Read 4 Maccabees 18 side by side with translations · The Final Bible
1 ܐܘ ܒܢ̈ܝܐ ܕܡܢ ܙܪܥܐ ܕܚܨܗ ܕܐܒܪܗܡ ܐܢܬܘܢ ܕܝܢ ܒܢ̈ܝ ܐܝܣܪܐܝܠ ܐܬܛܦܝܣܘ ܠܢܡܘܣܐ ܗܢܐ ܘܒܟܠ ܐܣܟܝܡ ܝܩܪܘܢܝܗܝ
2 ܐܝܟ ܐܢܫܐ ܕܡܦܣܝܢ ܕܡܫܠܛ ܥܠ ܚ̈ܫܐ ܐܝܬܘܗܝ ܪܥܝܢܐ ܕ̇ܫܠܡ ܠܕܚܠܬ ܐܠܗܐ ܘܠܐ ܗܘܐ ܒܠܚܘܕ ܠܚ̈ܫܐ ܕܡܢ ܠܓܘ ܐܠܐ ܐܦ ܥܠ ܟܐܒ̈ܐ ܕܡܢ ܠܒܪ ܡܡܠܟ
3 ܗ̇ܢܘܢ ܓܝܪ ܢܨܝܚ̈ܐ ܥܠ ܕܡܛܠ ܫܪܪܐ ܝܗ̣ܒܘ ܓܘܫ̈ܡܝܗܘܢ ܠܐܘ̈ܠܨܢܐ ܠܐ ܗܘܐ ܒܠܚܘܕ ܒ̈ܢܝ ܐܢܫܐ ܒܗܘܢ ܬܗ̇ܪܘ ܐܠܐ ܐܦ ܠܡܢ̇ܬܐ ܐܠܗܝܬܐ ܐܫܬܘܝܘ
4 ܘܡܛܠܗܘܢ ܒܫܝܢܐ ܝܬ̣ܒ ܥܡܢ ܘܚܕܬ ܒܐܬܪܗ ܛܘ̈ܟܣܝ ܢܡܘ̈ܣܘܗܝ ܘܠܒܥܠܕ̈ܒܒܘܗܝ ܙܟ̣ܐ
5 ܛܪܘܢܐ ܕܝܢ ܐܢܛܝܟܘܣ ܐܦ ܗܪܟܐ ܥܠ ܐܪܥܐ ܡܣܡ ܒܪܫܐ ܩܒ̇ܠ ܘܕܡܝܬ ܐܝܬܘܗܝ ܒܫܘܢܩܐ ܟܕ ܓܝܪ ܠܐ ܐܫܟܚ ܕܒܡܕܡ ܢܥܨܐ ܠܒ̈ܢܝ ܐܘܪܫܠܡ ܕܒܡܕܡ ܐܚܪܝܢ ܢܣܥܪܘܢ ܟܕ ܡܫܢܝܢ ܡܢ ܥܝܕܐ ܕܐܒ̈ܗܝܗܘܢ
6 ܗ̇ܝܕܝܢ ܐܫܩܠ ܡܢ ܒ̈ܢܝ ܐܘܪܫܠܡ ܘܥܠ ܦܪ̈ܣܝܐ ܒܚܝܠܗ ܐܙ̣ܠ ܐܡ̇ܪܐ ܗܘܬ ܕܝܢ ܐܡܐ ܙܕܩ̈ܐ ܗܠܝܢ ܠܒܢ̈ܝܗ̇
7 ܕܐܢܐ ܗܘܝܬ ܒܬܘܠܬܐ ܕܟܝܬܐ ܘܡܢ ܒܝܬ ܐܒܝ ܠܐ ܢܦܩ̇ܬ ܐܠܐ ܢ̇ܛܪܐ ܗ̇ܘܝܬ ܒܬܘܠܘܬܝ ܡܢ ܟܠ ܢܟܝ̈ܢܝܢ
8 ܘܡܚܒܠܢܐ ܐܝܟ ܕܒܡܕܒܪܐ ܒܡܕܝܢܬܐ ܠܝ ܠܐ ܩܪܒ ܘܠܐ ܢܟܗ̇ ܠܒܬܘܠܘܬܝ ܫܕܠܐ ܢܟ̇ܘܝܐ ܕܚܙܬܐ ܗ̇ܘܝܬ ܕܝܢ ܒܙܒܢܐ ܕܥܠܝܡܘܬܝ ܥܡ ܓܒܪܐ
9 ܘܡܢ ܕܗ̣ܘܝܬܘܢ ܐܢܬܘܢ ܡܢܗ ܘܐܬ̣ܝܬܘܢ ܠܩܘܡܬܐ ܡܝܬ ܐܒܘܟܘܢ ܠܗ̇ܘ ܕܝܢ ܛܘܒ ܓܒܪܐ ܓܝܪ ܕܒܥ̇ܐ ܗܘܐ ܚܝ̈ܐ ܕܒܗܘܢ ܒ̈ܢܝܐ ܣ̈ܓܝܐܐ ܢܗܘܘܢ ܠܗ ܥܠ ܡܓܙܝܘܬܐ ܕܡܢ ܒܢܘ̈ܗܝ ܠܐ ܐܬܬܢܚ
10 ܗ̇ܘ ܕܡܠܦ ܗܘܐ ܠܟܘܢ ܟܕ ܥܕܟܝܠ ܥܡܟܘܢ ܗܘܐ ܢܡܘܣܐ ܘܢܒ̈ܝܐ
11 ܘܡܠܦ ܗܘܐ ܠܟܘܢ ܥܠ ܗܒܝܠ ܕܡܢ ܩܐܝܢ ܐܬܩܛܠ ܘܩ̇ܪܐ ܗܘܐ ܩܕܡܝܟܘܢ ܠܝܩܕܐ ܕܫܠܡܐ ܠܐܝܣܚܩ ܘܠܝܘܣܦ ܕܒܒܝܬ ܐܣܝܪ̈ܐ
12 ܘܐܡ̇ܪ ܗܘܐ ܠܟܘܢ ܥܠ ܦܝܢܚܣ ܛ̇ܢܢܐ ܘܡܫܬܥܐ ܗܘܐ ܠܟܘܢ ܥܠ ܚܢܢܝܐ ܘܥܙܪܝܐ ܘܡܝܫܐܝܠ ܕܒܢܘܪܐ
13 ܡܩܠܣ ܗܘܐ ܕܝܢ ܐܦ ܠܕܢܝܐܝܠ ܕܒܓܘܒܐ ܕܐܪ̈ܝܘܬܐ
14 ܘܡܥܗܕ ܗܘܐ ܠܟܘܢ ܥܠ ܟܬܒܗ ܕܐܫܥܝܐ ܗ̇ܘ ܕܐܡ̇ܪ ܕܐܦ ܒܢܘܪܐ ܬܥܒܪ ܫܠܗܒܝܬܐ ܠܐ ܬܘܩܕܟ
15 ܙܡ̇ܪ ܗܘܐ ܩܕܡܝܟܘܢ ܠܕ̣ܘܝܕ ܡܟܬܒܢܐ ܕܙܡܝܪ̈ܬܐ ܟܕ ܐܡ̇ܪ ܕܣܓ̈ܝܐܢ ܒܝ̣ܫ̈ܬܗ ܕܙܕܝܩܐ
16 ܘܡܢ ܫܠܝܡܘܢ ܡܬܠܐ ܐܡ̇ܪ ܗܘܐ ܠܟܘܢ ܕܐܝܠܢܐ ܗܘ ܕܚ̈ܝܐ ܠܥ̇ܒ̈ܕܝ ܨܒܝܢܗ
17 ܘܡܠܬ ܚܙܩܝܐܝܠ ܡܫܪܪ ܗܘܐ ܗ̇ܘ ܕܐܡ̇ܪ ܕܚܐ̇ܝܢ ܓܪ̈ܡܐ ܗܠܝܢ ܝܒܝ̈ܫܐ
18 ܬܫܒܘܚܬܐ ܕܝܢ ܗ̇ܝ ܕܡܠܦ ܗܘܐ ܡܘܫܐ ܠܐ ܛܥ̣ܐ ܟܕ ܡ̇ܠܦ ܗܘܐ ܠܟܘܢ ܗ̇ܝ ܕܐܡ̇ܪܐ ܐܢܐ ܡܡܝܬ ܐܢܐ ܘܐܢܐ ܡܚܐ ܐܢܐ
19 ܗܠܝܢ ܐܢܘܢ ܚܝ̈ܝܢ ܘܢܘܓܪܐ ܕܝܘ̈ܡܬܢ
20 ܐܘ ܠܝܘܡܐ ܗ̇ܘ ܡܪܝܪܐ ܘܠܐ ܡܪܝܪܐ ܟܕ ܡ̇ܠܟܐ ܕܝ̈ܘܢܝܐ ܢܘܪܐ ܒܢܘܪܐ ܕܥ̇ܟ ܟܕ ܡܝܬܐ ܠܗܘܢ ܠܛܘܒ̈ܢܐ ܥܠ ܩܕܣ̈ܐ ܕܩܫܝܐܝܬ ܫܓܝܪܝܢ ܘܒܟܒܕܐ ܚܡܝܡܬܐ ܒܫ̈ܦܘܕܐ ܘܒܫܢ̈ܕܐ ܗܠܝܢ ܕܥܠ ܫܒܥܐ ܒܢ̈ܝܗ̇ ܕܒܪܬ ܐܒܪܗܡ ܥܬܕ ܗܘܐ
21 ܘܒ̈ܒܬܐ ܕܥ̈ܝܢܐ ܚܨ̇ܐ ܗܘܐ ܘܠܫ̈ܢܐ ܦܣ̇ܩ ܗܘܐ ܘܒܫ̈ܢܕܐ ܡܪܝ̈ܪܐ ܩ̇ܛܠ ܗܘܐ
22 ܕܡܛܠ ܗܠܝܢ ܕܝܢ̣ܐ ܐܠܗܝܐ ܫܢܩܗ ܘܥܬܝܕ ܬܘܒ ܕܢܫܢܩܝܘܗܝ ܠܛܪܘܢܐ ܕܗ̣ܘܐ ܐܝܟ ܕܝܘܐ ܚܒ̇ܠܐ
23 ܒܢܘ̈ܗܝ ܕܝܢ ܕܐܒܪܗܡ ܥܡ ܐܡܗܘܢ ܛܥܝܢܬ ܙܟܘܬܐ ܡܕܝܪܝܢ ܒܕܟܝܘܬܐ ܕܢܦܫܐ ܘܒܠܐ ܡܝܘܬܘܬܐ ܕܡܢ ܐܠܗܐ ܢܣ̣ܒܘ
24 ܕܠܗ ܫܘܒܚܐ ܘܐܝܩܪܐ ܗܫܐ ܘܠܥܠܡ ܥܠܡܝܢ ܐܡܝܢ ܫ̣ܠܡ ܡܐܡܪܐ ܕܥܠ ܡܩ̈ܒܝܐ ܘܐܡܗܘܢ