Deuteronomy 27 — Coptic (Sahidic)

1 ⲁϥⲟⲩⲉϩⲥⲁϩⲛⲉ ⲇⲉ ⲛϭⲓⲙⲱⲩⲥⲏⲥ ⲙⲛⲛϩⲗⲗⲟ ⲙⲡⲓⲥⲣⲁⲏⲗ ⲉϥϫⲱ ⲙⲙⲟⲥ ϫⲉϩⲁⲣⲉϩ ⲉⲛⲉⲓⲉⲛⲧⲟⲗⲏ ⲧⲏⲣⲟⲩ ⲛⲁⲓ ⲉϯϩⲱⲛ ⲙⲙⲟⲟⲩ ⲛⲧⲉⲧⲏⲩⲧⲛ ⲙⲡϩⲟⲟⲩ

2 ⲁⲩⲱ ⲙⲡⲉϩⲟⲟⲩ ⲉⲧⲉⲧⲛⲁϫⲓⲟⲟⲣ ⲙⲡⲓⲟⲣⲇⲁⲛⲏⲥ ⲉϩⲟⲩⲛ ⲉⲡⲕⲁϩ ⲡⲁⲓ ⲉⲧⲉⲣⲉⲡϫⲟⲉⲓⲥ ⲡⲉⲕⲛⲟⲩⲧⲉ ⲛⲁⲧⲁⲁϥ ⲛⲁⲕ ⲉⲕⲉⲧⲁϩⲟ ⲛⲁⲓ ⲉⲣⲁⲧⲟⲩ ⲛⲛⲟϭ ⲥⲛⲁⲩ ⲛⲱⲛⲉ ⲁⲩⲱ ⲉⲕⲉϫⲁϩⲟⲩ ⲛⲕⲟⲛⲓⲁ

3 ⲛⲅⲥϩⲁⲓ ⲉⲛⲱⲛⲉ ⲛⲛϣⲁϫⲉ ⲧⲏⲣⲟⲩ ⲙⲡⲓⲛⲟⲙⲟⲥ ⲉⲧⲉⲧⲛϣⲁⲛϫⲓⲟⲟⲣ ⲙⲡⲓⲟⲣⲇⲁⲛⲏⲥ ⲉⲧⲣⲉⲧⲉⲧⲛⲃⲱⲕ ⲉϩⲟⲩⲛ ⲉⲡⲕⲁϩ ⲉϥϣⲟⲩⲉ ⲉⲣⲱⲧⲉ ⲉⲃⲟⲗ ϩⲓⲉⲃⲓⲱ ⲙⲡⲉⲥⲙⲟⲧ ⲛⲧⲁⲡϫⲟⲉⲓⲥ ⲡⲛⲟⲩⲧⲉ ⲛⲛⲉⲕⲉⲓⲟⲧⲉ ϫⲟⲟⲥ ⲛⲁⲕ

4 ϫⲉⲉⲧⲉⲧⲛϣⲁⲛϫⲓⲟⲟⲣ ⲙⲡⲓⲟⲣⲇⲁⲛⲏⲥ ⲉⲧⲉⲧⲛⲉⲧⲁϩⲟ ⲉⲣⲁⲧⲟⲩ ⲛⲛⲉⲓⲱⲛⲉ ⲛⲁⲓ ⲁⲛⲟⲕ ⲉϯϩⲱⲛ ⲙⲙⲟⲟⲩ ⲉⲧⲟⲟⲧⲕ ⲉⲧⲃⲏⲏⲧⲟⲩ ϩⲙⲡⲧⲟⲟⲩ ⲛⲅⲁⲓⲃⲁⲗ ⲁⲩⲱ ⲉⲕⲉϫⲁϩⲟⲩ ⲛⲕⲟⲛⲓⲁ

5 ⲁⲩⲱ ⲉⲕⲉⲕⲱⲧ ϩⲙⲡⲙⲁ ⲉⲧⲙⲙⲁⲩ ⲛⲟⲩⲑⲩⲥⲓⲁⲥⲧⲏⲣⲓⲟⲛ ⲉⲃⲟⲗ ϩⲛϩⲉⲛⲱⲛⲉ ⲉⲡϫⲟⲉⲓⲥ ⲡⲉⲕⲛⲟⲩⲧⲉ ⲉⲃⲟⲗ ϩⲛϩⲉⲛⲱⲛⲉ ⲉⲩⲟⲩⲟϫ ⲛⲛⲉⲕⲛⲥⲟⲧⲃⲉϥ ⲛⲃⲉⲛⲓⲡⲉ ⲉϫⲱⲟⲩ

6 ⲁⲩⲱ ⲉⲕⲉⲧⲁⲗⲟ ⲉϫⲱⲟⲩ ⲛϩⲉⲛϭⲗⲓⲗ ⲙⲡϫⲟⲉⲓⲥ ⲡⲉⲕⲛⲟⲩⲧⲉ

7 ⲁⲩⲱ ⲛⲅⲑⲩⲥⲓⲁⲍⲉ ⲛⲟⲩⲑⲩⲥⲓⲁ ⲛⲟⲩϫⲁⲓ ϩⲙⲡⲙⲁ ⲉⲧⲙⲙⲁⲩ ⲙⲡϫⲟⲉⲓⲥ ⲡⲉⲕⲛⲟⲩⲧⲉ ⲁⲩⲱ ⲉⲕⲉⲟⲩⲱⲙ ⲛⲅⲥⲉⲓ ϩⲙⲡⲙⲁ ⲉⲧⲙⲙⲁⲩ ⲛⲅⲉⲩⲫⲣⲁⲛⲉ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲡⲉⲕⲛⲟⲩⲧⲉ

8 ⲉⲕⲉⲥϩⲁⲓ ⲉϫⲛⲛⲉⲓⲱⲛⲉ ⲙⲡⲉⲓⲛⲟⲙⲟⲥ ⲧⲏⲣϥ ⲛⲅⲥⲁϩϥ ⲕⲁⲗⲱⲥ ⲙⲙⲁⲧⲉ

9 ⲁϥϣⲁϫⲉ ⲇⲉ ⲛϭⲓⲙⲱⲩⲥⲏⲥ ⲛⲧⲟϥ ⲙⲛⲛⲟⲩⲏⲏⲃ ⲙⲛⲛⲗⲉⲩⲓⲧⲏⲥ ⲛⲁϩⲣⲙ ⲡⲓⲥⲣⲁⲏⲗ ϩⲣⲁⲓ ϩⲙⲡϩⲟⲟⲩ ⲛϩⲟⲟⲩ ⲁⲕϣⲱⲡⲉ ⲉⲩⲗⲁⲟⲥ ⲙⲡϫⲟⲉⲓⲥ ⲡⲉⲕⲛⲟⲩⲧⲉ

10 ⲁⲩⲱ ⲉⲕⲉⲥⲱⲧⲙ ⲛⲥⲁⲡⲉϩⲣⲟⲟⲩ ⲙⲡϫⲟⲉⲓⲥ ⲡⲉⲕⲛⲟⲩⲧⲉ ⲁⲩⲱ ⲉⲕⲉⲉⲓⲣⲉ ⲛⲛⲉϥⲉⲛⲧⲟⲗⲏ ⲧⲏⲣⲟⲩ ⲙⲛⲛⲉϥⲇⲓⲕⲁⲓⲱⲙⲁ ⲛⲁⲓ ⲁⲛⲟⲕ ⲉϯϩⲱⲛ ⲙⲙⲟⲟⲩ ⲉⲧⲟⲟⲧⲕ

11 ⲙⲱⲩⲥⲏⲥ ⲇⲉ ⲁϥϩⲱⲛ ⲉⲧⲟⲟⲧϥ ⲙⲡⲗⲁⲟⲥ ⲙⲡⲉϩⲟⲟⲩ ⲉⲧⲙⲙⲁⲩ ⲉϥϫⲱ ⲙⲙⲟⲥ ϫⲉ

12 ⲛⲁⲓ ⲛⲉⲧⲛⲁⲁϩⲉⲣⲁⲧⲟⲩ ⲉⲥⲙⲟⲩ ⲉⲡⲗⲁⲟⲥ ϩⲙⲡⲧⲟⲟⲩ ⲛⲅⲁⲣⲓⲍⲓⲛ ϩⲙⲡⲧⲣⲉⲧⲉⲧⲛϫⲓⲟⲟⲣ ⲙⲡⲓⲟⲣⲇⲁⲛⲏⲥ ⲥⲩⲙⲉⲱⲛ ⲗⲉⲩⲉⲓ ⲓⲟⲩⲇⲁⲥ ⲓⲉⲥⲁⲭⲁⲣ ⲓⲱⲥⲏⲫ ⲙⲛⲃⲉⲛⲓⲁⲙⲓⲛ

13 ⲁⲩⲱ ⲛⲁⲓ ϩⲱⲟⲩ ⲛⲉⲧⲛⲁⲁϩⲉⲣⲁⲧⲟⲩ ⲉϫⲙⲡⲥⲁϩⲟⲩ ϩⲙⲡⲧⲟⲟⲩ ⲛⲅⲁⲓⲃⲁⲗ ϩⲣⲟⲩⲃⲏⲛ ⲅⲁⲇ ⲙⲛⲁⲥⲏⲣ ⲍⲁⲃⲟⲩⲗⲱⲛ ⲙⲛⲇⲁⲛ ⲙⲛⲉⲫⲑⲁⲗⲓⲙ

14 ⲁⲩⲱ ⲥⲉⲛⲁⲟⲩⲱϣⲃ ⲛϭⲓⲛⲗⲉⲩⲓⲧⲏⲥ ⲛⲥⲉϫⲟⲟⲥ ⲛⲛⲣⲱⲙⲉ ⲧⲏⲣⲟⲩ ⲙⲡⲓⲥⲣⲁⲏⲗ ϩⲛⲟⲩⲛⲟϭ ⲛⲥⲙⲏ ϫⲉ

15 ϥⲥϩⲟⲩⲟⲣⲧ ⲛϭⲓⲡⲣⲱⲙⲉ ⲡⲁⲓ ⲉⲧⲛⲁⲧⲁⲙⲓⲟ ⲛⲁϥ ⲛⲟⲩⲅⲗⲩⲡⲧⲟⲛ ⲙⲛⲟⲩⲭⲱⲛⲉⲩⲧⲟⲛ ϫⲉⲟⲩⲃⲟⲧⲉ ⲡⲉ ⲙⲡϫⲟⲉⲓⲥ ⲡⲉ ⲟⲩϩⲱⲃ ⲛϭⲓϫ ⲙⲙⲛⲧⲣⲉϥⲣⲉⲓⲟⲡⲉ ⲛϯⲙⲓⲛⲉ ⲛϥⲕⲁⲁϥ ϩⲛⲟⲩⲙⲁ ⲉϥϩⲏⲡ ⲁⲩⲱ ⲉⲣⲉⲡⲗⲁⲟⲥ ⲟⲩⲱϣⲃ ⲛϥϫⲟⲟⲥ ϫⲉⲉϥⲉϣⲱⲡⲉ

16 ϥⲥϩⲟⲩⲟⲣⲧ ⲛϭⲓⲡⲉⲧⲛⲁⲥⲉϣⲡⲉϥⲉⲓⲱⲧ ⲏ ⲧⲉϥⲙⲁⲁⲩ ⲁⲩⲱ ⲉⲣⲉⲡⲗⲁⲟⲥ ⲧⲏⲣϥ ϫⲟⲟⲥ ϫⲉⲉϥⲉϣⲱⲡⲉ

17 ϥⲥϩⲟⲩⲟⲣⲧ ⲛϭⲓⲡⲉⲧⲛⲁⲡⲱⲱⲛⲉ ⲉⲃⲟⲗ ⲛⲛⲧⲟϣ ⲙⲡⲉⲧϩⲓⲧⲟⲩⲱϥ ⲁⲩⲱ ⲉⲣⲉⲡⲗⲁⲟⲥ ⲧⲏⲣϥ ϫⲟⲟⲥ ϫⲉⲉϥⲉϣⲱⲡⲉ

18 ϥⲥϩⲟⲩⲟⲣⲧ ⲛϭⲓⲡⲉⲧⲛⲁⲡⲗⲁⲛⲁ ⲛⲟⲩⲃⲗⲗⲉ ⲉⲃⲟⲗ ϩⲛⲧⲉϩⲓⲏ ⲁⲩⲱ ⲉⲣⲉⲡⲗⲁⲟⲥ ⲧⲏⲣϥ ϫⲟⲟⲥ ϫⲉⲉϥⲉϣⲱⲡⲉ

19 ϥⲥϩⲟⲩⲟⲣⲧ ⲛϭⲓⲡⲉⲧⲛⲁϭⲉⲉⲙⲉ ⲡϩⲁⲡ ⲙⲡⲉⲡⲣⲟⲥⲏⲗⲩⲧⲟⲥ ⲙⲛⲡⲟⲣⲫⲁⲛⲟⲥ ⲙⲛⲧⲉⲭⲏⲣⲁ ⲁⲩⲱ ⲉⲣⲉⲡⲗⲁⲟⲥ ⲧⲏⲣϥ ϫⲟⲟⲥ ϫⲉⲉϥⲉϣⲱⲡⲉ

20 ϥⲥϩⲟⲩⲟⲣⲧ ⲛϭⲓⲡⲉⲧⲛⲁⲛⲕⲟⲧⲕ ⲙⲛⲧϩⲓⲙⲉ ⲙⲡⲉϥⲉⲓⲱⲧ ϫⲉⲁϥϭⲱⲗⲡ ⲉⲃⲟⲗ ⲙⲡⲉⲡⲣⲏϣ ⲙⲡⲉϥⲉⲓⲱⲧ ⲁⲩⲱ ⲉⲣⲉⲡⲗⲁⲟⲥ ⲧⲏⲣϥ ϫⲟⲟⲥ ϫⲉⲉϥⲉϣⲱⲡⲉ

21 ϥⲥϩⲟⲩⲟⲣⲧ ⲛϭⲓⲡⲉⲧⲛⲁⲛⲕⲟⲧⲕ ⲙⲛⲧⲃⲛⲏ ⲛⲓⲙ ⲁⲩⲱ ⲉⲣⲉⲡⲗⲁⲟⲥ ⲧⲏⲣϥ ϫⲟⲟⲥ ϫⲉⲉϥⲉϣⲱⲡⲉ

22 ϥⲥϩⲟⲩⲟⲣⲧ ⲛϭⲓⲡⲉⲧⲛⲁⲛⲕⲟⲧⲕ ⲙⲛⲧⲉϥⲥⲱⲛⲉ ⲛϣⲛⲉⲓⲱⲧ ⲏ ⲛϣⲛⲙⲁⲁⲩ ⲁⲩⲱ ⲉⲣⲉⲡⲗⲁⲟⲥ ⲧⲏⲣϥ ϫⲟⲟⲥ ϫⲉⲉϥⲉϣⲱⲡⲉ

23 ϥⲥϩⲟⲩⲟⲣⲧ ⲛϭⲓⲡⲉⲧⲛⲁⲛⲕⲟⲧⲕ ⲙⲛⲧⲥⲱⲛⲉ ⲙⲡⲉϥⲉⲓⲱⲧ ⲁⲩⲱ ⲉⲣⲉⲡⲗⲁⲟⲥ ⲧⲏⲣϥ ϫⲟⲟⲥ ϫⲉⲉϥⲉϣⲱⲡⲉ

24 ϥⲥϩⲟⲩⲟⲣⲧ ⲛϭⲓⲡⲉⲧⲛⲁⲣⲉϩⲧⲡⲉⲧϩⲓⲧⲟⲩⲱϥ ϩⲛⲟⲩⲕⲣⲟϥ ⲁⲩⲱ ⲉⲣⲉⲡⲗⲁⲟⲥ ⲧⲏⲣϥ ϫⲟⲟⲥ ϫⲉⲉϥⲉϣⲱⲡⲉ

25 ϥⲥϩⲟⲩⲟⲣⲧ ⲛϭⲓⲡⲉⲧⲛⲁϫⲓⲇⲱⲣⲟⲛ ⲉⲣⲉϩⲧⲟⲩⲯⲩⲭⲏ ⲉⲡⲱⲱⲛⲉ ⲉⲃⲟⲗ ⲛⲟⲩⲥⲛⲟϥ ⲉⲛⲁⲧⲛⲟⲃⲉ ⲁⲩⲱ ⲉⲣⲉⲡⲗⲁⲟⲥ ⲧⲏⲣϥ ϫⲟⲟⲥ ϫⲉⲉϥⲉϣⲱⲡⲉ

26 ϥⲥϩⲟⲩⲟⲣⲧ ⲛϭⲓⲣⲱⲙⲉ ⲛⲓⲙ ⲉⲧⲉⲛϥⲛⲁⲁϩⲉ ⲁⲛ ⲉⲛϣⲁϫⲉ ⲙⲡⲉⲓⲛⲟⲙⲟⲥ ⲉⲧⲣⲉϥⲁⲁⲩ ⲁⲩⲱ ⲉⲣⲉⲡⲗⲁⲟⲥ ⲧⲏⲣϥ ϫⲟⲟⲥ ϫⲉⲉϥⲉϣⲱⲡⲉ