Deuteronomy 17 — Coptic (Sahidic)

1 ⲛⲛⲉⲕϣⲱⲱⲧ ⲙⲙⲁϩ ⲡϫⲟⲉⲓⲥ ⲡⲉⲕⲛⲟⲩⲧⲉ ⲛⲟⲩⲙⲁⲥⲉ ⲏ ⲟⲩⲉⲥⲟⲟⲩ ⲉⲣⲉⲟⲩϫⲃⲓⲛ ϣⲟⲟⲡ ⲛϩⲏⲧϥ ϣⲁϫⲉ ⲛⲓⲙ ⲙⲡⲟⲛⲏⲣⲟⲛ ϩⲉⲛⲃⲟⲧⲉ ⲛⲉ ⲙⲡϫⲟⲉⲓⲥ ⲡⲉⲕⲛⲟⲩⲧⲉ

2 ⲉⲩϣⲁⲛⲧⲁϩⲟ ⲇⲉ ϩⲛⲟⲩⲉⲓ ⲛⲛⲉⲕⲡⲟⲗⲓⲥ ⲛⲁⲓ ⲉⲧⲉⲣⲉⲡϫⲟⲉⲓⲥ ⲡⲉⲕⲛⲟⲩⲧⲉ ⲛⲁⲧⲁⲁⲩ ⲛⲁⲕ ⲛⲟⲩϩⲟⲟⲩⲧ ⲏ ⲟⲩⲥϩⲓⲙⲉ ⲡⲁⲓ ⲉⲧⲛⲁⲉⲓⲣⲉ ⲙⲡⲡⲟⲛⲏⲣⲟⲛ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲡⲉⲕⲛⲟⲩⲧⲉ ⲉⲧⲣⲉⲩⲕⲱ ⲛⲥⲱⲟⲩ ⲛⲧⲉϥⲇⲓⲁⲑⲏⲕⲏ

3 ⲛⲥⲉⲃⲱⲕ ⲛⲥⲉϣⲙϣⲉ ⲛϩⲉⲛⲕⲉⲛⲟⲩⲧⲉ ⲁⲩⲱ ⲛⲥⲉⲟⲩⲱϣⲧ ⲛⲁⲩ ⲏ ⲙⲡⲣⲏ ⲏ ⲙⲡⲟⲟϩ ⲏ ⲛⲉⲧⲏⲡ ⲧⲏⲣⲟⲩ ⲉⲡⲕⲟⲥⲙⲟⲥ ⲛⲧⲡⲉ ⲛⲁⲓ ⲉⲧⲉⲙⲡⲓϩⲱⲛ ⲉⲧⲃⲏⲏⲧⲟⲩ

4 ⲁⲩⲱ ⲛⲥⲉⲧⲁⲙⲟⲕ ⲉⲡⲉⲥϩⲟⲧϩⲧ ⲉⲙⲁⲧⲉ ⲁⲩⲱ ⲉⲕϣⲁⲛϩⲉ ⲉⲣⲟⲥ ⲉⲁⲡϣⲁϫⲉ ϣⲱⲡⲉ ⲛⲁⲙⲉ ⲁⲧⲉⲓⲃⲟⲧⲉ ϣⲱⲡⲉ ⲛⲧⲉⲓϩⲉ ϩⲙⲡⲓⲥⲣⲁⲏⲗ

5 ⲉⲕⲉⲉⲓⲛⲉ ⲉⲃⲟⲗ ⲙⲡⲣⲱⲙⲉ ⲉⲧⲙⲙⲁⲩ ⲏ ⲧⲉⲥϩⲓⲙⲉ ⲉⲧⲙⲙⲁⲩ ⲛⲥⲉϩⲓⲱⲛⲉ ⲉⲣⲟⲟⲩ ϩⲛϩⲉⲛⲱⲛⲉ ⲛⲥⲉⲙⲟⲩ

6 ϩⲓⲙⲛⲧⲣⲉ ⲥⲛⲁⲩ ⲁⲩⲱ ϩⲓϣⲟⲙⲛⲧ ⲛⲙⲛⲧⲣⲉ ⲙⲁⲣⲉϥⲙⲟⲩ ⲛϭⲓⲡⲉⲧⲟⲩⲛⲁⲙⲟⲟⲩⲧϥ ⲛⲛⲉϥⲙⲟⲩ ϩⲓⲧⲛⲟⲩⲙⲛⲧⲣⲉ ⲛⲟⲩⲱⲧ

7 ⲁⲩⲱ ⲧϭⲓϫ ⲛⲛⲙⲛⲧⲣⲉⲉⲩ ⲉⲥⲉϣⲱⲡⲉ ϩⲓϫⲱϥ ⲛϣⲟⲣⲡ ⲉⲙⲟⲟⲩⲧϥ ⲁⲩⲱ ⲧϭⲓϫ ⲙⲡⲗⲁⲟⲥ ⲧⲏⲣϥ ⲉⲥⲉϣⲱⲡⲉ ϩⲓϫⲱϥ ⲙⲛⲛⲥⲱⲥ ⲁⲩⲱ ⲉⲕⲉϥⲓ ⲙⲡⲡⲟⲛⲏⲣⲟⲥ ⲉⲃⲟⲗ ϩⲛⲧⲉⲧⲛⲙⲏⲧⲉ

8 ⲉⲣϣⲁⲛⲟⲩϣⲁϫⲉ ⲇⲉ ⲣⲁⲧϭⲟⲙ ⲛⲛⲁϩⲣⲁⲕ ⲡⲁⲣⲁⲧⲉⲕϭⲟⲙ ϩⲛⲧⲙⲏⲧⲉ ⲛⲟⲩⲥⲛⲟϥ ⲙⲛⲟⲩⲥⲛⲟϥ ⲁⲩⲱ ϩⲛⲧⲙⲏⲧⲉ ⲛⲟⲩϩⲁⲡ ⲙⲛⲟⲩϩⲁⲡ ⲙⲛⲧⲙⲏⲧⲉ ⲛⲟⲩⲙⲛⲧⲗⲁ ⲙⲛⲟⲩⲗⲁ ⲏ ⲛⲧⲙⲏⲧⲉ ⲛⲟⲩϩⲗⲟⲩⲱ ⲙⲛⲟⲩϩⲗⲟⲩⲱ ϩⲉⲛϣⲁϫⲉ ⲛϩⲁⲡ ϩⲛⲛⲉⲕⲡⲟⲗⲓⲥ ⲉⲕⲉⲧⲱⲟⲩⲛ ⲛⲅⲃⲱⲕ ⲉϩⲣⲁⲓ ⲉⲡⲙⲁ ⲉⲧⲉⲣⲉⲡϫⲟⲉⲓⲥ ⲡⲉⲕⲛⲟⲩⲧⲉ ⲛⲁⲥⲟⲧⲡϥ ⲛⲁϥ ⲉⲧⲣⲉⲩⲉⲡⲓⲕⲁⲗⲓ ⲙⲡⲉϥⲣⲁⲛ ⲙⲡⲙⲁ ⲉⲧⲙⲙⲁⲩ

9 ⲁⲩⲱ ⲉⲕⲉⲃⲱⲕ ⲉⲣⲁⲧⲟⲩ ⲛⲛⲗⲉⲩⲓⲧⲏⲥ ⲏ ⲉⲣⲁⲧϥ ⲙⲡⲉⲕⲣⲓⲧⲏⲥ ⲡⲉⲧⲛⲁϣⲱⲡⲉ ϩⲛⲛⲉϩⲟⲟⲩ ⲉⲧⲙⲙⲁⲩ ⲁⲩⲱ ⲉⲩⲉϩⲟⲧϩⲧ ⲛⲥⲉⲧⲁⲙⲟⲕ ⲉⲡϩⲁⲡ

10 ⲛⲅⲉⲓⲣⲉ ⲕⲁⲧⲁⲡⲟⲩⲉϩⲥⲁϩⲛⲉ ⲉⲧⲟⲩⲛⲁⲧⲁⲩⲟϥ ⲉⲣⲟⲕ ϩⲙⲡⲙⲁ ⲉⲛⲧⲁⲡϫⲟⲉⲓⲥ ⲡⲉⲕⲛⲟⲩⲧⲉ ⲥⲟⲧⲡϥ ⲉⲧⲣⲉⲩⲧⲁⲩⲉⲡⲉϥⲣⲁⲛ ⲛϩⲏⲧϥ ⲁⲩⲱ ⲉⲕⲉϩⲁⲣⲉϩ ⲉⲙⲁⲧⲉ ⲉⲧⲣⲉⲕⲉⲓⲣⲉ ⲛϩⲱⲃ ⲛⲓⲙ ⲕⲁⲧⲁⲡⲉⲥⲙⲓⲛⲉ ⲙⲡⲛⲟⲙⲟⲥ ⲡⲁⲓ ⲉⲧⲟⲩⲛⲁⲥⲙⲛⲧϥ ⲛⲙⲙⲁⲕ

11 ⲁⲩⲱ ⲕⲁⲧⲁⲡϩⲁⲡ ⲉⲧⲟⲩⲛⲁϫⲟⲟϥ ⲉⲣⲟⲕ ⲉⲕⲉⲁⲁϥ ⲛⲛⲉⲕⲣⲁⲕⲧⲕ ⲉⲃⲟⲗ ⲙⲡϣⲁϫⲉ ⲉⲧⲟⲩⲛⲁϫⲟⲟϥ ⲉⲣⲟⲕ ⲉⲟⲩⲛⲁⲙ ⲟⲩⲇⲉ ⲉϩⲃⲟⲩⲣ

12 ⲡⲣⲱⲙⲉ ⲇⲉ ⲉⲧⲛⲁⲉⲓⲣⲉ ϩⲛⲟⲩⲙⲛⲧϫⲁⲥⲓϩⲏⲧ ⲉⲧⲙⲥⲱⲧⲙ ⲛⲥⲁⲡⲟⲩⲏⲏⲃ ⲡⲉⲧⲁϩⲉⲣⲣⲁⲧϥ ⲉⲧϣⲙϣⲉ ϩⲙⲡⲣⲁⲛ ⲙⲡϫⲟⲉⲓⲥ ⲡⲉⲕⲛⲟⲩⲧⲉ ⲏ ⲡⲉⲕⲣⲓⲧⲏⲥ ⲉⲧⲛⲁϣⲱⲡⲉ ⲛⲛⲉϩⲟⲟⲩ ⲉⲧⲙⲙⲁⲩ ⲛϥⲧⲙⲥⲱⲧⲙ ⲛⲥⲱⲟⲩ ⲉϥⲉⲙⲟⲩ ⲛϭⲓⲡⲣⲱⲙⲉ ⲉⲧⲙⲙⲁⲩ ⲁⲩⲱ ⲉⲕⲉϥⲓ ⲙⲡⲡⲟⲛⲏⲣⲟⲥ ⲉⲃⲟⲗ ϩⲙⲡⲓⲥⲣⲁⲏⲗ

13 ⲡⲗⲁⲟⲥ ⲇⲉ ⲧⲏⲣϥ ⲉϥϣⲁⲛⲥⲱⲧⲙ ϥⲛⲁⲣϩⲟⲧⲉ ⲛϥⲧⲙⲕⲟⲧϥ ϭⲉ ⲉⲣϣⲁⲛⲧⲉ

14 ⲉⲕϣⲁⲛⲃⲱⲕ ⲇⲉ ⲉϩⲟⲩⲛ ⲉⲡⲕⲁϩ ⲡⲁⲓ ⲉⲧⲉⲣⲉⲡϫⲟⲉⲓⲥ ⲡⲉⲕⲛⲟⲩⲧⲉ ⲛⲁⲧⲁⲁϥ ⲛⲁⲕ ϩⲛⲟⲩⲕⲗⲏⲣⲟⲛⲟⲙⲓⲁ ⲉⲧⲣⲉⲕⲕⲗⲏⲣⲟⲛⲟⲙⲉⲓ ⲙⲙⲟϥ ⲛⲅⲟⲩⲱϩ ϩⲓϫⲱϥ ⲁⲩⲱ ⲛⲅϫⲟⲟⲥ ϫⲉϯⲛⲁⲉⲓⲛⲉ ⲉⲃⲟⲗ ϩⲓϫⲱⲓ ⲛⲟⲩⲁⲣⲭⲱⲛ ⲛⲧϩⲉ ⲛⲛⲕⲉϩⲉⲑⲛⲟⲥ ⲉⲧϩⲛⲡⲁⲕⲱⲧⲉ

15 ϩⲛⲟⲩⲕⲱ ⲉⲕⲉⲕⲱ ϩⲓϫⲱⲕ ⲛⲟⲩⲁⲣⲭⲱⲛ ⲡⲁⲓ ⲉⲧϥⲛⲁⲥⲟⲧⲡϥ ⲛϭⲓⲡϫⲟⲉⲓⲥ ⲡⲉⲕⲛⲟⲩⲧⲉ ⲉⲕⲉⲕⲁⲑⲓⲥⲧⲁ ⲙⲡⲁⲣⲭⲱⲛ ⲉϩⲣⲁⲓ ⲉϫⲱⲕ ⲉⲃⲟⲗ ϩⲛⲛⲉⲕⲥⲛⲏⲩ ⲛⲛⲉⲕⲉϣⲛϭⲉⲣⲱⲙⲉ ⲛϣⲙⲙⲟ ⲉⲃⲟⲗ ⲉϫⲱⲕ ϫⲉⲙⲡⲉⲕⲥⲟⲛ ⲁⲛ ⲡⲉ

16 ϫⲉⲛϥⲛⲁⲧⲁϣⲟ ⲛⲁϥ ⲁⲛ ⲛϩⲉⲛϩⲧⲱⲱⲣ ⲟⲩⲇⲉ ⲛϥⲛⲁⲕⲧⲟ ⲁⲛ ⲙⲡⲗⲁⲟⲥ ⲉϩⲣⲁⲓ ⲉⲕⲏⲙⲉ ϫⲉⲕⲁⲥ ⲉⲛⲛⲉϥⲧⲁϣⲟ ⲛⲁϥ ⲛϩⲉⲛϩⲧⲱⲱⲣ ⲡϫⲟⲉⲓⲥ ⲇⲉ ⲁϥϫⲟⲟⲥ ϫⲉⲛⲛⲉⲧⲛⲟⲩⲱϩ ⲉⲧⲉⲧⲏⲩⲧⲛ ⲉⲕⲧⲉⲧⲏⲩⲧⲛ ⲟⲛ ⲉⲡⲁϩⲟⲩ ϩⲓⲧⲉⲓϩⲓⲏ

17 ⲁⲩⲱ ⲛⲛⲉϥⲧⲁϣⲉⲥϩⲓⲙⲉ ⲛⲁϥ ⲟⲩⲇⲉ ⲛⲛⲉⲡⲉϥϩⲏⲧ ϣⲓⲃⲉ ⲁⲩⲱ ⲟⲩϩⲁⲧ ⲙⲛⲟⲩⲛⲟⲩⲃ ⲛⲛⲉϥⲧⲁϣⲟϥ ⲛⲁϥ ⲉⲙⲁⲧⲉ

18 ⲁⲩⲱ ⲉϥϣⲁⲛϩⲙⲟⲟⲥ ⲉϫⲛⲧⲉϥⲁⲣⲭⲏ ⲉϥⲉⲥϩⲁⲓ ⲛⲁϥ ⲙⲡⲉⲓⲇⲉⲩⲧⲉⲣⲟⲛⲟⲙⲓⲟⲛ ⲉⲩϫⲱⲱⲙⲉ ⲛⲧⲟⲟⲧⲟⲩ ⲛⲛⲟⲩⲏⲏⲃ ⲛⲗⲉⲩⲓⲧⲏⲥ

19 ⲛϥϣⲱⲡⲉ ⲛⲙⲙⲁϥ ⲁⲩⲱ ⲛϥⲱϣ ⲛϩⲏⲧϥ ⲛⲛⲉϩⲟⲟⲩ ⲧⲏⲣⲟⲩ ⲙⲡⲉϥⲱⲛϩ ϫⲉⲉϥⲉⲥⲃⲟ ⲉⲣϩⲟⲧⲉ ϩⲏⲧϥ ⲙⲡϫⲟⲉⲓⲥ ⲡⲉⲕⲛⲟⲩⲧⲉ ⲉⲧⲣⲉϥϩⲁⲣⲉϩ ⲉⲛⲉⲓⲉⲛⲧⲟⲗⲏ ⲧⲏⲣⲟⲩ ⲙⲛⲛⲉⲓⲇⲓⲕⲁⲓⲱⲙⲁ ⲉⲁⲁⲩ

20 ϫⲉⲕⲁⲥ ⲛⲛⲉⲡⲉϥϩⲏⲧ ϫⲓⲥⲉ ⲉϫⲛⲛⲉϥⲥⲛⲏⲩ ⲁⲩⲱ ϫⲉⲕⲁⲥ ⲉⲛⲛⲉϥⲣⲡⲃⲟⲗ ⲛⲛⲉⲛⲧⲟⲗⲏ ⲉⲟⲩⲛⲁⲙ ⲏ ⲉϩⲃⲟⲩⲣ ϫⲉⲉϥⲉⲣⲟⲩⲛⲟϭ ⲛⲟⲩⲟⲉⲓϣ ϩⲛⲧⲉϥⲁⲣⲭⲏ ⲛⲧⲟϥ ⲙⲛⲛⲉϥϣⲏⲣⲉ ⲛⲙⲙⲁϥ ϩⲛⲛϣⲏⲣⲉ ⲙⲡⲓⲥⲣⲁⲏⲗ