Read 4 Maccabees 1 side by side with translations · The Final Bible
1 ܡܠܬܐ ܕܦܝܠܘܣܦܘܬܐ ܡܛܝܒ ܐܢܐ ܕܐܚ̇ܘܐ ܩܕܡܝܟܘܢ ܕܐܢ ܡܫܠܛܐ ܗܘ ܪܥܝܢܐ ܫܪܝܪܐ ܕܫ̇ܠܡ ܠܕܚܠܬ ܐܠܗܐ ܘܡ̇ܠܟ ܐܢܐ ܠܟܘܢ ܬܪܝܨܐܝܬ̣ ܕܒܚܦܝܛܘܬܐ ܬܚܘܪܘܢ ܒܦܝܠܣܘܦܘܬܐ
2 ܐܦ ܓܝܪ ܐܠܨܐܝܬ ܠܟܠܢܫ ܚܫ̇ܚܐ ܝܬܝܪܐܝܬ ܠܐܝܠܝܢ ܕܪ̈ܓܝܢ ܠܡܝܬܪܘܬܐ ܛܥܝܢܐ ܓܝܪ ܪܥܝܢܐ ܪܡܝܣܐ
3 ܐܢ ܗ̣ܘ ܕܥܠ ܚܫ̈ܐ ܡܥܟܪ̈ܢܐ ܕܟܢܝܟܘܬܐ ܡܬܚܙܐ ܕܡܡܠܟ ܪܥܝܢܐ ܡܝܬܪܐ ܥܠ ܐܣܘܛܘܬܐ ܥܠ ܪܓܬܐ
4 ܘܠܐ ܗܘܐ ܒܠܚܘܕ ܥܠ ܗܠܝ̣ܢ ܐܠܐ ܐܦ ܥܠ ܚ̈ܫܐ ܐܚܪ̈ܢܐ ܕܠܙܕܝܩܘܬܐ ܡܥ̣ܘܟܝܢ ܡܬܚܙܐ ܕܡܫܠܛ ܥܠ ܙ̈ܢܝܐ ܒܝܫ̈ܐ ܘܥܠ ܚ̈ܫܐ ܐܚܪ̈ܢܐ ܕܠܓܢܒܪܘܬܐ ܡܟܠܝܢ ܥܠ ܚܡܬܐ ܘܥܠ ܕܠܐ ܐܢܫ ܢܬܪܦܐ ܩܕܡ ܐܘ̈ܠܨܢܐ ܘܥܠ ܕܚܠܬܐ
5 ܘܟܒܪ ܐܢܫ ܢܐܡܪ ܕܐܢܗ̣ܘ ܕܥܠ ܚ̈ܫܐ ܡܫܠܛ ܗܘܢܐ ܐܝ̇ܟܢܐ ܥܠ ܛܘܐܝܝ ܘܥܠ ܠܐ ܝܕܥܬܐ ܠܐ ܡܫܠܛ ܐܡ̇ܪܝܢ ܕܝܢ ܡܠܬܐ ܗܕܐ ܕܠܓܘܚܟܐ ܫ̇ܘܝܐ
6 ܠܐ ܗܘܐ ܓܝܪ ܥܠ ܚ̈ܫܐ ܕܝܠܗ ܡܫܠܛ ܗܘܐ ܐܠܐ ܥܠ ܚ̈ܫܐ ܕܠܘܩܒܠ ܓܢܒܪܘܬܐ ܘܙܕܝܩܘܬܐ ܘܟܢܝܟܘܬܐ ܐܝܬܝܗܘܢ ܘܥܠ ܗܠܝܢ ܠܐ ܗܘܐ ܐܝܟ ܡ̇ܢ ܕܡܨ̣ܐ ܕܢܒ̇ܛܠ ܐܢܘܢ ܐܠܐ ܕܠܐ ܢܬܚܣܢ ܡܢܗܘܢ ܰ
7 ܡܢ ܣܓܝܐ̈ܬܐ ܕܝܢ ܘܡܢ ܐܚܪ̈ܢܝܬܐ ܐܝܬ ܠܝ ܕܐ̣ܚܘܐ ܕܡܡܠܟ ܗ̣ܘ ܥܠ ܚ̈ܫܐ̇ ܪܥ̇ܝܢܐ ܕܫ̇ܠܡ̇ ܠܕܚܠܬ ܐܠܗܐ
8 ܝܬܝܪܐܝܬ ܕܝܢ ܗܕܐ ܡܚܘܐ ܐܢܐ ܡܢ ܚܠܝܨܘܬܐ ܕܗܠܝܢ ܕܥܠ ܐ̈ܦܝ ܕܚܠܬ ܐܠܗܐ ܡܝܬܘ ܐ̇ܡ̇ܪ ܐܢܐ ܕܝܢ ܐܠܝܥܙܪ ܘܫܒܥܐ ܐܚ̈ܐ ܘܐܡܗܘܢ
9 ܟܠܗܘܢ ܓܝܪ ܗܠܝܢ ܥܠ ܟܐ̈ܒܐ ܕܥܕܡܐ ܠܡܘܬܐ ܡܡܛܝܢ ܐܡܣܪܘ ܘܚ̇ܘܝܘ ܕܡܫܠܛ ܥܠ ܚ̈ܫܐ ܐܝܬܘܗܝ ܪܥܝܢܐ
10 ܡܢ ܐܢܫܐ ܕܝܢ ܫܒܝ̈ܚܐ ܗܫܐ ܠܗܠܝܢ ܗܘ ܣܝܡ̣ܐ ܠܝ ܕܐܩܠܣ ܠܗܠܝܢ ܕܒܙܒܢܐ ܗܢܐ ܡܛܠ ܕܚܠܬ ܐܠܗܐ ܡܝܬܘ ܥܡ ܐܡܗܘܢ ܟܕ ܝܗ̇ܒ ܐܢܐ ܠܗܘܢ ܛܘܒܐ ܥܠ ܚܫܝ̈ܗܘܢ
11 ܗܘ̇ܘ ܓܝܪ ܬܗܪܐ ܠܐ ܗܘܐ ܒܠܚܘܕ ܠܟܠܗܘܢ ܒܢܝ̈ܢܫܐ ܕܫܪܟܐ ܡܛܠ ܓܢܒܪܘܬܗܘܢ ܐܠܐ ܐܦ ܠܗ̇ܢܘܢ ܕܐܫܬܢܕܘ ܒܗܘܢ ܗܘܘ ܓܝܪ ܥܠ̣ܬܐ ܠܡܦܘܠܬܗ̇ ܕܛܪܘܢܘܬܐ ܕܥܠ ܥܡܐ ܘܙܟܐܘܗܝ ܠܛܪܘܢܐ ܘܕܟܝܘܗܝ ܠܐܬܪܗܘܢ
12 ܘܥܠ ܗܕܐ ܗܫܐ ܠܡܐܡܪ ܕܠܝܠܐ ܠܢ ܡܢ ܒܬܪ ܕܥܠܬܗ̇ ܕܡܠܬܢ ܢܘܕܥ ܗ̇ܝ ܕܗܟܢܐ ܡܥܕܝܢܢ ܠܡܥܒܕ ܘܗܝ̇ܕܝܢ ܒܥܘܕܪܢܗ ܕܐܠܗܐ ܡܚܟܡ ܟܠ ܡܠܬܢ ܥܠܝܗܝܢ ܡܦܢܝܢܢ
13 ܒܥܬܢ ܗܟܝܠ ܗܕܐ ܗܝ ܐܢ ܡܫܠܛ ܥܠ ܚܫܐ ܪܥܝܢܐ
14 ܢܒ̇ܚܢ ܕܝܢ ܡܢܐ ܐܝܬܘܗܝ ܪܥܝܢܐ ܘܡܢܐ ܐܝܬܘܗܝ ܚܫܐ ܘܟܡ̣ܐ ܙ̈ܢܝܢ ܕܚܫܐ ܘܐܢܗ̣ܘ ܕܥܠ ܟܠܗܘܢ ܪܥܝܢܐ ܡܫܠܛ
15 ܪܥܝܢܐ ܗܟܝܠ ܐܝܬܘܗܝ ܗܘܢܐ ܕܒܟܐܢܘܬܐ ܓܒ̇ܐ ܠܚ̈ܝܐ ܕܒܚܟܡܬܐ
16 ܚܟܡܬܐ ܕܝܢ ܐܝܬܝܗ̇ ܐܝܕܥܬܐ ܕܨܒ̈ܘܬܐ ܕܐܠܗܘܬܐ ܘܕܐܢܫܘܬܐ ܘܕܥܠܠ̈ܬܗܝܢ
17 ܗܝ̣ ܕܝܢ ܗܕܐ ܐܝܬܝܗ̇ ܡܪܕܘܬܐ ܕܒܢܡܘܣܐ ܗ̇ܝ ܕܒܐܝ̈ܕܝܗ̇ ܐܦ ܗܠܝܢ ܕܐܠܗܘܬܐ ܪ̈ܘܪܒܐܝܬ ܘܗܠܝܢ ܕܐܢܫܘܬܐ ܥܗܢܐܝܬ ܝܠܦ̇ܝܢ ܚܢܢ
18 ܡܢܘ̈ܬܐ ܕܝܢ ܕܝܠܗ̇ ܕܚܟܡܬܐ ܐܝܬܝܗܝܢ ܗܠܝܢ ܡܗܘܢܘܬܐ ܙܕܝܩܘܬܐ ܟܢܝܟܘܬܐ
19 ܕܡܢ ܟܘܠܗܝܢ ܕܝܢ ܪܫܝܐ ܐܝܬܝܗ̇ ܡܗܘܢܘܬܐ ܕܒܐ̈ܝܕܝܗ̇ ܥܠ ܟܠ ܚ̈ܫܝܢ ܡܡܠܟ ܪܥܝܢܐ
20 ܟܝܢܗܘܢ ܕܝܢ ܕܚ̈ܫܐ ܕܠܓܘ ܡܢܗܘܢ ܚܒܝܫܝܢ ܐܚܪ̈ܢܐ ܐܝܬܝܗܘܢ̣ ܬܪܝܢ ܗܢܝܝܘܬܐ ܘܐܘܠܨܢܐ ܗܠܝܢ ܕܝܢ ܠܘ̇ܝܢ ܠܗ̇ ܠܢܦܫܐ
21 ܚܫ̈ܐ ܕܝܢ ܣܓܝܐ̈ܐ ܐܝܟ ܕܒܝܘܒܠܐ ܣܕܝܪܝܢ ܒܬܪܗܘܢ
22 ܡܢ ܩܕܡ ܗܢܝܝܘܬܐ ܗܟܝܠ ܐܝܬܝܗ̇ ܪܓܬܐ ܒܬܪܗ̇ ܕܝܢ ܚܕܘܬܐ
23 ܡܢ ܩܕܡ ܐܘܠܨܢܐ ܕܝܢ ܐܝܬ ܕܚܠܬܐ ܡܢ ܒܬܪܗ ܕܝܢ ܕܐܘܠܨܢܐ̣ ܥܩܬܐ
24 ܚܡܬܐ ܕܝܢ ܚܫܐ ܗܘ ܕܓܘܐ ܕܗܢܝܝܘܬܐ ܘܕܐܘܠܨܢܐ ܢܕܥ ܕܝܢ ܐܢܫ ܕܗܟܢܐ ܗܝ̣ ܐܡܬܝ ܕܢ̇ܦܠ ܒܗ̇
25 ܒܗܢܝܝܘܬܐ ܗܟܝܠ ܐܝܬܝܗ̇ ܡܨܛܠܝܢܘܬܐ ܕܠܘܬ ܚ̈ܫܐ ܒܝܫ̣̈ܐ ܕܡܢ ܟܠܗܘܢ ܚ̈ܫܐ̣ ܐܣܟ̈ܡܝܗ ܣܓܝܐܝܢ
26 ܕܒܢܦܫܐ ܗܠܝܢ ܣ̇ܥܪܐ ܚܬܝܪܘܬܐ ܘܪܚܡܬ ܟܣܦܐ ܘܪܚܡܬ ܬܫܒܘܚܬܐ ܘܚܪܝܢܘܬܐ
27 ܒܦܓܪܐ ܕܝܢ ܕܢܐܟܘܠ ܕܟܠ ܡܕܡ ܘܕܗ̇ܘܐ ܙ̇ܟܐ ܠܟܪܣܗ ܘܕܗ̣ܘܐ ܐ̇ܟܠ ܡܫܘܚܕܐܝܬ̣
28 ܐܝ̇ܟܢܐ ܗܟܝܠ ܕܢܨ̈ܒܬܐ ܐܝܬܝܗܝܢ ܕܦܓܪܐ ܘܕܢܦܫܐ ܬܪ̈ܬܝܗܝܢ ܗܠܝܢ ܗܢܝܝܘܬܐ ܘܐܘܠܨܢܐ ܕܡܬܝܠܕܝܢ ܡܢ ܟܐ̈ܒܐ ܗܟܢܐ ܣܓܝܐ̈ܝܢ ܥܘ̈ܦܐ ܕܗܠܝܢ ܚ̈ܫܐ
29 ܕܠܚܕ ܚܕ ܡܢܗܘܢ ܗ̣ܘ ܪܥܝܢܐ ܕܫ̣ܠܡ ܠܕܚܠܬ ܐܠܗܐ ܦ̇ܠܚ ܘܡܕܟܐ ܘܟ̇ܣܚ ܘܡܛܥܡ ܘܡܟܪܟ ܘܡܫܩܐ ܘܡܪܝܚ ܠܟܘܠ ܥ̈ܠܠܢ ܕܡܘ̈ܠܕܢ ܟܐ̈ܒܐ
30 ܗܘܢܐ ܓܝܪ ܐܝܬܘܗܝ ܡܕܒܪܢܗ̇ ܕܡܝܬܪܘܬܐ ܡ̇ܠܟܐ ܕܝܢ ܕܥܠ ܚܫ̈ܐ ܘܡܬܚܙܐ ܠܘܩܕܡ ܒܝܕ ܥܒ̈ܕܐ ܡܥܟܪ̈ܢܐ ܕܟܢܝܟܘܬܐ ܕܡܫܠܛ ܗܘ ܥܠ ܚ̈ܫܐ
31 ܟܢܝܟܘܬܐ ܗܟܝܠ ܕܐܢܫ̣ ܢܗܘܐ ܙܟ̇ܐ ܠܐܪ̈ܓܝܓܬܐ
32 ܗܠܝܢ ܕܐܝܬܝܗܝܢ ܡܢܗܝܢ ܢܦܫ̈ܢܝܬܐ ܘܡܢܗܝܢ ܦܓܪ̈ܢܝܬܐ ܡܬܚܙܐ ܕܝܢ ܕܐܦ ܥܠ ܗܠܝܢ ܘܥܠ ܗܠܝܢ ܡܫܠܛ
33 ܘܐܠܐ ܐܝ̇ܟܢܐ ܡܐ ܕܡܬܙܝܥܝܢ ܚܢܢ ܠܡܐܟܠ ܡܕܡ ܕܠܐ ܡܦܣ ܡܗܦܟܝܢ ܚܢܢ ܢܦܫܢ ܡܢ ܐ̈ܪܓܝܓܬܢ ܠܐ ܗܘܐ ܕܡܨ̣ܐ ܪܥܝܢܐ ܠܡܙܟܐ ܠܪ̈ܓܝܓܬܐ ܐܢܐ ܗܟܢܐ ܣ̇ܒܪ ܐܢܐ
34 ܪ̈ܓܝܢ ܚܢܢ ܓܝܪ ܠܡܐܟܠ ܠܚܝܘ̈ܬܐ ܕܒܝܡܐ ܘܠܦܪܚܬܐ ܘܠܐܪܒܥܬ ܪ̈ܓܠܐ ܘܠܟܘܠ ܡܐ̈ܟܠܢ ܘܡܬܟܠܝܢ ܚܢܢ ܡܛܠ ܡܫܠܛܘܬܗ ܕܪܥܝܢܐ
35 ܘܡܬܛܦܝܣܝܢ ܚܢܢ ܘܡܬܬܟܣܝܢ ܚܫ̈ܝܗܝܢ ܕܪ̈ܓܝܓܬܐ ܟܕ ܡܢ ܪܥܝܢܐ ܪܡܝܣܐ ܡܙܕܓܪܝܢ ܘܡܬܒܠܡܝܢ ܟܠܗܘܢ ܙܘ̈ܥܐ ܕܦܓܪܐ