Daniel 3 — Coptic (Sahidic)

21 ⲧⲟⲧⲉ ⲛⲣⲱⲙⲉ ⲉⲧⲙⲙⲁⲩ ⲁⲩⲙⲟⲣⲟⲩ ⲉⲣⲉⲛⲉⲩϩⲟⲓⲧⲉ ϩⲓⲱⲟⲩ ⲙⲛⲛⲉⲩⲕⲗⲁϥⲧ ⲙⲛⲛⲉⲧⲙⲏⲣ ⲉⲛⲉⲩⲟⲩⲉⲣⲏⲧⲉ ⲁⲩⲛⲟϫⲟⲩ ⲉⲧⲙⲏⲧⲉ ⲛⲧⲉϩⲣⲱ ⲛⲥⲁⲧⲉ ⲉⲧⲙⲟⲩϩ

22 ⲉⲃⲟⲗ ϫⲉⲛϥϭⲙϭⲟⲙ ⲛϭⲓⲡϣⲁϫⲉ ⲙⲡⲣⲣⲟ ⲧⲉϩⲣⲱ ⲇⲉ ⲁⲩⲧⲙϩo ⲉⲙⲁⲧⲉ

23 ⲁⲩⲱ ⲡⲉⲓϣⲟⲙⲛⲧ ⲥⲉⲇⲣⲁⲕ ⲙⲓⲥⲁⲕ ⲁⲃⲇⲉⲛⲁⲅⲱ ⲁⲩϩⲉ ⲉⲧⲙⲏⲧⲉ ⲛⲧⲉϩⲣⲱ ⲉⲧⲙⲟⲩϩ ⲉⲩⲙⲏⲣ

24 ⲁⲩⲱ ⲛⲉⲩⲙⲟⲟϣⲉ ⲛⲧⲙⲏⲧⲉ ⲙⲡϣⲁϩ ⲉⲩϩⲱⲥ ⲉⲡⲛⲟⲩⲧⲉ ⲁⲩⲱ ⲉⲩϯⲉⲟⲟⲩ ⲙⲡϫⲟⲉⲓⲥ

25 ⲁⲁⲍⲁⲣⲓⲁⲥ ⲇⲉ ⲁϩⲉⲣⲁⲧϥ ⲙⲙⲁⲩ ⲁϥϣⲗⲏⲗ ⲛⲧⲉⲓϩⲉ ⲁⲩⲱ ⲁϥⲟⲩⲱⲛ ⲛⲣⲱϥ ϩⲛⲧⲙⲏⲧⲉ ⲙⲡⲕⲱϩⲧ ⲉϥϫⲱ ⲙⲙⲟⲥ ϫⲉ

26 ⲕⲥⲙⲁⲙⲁⲁⲧ ⲡϫⲟⲉⲓⲥ ⲡⲛⲟⲩⲧⲉ ⲛⲛⲉⲛⲉⲓⲟⲧⲉ ⲕⲥⲙⲁⲙⲁⲁⲧ ⲁⲩⲱ ⲡⲉⲕⲣⲁⲛ ϩⲁⲉⲟⲟⲩ ϣⲁⲛⲓⲉⲛⲉϩ

27 ϫⲉⲛⲧⲕ ⲟⲩⲇⲓⲕⲁⲓⲟⲥ ⲉϩⲣⲁⲓ ⲉϫⲛϩⲱⲃ ⲛⲓⲙ ⲛⲧⲁⲕⲁⲁⲩ ⲁⲩⲱ ⲛⲉⲕϩⲃⲏⲩⲉ ⲧⲏⲣⲟⲩ ϩⲉⲛⲙⲉ ⲛⲉ ⲁⲩⲱ ⲛⲉⲕϩⲓⲟⲟⲩⲉ ⲧⲏⲣⲟⲩ ⲥⲉⲥⲟⲩⲧⲱⲛ ⲁⲩⲱ ⲛⲉⲕϩⲁⲡ ⲧⲏⲣⲟⲩ ϩⲉⲛⲙⲉ ⲛⲉ

28 ⲁⲩⲱ ⲛϩⲁⲡ ⲙⲙⲉ ⲛⲉ ⲛⲧⲁⲕⲁⲁⲩ ⲕⲁⲧⲁϩⲱⲃ ⲛⲓⲙ ⲛⲧⲁⲕⲛⲧⲟⲩ ⲉϩⲣⲁⲓ ⲉϫⲱⲛ ⲁⲩⲱ ⲉϩⲣⲁⲓ ⲉϫⲛⲧϩⲓⲉⲣⲟⲩⲥⲁⲗⲏⲙ ⲧⲡⲟⲗⲓⲥ ⲉⲧⲟⲩⲁⲁⲃ ⲛⲛⲉⲛⲉⲓⲟⲧⲉ ϫⲉϩⲣⲁⲓ ϩⲛⲟⲩⲙⲉ ⲙⲛⲟⲩϩⲁⲡ ⲁⲕⲉⲓⲛⲉ ⲛⲛⲁⲓ ⲧⲏⲣⲟⲩ ⲉⲧⲃⲉⲛⲉⲛⲛⲟⲃⲉ

29 ϫⲉⲁⲛⲣⲛⲟⲃⲉ ⲁⲩⲱ ⲁⲛⲁⲛⲟⲙⲉⲓ ⲁⲛⲥⲁϩⲱⲛ ⲉⲃⲟⲗ ⲙⲙⲟⲕ ⲁⲛⲣⲛⲟⲃⲉ ϩⲛϩⲱⲃ ⲛⲓⲙ

30 ⲁⲩⲱ ⲙⲡⲉⲛⲥⲱⲧⲙ ⲛⲛⲉⲕⲉⲛⲧⲟⲗⲏ ⲟⲩⲇⲉ ⲙⲡⲉⲛϩⲁⲣⲉϩ ⲉⲣⲟⲟⲩ ⲟⲩⲇⲉ ⲙⲡⲉⲛⲁⲁⲩ ⲕⲁⲧⲁⲧϩⲉ ⲛⲧⲁⲕϩⲱⲛ ⲉⲧⲟⲟⲧⲛ ϫⲉⲕⲁⲥ ⲉⲣⲉⲡⲡⲉⲧⲛⲁⲛⲟⲩϥ ϣⲱⲡⲉ ⲙⲙⲟⲛ

31 ⲁⲩⲱ ϩⲱⲃ ⲛⲓⲙ ⲛⲧⲁⲕⲛⲧⲟⲩ ⲉϩⲣⲁⲓ ⲉϫⲱⲛ ⲙⲛϩⲱⲃ ⲛⲓⲙ ⲛⲧⲁⲕⲁⲁⲩ ⲛⲁⲛ ⲛⲧⲁⲕⲁⲁⲩ ϩⲣⲁⲓ ϩⲛⲟⲩϩⲁⲡ ⲙⲙⲉ

32 ⲁⲕⲧⲁⲁⲛ ⲉϩⲣⲁⲓ ⲉⲧⲟⲟⲧⲟⲩ ⲛϩⲉⲛⲁⲛⲟⲙⲟⲥ ⲛϫⲁϫⲉ ⲛⲁⲡⲟⲥⲧⲁⲧⲏⲥ ⲁⲩⲱ ⲛⲟⲩⲣⲣⲟ ⲛⲣⲉϥϫⲓⲛϭⲟⲛⲥ ⲁⲩⲱ ⲙⲡⲟⲛⲏⲣⲟⲥ ⲡⲁⲣⲁⲡⲕⲁϩ ⲧⲏⲣϥ

33 ⲧⲉⲛⲟⲩ ϭⲉ ⲛⲥⲧⲟ ⲛⲁⲛ ⲁⲛ ⲉⲩⲱⲛ ⲛⲣⲱⲛ ϫⲉⲁⲩϣⲓⲡⲉ ⲙⲛⲟⲩⲛⲟϭⲛⲉϭ ϣⲱⲡⲉ ⲛⲛⲉⲕϩⲙϩⲁⲗ ⲙⲛⲛⲉⲧϣⲙϣⲉ ⲛⲁⲕ

34 ⲙⲡⲣⲧⲁⲁⲛ ⲡⲉⲕⲣⲁⲛ ⲁⲩⲱ ⲧⲉⲕⲇⲓⲁⲑⲏⲕⲏ

35 ⲁⲩⲱ ⲉⲧⲃⲉⲁⲃⲣⲁϩⲁⲙ ⲙⲛⲡⲓⲥⲣⲁⲏⲗ ...

36 ⲛⲁⲓ ⲛⲧⲁⲕϣⲁϫⲉ ⲛⲧϩⲉ ⲛⲛⲥⲓⲟⲩ ⲛⲧⲡⲉ ⲁⲩⲱ ⲛⲧϩⲉ ⲙⲡϣⲱ ⲉⲧϩⲓϫⲙ ⲡⲉⲕⲣⲟ ⲛⲧⲑⲁⲗⲁⲥⲥⲁ

37 ϫⲉⲁⲛⲥⲃⲟⲕ ⲡϫⲟⲉⲓⲥ ⲡⲁⲣⲁⲛϩⲉⲑⲛⲟⲥ ⲧⲏⲣⲟⲩ ⲁⲩⲱ ⲧⲛⲑⲃⲃⲓⲏⲩ ϩⲣⲁⲓ ϩⲙⲡⲕⲁϩ ⲧⲏⲣϥ ⲙⲡϩⲟⲟⲩ ⲉⲧⲃⲉⲛⲉⲛⲛⲟⲃⲉ

38 ⲁⲩⲱ ⲙⲙⲛⲟⲩⲟⲛ ϩⲙⲡⲉⲓⲟⲩⲟⲉⲓϣ ⲛϭⲓⲟⲩⲁⲣⲭⲱⲛ ⲙⲛⲟⲩⲡⲣⲟⲫⲏⲧⲏⲥ ⲙⲛⲟⲩϩⲏⲅⲟⲩⲙⲉⲛⲟⲥ ⲟⲩⲇⲉ ϭⲗⲓⲗ ⲟⲩⲇⲉ ⲑⲩⲥⲓⲁ ⲟⲩⲇⲉ ⲡⲣⲟⲥⲫⲟⲣⲁ ⲟⲩⲇⲉ ϣⲟⲩϩⲏⲛⲉ ⲟⲩⲇⲉ ⲙⲁ ⲛⲧⲁⲗⲟ ⲉϩⲣⲁⲓ ⲙⲡⲉⲕⲙⲧⲟ ⲉⲃⲟⲗ ⲉⲧⲣⲉⲛϭⲓⲛⲉ ⲛⲟⲩⲛⲁ

39 ⲁⲗⲗⲁ ϩⲣⲁⲓ ϩⲛⲟⲩⲯⲩⲭⲏ ⲉⲥⲧⲛⲛⲏⲩ ⲙⲛⲟⲩⲡⲛⲉⲩⲙⲁ ⲉϥⲑⲃⲃⲓⲏⲩ ⲉⲕⲉϣⲁⲡⲉⲛ ⲉϩⲟⲩⲛ

40 ⲛⲧϩⲉ ⲛⲟⲩⲧⲁⲗⲟ ⲛⲟⲉⲓⲗⲉ ϩⲓⲙⲁⲥⲉ ⲁⲩⲱ ⲛⲧϩⲉ ⲛϩⲉⲛⲧⲃⲁ ⲛϩⲓⲉⲓⲃ ⲉⲩⲕⲓⲱⲟⲩ ⲧⲁⲓ ⲧⲉ ⲧϩⲉ ⲙⲁⲣⲉⲥϣⲱⲡⲉ ⲛϭⲓⲧⲉⲛⲑⲩⲥⲓⲁ ⲙⲡⲉⲕⲙⲧⲟ ⲉⲃⲟⲗ ⲛⲧⲉⲛϣⲙϣⲉ ⲛⲁⲕ ϫⲉⲙⲛϣⲓⲡⲉ ϣⲟⲟⲡ ⲛⲛⲉⲧⲛⲁϩⲧⲉ ⲉⲣⲟⲕ

41 ⲧⲉⲛⲟⲩ ⲇⲉ ⲧⲛⲟⲩⲁϩⲛ ⲛⲥⲱⲕ ϩⲙⲡⲉⲛϩⲏⲧ ⲧⲏⲣϥ ⲛⲧⲛⲣϩⲟⲧⲉ ⲉϩⲏⲧⲕ ϩⲙⲡⲉⲛϩⲏⲧ ⲧⲏⲣϥ ⲁⲩⲱ ⲧⲛϣⲓⲛⲉ ⲛⲥⲁⲡⲉⲕϩⲟ

42 ⲙⲡⲣϯϣⲓⲡⲉ ⲛⲁⲛ ⲁⲗⲗⲁ ⲁⲣⲓⲣⲉ ⲛⲙⲙⲁⲛ ⲕⲁⲧⲁⲧⲉⲕⲙⲛⲧϩⲁⲕ ⲁⲩⲱ ⲕⲁⲧⲁⲡⲁϣⲁⲓ ⲙⲡⲉⲕⲛⲁ

43 ⲙⲁⲧⲟⲩϫⲟⲛ ⲕⲁⲧⲁⲛⲉⲕϣⲡⲏⲣⲉ ⲁⲩⲱ ⲛⲅϯⲉⲟⲟⲩ ⲙⲡⲉⲕⲣⲁⲛ ⲡϫⲟⲉⲓⲥ

44 ⲁⲩⲱ ⲛⲥⲉϫⲓϣⲓⲡⲉ ⲉⲃⲟⲗ ⲛϭⲓⲛⲉⲧⲣⲃⲟⲟⲛⲉ ⲛⲛⲉⲕϩⲙϩⲁⲗ ⲁⲩⲱ ⲙⲁⲣⲟⲩϫⲓϣⲓⲡⲉ ⲉⲃⲟⲗ ϩⲁⲧⲉⲩϭⲟⲙ ⲧⲏⲣⲥ ⲛⲥⲟⲩⲱϣϥ ⲛϭⲓⲧⲉⲩⲛⲟⲙⲧⲉ

45 ⲁⲩⲱ ⲙⲁⲣⲟⲩⲉⲓⲙⲉ ϫⲉⲛⲧⲟⲕ ⲡⲉ ⲡϫⲟⲉⲓⲥ ⲡⲛⲟⲩⲧⲉ ⲙⲁⲩⲁⲁϥ ⲉϩⲣⲁⲓ ⲉϫⲛⲧⲟⲓⲕⲟⲩⲙⲉⲛⲏ ⲧⲏⲣⲥ

46 ⲛϩⲏⲡⲉⲣⲏⲧⲏⲥ ⲇⲉ ⲙⲡⲣⲣⲟ ⲛⲧⲁⲩⲛⲁϫⲟⲩ ⲙⲡⲟⲩⲕⲁ ⲧⲟⲟⲧⲟⲩ ⲉⲃⲟⲗ ⲉⲩⲧⲱⲕ ⲉⲧⲉϩⲣⲱ ⲛⲟⲩⲙⲁϩⲉ ⲙⲛⲟⲩⲗⲁⲙϫⲁⲧⲡ ⲟⲩⲥⲁⲁⲥⲉ ⲙⲛⲟⲩϭⲗⲱ

47 ⲡϣⲁϩ ⲁϥϫⲓⲥⲉ ⲉϩⲣⲁⲓ ⲉϫⲛⲧⲉϩⲣⲱ ⲛⲁⲁⲙⲉⲯⲓⲥ ⲙⲙⲁϩⲉ

48 ⲁϥⲉⲓ ⲉⲃⲟⲗ ⲁϥⲣⲱⲕϩ ⲛⲛⲉⲭⲁⲗⲇⲁⲓⲟⲥ ⲛⲁⲓ ⲛⲧⲁϥϩⲉ ⲉⲣⲟⲟⲩ ϩⲙⲡⲕⲱⲧⲉ ⲛⲧⲉϩⲣⲱ

49 ⲡⲁⲅⲅⲉⲗⲟⲥ ⲇⲉ ⲙⲡϫⲟⲉⲓⲥ ⲁϥⲉⲓ ⲙⲛⲁⲍⲁⲣⲓⲁⲥ ⲉϩⲣⲁⲓ ⲉⲧⲉϩⲣⲱ ⲁϥⲡⲱϣ ⲙⲡϣⲁϩ ⲛⲕⲱϩⲧ ⲉⲃⲟⲗ ϩⲛⲧⲉϩⲣⲱ

50 ⲁϥⲧⲣⲉⲧⲉⲙⲏⲧⲉ ⲛⲧⲉϩⲣⲱ ϣⲱⲡⲉ ⲛⲧϩⲉ ⲛⲟⲩⲡⲛⲉⲩⲙⲁ ⲛⲉⲓⲱⲧⲉ ⲉϥⲥⲱⲕ ⲁⲩⲱ ⲙⲡⲉϥϫⲱϩ ⲗⲁⲁⲩ ⲉⲣⲟⲟⲩ ⲛϭⲓⲡⲕⲱϩⲧ ⲟⲩⲇⲉ ⲙⲡⲉϥⲗⲩⲡⲉⲓ ⲙⲙⲟⲟⲩ ⲟⲩⲇⲉ ⲙⲡⲉϥⲉⲛⲱⲭⲗⲉⲓ ⲛⲁⲩ

51 ⲧⲟⲧⲉ ⲡϣⲟⲙⲛⲧ ⲛⲧϩⲉ ⲉⲃⲟⲗ ϩⲛⲟⲩⲧⲁⲡⲣⲟ ⲛⲟⲩⲱⲧ ⲁⲩϩⲱⲥ ⲁⲩϯⲉⲟⲟⲩ ⲁⲩⲥⲙⲟⲩ ⲉⲡⲛⲟⲩⲧⲉ ⲉϩⲣⲁⲓ ϩⲛⲧⲉϩⲣⲱ ⲉⲩϫⲱ ⲙⲙⲟⲥ ϫⲉ

52 ⲕⲥⲙⲁⲙⲁⲁⲧ ⲡϫⲟⲉⲓⲥ ⲡⲛⲟⲩⲧⲉ ⲛⲛⲉⲛⲉⲓⲟⲧⲉ ⲕⲥⲙⲁⲙⲁⲁⲧ ⲁⲩⲱ ⲕϫⲁⲥⲉ ϣⲁⲛⲓⲉⲛⲉϩ ⲁⲩⲱ ϥⲥⲙⲁⲙⲁⲁⲧ ⲛϭⲓⲡⲣⲁⲛ ⲙⲡⲉⲕⲉⲟⲟⲩ ⲉⲧⲟⲩⲁⲁⲃ ϥⲥⲙⲁⲙⲁⲁⲧ ⲁⲩⲱ ϥϫⲁⲥⲉ ϣⲁⲛⲓⲉⲛⲉϩ ⲧⲏⲣⲟⲩ

53 ⲕⲥⲙⲁⲙⲁⲁⲧ ϩⲣⲁⲓ ϩⲙⲡⲉⲣⲡⲉ ⲙⲡⲉⲕⲉⲟⲟⲩ ⲉⲧⲟⲩⲁⲁⲃ ⲕⲥⲙⲁⲙⲁⲁⲧ ⲁⲩⲱ ⲕϩⲁⲉⲟⲟⲩ ϣⲁⲛⲓⲉⲛⲉϩ

54 ⲕⲥⲙⲁⲙⲁⲁⲧ ⲡⲉⲧϭⲱϣⲧ ⲉϩⲣⲁⲓ ⲉϫⲛⲛⲛⲟⲩⲛ ⲉⲧϩⲙⲟⲟⲥ ⲉϩⲣⲁⲓ ⲉϫⲛⲛⲉⲭⲉⲣⲟⲩⲃⲓⲛ ⲕⲥⲙⲁⲙⲁⲁⲧ ⲁⲩⲱ ⲕϫⲟⲥⲉ ϣⲁⲛⲓⲉⲛⲉϩ

55 ⲕⲥⲙⲁⲙⲁⲁⲧ ⲉϩⲣⲁⲓ ⲉϫⲙⲡⲉⲑⲣⲟⲛⲟⲥ ⲛⲧⲉⲕⲙⲛⲧⲣⲣⲟ ⲕⲥⲙⲁⲙⲁⲁⲧ ⲁⲩⲱ ⲕϫⲟⲥⲉ ϣⲁⲛⲓⲉⲛⲉϩ

56 ⲕⲥⲙⲁⲙⲁⲁⲧ ϩⲣⲁⲓ ϩⲙⲡⲉⲥⲧⲉⲣⲉⲱⲙⲁ ⲛⲧⲡⲉ ⲕⲥⲙⲁⲙⲁⲁⲧ ⲁⲩⲱ ⲕⲧⲁⲓⲏⲩ ϣⲁⲛⲓⲉⲛⲉϩ

57 ⲛⲉϩⲃⲏⲩⲉ ⲧⲏⲣⲟⲩ ⲙⲡϫⲟⲉⲓⲥ ⲥⲙⲟⲩ ⲉⲡϫⲟⲉⲓⲥ ⲥⲙⲟⲩ ⲉⲣⲟϥ ⲛⲧⲉⲧⲛϫⲓⲥⲉ ⲙⲙⲟϥ ϣⲁⲛⲓⲉⲛⲉϩ

58 ⲙⲡⲏⲩⲉ ⲥⲙⲟⲩ ⲉⲡϫⲟⲉⲓⲥ ⲥⲙⲟⲩ ⲉⲣⲟϥ ⲛⲧⲉⲧⲛϫⲓⲥⲉ ⲙⲙⲟϥ ϣⲁⲛⲓⲉⲛⲉϩ

59 ⲛⲁⲅⲅⲉⲗⲟⲥ ⲙⲡϫⲟⲉⲓⲥ ⲥⲙⲟⲩ ⲉⲡϫⲟⲉⲓⲥ ⲥⲙⲟⲩ ⲉⲣⲟϥ ⲛⲧⲉⲧⲛϫⲓⲥⲉ ⲙⲙⲟϥ ϣⲁⲛⲓⲉⲛⲉϩ

60 ⲙⲙⲟⲟⲩ ⲧⲏⲣⲟⲩ ⲉⲧϩⲓϫⲛⲧⲡⲉ ⲥⲙⲟⲩ ⲉⲡϫⲟⲉⲓⲥ ⲥⲙⲟⲩ ⲉⲣⲟϥ ⲛⲧⲉⲧⲛϫⲓⲥⲉ ⲙⲙⲟϥ ϣⲁⲛⲓⲉⲛⲉϩ

61 ⲛϭⲟⲙ ⲧⲏⲣⲟⲩ ⲙⲡϫⲟⲉⲓⲥ ⲥⲙⲟⲩ ⲉⲡϫⲟⲉⲓⲥ ⲥⲙⲟⲩ ⲉⲣⲟϥ ⲛⲧⲉⲧⲛϫⲓⲥⲉ ⲙⲙⲟϥ ϣⲁⲛⲓⲉⲛⲉϩ

62 ⲡⲣⲏ ⲙⲛⲡⲟⲟϩ ⲥⲙⲟⲩ ⲉⲡϫⲟⲉⲓⲥ ⲥⲙⲟⲩ ⲉⲣⲟϥ ⲛⲧⲉⲧⲛϫⲓⲥⲉ ⲙⲙⲟϥ ϣⲁⲛⲓⲉⲛⲉϩ

63 ⲛⲥⲓⲟⲩ ⲛⲧⲡⲉ ⲥⲙⲟⲩ ⲉⲡϫⲟⲉⲓⲥ ⲥⲙⲟⲩ ⲉⲣⲟϥ ⲛⲧⲉⲧⲛϫⲓⲥⲉ ⲙⲙⲟϥ ϣⲁⲛⲓⲉⲛⲉϩ

64 ⲛⲙⲟⲟⲩ ⲛϩⲱⲟⲩ ⲧⲏⲣⲟⲩ ⲙⲛⲛⲉⲓⲱⲧⲉ ⲥⲙⲟⲩ ⲉⲡϫⲟⲉⲓⲥ ⲥⲙⲟⲩ ⲉⲣⲟϥ ⲛⲧⲉⲧⲛϫⲓⲥⲉ ⲙⲙⲟϥ ϣⲁⲛⲓⲉⲛⲉϩ ⲛϭⲏⲡⲉ ⲙⲛⲛⲛⲓϥ ⲥⲙⲟⲩ ⲉⲡϫⲟⲉⲓⲥ ⲥⲙⲟⲩ ⲉⲣⲟϥ ⲛⲧⲉⲧⲛϫⲓⲥⲉ ⲙⲙⲟϥ ϣⲁⲛⲓⲉⲛⲉϩ

65 ⲛⲉⲡⲛⲉⲩⲙⲁ ⲧⲏⲣⲟⲩ ⲥⲙⲟⲩ ⲉⲡϫⲟⲉⲓⲥ ⲥⲙⲟⲩ ⲉⲣⲟϥ ⲛⲧⲉⲧⲛϫⲓⲥⲉ ⲙⲙⲟϥ ϣⲁⲛⲓⲉⲛⲉϩ

66 ⲡⲕⲱϩⲧ ⲙⲛⲡⲕⲁⲩⲙⲁ ⲥⲙⲟⲩ ⲉⲡϫⲟⲉⲓⲥ ⲥⲙⲟⲩ ⲉⲣⲟϥ ⲛⲧⲉⲧⲛϫⲓⲥⲉ ⲙⲙⲟϥ ϣⲁⲛⲓⲉⲛⲉϩ

67 ⲡⲁⲣⲟϣ ⲙⲛⲡⲕⲁⲩⲙⲁ ⲥⲙⲟⲩ ⲉⲡϫⲟⲉⲓⲥ ⲥⲙⲟⲩ ⲉⲣⲟϥ ⲛⲧⲉⲧⲛϫⲓⲥⲉ ⲙⲙⲟϥ ϣⲁⲛⲓⲉⲛⲉϩ

68 ⲛⲉⲓⲱⲧⲉ ⲙⲛⲛⲛⲓϥ ⲥⲙⲟⲩ ⲉⲡϫⲟⲉⲓⲥ ⲥⲙⲟⲩ ⲉⲣⲟϥ ⲛⲧⲉⲧⲛϫⲓⲥⲉ ⲙⲙⲟϥ ϣⲁⲛⲓⲉⲛⲉϩ

69 ⲛⲉⲩϣⲟⲟⲩⲉ ⲙⲛⲛⲉϩⲟⲟⲩ ⲥⲙⲟⲩ ⲉⲡϫⲟⲉⲓⲥ ⲥⲙⲟⲩ ⲉⲣⲟϥ ⲛⲧⲉⲧⲛϫⲓⲥⲉ ⲙⲙⲟϥ ϣⲁⲛⲓⲉⲛⲉϩ

70 ⲡⲟⲩⲟⲉⲓⲛ ⲙⲛⲡⲕⲁⲕⲉ ⲥⲙⲟⲩ ⲉⲡϫⲟⲉⲓⲥ ⲥⲙⲟⲩ ⲉⲣⲟϥ ⲛⲧⲉⲧⲛϫⲓⲥⲉ ⲙⲙⲟϥ ϣⲁⲛⲓⲉⲛⲉϩ

71 ⲡϫⲁϥ ⲙⲛⲡⲉⲭⲓⲱⲛ ⲥⲙⲟⲩ ⲉⲡϫⲟⲉⲓⲥ ⲥⲙⲟⲩ ⲉⲣⲟϥ ⲛⲧⲉⲧⲛϫⲓⲥⲉ ⲙⲙⲟϥ ϣⲁⲛⲓⲉⲛⲉϩ

72 ⲡⲉⲡⲁⲭⲛⲏ ⲙⲛⲡⲉⲭⲓⲱⲛ ⲥⲙⲟⲩ ⲉⲡϫⲟⲉⲓⲥ ⲥⲙⲟⲩ ⲉⲣⲟϥ ⲛⲧⲉⲧⲛϫⲓⲥⲉ ⲙⲙⲟϥ ϣⲁⲛⲓⲉⲛⲉϩ

73 ⲛⲉⲃⲣⲏϭⲉ ⲙⲛⲛⲉⲕⲗⲟⲟⲗⲉ ⲥⲙⲟⲩ ⲉⲡϫⲟⲉⲓⲥ ⲥⲙⲟⲩ ⲉⲣⲟϥ ⲛⲧⲉⲧⲛϫⲓⲥⲉ ⲙⲙⲟϥ ϣⲁⲛⲓⲉⲛⲉϩ

74 ⲙⲁⲣⲉⲡⲕⲁϩ ⲥⲙⲟⲩ ⲉⲡϫⲟⲉⲓⲥ ⲙⲁⲣⲉϥⲥⲙⲟⲩ ⲉⲣⲟϥ ⲛϥϫⲓⲥⲉ ⲙⲙⲟϥ ϣⲁⲛⲓⲉⲛⲉϩ

75 ⲛⲧⲟⲟⲩ ⲙⲛⲛⲥⲓⲃⲧ ⲥⲙⲟⲩ ⲉⲡϫⲟⲉⲓⲥ ⲥⲙⲟⲩ ⲉⲣⲟϥ ⲛⲧⲉⲧⲛϫⲓⲥⲉ ⲙⲙⲟϥ ϣⲁⲛⲓⲉⲛⲉϩ

76 ⲛⲁⲓ ⲧⲏⲣⲟⲩ ⲉⲧⲣⲏⲧ ϩⲓϫⲙⲡⲕⲁϩ ⲥⲙⲟⲩ ⲉⲡϫⲟⲉⲓⲥ ⲥⲙⲟⲩ ⲉⲣⲟϥ ⲛⲧⲉⲧⲛϫⲓⲥⲉ ⲙⲙⲟϥ ϣⲁⲛⲓⲉⲛⲉϩ

77 ⲛⲡⲏⲅⲏ ⲥⲙⲟⲩ ⲉⲡϫⲟⲉⲓⲥ ⲥⲙⲟⲩ ⲉⲣⲟϥ ⲛⲧⲉⲧⲛϫⲓⲥⲉ ⲙⲙⲟϥ ϣⲁⲛⲓⲉⲛⲉϩ

78 ⲛⲉⲑⲁⲗⲁⲥⲥⲁ ⲙⲛⲛⲉⲓⲉⲣⲱⲟⲩ ⲥⲙⲟⲩ ⲉⲡϫⲟⲉⲓⲥ ⲥⲙⲟⲩ ⲉⲣⲟϥ ⲛⲧⲉⲧⲛϫⲓⲥⲉ ⲙⲙⲟϥ ϣⲁⲛⲓⲉⲛⲉϩ

79 ⲛⲕⲏⲧⲟⲥ ⲙⲛⲛⲉⲧⲕⲓⲙ ⲧⲏⲣⲟⲩ ϩⲛⲙⲟⲩ ⲥⲙⲟⲩ ⲉⲡϫⲟⲉⲓⲥ ⲥⲙⲟⲩ ⲉⲣⲟϥ ⲛⲧⲉⲧⲛϫⲓⲥⲉ ⲉⲣⲟϥ ϣⲁⲛⲓⲉⲛⲉϩ

80 ⲛϩⲁⲗⲁⲧⲉ ⲧⲏⲣⲟⲩ ⲛⲧⲡⲉ ⲥⲙⲟⲩ ⲉⲡϫⲟⲉⲓⲥ ⲥⲙⲟⲩ ⲉⲣⲟϥ ⲛⲧⲉⲧⲛϫⲓⲥⲉ ⲙⲙⲟϥ ϣⲁⲛⲓⲉⲛⲉϩ

81 ⲛⲑⲏⲣⲓⲟⲛ ⲧⲏⲣⲟⲩ ⲙⲛⲛⲧⲃⲛⲏⲩⲉ ⲥⲙⲟⲩ ⲉⲡϫⲟⲉⲓⲥ ⲥⲙⲟⲩ ⲉⲣⲟϥ ⲛⲧⲉⲧⲛϫⲓⲥⲉ ⲙⲙⲟϥ ϣⲁⲛⲓⲉⲛⲉϩ

82 ⲛϣⲏⲣⲉ ⲛⲛⲣⲱⲙⲉ ⲥⲙⲟⲩ ⲉⲡϫⲟⲉⲓⲥ ⲥⲙⲟⲩ ⲉⲣⲟϥ ⲛⲧⲉⲧⲛϫⲓⲥⲉ ⲙⲙⲟϥ ϣⲁⲛⲓⲉⲛⲉϩ

83 ⲡⲓⲥⲣⲁⲏⲗ ⲥⲙⲟⲩ ⲉⲡϫⲟⲉⲓⲥ ⲥⲙⲟⲩ ⲉⲣⲟϥ ⲛⲧⲉⲧⲛϫⲓⲥⲉ ⲙⲙⲟϥ ϣⲁⲛⲓⲉⲛⲉϩ

84 ⲛⲟⲩⲏⲏⲃ ⲧⲏⲣⲟⲩ ⲙⲡϫⲟⲉⲓⲥ ⲥⲙⲟⲩ ⲉⲡϫⲟⲉⲓⲥ ⲥⲙⲟⲩ ⲉⲣⲟϥ ⲛⲧⲉⲧⲛϫⲓⲥⲉ ⲙⲙⲟϥ ϣⲁⲛⲓⲉⲛⲉϩ

85 ⲛϩⲙϩⲁⲗ ⲧⲏⲣⲟⲩ ⲙⲡϫⲟⲉⲓⲥ ⲥⲙⲟⲩ ⲉⲡϫⲟⲉⲓⲥ ⲥⲙⲟⲩ ⲉⲣⲟϥ ⲛⲧⲉⲧⲛϫⲓⲥⲉ ⲙⲙⲟϥ ϣⲁⲛⲓⲉⲛⲉϩ

86 ⲛⲉⲡⲛⲉⲩⲙⲁ ⲙⲛⲛⲉⲯⲩⲭⲏ ⲛⲛⲇⲓⲕⲁⲓⲟⲥ ⲥⲙⲟⲩ ⲉⲡϫⲟⲉⲓⲥ ⲥⲙⲟⲩ ⲉⲣⲟϥ ⲛⲧⲉⲧⲛϫⲓⲥⲉ ⲙⲙⲟϥ ϣⲁⲛⲓⲉⲛⲉϩ

87 ⲛⲉⲧⲟⲩⲁⲁⲃ ⲙⲛⲛⲉⲧⲑⲃⲃⲓⲏⲩ ϩⲙⲡⲉⲩϩⲏⲧ ⲥⲙⲟⲩ ⲉⲡϫⲟⲉⲓⲥ ⲥⲙⲟⲩ ⲉⲣⲟϥ ⲛⲧⲉⲧⲛϫⲓⲥⲉ ⲙⲙⲟϥ ϣⲁⲛⲓⲉⲛⲉϩ

88 ⲁⲛⲁⲛⲓⲁⲥ ⲁⲍⲁⲣⲓⲁⲥ ⲙⲓⲥⲁⲏⲗ ⲥⲙⲟⲩ ⲉⲡϫⲟⲉⲓⲥ ⲥⲙⲟⲩ ⲉⲣⲟϥ ⲛⲧⲉⲧⲛϫⲓⲥⲉ ⲙⲙⲟϥ ϣⲁⲛⲓⲉⲛⲉϩ ...

89 ...

90 ...

91 ...

92 ...

93 ...

94 ...

95 ...

96 ...

97 ...

98 ...

99 ...