Exodus 4 — Coptic (Sahidic)

1 ⲁϥⲟⲩⲱϣⲃ ⲇⲉ ⲛϭⲓⲙⲱⲩⲥⲏⲥ ⲉϥϫⲱ ⲙⲙⲟⲥ ϫⲉⲉϣⲱⲡⲉ ϭⲉ ⲉⲩⲧⲙⲧⲁⲛϩⲟⲩⲧ ⲣⲉ ⲁⲩⲱ ⲛⲥⲉⲧⲙⲥⲱⲧⲙ ⲉⲡⲁϩⲣⲟⲟⲩ ⲥⲉⲛⲁϫⲟⲟⲥ ⲅⲁⲣ ϫⲉⲙⲡⲉⲡⲛⲟⲩⲧⲉ ⲟⲩⲱⲛϩ ⲛⲁⲕ ⲉⲃⲟⲗ ⲟⲩ ⲡⲉ ⲉϯⲛⲁϫⲟⲟϥ ⲛⲁⲩ

2 ⲡⲉϫⲁϥ ⲇⲉ ⲛⲁϥ ⲛϭⲓⲡϫⲟⲉⲓⲥ ϫⲉⲟⲩ ⲡⲉ ⲡⲁⲓ ⲉⲧϩⲛⲧⲉⲕϭⲓϫ ⲛⲧⲟϥ ⲇⲉ ⲡⲉϫⲁϥ ϫⲉⲟⲩϭⲉⲣⲱⲃ ⲡⲉ

3 ⲡⲉϫⲁϥ ⲛⲁϥ ϫⲉⲛⲟⲩϫⲉ ⲙⲙⲟϥ ⲉϩⲣⲁⲓ ⲉϫⲙⲡⲕⲁϩ ⲁϥϣⲱⲡⲉ ⲛⲟⲩϩⲟϥ ⲁⲙⲱⲩⲥⲏⲥ ⲡⲱⲧ ϩⲁⲧⲉϥϩⲏ

4 ⲡⲉϫⲁϥ ⲛⲁϥ ⲛϭⲓⲡϫⲟⲉⲓⲥ ϫⲉⲥⲟⲟⲩⲧⲛ ⲉⲃⲟⲗ ⲛⲧⲉⲕϭⲓϫ ⲛⲅⲁⲙⲁϩⲧⲉ ⲙⲡⲉϥⲥⲏⲧ ⲁϥⲥⲟⲟⲩⲧⲛ ⲛⲧⲉϥϭⲓϫ ⲉⲃⲟⲗ ⲁϥⲁⲙⲁϩⲧⲉ ⲙⲡⲉϥⲥⲉⲓⲁⲧ ⲁϥϣⲱⲡⲉ ⲛⲟⲩϭⲉⲣⲱⲃ ϩⲛⲧⲉϥϭⲓϫ

5 ϫⲉⲕⲁⲁⲥ ⲉⲩⲉⲧⲁⲛϩⲟⲩⲧⲕ ϫⲉⲁⲡϫⲟⲉⲓⲥ ⲡⲛⲟⲩⲧⲉ ⲛⲛⲉⲩⲉⲓⲟⲧⲉ ⲟⲩⲱⲛϩ ⲛⲁⲕ ⲉⲃⲟⲗ ⲡⲛⲟⲩⲧⲉ ⲛⲁⲃⲣⲁϩⲁⲙ ⲡⲛⲟⲩⲧⲉ ⲛⲓⲥⲁⲁⲕ ⲡⲛⲟⲩⲧⲉ ⲛⲓⲁⲕⲱⲃ

6 ⲡⲉϫⲁϥ ⲟⲛ ⲛⲁϥ ⲛϭⲓⲡϫⲟⲉⲓⲥ ϫⲉⲛⲟⲩϫⲉ ⲛⲧⲉⲕϭⲓϫ ⲉϩⲟⲩⲛ ϩⲁⲕⲟⲩⲟⲩⲛⲅ ⲁϥⲛⲟⲩϫⲉ ⲛⲧⲉϥϭⲓϫ ϩⲁⲕⲟⲩⲟⲩⲛϥ ⲁⲩⲱ ⲁϥⲉⲓⲛⲉ ⲛⲧⲉϥϭⲓϫ ⲉⲃⲟⲗ ϩⲁⲕⲟⲩⲟⲩⲛϥ ⲁⲥϣⲱⲡⲉ ⲛϭⲓⲧⲉϥϭⲓϫ ⲛⲧϩⲉ ⲛⲟⲩⲭⲓⲱⲛ

7 ⲡⲉϫⲁϥ ⲟⲛ ⲛⲁϥ ϫⲉⲛⲟⲩϫⲉ ⲛⲧⲉⲕϭⲓϫ ⲉϩⲟⲩⲛ ϩⲁⲕⲟⲩⲟⲩⲛⲅ ⲁϥⲛⲟⲩϫⲉ ⲛⲧⲉϥϭⲓϫ ⲉϩⲟⲩⲛ ϩⲁⲕⲟⲩⲟⲩⲛϥ ⲁⲩⲱ ⲁϥⲉⲓⲛⲉ ⲛⲧⲉϥϭⲓϫ ⲉⲃⲟⲗ ϩⲁⲕⲟⲩⲛϥ ⲁⲥϣⲱⲡⲉ ⲟⲛ ⲛⲧⲉⲥϩⲉ ⲛⲡⲁⲩⲁⲛ ⲛⲧⲉϥⲥⲁⲣⲝ

8 ⲉϣⲱⲡⲉ ⲇⲉ ⲉⲩⲧⲙⲧⲁⲛϩⲟⲩⲧⲕ ϩⲙⲡⲙⲁⲉⲓⲛ ⲛϣⲟⲣⲡ ⲥⲉⲛⲁⲧⲁⲛϩⲟⲩⲧⲕ ϩⲙⲡⲙⲁⲉⲓⲛ ⲛϩⲁⲉ

9 ⲉⲩⲧⲙⲧⲁⲛϩⲟⲩⲧⲕ ϩⲙⲡⲉⲓⲙⲁⲉⲓⲛ ⲥⲛⲁⲩ ⲛⲥⲉⲧⲙⲥⲱⲧⲙ ⲉⲧⲉⲕⲥⲙⲏ ⲉⲕⲉϫⲓ ⲉⲃⲟⲗ ϩⲛⲡⲙⲟⲟⲩ ⲙⲡⲓⲉⲣⲟ ⲛⲅⲡⲱϩⲧ ⲙⲙⲟϥ ⲉϫⲛⲡⲉⲧϣⲟⲩⲱⲟⲩ ⲛϥϣⲱⲡⲉ ⲛϭⲓⲡⲙⲟⲟⲩ ⲡⲁⲓ ⲉⲧⲕⲛⲁϫⲓⲧϥ ⲉⲃⲟⲗ ϩⲛⲡⲓⲉⲣⲟ ⲉⲩⲥⲛⲟϥ ϩⲣⲁⲓ ϩⲓϫⲛⲡⲉⲧϣⲟⲩⲱⲟⲩ

10 ⲡⲉϫⲁϥ ⲇⲉ ⲛϭⲓⲙⲱⲩⲥⲏⲥ ⲛⲛⲁϩⲣⲙⲡϫⲟⲉⲓⲥ ϫⲉϯⲥⲟⲡⲥ ⲙⲙⲟⲕ ⲡϫⲟⲉⲓⲥ ⲁⲛⲅ ⲟⲩⲣⲉϥϣⲁϫⲉ ⲁⲛ ϩⲁⲧϩⲏ ⲛⲥⲁϥ ⲙⲛϣⲙⲧⲉ ⲡϩⲟⲟⲩ ⲛϩⲟⲟⲩ ⲟⲩⲇⲉ ϫⲓⲛⲧⲁⲕⲁⲣⲭⲉⲓ ⲛϣⲁϫⲉ ⲙⲛⲡⲉⲕϩⲙϩⲁⲗ ϫⲉⲁⲛⲅ ⲟⲩⲗⲁⲥϣⲓⲣⲉ ⲁⲩⲱ ⲁⲛⲅ ⲟⲩϩⲁϭⲃⲥⲙⲏ

11 ⲡⲉϫⲁϥ ⲇⲉ ⲛϭⲓⲡϫⲟⲉⲓⲥ ⲙⲙⲱⲩⲥⲏⲥ ϫⲉⲛⲓⲙ ⲡⲉ ⲛⲧⲁϥϯⲧⲁⲡⲣⲟ ⲙⲡⲣⲱⲙⲉ ⲁⲩⲱ ⲛⲓⲙ ⲡⲉⲛⲧⲁϥⲧⲁⲙⲓⲉⲡⲉⲙⲡⲟ ⲙⲛⲡⲁⲗ ⲡⲉⲧⲛⲁⲩ ⲉⲃⲟⲗ ⲙⲛⲡⲃⲗⲗⲉ ⲙⲏ ⲁⲛⲟⲕ ⲁⲛ ⲡⲉ ⲡϫⲟⲉⲓⲥ ⲡⲛⲟⲩⲧⲉ

12 ⲧⲉⲛⲟⲩ ϭⲉ ⲃⲱⲕ ⲁⲩⲱ ⲁⲛⲟⲕ ϯⲛⲁⲟⲩⲱⲛ ⲛⲣⲱⲕ ⲛⲧⲁⲧⲥⲁⲃⲟⲕ ⲉⲡⲉⲧⲕⲛⲁϫⲟⲟⲥ

13 ⲡⲉϫⲁϥ ⲇⲉ ⲛϭⲓⲙⲱⲩⲥⲏⲥ ϫⲉϯⲥⲟⲡⲥ ⲙⲙⲟⲕ ⲡϫⲟⲉⲓⲥ ⲁⲛⲁⲩ ⲛⲁⲕ ⲉⲕⲉⲩⲁ ⲉⲩⲛϭⲟⲙ ⲙⲙⲟϥ ⲛⲅϫⲛⲁϥ

14 ⲁⲡϫⲟⲉⲓⲥ ϭⲱⲛⲧ ϩⲛⲟⲩⲟⲣⲅⲏ ⲉϫⲛⲙⲱⲩⲥⲏⲥ ⲉϥϫⲱ ⲙⲙⲟⲥ ϫⲉⲉⲓⲥⲁⲁⲣⲱⲛ ⲡⲉⲕⲥⲟⲛ ⲡⲗⲉⲩⲓⲧⲏⲥ ϯⲥⲟⲟⲩⲛ ϫⲉϩⲛⲟⲩϣⲁϫⲉ ϥⲛⲁϣⲁϫⲉ ⲛⲙⲙⲁⲕ ⲁⲩⲱ ⲉⲓⲥ ϩⲏⲏⲧⲉ ⲛⲧⲟϥ ϥⲛⲏⲩ ⲉⲃⲟⲗ ⲉⲧⲱⲙⲧ ⲉⲣⲟϥ ⲛϥⲛⲁⲩ ⲉⲣⲟⲕ ⲛϥⲣⲁϣⲉ ϩⲣⲁⲓ ⲛϩⲏⲧϥ

15 ⲛⲅϫⲟⲟⲥ ⲛⲁϥ ⲁⲩⲱ ⲛⲅϯⲛⲁϣⲁϫⲉ ⲉϩⲣⲁⲓ ⲉⲧⲉϥⲧⲁⲡⲣⲟ ⲁⲩⲱ ⲁⲛⲟⲕ ϯⲛⲁⲟⲩⲱⲛ ⲛⲧⲉϥⲧⲁⲡⲣⲟ ⲙⲛⲧⲉⲕⲧⲁⲡⲣⲟ ⲛⲧⲁⲧⲥⲁⲃⲉⲧⲏⲩⲧⲛ ⲉⲛⲉⲧⲉⲧⲛⲛⲁⲁⲁⲩ

16 ⲁⲩⲱ ⲛⲧⲟϥ ⲡⲉⲧⲛⲁϣⲁϫⲉ ⲛⲙⲙⲁⲕ ⲛⲛⲁϩⲣⲙⲡⲗⲁⲟⲥ ⲛϥϣⲱⲡⲉ ⲛⲁⲕ ⲛⲧⲁⲡⲣⲟ ⲛⲧⲟⲕ ⲇⲉ ⲕⲛⲁϣⲱⲡⲉ ⲛⲁϥ ⲛⲛⲁϩⲣⲙⲡⲛⲟⲩⲧⲉ

17 ⲉⲕⲉϫⲓ ⲇⲉ ⲙⲡⲉⲓϭⲉⲣⲱⲃ ⲉⲛⲧⲁϥⲕⲧⲟϥ ⲉⲩϩⲟϥ ϩⲣⲁⲓ ϩⲛⲧⲉⲕϭⲓϫ ⲡⲁⲓ ⲉⲧⲕⲛⲁⲉⲓⲣⲉ ⲛⲙⲙⲁⲉⲓⲛ ϩⲣⲁⲓ ⲛϩⲏⲧϥ

18 ⲁϥⲃⲱⲕ ⲇⲉ ⲛϭⲓⲙⲱⲩⲥⲏⲥ ⲁϥⲕⲧⲟϥ ϣⲁⲓⲟⲑⲟⲣ ⲡⲉϥϣⲟⲙ ⲉϥϫⲱ ⲙⲙⲟⲥ ϫⲉϯⲛⲁⲃⲱⲕ ⲛⲧⲁⲕⲧⲟⲉⲓ ϣⲁⲛⲁⲥⲛⲏⲩ ⲛⲁⲓ ⲉⲧϣⲟⲟⲡ ϩⲛⲕⲏⲙⲉ ⲧⲁⲛⲁⲩ ϫⲉⲉⲧⲓ ⲥⲉⲟⲛϩ ⲡⲉϫⲉⲓⲟⲑⲟⲣ ⲙⲙⲱⲩⲥⲏⲥ ϫⲉⲃⲱⲕ ⲉⲕⲟⲩⲟϫ

19 ⲙⲛⲛⲥⲁⲛⲉϩⲟⲟⲩ ⲇⲉ ⲉⲧⲙⲙⲁⲩ ⲉⲧⲛⲁϣⲱⲟⲩ ⲁϥⲙⲟⲩ ⲛϭⲓⲡⲣⲣⲟ ⲛⲕⲏⲙⲉ ⲡⲉϫⲁϥ ⲛϭⲓⲡϫⲟⲉⲓⲥ ⲙⲙⲱⲩⲥⲏⲥ ϩⲣⲁⲓ ϩⲙⲡⲕⲁϩ ⲙⲙⲁⲇⲓϩⲁⲙ ϫⲉⲙⲟⲟϣⲉ ⲛⲅⲃⲱⲕ ⲉϩⲣⲁⲓ ⲉⲕⲏⲙⲉ ⲁⲩⲙⲟⲩ ⲅⲁⲣ ⲛϭⲓⲟⲩⲟⲛ ⲛⲓⲙ ⲉⲧϣⲓⲛⲉ ⲛⲥⲁⲧⲉⲕⲯⲩⲭⲏ

20 ⲁϥϫⲓ ⲇⲉ ⲛϭⲓⲙⲱⲩⲥⲏⲥ ⲛⲧⲉϥⲥϩⲓⲙⲉ ⲙⲛⲛⲉϥϣⲏⲣⲉ ⲁϥⲧⲁⲗⲟ ⲙⲙⲟⲟⲩ ⲉϩⲣⲁⲓ ⲉϫⲛⲛϥⲁⲓⲛⲁϩⲃ ⲁϥⲕⲧⲟϥ ⲉϩⲣⲁⲓ ⲉⲕⲏⲙⲉ ⲁⲙⲱⲩⲥⲏⲥ ⲇⲉ ϫⲓ ⲙⲡϭⲉⲣⲱⲃ ⲡⲉⲃⲟⲗ ϩⲓⲧⲟⲟⲧϥ ⲙⲡⲛⲟⲩⲧⲉ ϩⲣⲁⲓ ϩⲛⲧⲉϥϭⲓϫ

21 ⲡⲉϫⲁϥ ⲇⲉ ⲛϭⲓⲡϫⲟⲉⲓⲥ ⲙⲙⲱⲩⲥⲏⲥ ϫⲉⲉⲕⲃⲱⲕ ⲁⲩⲱ ⲉⲕⲕⲱⲧⲉ ⲙⲙⲟⲕ ⲉϩⲣⲁⲓ ⲉⲕⲏⲙⲉ ϯϩⲧⲏⲕ ⲉⲣⲛⲉϣⲡⲏⲣⲉ ⲧⲏⲣⲟⲩ ⲛⲧⲁⲓⲁⲁⲩ ϩⲛⲛⲉⲕϭⲓϫ ⲙⲡⲉⲙⲧⲟ ⲉⲃⲟⲗ ⲙⲫⲁⲣⲁⲱ ⲁⲛⲟⲕ ⲇⲉ ϯⲛⲁϯⲛϣⲟⲧ ⲙⲡⲉϥϩⲏⲧ ⲛϥⲧⲙⲕⲱ ⲉⲃⲟⲗ ⲙⲡⲗⲁⲟⲥ

22 ⲛⲧⲟⲕ ⲇⲉ ⲉⲕⲉϫⲟⲟⲥ ⲙⲫⲁⲣⲁⲱ ϫⲉⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉⲡⲁϣⲏⲣⲉ ⲡⲁϣⲣⲡⲙⲙⲓⲥⲉ ⲡⲓⲥⲣⲁⲏⲗ

23 ⲁⲓϫⲟⲟⲥ ⲇⲉ ⲛⲁⲕ ϫⲉⲕⲱ ⲉⲃⲟⲗ ⲙⲡⲁⲗⲁⲟⲥ ϫⲉⲕⲁⲥ ⲉϥⲉϣⲙϣⲉ ⲛⲁⲓ ⲉϣⲱⲡⲉ ϭⲉ ⲛⲅⲟⲩⲱϣ ⲁⲛ ⲉⲕⲱ ⲙⲙⲟϥ ⲉⲃⲟⲗ ⲉⲓⲥ ϩⲏⲏⲧⲉ ⲁⲛⲟⲕ ϯⲛⲁⲙⲟⲩⲟⲩⲧ ⲙⲡⲉⲕϣⲣⲡⲙⲙⲓⲥⲉ

24 ⲁⲥϣⲱⲡⲉ ⲇⲉ ϩⲣⲁⲓ ϩⲛⲧⲉϩⲓⲏ ⲙⲡⲙⲁ ⲛⲟⲩⲉϩⲛⲁⲩ ⲁⲟⲩⲁⲅⲅⲉⲗⲟⲥ ⲧⲱⲙⲧ ⲉⲣⲟϥ ⲛⲧⲉⲡϫⲟⲉⲓⲥ ⲁϥϣⲓⲛⲉ ⲛⲥⲁⲙⲟⲩⲟⲩⲧϥ

25 ⲁⲥⲉⲫⲫⲱⲣⲁ ϫⲓ ⲛⲟⲩⲱⲛⲉ ⲁⲥⲥⲃⲃⲉ ⲛⲧⲙⲛⲧⲁⲧⲥⲃⲃⲉ ⲙⲡⲉⲥϣⲏⲣⲉ ⲁⲥϩⲉ ϩⲁⲛⲉϥⲟⲩⲉⲣⲏⲧⲉ ⲡⲉϫⲁⲥ ϫⲉⲁϥⲁϩⲉⲣⲁⲧϥ ⲛϭⲓⲡⲉⲥⲛⲟϥ ⲙⲡⲥⲃⲃⲉ ⲙⲡⲁϣⲏⲣⲉ

26 ⲁϥⲥⲁϩⲱϥ ⲉⲃⲟⲗ ⲙⲙⲟⲥ ϫⲉⲁⲥϫⲟⲟⲥ ϫⲉⲁϥⲁϩⲉⲣⲁⲧϥ ⲛϭⲓⲡⲉⲥⲛⲟϥ ⲙⲡⲥⲃⲃⲉ ⲙⲡⲁϣⲏⲣⲉ

27 ⲡⲉϫⲁϥ ⲇⲉ ⲛϭⲓⲡϫⲟⲉⲓⲥ ⲛⲁⲁⲣⲱⲛ ϫⲉⲃⲱⲕ ⲛⲕⲧⲱⲙⲧ ⲉⲙⲱⲩⲥⲏⲥ ϩⲣⲁⲓ ϩⲛⲧⲉⲣⲏⲙⲟⲥ ⲁϥⲃⲱⲕ ⲇⲉ ⲉⲧⲱⲙⲧ ⲉⲣⲟϥ ϩⲣⲁⲓ ϩⲙⲡⲧⲟⲟⲩ ⲙⲡⲛⲟⲩⲧⲉ ⲁⲩⲁⲥⲡⲁⲍⲉ ⲛⲛⲉⲩⲉⲣⲏⲩ

28 ⲁⲙⲱⲩⲥⲏⲥ ⲇⲉ ϫⲱ ⲛⲛϣⲁϫⲉ ⲧⲏⲣⲟⲩ ⲉⲁⲁⲣⲱⲛ ⲡⲉϥⲥⲟⲛ ⲛⲁⲓ ⲛⲧⲁϥϫⲟⲟⲩ ⲛϭⲓⲡϫⲟⲉⲓⲥ ⲁⲩⲱ ⲙⲙⲁⲉⲓⲛ ⲧⲏⲣⲟⲩ ⲉⲛⲧⲁϥϩⲟⲛⲟⲩ ⲉⲧⲟⲟⲧϥ

29 ⲁϥⲃⲱⲕ ⲇⲉ ⲛϭⲓⲙⲱⲩⲥⲏⲥ ⲙⲛⲁⲁⲣⲱⲛ ⲁⲩⲥⲱⲟⲩϩ ⲉϩⲟⲩⲛ ⲛⲛϩⲗⲗⲟⲓ ⲛⲛϣⲏⲣⲉ ⲙⲡⲓⲥⲣⲁⲏⲗ

30 ⲁϥϫⲱ ⲛⲁⲩ ⲛϭⲓⲁⲁⲣⲱⲛ ⲛⲛϣⲁϫⲉ ⲧⲏⲣⲟⲩ ⲛⲧⲁⲡⲛⲟⲩⲧⲉ ϩⲱⲛ ⲉⲧⲟⲟⲧϥ ⲙⲙⲱⲩⲥⲏⲥ ⲙⲙⲟⲟⲩ ⲁⲩⲱ ⲁϥⲉⲓⲣⲉ ⲛⲙⲙⲁⲉⲓⲛ ⲙⲡⲉⲙⲧⲟ ⲉⲃⲟⲗ ⲙⲡⲗⲁⲟⲥ

31 ⲁϥⲡⲓⲥⲧⲉⲩⲉ ⲛϭⲓⲡⲗⲁⲟⲥ ⲁⲩⲱ ⲁϥⲣⲁϣⲉ ϫⲉⲁⲡⲛⲟⲩⲧⲉ ϭⲙⲡϣⲓⲛⲉ ⲛⲛϣⲏⲣⲉ ⲙⲡⲓⲥⲣⲁⲏⲗ ⲁⲩⲱ ϫⲉⲁϥⲛⲁⲩ ⲉⲧⲉⲩⲑⲗⲓⲯⲓⲥ ⲁϥⲡⲁϩⲧϥ ⲇⲉ ⲛϭⲓⲡⲗⲁⲟⲥ ⲁϥⲟⲩⲱϣⲧ ⲙⲡϫⲟⲉⲓⲥ