Deuteronomy 30 — Coptic (Sahidic)

1 ⲁⲩⲱ ⲉⲩϣⲁⲛⲉⲓ ⲉϩⲣⲁⲓ ⲉϫⲱⲕ ⲛϭⲓⲛϣⲁϫⲉ ⲧⲏⲣⲟⲩ ⲙⲡⲉⲥⲙⲟⲩ ⲛⲙⲡⲥⲁϩⲟⲩ ⲛⲛⲉⲛⲧⲁⲓⲁⲁⲩ ϩⲓϩⲏ ⲙⲙⲟⲕ ⲉⲕⲉⲕⲁⲁⲩ ϩⲙⲡⲉⲕϩⲏⲧ ϩⲛⲛϩⲉⲑⲛⲟⲥ ⲧⲏⲣⲟⲩ ⲉⲧⲉⲣⲉⲡϫⲟⲉⲓⲥ ⲛⲁϫⲟⲟⲣⲉⲕ ⲉⲃⲟⲗ ⲛϩⲏⲧⲟⲩ

2 ⲁⲩⲱ ⲉⲕⲉⲕⲟⲧⲕ ⲉⲡϫⲟⲉⲓⲥ ⲡⲉⲕⲛⲟⲩⲧⲉ ⲛⲅⲥⲱⲧⲙ ⲛⲥⲁⲡⲉϥϩⲣⲟⲟⲩ ⲕⲁⲧⲁϣⲁϫⲉ ⲛⲓⲙ ⲉϯϩⲱⲛ ⲙⲙⲟⲟⲩ ⲉⲧⲟⲟⲧⲕ ⲛⲡϩⲟⲟⲩ ϩⲛⲡⲉⲕϩⲏⲧ ⲧⲏⲣϥ ⲁⲩⲱ ϩⲛⲧⲉⲕⲯⲩⲭⲏ ⲧⲏⲣⲥ

3 ⲁⲩⲱ ⲡϫⲟⲉⲓⲥ ϥⲛⲁⲕⲱ ⲉⲃⲟⲗ ⲛⲁⲕ ⲛⲛⲉⲕⲛⲟⲃⲉ ⲛϥⲛⲁ ⲛⲁⲕ ⲁⲩⲱ ⲟⲛ ϥⲛⲁⲥⲟⲟⲩϩⲕ ⲉϩⲟⲩⲛ ⲉⲃⲟⲗ ϩⲛⲛϩⲉⲑⲛⲟⲥ ⲧⲏⲣⲟⲩ ⲛⲉⲛⲧⲁⲡϫⲟⲉⲓⲥ ϫⲟⲟⲣⲉⲕ ⲉⲃⲟⲗ ⲛϩⲏⲧⲟⲩ

4 ⲁⲩⲱ ⲉϣⲱⲡⲉ ⲉⲣⲉⲡⲉⲕϫⲱⲱⲣⲉ ⲉⲃⲟⲗ ϣⲟⲟⲡ ϫⲓⲛϫⲱⲥ ⲛⲧⲡⲉ ϣⲁϫⲱⲥ ⲛⲧⲡⲉ ϥⲛⲁⲥⲟⲟⲩϩⲕ ⲉϩⲟⲩⲛ ⲉⲃⲟⲗ ϩⲛⲡⲙⲁ ⲉⲧⲙⲙⲁⲩ ⲛϭⲓⲡϫⲟⲉⲓⲥ ⲡⲉⲕⲛⲟⲩⲧⲉ

5 ⲛϥϫⲓⲧⲕ ⲉϩⲟⲩⲛ ⲉⲡⲕⲁϩ ⲛϭⲓⲡϫⲟⲉⲓⲥ ⲡⲉⲕⲛⲟⲩⲧⲉ ⲡⲁⲓ ⲉⲛⲧⲁⲩⲕⲗⲏⲣⲟⲛⲟⲙⲉⲓ ⲙⲙⲟϥ ⲛϭⲓⲛⲉⲕⲉⲓⲟⲧⲉ ⲛⲅⲕⲗⲏⲣⲟⲛⲟⲙⲉⲓ ⲙⲙⲟϥ ⲁⲩⲱ ϥⲛⲁⲉⲓⲣⲉ ⲛⲁⲕ ⲙⲡⲡⲉⲧⲛⲁⲛⲟⲩϥ ⲁⲩⲱ ϥⲛⲁⲧⲁϣⲟⲕ ⲉϩⲟⲩⲉ ⲛⲉⲕⲉⲓⲟⲧⲉ

6 ⲁⲩⲱ ⲉϥⲛⲁⲧⲃⲃⲉⲡⲉⲕϩⲏⲧ ⲁⲩⲱ ⲡϩⲏⲧ ⲙⲡⲉⲕⲥⲡⲉⲣⲙⲁ ⲉⲧⲣⲉⲕⲙⲉⲣⲉⲡϫⲟⲉⲓⲥ ⲡⲉⲕⲛⲟⲩⲧⲉ ⲉⲃⲟⲗ ϩⲙⲡⲉⲕϩⲏⲧ ⲧⲏⲣϥ ⲙⲛⲧⲉⲕⲯⲩⲭⲏ ⲧⲏⲣⲥ ϫⲉⲕⲁⲥ ⲉⲕⲉⲱⲛϩ ⲛⲧⲟⲕ ⲙⲛⲡⲉⲕⲥⲡⲉⲣⲙⲁ

7 ⲁⲩⲱ ⲡϫⲟⲉⲓⲥ ⲡⲉⲕⲛⲟⲩⲧⲉ ϥⲛⲁϯ ⲛⲛⲉⲓⲥⲁϩⲟⲩ ⲉϫⲛⲛⲉⲕϫⲓϫⲉⲉⲩⲉ ⲁⲩⲱ ⲉϫⲛⲛⲉⲧⲙⲟⲥⲧⲉ ⲙⲙⲟⲕ ⲛⲉⲛⲧⲁⲩⲇⲓⲱⲕⲉⲓ ⲙⲙⲟⲕ

8 ⲁⲩⲱ ⲛⲅⲛⲁⲕⲟⲧⲕ ⲛⲅⲥⲱⲧⲙ ⲛⲥⲁⲡⲉϩⲣⲟⲟⲩ ⲙⲡϫⲟⲉⲓⲥ ⲡⲉⲕⲛⲟⲩⲧⲉ ⲛⲅⲉⲓⲣⲉ ⲛⲛⲉϥⲉⲛⲧⲟⲗⲏ ⲛⲁⲓ ⲁⲛⲟⲕ ⲉϯϩⲱⲛ ⲙⲙⲟⲟⲩ ⲉⲧⲟⲟⲧⲕ ⲙⲡϩⲟⲟⲩ

9 ⲁⲩⲱ ⲡϫⲟⲉⲓⲥ ⲡⲉⲕⲛⲟⲩⲧⲉ ⲛⲁϩⲁⲣⲉϩ ⲉⲣⲟⲕ ⲉⲙⲁⲧⲉ ϩⲛⲛⲉϩⲃⲏⲩⲉ ⲧⲏⲣⲟⲩ ⲛⲛⲉⲕϭⲓϫ ⲁⲩⲱ ϩⲛⲛⲉϫⲡⲟ ⲛϩⲏⲧⲕ ⲁⲩⲱ ϩⲛⲛⲅⲉⲛⲏⲙⲁ ⲙⲡⲉⲕⲕⲁϩ ⲁⲩⲱ ϩⲛⲙⲙⲓⲥⲉ ⲛⲛⲉⲕⲧⲃⲛⲟⲟⲩⲉ ϫⲉϥⲛⲁⲕⲧⲟϥ ⲛϭⲓⲡϫⲟⲉⲓⲥ ⲡⲉⲕⲛⲟⲩⲧⲉ ⲉⲧⲣⲉϥⲉⲩⲫⲣⲁⲛⲉ ⲉϩⲣⲁⲓ ⲉϫⲱⲕ ⲉϩⲉⲛⲁⲅⲁⲑⲟⲛ ⲕⲁⲧⲁⲧϩⲉ ⲉⲛⲧⲁϥⲉⲩⲫⲣⲁⲛⲉ ⲉϫⲛⲛⲉⲕⲉⲓⲟⲧⲉ

10 ⲉⲕϣⲁⲛⲥⲱⲧⲙ ⲛⲥⲁⲡⲉϩⲣⲟⲟⲩ ⲙⲡϫⲟⲉⲓⲥ ⲡⲉⲕⲛⲟⲩⲧⲉ ⲉϩⲁⲣⲉϩ ⲁⲩⲱ ⲉⲉⲓⲣⲉ ⲛⲛⲉϥⲉⲛⲧⲟⲗⲏ ⲙⲛⲛⲉϥⲇⲓⲕⲁⲓⲱⲙⲁ ⲛⲁⲓ ⲉⲧⲥⲏϩ ϩⲙⲡϫⲱⲱⲙⲉ ⲙⲡⲉⲓⲛⲟⲙⲟⲥ ⲉⲕϣⲁⲛⲕⲟⲧⲕ ⲉⲡϫⲟⲉⲓⲥ ⲡⲉⲕⲛⲟⲩⲧⲉ ⲉⲃⲟⲗ ϩⲙⲡⲉⲕϩⲏⲧ ⲧⲏⲣϥ ⲙⲛⲧⲉⲕⲯⲩⲭⲏ ⲧⲏⲣⲥ

11 ϫⲉⲧⲉⲓⲉⲛⲧⲟⲗⲏ ⲧⲁⲓ ⲁⲛⲟⲕ ϯϩⲱⲛ ⲙⲙⲟⲥ ⲉⲧⲟⲟⲧⲕ ⲙⲙⲟⲟⲩ ⲛⲥϩⲟⲣϣ ⲁⲛ ⲉϫⲱⲕ ⲟⲩⲇⲉ ⲛⲥⲟⲩⲏⲩ ⲁⲛ ⲙⲙⲟⲕ

12 ⲉⲧⲣⲉⲕϫⲟⲟⲥ ϫⲉⲛⲓⲙ ⲛϩⲏⲧⲛ ⲡⲉ ⲉⲧⲛⲁⲃⲱⲕ ⲉϩⲣⲁⲓ ⲉⲧⲡⲉ ⲛϥϫⲓⲧϥ ⲛⲁⲛ ⲛⲧⲛⲥⲱⲧⲙ ⲉⲣⲟϥ ⲛⲧⲛⲁⲁϥ

13 ⲟⲩⲇⲉ ⲛⲛⲉϥϩⲛⲁⲣⲏⲧⲥ ⲁⲛ ⲛⲧⲑⲁⲗⲁⲥⲥⲁ ⲉⲧⲣⲉⲕϫⲟⲟⲥ ϫⲉⲛⲓⲙ ⲙⲙⲟⲛ ⲡⲉ ⲉⲧⲛⲁϫⲓⲟⲟⲣ ⲙⲡⲉⲕⲣⲟ ⲛⲧⲑⲁⲗⲁⲥⲥⲁ ⲛϥϫⲓⲧϥ ⲛⲁⲛ ⲛϥⲧⲣⲉⲛⲥⲱⲧⲙ ⲉⲣⲟϥ ⲛⲧⲛⲁⲁϥ

14 ⲁⲗⲗⲁ ⲡϣⲁϫⲉ ϩⲏⲛ ⲉϩⲟⲩⲛ ⲉⲣⲟⲕ ⲉⲙⲁⲧⲉ ϩⲛⲧⲉⲕⲧⲁⲡⲣⲟ ⲁⲩⲱ ϩⲙⲡⲉⲕϩⲏⲧ ⲁⲩⲱ ϩⲛⲡⲉⲕϭⲓϫ ⲉⲧⲣⲉⲕⲁⲁϥ

15 ⲉⲓⲥ ϩⲏⲏⲧⲉ ⲁⲓϯ ⲙⲡϩⲟⲟⲩ ⲙⲡⲉⲕⲙⲧⲟ ⲉⲃⲟⲗ ⲙⲡⲱⲛϩ ⲙⲛⲡⲙⲟⲩ ⲡⲡⲉⲧⲛⲁⲛⲟⲩϥ ⲙⲛⲡⲡⲉⲧϩⲟⲟⲩ

16 ⲉϣⲱⲡⲉ ⲇⲉ ⲉⲕϣⲁⲛⲥⲱⲧⲙ ⲛⲥⲁⲛⲉⲛⲧⲟⲗⲏ ⲙⲡϫⲟⲉⲓⲥ ⲡⲉⲕⲛⲟⲩⲧⲉ ⲛⲁⲓ ⲁⲛⲟⲕ ⲉϯϩⲱⲛ ⲙⲙⲟⲟⲩ ⲉⲧⲟⲟⲧⲕ ⲙⲡϩⲟⲟⲩ ⲉⲙⲉⲣⲉⲡϫⲟⲉⲓⲥ ⲡⲉⲕⲛⲟⲩⲧⲉ ⲉⲙⲟⲟϣⲉ ϩⲓⲛⲉϥϩⲓⲟⲟⲩⲉ ⲧⲏⲣⲟⲩ ⲁⲩⲱ ⲉϩⲁⲣⲉϩ ⲉⲛⲉϥⲇⲓⲕⲁⲓⲱⲙⲁ ⲙⲛⲛⲉϥϩⲁⲡ ⲧⲉⲧⲛⲛⲁⲱⲛϩ ⲛⲧⲉⲧⲛⲁϣⲁⲓ ⲁⲩⲱ ϥⲛⲁⲥⲙⲟⲩ ⲉⲣⲟⲕ ⲛϭⲓⲡϫⲟⲉⲓⲥ ⲡⲉⲕⲛⲟⲩⲧⲉ ϩⲙⲡⲕⲁϩ ⲧⲏⲣϥ ⲡⲁⲓ ⲉⲧⲕⲛⲁⲃⲱⲕ ⲉϩⲟⲩⲛ ⲉⲣⲟϥ ⲉⲕⲗⲏⲣⲟⲛⲟⲙⲉⲓ ⲙⲙⲟϥ

17 ⲉⲣⲉϣⲁⲛⲧⲡⲉⲕϩⲏⲧ ⲇⲉ ϣⲓⲃⲉ ⲉⲧⲙⲥⲱⲧⲙ ⲁⲗⲗⲁ ⲛⲅⲡⲗⲁⲛⲁ ⲛⲅⲟⲩⲱϣⲧ ⲛϩⲉⲛⲕⲉⲩⲛⲟⲩⲧⲉ ⲁⲩⲱ ⲛⲅϣⲙϣⲉ ⲛⲁⲩ

18 ϯⲧⲁⲙⲟ ⲙⲙⲟⲕ ⲙⲡϩⲟⲟⲩ ϫⲉϩⲛⲟⲩⲧⲁⲕⲟ ⲕⲛⲁⲧⲁⲕⲟ ⲁⲩⲱ ⲛⲧⲉⲧⲛⲧⲙⲣϩⲁϩ ⲛϩⲟⲟⲩ ϩⲓϫⲛⲡⲕⲁϩ ⲡⲁⲓ ⲉⲧⲉⲣⲉⲡϫⲟⲉⲓⲥ ⲡⲉⲕⲛⲟⲩⲧⲉ ⲛⲁⲧⲁⲁϥ ⲛⲁⲕ ⲡⲁⲓ ⲉⲧⲉⲧⲛⲛⲁϫⲓⲟⲟⲣ ⲙⲡⲓⲟⲣⲇⲁⲛⲏⲥ ⲉⲃⲱⲕ ⲉϩⲟⲩⲛ ⲉⲣⲟϥ ⲉⲕⲗⲏⲣⲟⲛⲟⲙⲉⲓ ⲙⲙⲟϥ

19 ϯⲣⲙⲛⲧⲣⲉ ⲛⲏⲧⲛ ⲙⲡϩⲟⲟⲩ ⲛⲧⲡⲉ ⲙⲛⲡⲕⲁϩ ⲡⲱⲛϩ ⲙⲛⲡⲙⲟⲩ ⲁⲓⲧⲁⲁⲩ ϩⲓϩⲏ ⲙⲙⲱⲧⲛ ⲡⲉⲥⲙⲟⲩ ⲙⲛⲡⲥⲁϩⲟⲩ ⲥⲱⲧⲡ ⲇⲉ ⲛⲁⲕ ⲙⲡⲱⲛϩ ϫⲉⲉⲕⲉⲱⲛϩ ⲛⲧⲟⲕ ⲙⲛⲡⲉⲕⲥⲡⲉⲣⲙⲁ

20 ⲉⲙⲉⲣⲉⲡϫⲟⲉⲓⲥ ⲡⲉⲕⲛⲟⲩⲧⲉ ⲉⲥⲱⲧⲙ ⲛⲥⲁⲡⲉϥϩⲣⲟⲟⲩ ⲁⲩⲱ ⲉϭⲟⲗⲉϫⲕ ⲛϩⲏⲧϥ ϫⲉⲡⲁⲓ ⲡⲉ ⲡⲱⲛϩ ⲁⲩⲱ ⲧⲁϣⲏ ⲛⲛⲉⲕϩⲟⲟⲩ ⲉⲧⲣⲉⲕⲱⲛϩ ϩⲓϫⲛⲡⲕⲁϩ ⲡⲁⲓ ⲉⲛⲧⲁⲡϫⲟⲉⲓⲥ ⲱⲣⲕ ⲉⲧⲃⲏⲏⲧϥ ⲛⲛⲉⲕⲉⲓⲟⲧⲉ ⲁⲃⲣⲁϩⲁⲙ ⲙⲛⲓⲥⲁⲁⲕ ⲙⲛⲓⲁⲕⲱⲃ ⲉⲧⲁⲁϥ ⲛⲁⲩ