ ⲛⲥⲁⲗⲡⲓⲅⲝ
4 ϫⲉⲧⲁⲓ ⲧⲉ ⲧϩⲉ ⲛⲧⲁⲡϫⲟⲉⲓⲥ ϫⲟⲟⲥ ⲛⲁⲓ ϫⲉⲟⲩⲛⲟⲩⲱⲣϫ ⲛⲁϣⲱⲡⲉ ϩⲛⲧⲁⲡⲟⲗⲓⲥ ⲛⲧϩⲉ ⲙⲡⲟⲩⲟⲉⲓⲛ ⲙⲡⲕⲁⲩⲙⲁ ⲙⲡⲛⲟⲩ ⲙⲙⲉⲉⲣⲉ ⲛⲧϩⲉ ⲛⲟⲩⲕⲗⲟⲟⲗⲉ ⲛⲓⲱⲧⲉ ⲙⲡⲉϩⲟⲟⲩ ⲙⲡⲱϩⲥ
5 ϥⲛⲁϣⲱⲡⲉ ϩⲁⲧϩⲏ ⲙⲡⲱϩⲥ ⲉⲣϣⲁⲛⲛⲉϩⲣⲏⲣⲉ ⲗⲟ ⲙⲛⲛⲉⲗⲉⲗϩⲏⲙϫ ϥⲛⲁϯⲟⲩⲱ ⲛⲟⲩϯⲟⲩⲱ ⲛⲉⲗⲉⲗϩⲏⲙϫ ⲁⲩⲱ ϥⲛⲁϫⲱⲱⲗⲉ ⲛϩⲉⲛⲕⲟⲩⲓ ⲛⲥⲙⲁϩ ϩⲛⲛⲟϩⲥ ⲁⲩⲱ ϥⲛⲁϣⲱⲱⲧ ⲛⲛⲉⲩϣⲗϩ ⲛϥϭⲉϫϭⲱϫⲟⲩ
6 ⲁⲩⲱ ϥⲛⲁⲕⲁⲁⲩ ⲛⲛϩⲁⲗⲁⲧⲉ ⲛⲧⲡⲉ ϩⲓⲟⲩⲥⲟⲡ ⲙⲛⲛⲉⲑⲏⲣⲓⲟⲛ ⲙⲡⲕⲁϩ ⲁⲩⲱ ⲥⲉⲛⲁⲥⲱⲟⲩϩ ⲉϫⲱⲟⲩ ⲛϭⲓⲛϩⲁⲗⲁⲧⲉ ⲧⲏⲣⲟⲩ ⲛⲧⲡⲉ ⲁⲩⲱ ⲛⲉⲑⲏⲣⲓⲟⲛ ⲧⲏⲣⲟⲩ ⲙⲡⲕⲁϩ ⲛⲏⲩ ⲉϫⲱϥ
7 ϩⲙⲡⲉϩⲟⲟⲩ ⲉⲧⲙⲙⲁⲩ ⲥⲉⲛⲁⲧⲁⲗⲉ ⲛⲇⲱⲣⲟⲛ ⲉϩⲣⲁⲓ ⲙⲡϫⲟⲉⲓⲥ ⲥⲁⲃⲁⲱⲑ ⲉⲃⲟⲗ ϩⲛⲟⲩⲗⲁⲟⲥ ⲉϥϩⲉϫϩⲱϫ ⲁⲩⲱ ⲉⲩⲧⲱⲗⲕ ⲙⲙⲟϥ ⲁⲩⲱ ⲉⲃⲟⲗ ϩⲓⲧⲛⲟⲩⲛⲟϭ ⲛⲗⲁⲟⲥ ϫⲓⲛⲧⲉⲛⲟⲩ ϣⲁⲉⲛⲉϩ ⲛⲟⲩⲟⲉⲓϣ ⲟⲩϩⲉⲑⲛⲟⲥ ⲉϥⲛⲁϩⲧⲉ ⲁⲩⲱ ⲉϥⲑⲃⲃⲓⲏⲩ ⲡⲁⲓ ⲉⲧⲥⲁ ⲟⲩⲥⲁ ⲙⲡⲓⲉⲣⲟ ⲛⲧⲉⲭⲱⲣⲁ ⲛⲕⲏⲙⲉ ⲉⲡⲙⲁ ⲛⲧⲁⲩⲧⲁⲩⲉⲡⲣⲁⲛ ⲙⲡϫⲟⲉⲓⲥ ⲥⲁⲃⲁⲱⲑ ⲉϫⲱϥ ⲡⲧⲟⲟⲩ ⲛⲥⲓⲱⲛ
Isaiah 17 · Isaiah 19 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)