Deuteronomy 34 — Coptic (Sahidic)

1 ⲙⲱⲩⲥⲏⲥ ⲇⲉ ⲁϥⲡⲱⲧ ⲉϩⲣⲁⲓ ⲉϫⲛⲁⲣⲁⲙⲱⲑ ⲛⲧⲉⲙⲱⲁⲃ ⲉϫⲙⲡⲧⲟⲟⲩ ⲛⲁⲃⲁⲩ ⲉϫⲙⲡⲕⲟⲟϩ ⲛⲫⲁⲥⲅⲁ ⲉⲧⲙⲡⲉⲙⲧⲟ ⲉⲃⲟⲗ ⲛϩⲓⲉⲣⲓⲭⲱ ⲁⲩⲱ ⲡϫⲟⲉⲓⲥ ⲁϥⲧⲟⲩⲟϥ ⲉⲡⲕⲁϩ ⲧⲏⲣϥ ⲛⲅⲁⲗⲁⲁⲇ ϣⲁϩⲣⲁⲓ ⲉⲇⲁⲛ

2 ⲁⲩⲱ ⲡⲕⲁϩ ⲧⲏⲣϥ ⲛⲛⲉⲡⲑⲁⲗⲉⲓⲙ ⲙⲛⲡⲕⲁϩ ⲛⲉⲫⲣⲁⲓⲙ ⲙⲛⲙⲁⲛⲁⲥⲥⲏ ⲁⲩⲱ ⲡⲕⲁϩ ⲧⲏⲣϥ ⲛⲓⲟⲩⲇⲁ ϣⲁⲧⲉⲑⲁⲗⲁⲥⲥⲁ ⲛϩⲁⲏ

3 ⲙⲛⲧⲉⲣⲏⲙⲟⲥ ⲙⲛⲡⲕⲱⲧⲉ ⲛϩⲓⲉⲣⲓⲭⲱ ⲧⲡⲟⲗⲓⲥ ⲛⲛⲣⲙ ⲛⲧⲉⲫⲟⲓⲛⲓⲕⲏ ϣⲁϩⲣⲁⲓ ⲉⲥⲏⲅⲱⲣ

4 ⲡⲉϫⲉⲡϫⲟⲉⲓⲥ ⲇⲉ ⲙⲙⲱⲩⲥⲏⲥ ϫⲉⲡⲁⲓ ⲡⲉ ⲡⲕⲁϩ ⲉⲛⲧⲁⲓⲱⲣⲕ ⲉⲧⲃⲏⲏⲧϥ ⲛⲁⲃⲣⲁϩⲁⲙ ⲙⲛⲓⲥⲁⲁⲕ ⲙⲛⲓⲁⲕⲱⲃ ⲉⲓϫⲱ ⲙⲙⲟⲥ ⲛⲁⲩ ϫⲉϯⲛⲁⲧⲁⲁϥ ⲙⲡⲉⲧⲉⲛⲥⲡⲉⲣⲙⲁ ⲁⲓⲧⲣⲉⲛⲉⲕⲃⲁⲗ ⲛⲁⲩ ⲉⲣⲟϥ ⲛⲅⲛⲁⲃⲱⲕ ⲇⲉ ⲉϩⲟⲩⲛ ⲉⲣⲟϥ ⲁⲛ

5 ⲁⲩⲱ ⲁϥⲙⲟⲩ ϩⲙⲡⲙⲁ ⲉⲧⲙⲙⲁⲩ ⲛϭⲓⲙⲱⲩⲥⲏⲥ ⲡϩⲙϩⲁⲗ ⲛⲡϫⲟⲉⲓⲥ ϩⲙⲡⲕⲁϩ ⲙⲙⲱⲁⲃ ϩⲓⲧⲙⲡϣⲁϫⲉ ⲛⲡϫⲟⲉⲓⲥ

6 ⲁⲩⲱ ⲁⲩⲧⲟⲙⲥϥ ϩⲛⲅⲁⲓ ϩⲓⲧⲟⲩⲛ ⲡⲏⲓ ⲙⲫⲟⲅⲱⲣ ⲁⲩⲱ ⲙⲛⲗⲁⲁⲩ ⲥⲟⲟⲩⲛ ⲛⲧⲉϥⲕⲁⲓⲥⲉ ϣⲁϩⲣⲁⲓ ⲉⲡϩⲟⲟⲩ

7 ⲙⲱⲩⲥⲏⲥ ⲇⲉ ⲛⲉϥϩⲛϣⲉ ϫⲟⲩⲱⲧⲉ ⲛⲣⲟⲙⲡⲉ ⲛⲧⲉⲣⲉϥⲙⲟⲩ ⲁⲩⲱ ⲛⲉϥⲃⲁⲗ ⲙⲡⲟⲩⲣϩⲗⲟⲥⲧⲛ ⲟⲩⲧⲉ ⲙⲡⲟⲩⲧⲁⲕⲟ

8 ⲁⲩⲱ ⲛϣⲏⲣⲉ ⲙⲡⲓⲥⲣⲁⲏⲗ ⲁⲩⲣⲓⲙⲉ ⲙⲙⲱⲩⲥⲏⲥ ϩⲛⲁⲣⲁⲃⲱⲑ ⲛⲧⲉⲙⲱⲁⲃ ϩⲓϫⲛⲡⲓⲟⲣⲇⲁⲛⲏⲥ ⲙⲡⲉⲙⲧⲟ ⲉⲃⲟⲗ ⲛϩⲓⲉⲣⲓⲭⲱ ⲙⲙⲁⲁⲃ ⲛϩⲟⲟⲩ ⲛⲧⲉⲣⲟⲩϫⲱⲕ ⲇⲉ ⲉⲃⲟⲗ ⲛϭⲓⲛⲉϩⲟⲟⲩ ⲙⲡϩⲏⲃⲉ ⲙⲛⲡⲣⲓⲙⲉ ⲙⲙⲱⲩⲥⲏⲥ

9 ⲁⲩⲱ ⲓⲏⲥⲟⲩⲥ ⲡϣⲏⲣⲉ ⲛⲛⲁⲩⲏ ⲁϥⲙⲟⲩϩ ⲙⲡⲛⲉⲩⲙⲁ ⲙⲙⲛⲧⲣⲙⲛⲧϩⲏⲧ ⲁⲙⲱⲩⲥⲏⲥ ⲅⲁⲣ ⲕⲁⲧⲟⲟⲧϥ ϩⲓϫⲱϥ ⲁⲩⲱ ⲁⲩⲥⲱⲧⲙ ⲛⲥⲱϥ ⲛϭⲓⲛϣⲏⲣⲉ ⲙⲡⲓⲥⲣⲁⲏⲗ ⲉⲁⲩⲉⲓⲣⲉ ⲕⲁⲧⲁⲧϩⲉ ⲉⲛⲧⲁⲡϫⲟⲉⲓⲥ ϩⲱⲛ ⲉⲧⲟⲟⲧϥ ⲙⲙⲱⲩⲥⲏⲥ

10 ⲁⲩⲱ ⲙⲡⲉⲕⲉⲡⲣⲟⲫⲏⲧⲏⲥ ⲧⲱⲟⲩⲛ ϩⲙⲡⲓⲥⲣⲁⲏⲗ ⲛⲧϩⲉ ⲙⲙⲱⲩⲥⲏⲥ ⲉⲁⲡϫⲟⲉⲓⲥ ⲥⲟⲩⲱⲛϥ ⲛϩⲟ ϩⲓϩⲟ

11 ϩⲛϩⲉⲛⲙⲁⲉⲓⲛ ⲧⲏⲣⲟⲩ ⲙⲛϩⲉⲛϣⲡⲏⲣⲉ ⲡⲁⲓ ⲉⲛⲧⲁⲡϫⲟⲉⲓⲥ ϫⲟⲟⲩϥ ⲉⲧⲣⲉϥⲁⲁⲩ ϩⲛⲡⲕⲁϩ ⲛⲕⲏⲙⲉ ϩⲙⲫⲁⲣⲁⲱ ⲙⲛⲛⲉϥϩⲙϩⲁⲗ ⲧⲏⲣⲟⲩ ⲙⲛⲡⲉϥⲕⲁϩ

12 ⲛⲛⲟϭ ⲛϣⲡⲏⲣⲉ ⲁⲩⲱ ⲧϭⲓϫ ⲉⲧϫⲟⲟⲣ ⲉⲛⲧⲁⲙⲱⲩⲥⲏⲥ ⲁⲁⲩ ⲙⲡⲉⲙⲧⲟ ⲉⲃⲟⲗ ⲙⲡⲓⲥⲣⲁⲏⲗ ⲧⲏⲣϥ