Exodus 13 — Coptic (Sahidic)

1 ⲡⲉϫⲁϥ ⲇⲉ ⲛϭⲓⲡϫⲟⲉⲓⲥ ⲙⲙⲱⲩⲥⲏⲥ

2 ϫⲉⲧⲃⲃⲟ ⲛⲁⲓ ⲛⲡϣⲣⲡⲙⲙⲓⲥⲉ ⲛⲓⲙ ⲉⲧⲟⲩⲛⲁϫⲡⲟϥ ⲉⲧⲛⲁⲟⲩⲱⲛϩ ϩⲟⲟⲩⲧ ⲛⲓⲙ ϩⲛⲛϣⲏⲣⲉ ⲙⲡⲓⲥⲣⲁⲏⲗ ϫⲓⲛⲙⲡⲣⲱⲙⲉ ϣⲁⲡⲧⲃⲛⲏ ⲉϥⲛⲁϣⲱⲡⲉ ⲛⲁⲓ

3 ⲡⲉϫⲁϥ ⲇⲉ ⲛϭⲓⲙⲱⲩⲥⲏⲥ ⲛⲛⲁϩⲣⲛⲡⲗⲁⲟⲥ ϫⲉⲁⲣⲓⲡⲙⲉⲉⲩⲉ ⲙⲡⲉⲓϩⲟⲟⲩ ⲉⲛⲧⲁⲧⲉⲧⲛⲉⲓ ⲉⲃⲟⲗ ⲛϩⲏⲧϥ ϩⲙⲡⲕⲁϩ ⲛⲕⲏⲙⲉ ⲉⲃⲟⲗ ϩⲛⲡⲏⲓ ⲛⲧⲉⲧⲛⲙⲛⲧϩⲙϩⲁⲗ ϩⲣⲁⲓ ⲅⲁⲣ ϩⲛⲟⲩϭⲓϫ ⲉⲥϫⲟⲟⲣ ⲁϥⲛⲧⲏⲩⲧⲛ ⲉⲃⲟⲗ ϩⲛⲡⲉⲓⲙⲁ ⲛⲛⲉⲧⲛⲟⲩⲱⲙ ⲟⲩⲑⲁⲃ

4 ϩⲣⲁⲓ ⲅⲁⲣ ϩⲙⲡϩⲟⲟⲩ ⲛϩⲟⲟⲩ ⲛⲧⲱⲧⲛ ⲉⲧⲉⲧⲛⲛⲏⲩ ⲉⲃⲟⲗ ϩⲙⲡⲉⲃⲟⲧ ⲛⲃⲣⲣⲉ

5 ⲉⲥⲉϣⲱⲡⲉ ⲉⲣⲉϣⲁⲛⲧⲡϫⲟⲉⲓⲥ ⲡⲉⲕⲛⲟⲩⲧⲉ ϫⲓⲧⲕ ⲉϩⲟⲩⲛ ⲉⲡⲕⲁϩ ⲛⲛⲉⲭⲁⲛⲁⲛⲁⲓⲟⲥ ⲙⲛⲛⲉⲭⲉⲧⲧⲁⲓⲟⲥ ⲙⲛⲛⲉⲩⲁⲓⲟⲥ ⲙⲛⲛⲁⲙⲟⲣⲣⲁⲓⲟⲥ ⲙⲛⲛⲉⲅⲉⲣⲅⲉⲥⲁⲓⲟⲥ ⲙⲛⲛⲉⲫⲉⲣⲉⲍⲁⲓⲟⲥ ⲙⲛⲛⲓⲉⲃⲟⲩⲥⲁⲓⲟⲥ ⲧⲁⲓ ⲛⲧⲁⲡϫⲟⲉⲓⲥ ⲱⲣⲕ ⲙⲙⲟϥ ⲛⲛⲉⲕⲉⲓⲟⲧⲉ ⲉϯ ⲙⲙⲟϥ ⲛⲁⲕ ⲟⲩⲕⲁϩ ⲉϥϣⲟⲩⲉ ⲉⲣⲱⲧⲉ ⲉⲃⲟⲗ ϩⲓⲉⲃⲓⲱ ⲉⲕⲉⲉⲓⲣⲉ ⲙⲡⲉⲓϣⲙϣⲉ ⲙⲡⲉⲓⲉⲃⲟⲧ

6 ⲥⲟⲟⲩ ⲛϩⲟⲟⲩ ⲉⲧⲉⲧⲛⲉⲟⲩⲱⲙ ⲛϩⲉⲛⲁⲧⲑⲁⲃ ϩⲙⲡⲙⲉϩⲥⲁϣϥ ⲇⲉ ⲛϩⲟⲟⲩ ⲡϣⲁ ⲙⲡϫⲟⲉⲓⲥ ⲡⲉ

7 ⲉⲧⲉⲧⲛⲉⲟⲩⲱⲙ ⲛϩⲉⲛⲁⲧⲑⲁⲃ ⲙⲡⲥⲁϣϥ ⲛϩⲟⲟⲩ ⲛⲛⲉⲗⲁⲁⲩ ⲉϣⲁϥϫⲓⲑⲁⲃ ⲟⲩⲇⲉ ⲑⲁⲃ ⲟⲩⲱⲛϩ ⲉⲃⲟⲗ ϩⲛⲛⲉⲕⲧⲟⲟϣ ⲧⲏⲣⲟⲩ

8 ⲛⲅϫⲟⲟⲥ ⲙⲡⲉⲕϣⲏⲣⲉ ϩⲙⲡⲉϩⲟⲟⲩ ⲉⲧⲙⲙⲁⲩ ⲉⲕϫⲱ ⲙⲙⲟⲥ ϫⲉⲉⲧⲃⲉⲡⲁⲓ ⲁⲡϫⲟⲉⲓⲥ ⲡⲛⲟⲩⲧⲉ ⲉⲓⲣⲉ ⲛⲁⲓ ⲉⲉⲓⲛⲏⲩ ⲉⲃⲟⲗ ϩⲛⲕⲏⲙⲉ

9 ⲛϥϣⲱⲡⲉ ⲛⲟⲩⲙⲁⲉⲓⲛ ⲉϩⲣⲁⲓ ⲉϫⲛⲧⲉⲕϭⲓϫ ⲁⲩⲱ ⲟⲩⲣⲡⲙⲉⲉⲩⲉ ⲙⲡⲉⲙⲧⲟ ⲉⲃⲟⲗ ⲛⲛⲉⲕⲃⲁⲗ ϫⲉⲕⲁⲥ ⲉⲣⲉⲡⲛⲟⲙⲟⲥ ⲙⲡϫⲟⲉⲓⲥ ϣⲱⲡⲉ ϩⲛⲧⲉⲕⲧⲁⲡⲣⲟ ϩⲣⲁⲓ ⲅⲁⲣ ϩⲛⲟⲩϭⲓϫ ⲉⲥϫⲟⲟⲣ ⲁⲡϫⲟⲉⲓⲥ ⲡⲉⲕⲛⲟⲩⲧⲉ ⲛⲧⲕ ⲉⲃⲟⲗ ϩⲛⲕⲏⲙⲉ

10 ⲛⲧⲉⲧⲛϩⲁⲣⲉϩ ⲉⲡⲉⲓⲛⲟⲙⲟⲥ ⲕⲁⲧⲁⲛⲉoⲩⲟⲉⲓϣ ⲛⲛⲉϥⲟⲩⲛⲟⲟⲩⲉ ϫⲓⲛⲛⲉϥϩⲟⲟⲩ ϣⲁϩⲣⲁⲓ ⲉⲛⲉϥⲟⲩⲛⲟⲟⲩⲉ

11 ⲛⲥϣⲱⲡⲉ ⲉⲣⲉϣⲁⲛⲧⲡϫⲟⲉⲓⲥ ⲡⲉⲕⲛⲟⲩⲧⲉ ϫⲓⲧⲕ ⲉϩⲟⲩⲛ ⲉⲡⲕⲁϩ ⲛⲛⲉⲭⲁⲛⲁⲛⲁⲓⲟⲥ ⲛⲧϩⲉ ⲛⲧⲁϥⲱⲣⲕ ⲙⲙⲟϥ ⲛⲛⲉⲕⲉⲓⲟⲧⲉ ⲛϥϯ ⲙⲙⲟϥ ⲛⲁⲕ

12 ⲉⲕⲉⲡⲱⲣϫ ⲉⲃⲟⲗ ⲛϩⲟⲟⲩⲧ ⲛⲓⲙ ⲉⲧⲛⲁⲟⲩⲱⲛ ⲛⲧⲟⲟⲧⲉ ⲙⲡϫⲟⲉⲓⲥ ⲡⲉⲕⲛⲟⲩⲧⲉ ⲟⲩⲟⲛ ⲛⲓⲙ ⲉⲧⲛⲁⲟⲩⲱⲛ ⲛⲧⲟⲟⲧⲉ ⲛⲛⲉⲕⲉϩⲟⲟⲩ ⲙⲛⲛⲉⲕⲧⲃⲛⲟⲟⲩⲉ ⲛⲁⲓ ⲉⲧⲛⲁϣⲱⲡⲉ ⲛⲁⲕ ⲛϩⲟⲟⲩⲧ ⲉⲕⲉⲧⲃⲃⲟ ⲙⲙⲟⲟⲩ ⲙⲡϫⲟⲉⲓⲥ

13 ⲉⲓⲱ ⲛⲓⲙ ⲉⲧⲛⲁⲟⲩⲱⲛ ⲛⲧⲟⲟⲧⲉ ⲉⲕⲛⲁϣⲃⲧϥ ⲛⲟⲩⲉⲥⲟⲟⲩ ⲉϣⲱⲡⲉ ⲇⲉ ⲉⲕⲧⲙϣⲃⲧϥ ⲉⲕⲉⲥⲱⲧⲉ ⲙⲙⲟϥ ϣⲣⲡⲙⲙⲓⲥⲉ ⲛⲓⲙ ⲛⲣⲱⲙⲉ ⲉⲃⲟⲗ ϩⲛⲛⲉⲕϣⲏⲣⲉ ⲉⲕⲉⲥⲱⲧⲉ ⲙⲙⲟⲟⲩ

14 ⲉⲣϣⲁⲛⲡⲉⲕϣⲏⲣⲉ ⲇⲉ ϫⲛⲟⲩⲕ ⲉϥϫⲱ ⲙⲙⲟⲥ ⲙⲛⲛⲥⲱⲥ ⲉⲕⲉϫⲟⲟⲥ ⲛⲁϥ ϫⲉϩⲣⲁⲓ ϩⲛⲟⲩϭⲓϫ ⲉⲥϫⲟⲟⲣ ⲁⲡϫⲟⲉⲓⲥ ⲛⲧⲛⲉⲃⲟⲗ ϩⲙⲡⲕⲁϩ ⲛⲕⲏⲙⲉ ⲉⲃⲟⲗ ϩⲛⲡⲏⲓ ⲛⲧⲉⲛⲙⲛⲧϩⲙϩⲁⲗ

15 ⲁⲩⲱ ⲛⲧⲉⲣⲉϥⲛϣⲟⲧ ⲛϭⲓⲡϩⲏⲧ ⲙⲫⲁⲣⲁⲱ ⲉⲕⲁⲁⲛ ⲉⲃⲟⲗ ⲁϥⲙⲟⲩⲟⲩⲧ ⲛϣⲣⲡⲙⲙⲓⲥⲉ ⲛⲓⲙ ϩⲣⲁⲓ ϩⲙⲡⲕⲁϩ ⲛⲕⲏⲙⲉ ϫⲓⲛⲛϣⲣⲡⲙⲙⲓⲥⲉ ⲛⲛⲣⲱⲙⲉ ϣⲁϩⲣⲁⲓ ⲉⲛϣⲣⲡⲙⲙⲓⲥⲉ ⲛⲛⲧⲃⲛⲟⲟⲩⲉ ⲉⲧⲃⲉⲡⲁⲓ ⲁⲛⲟⲕ ϯϣⲱⲱⲧ ⲛⲛⲁϩⲣⲙⲡϫⲟⲉⲓⲥ ⲛϩⲟⲟⲩⲧ ⲛⲓⲙ ⲉⲧⲛⲁⲟⲩⲱⲛ ⲉⲧⲟⲟⲧⲉ ⲁⲩⲱ ϯⲛⲁⲥⲱⲧⲉ ⲛϣⲣⲡⲙⲙⲓⲥⲉ ⲛⲓⲙ ⲛⲛⲁϣⲏⲣⲉ

16 ⲛϥϣⲱⲡⲉ ⲛⲟⲩⲙⲁⲉⲓⲛ ⲉϩⲣⲁⲓ ⲉϫⲛⲧⲉⲕϭⲓϫ ⲁⲩⲱ ⲛⲁⲧⲕⲓⲙ ⲙⲡⲉⲙⲧⲟ ⲉⲃⲟⲗ ⲛⲛⲉⲕⲃⲁⲗ ϩⲣⲁⲓ ⲛⲅⲁⲣ ϩⲛⲟⲩϭⲓϫ ⲉⲥϫⲟⲟⲣ ⲡϫⲟⲉⲓⲥ ⲁϥⲛⲧⲕ ⲉⲃⲟⲗ ϩⲙⲡⲕⲁϩ ⲛⲕⲏⲙⲉ

17 ⲛⲧⲉⲣⲉⲫⲁⲣⲁⲱ ⲇⲉ ⲕⲱ ⲉⲃⲟⲗ ⲙⲡⲗⲁⲟⲥ ⲙⲡⲉⲛⲟⲩⲧⲉ ϫⲓⲙⲟⲉⲓⲧ ϩⲏⲧⲟⲩ ⲉⲧⲉϩⲓⲏ ⲙⲫⲓⲗⲓⲥⲧⲓⲉⲓⲙ ϫⲉⲛⲉⲥϩⲏⲛ ⲉϩⲟⲩⲛ ⲁϥϫⲟⲟⲥ ⲛⲅⲁⲣ ⲛϭⲓⲡⲛⲟⲩⲧⲉ ϫⲉⲙⲏⲡⲟⲧⲉ ⲛϥⲣϩⲧⲏϥ ⲛϭⲓⲡⲗⲁⲟⲥ ⲉϥϣⲁⲛⲛⲁⲩ ⲉⲩⲡⲟⲗⲉⲙⲟⲥ ⲛϥⲕⲧⲟϥ ⲉϩⲣⲁⲓ ⲉⲕⲏⲙⲉ

18 ⲁⲡⲛⲟⲩⲧⲉ ⲕⲧⲟ ⲙⲡⲗⲁⲟⲥ ⲉⲧⲉϩⲓⲏ ⲉⲧϫⲁⲓⲉⲓⲱⲟⲩ ⲉⲧⲉⲣⲩⲑⲣⲁ ⲑⲁⲗⲁⲥⲥⲁ ϩⲛⲧⲙⲉϩϯ ⲇⲉ ⲛⲅⲉⲛⲉⲁ ⲁⲛϣⲏⲣⲉ ⲙⲡⲓⲥⲣⲁⲏⲗ ⲁⲩⲉⲓ ⲉϩⲣⲁⲓ ⲉⲃⲟⲗ ϩⲛⲕⲏⲙⲉ

19 ⲁϥϫⲓ ⲇⲉ ⲛϭⲓⲙⲱⲩⲥⲏⲥ ⲛⲛⲕⲉⲉⲥ ⲛⲓⲱⲥⲏⲫ ⲛⲙⲙⲁϥ ϩⲛⲟⲩⲁⲛⲁϣ ⲛⲅⲁⲣ ⲁⲓⲱⲥⲏⲫ ⲧⲁⲣⲕⲟ ⲛⲛϣⲏⲣⲉ ⲙⲡⲓⲥⲣⲁⲏⲗ ⲉϥϫⲱ ⲙⲙⲟⲥ ϫⲉϩⲛⲟⲩϭⲙⲡϣⲓⲛⲉ ⲡϫⲟⲉⲓⲥ ⲛⲁϭⲙⲡⲉⲧⲛϣⲓⲛⲉ ⲉⲧⲉⲧⲛⲉϫⲓ ⲛⲛⲁⲕⲉⲉⲥ ⲉϩⲣⲁⲓ ⲛⲙⲙⲏⲧⲛ

20 ⲁⲩⲧⲱⲟⲩⲛ ⲇⲉ ⲛϭⲓⲛϣⲏⲣⲉ ⲙⲡⲓⲥⲣⲁⲏⲗ ⲉⲃⲟⲗ ϩⲛⲥⲟⲭⲭⲱⲑ ⲁⲩⲙⲟⲟϣⲉ ⲉϩⲣⲁⲓ ⲉⲛⲟⲑⲟⲙ ϩⲁⲧⲙ ⲡϫⲁⲓⲉ

21 ⲡⲛⲟⲩⲧⲉ ⲇⲉ ⲛⲉϥⲙⲟⲟϣⲉ ϩⲏⲧⲟⲩ ⲡⲉ ⲙⲡⲉϩⲟⲟⲩ ⲙⲉⲛ ⲛⲟⲩⲥⲧⲩⲗⲟⲥ ⲛⲕⲗⲟⲟⲗⲉ ⲉⲧⲟⲩⲟⲟⲩ ⲉⲧⲉϩⲓⲏ ⲛⲧⲉⲩϣⲏ ⲇⲉ ⲛⲟⲩⲥⲧⲩⲗⲟⲥ ⲛⲥⲁⲧⲉ

22 ⲙⲡϥⲱϫⲛ ⲛϭⲓⲡⲉⲥⲧⲩⲗⲟⲥ ⲛⲕⲗⲟⲟⲗⲉ ⲙⲡⲉϩⲟⲟⲩ ⲁⲩⲱ ⲡⲉⲥⲧⲩⲗⲟⲥ ⲛⲥⲁⲧⲉ ⲛⲧⲉⲩϣⲏ ⲙⲡⲉⲙⲧⲟ ⲉⲃⲟⲗ ⲙⲡⲗⲁⲟⲥ ⲧⲏⲣϥ