Amos 8 — Coptic (Sahidic)

1 ⲧⲁⲓ ⲧⲉ ⲧϩⲉ ⲛⲧⲁⲡϫⲟⲉⲓⲥ ⲧⲟⲩⲟⲓ ⲁⲩⲱ ⲉⲓⲥ ⲟⲩϩⲛⲁⲁⲩ ⲛϭⲉⲣⲏϭ

2 ⲡⲉϫⲉⲡϫⲟⲉⲓⲥ ⲛⲁⲓ ϫⲉⲉⲕⲛⲁⲩ ⲛⲧⲟⲕ ⲉⲟⲩϩⲁⲙⲱⲥ ⲡⲉϫⲁⲓ ϫⲉⲉⲩϩⲛⲁⲁⲩ ⲛϭⲉⲣⲏϭ ⲡⲉϫⲉⲡϫⲟⲉⲓⲥ ⲛⲁⲓ ϫⲉⲁⲧϩⲁⲏ ⲉⲓ ⲉϫⲙⲡⲁⲗⲁⲟⲥ ⲡⲓⲥⲣⲁⲏⲗ ⲛⲛⲁⲟⲩⲱϩ ϭⲉ ⲉⲧⲟⲟⲧⲉⲥⲁⲁⲧϥ

3 ⲁⲩⲱ ⲥⲉⲛⲁⲱϣ ⲉⲃⲟⲗ ⲛϭⲓⲛⲙⲉϣϯⲃⲥ ⲙⲡⲣⲡⲉ ϩⲛⲙⲙⲉⲗⲁⲧⲉ ⲛⲕⲛϩⲉ ϩⲙⲡⲉϩⲟⲟⲩ ⲉⲧⲙⲙⲁⲩ ⲡⲉϫⲉⲡϫⲟⲉⲓⲥ ⲛⲁϣⲉⲧⲣⲁϩⲧⲥ ⲛⲧⲁⲥϣⲱⲡⲉ ⲙⲛⲗⲁⲁⲩ ⲛⲁϯ ⲙⲡⲉϥϩⲣⲟⲟⲩ ϩⲛⲗⲁⲁⲩ ⲙⲙⲁ

4 ⲥⲱⲧⲙ ϭⲉ ⲉⲛⲁⲓ ⲛⲉⲧϩⲟϫϩϫ ⲙⲡⲉⲧⲙⲟⲕϩ ⲙⲡⲛⲁⲩ ⲛϩⲧⲟⲟⲩⲉ ⲁⲩⲱ ⲛⲉⲧⲑⲙⲕⲟ ⲉϫⲛⲛϩⲏⲕⲉ ϩⲓϫⲙⲡⲕⲁϩ

5 ⲛⲉⲧϫⲱ ⲙⲙⲟⲥ ϫⲉⲉⲣⲉⲡⲉⲃⲟⲧ ⲛⲁⲟⲩⲱ ⲧⲛⲁⲩ ⲛⲧⲛϯ ⲉⲃⲟⲗ ⲁⲩⲱ ⲛⲥⲁⲃⲃⲁⲧⲟⲛ ϫⲉⲉⲛⲉⲟⲩⲱⲛ ⲙⲡⲉⲛⲁϩⲟ ⲉⲧⲁⲙⲓⲉⲟⲩⲕⲟⲩⲓ ⲛⲟⲓⲡⲉ ⲁⲩⲱ ⲉϩⲉⲣϣⲡϣⲓ ⲁⲩⲱ ⲉⲧⲁⲙⲓⲉⲟⲩⲙⲁϣⲉ ⲛⲕⲣⲟϥ

6 ⲉⲧⲣⲉⲛⲕⲱ ⲛⲁⲛ ⲛⲛⲉⲧⲙⲟⲕϩ ϩⲁⲟⲩϩⲁⲧ ⲁⲩⲱ ⲛϩⲏⲕⲉ ⲉⲡⲙⲁ ⲛϩⲉⲛⲧⲟⲟⲩⲉ ⲛⲧⲛⲣⲉⲓⲉⲡϣⲱⲧ ⲉⲃⲟⲗ ϩⲛⲅⲉⲛⲏⲙⲁ ⲛⲓⲙ

7 ⲁⲡϫⲟⲉⲓⲥ ⲱⲣⲕ ⲉϫⲛⲧⲙⲛⲧϫⲁⲥⲓϩⲏⲧ ⲛⲓⲁⲕⲱⲃ ϫⲉⲉⲛⲉ ⲥⲉⲛⲁⲣⲡⲱⲃϣ ⲛⲛⲉⲧⲛϩⲃⲏⲩⲉ ⲧⲏⲣⲟⲩ ⲉⲩϫⲣⲟ

8 ⲙⲏ ⲉϫⲛⲛⲁⲓ ⲙⲡⲕⲁϩ ⲛⲁϣⲧⲟⲣⲧⲣ ⲁⲛ ⲛⲥⲉⲣϩⲏⲃⲉ ⲛϭⲓⲟⲩⲟⲛ ⲛⲓⲙ ⲉⲧⲟⲩⲏϩ ϩⲣⲁⲓ ⲛϩⲏⲧϥ ⲁⲩⲱ ⲧⲉⲩϩⲁⲉ ⲛⲁⲉⲓ ⲉϩⲣⲁⲓ ⲛⲧϩⲉ ⲛⲟⲩⲓⲉⲣⲟ ⲁⲩⲱ ⲥⲉⲛⲁⲉⲓ ⲉⲡⲉⲥⲏⲧ ⲛⲧϩⲉ ⲙⲡⲓⲉⲣⲟ ⲛⲕⲏⲙⲉ

9 ⲁⲩⲱ ⲥⲛⲁϣⲱⲡⲉ ϩⲙⲡⲉϩⲟⲟⲩ ⲉⲧⲙⲙⲁⲩ ⲡⲉϫⲉⲡϫⲟⲉⲓⲥ ⲡⲣⲏ ⲛⲁϩⲱⲧⲡ ⲙⲡⲛⲟⲩ ⲙⲙⲉⲉⲣⲉ ⲁⲩⲱ ⲡⲟⲩⲟⲉⲓⲛ ϥⲛⲁⲣⲕⲁⲕⲉ ϩⲓϫⲙⲡⲕⲁϩ ϩⲙⲡⲉϩⲟⲟⲩ

10 ϯⲛⲁⲡⲱⲱⲛⲉ ⲛⲛⲉⲧⲛϣⲁ ⲉⲩϩⲏⲃⲉ ⲁⲩⲱ ⲛⲉⲧⲛⲱⲇⲏ ⲧⲏⲣⲟⲩ ⲉⲩⲧⲟⲉⲓⲧ ⲛⲧⲁⲧⲣⲉⲟⲩⲟⲛ ⲛⲓⲙ ⲕⲁⲟⲩϭⲟⲟⲩⲛⲉ ϩⲓϫⲛⲧⲉⲩϯⲡⲉ ⲛⲧⲁⲧⲣⲉⲟⲩⲟⲛ ⲛⲓⲙ ϩⲉⲉⲕⲉϫⲱⲟⲩ ⲁⲩⲱ ϯⲛⲁⲕⲁⲁϥ ⲛⲧϩⲉ ⲙⲡϩⲉⲃⲉ ⲛⲟⲩⲙⲉⲣⲓⲧ ⲁⲩⲱ ⲛⲉⲧⲛⲙⲙⲁϥ ⲉⲩϩⲟⲟⲩ ⲛⲙⲕⲁϩ ⲛϩⲏⲧ

11 ⲉⲓⲥ ϩⲉⲛϩⲟⲟⲩ ⲛⲏⲩ ⲡⲉϫⲉⲡϫⲟⲉⲓⲥ ⲧⲁϫⲟⲟⲩ ⲛⲟⲩϩⲉⲃⲱⲱⲛ ⲉϫⲙⲡⲕⲁϩ ⲛⲟⲩϩⲉⲃⲱⲱⲛ ⲁⲛ ⲛⲟⲉⲓⲕ ⲟⲩⲇⲉ ⲛⲟⲩⲉⲓⲃⲉ ⲁⲛ ⲙⲙⲟⲟⲩ ⲁⲗⲗⲁ ⲟⲩϩⲉⲃⲱⲱⲛ ⲛⲥⲱⲧⲙ ⲉⲡϣⲁϫⲉ ⲙⲡϫⲟⲉⲓⲥ

12 ⲁⲩⲱ ⲙⲙⲟⲟⲩ ⲥⲉⲛⲁⲛⲟⲉⲓⲛ ϫⲓⲛⲑⲁⲗⲁⲥⲥⲁ ϣⲁⲧϩⲁⲗⲁⲥⲥⲁ ⲁⲩⲱ ϫⲓⲛⲡⲙϩⲓⲧ ϣⲁⲙⲙⲁ ⲛϣⲁ ⲥⲉⲛⲁⲡⲱⲧ ⲉⲩϣⲓⲛⲉ ⲛⲥⲁⲡϣⲁϫⲉ ⲙⲡϫⲟⲉⲓⲥ ⲛⲥⲉⲧⲙϩⲉ ⲉⲣⲟϥ

13 ϩⲙⲡⲉϩⲟⲟⲩ ⲉⲧⲙⲙⲁⲩ ⲥⲉⲛⲁⲱϫⲛ ⲛϭⲓⲙⲡⲁⲣⲑⲉⲛⲟⲥ ⲉⲧⲛⲁⲛⲟⲩⲟⲩ ⲁⲩⲱ ⲛϩⲉⲣϣⲓⲣⲉ ϩⲛⲟⲩⲉⲓⲃⲉ

14 ⲛⲉⲧⲱⲣⲕ ⲉϫⲙⲡⲕⲱ ⲉⲃⲟⲗ ⲛⲧⲥⲁⲙⲁⲣⲓⲁ ⲉⲩϫⲱ ⲙⲙⲟⲥ ϫⲉⲇⲁⲛ ⲡⲟⲩⲛⲟⲩⲧⲉ ⲟⲛϩ ⲁⲩⲱ ⲡⲟⲩⲛⲟⲩⲧⲉ ⲟⲛϩ ⲃⲏⲣⲥⲁⲃⲉⲉ ⲁⲩⲱ ⲥⲉⲛⲁϩⲉ ⲛⲥⲉⲧⲙⲉϣⲧⲱⲟⲩⲛ ϭⲉ