Read 2 Esdras 5 side by side with translations · The Final Bible
1 ܥܠ ܐܬܘ̈ܬܐ ܕܝܢ̣ ܗܐ ܝܘܡ̈ܬܐ ܐܬ̇ܝܢ ܘܢܬܬܚܕܘܢ ܥ̇ܡܘܪ̈ܘܗܝ ܕܥܠܡܐ ܒܬܘܗܬܐ ܣܓܝܐܬܐ ܘܬܬܟܣܐ ܡܢ̇ܬܐ ܕܫܪܪܐ ܘܥܩܪܬܐ ܬܗܘܐ ܐܪܥܗ̇ ܕܗܝܡܢܘܬܐ
2 ܘܢܣܓܐ ܥ̣ܘܠܐ ܘܫܪܝܚܘܬܐ̣ ܝܬܝܪ ܡܢ ܗܢܐ ܕܚ̣ܙܝܬ ܗܫܐ ܘܝܬܝܪ ܡܢ ܗ̇ܘ ܕܫܡ̣ܥܬ ܡܢ ܩܕܝܡ
3 ܘܬܗܘܐ ܕܠܐ ܩܝ̇ܡܐ ܘܕܠܐ ܡܬܕܝܫܐ ܐܪܥܐ ܗܕܐ ܕܚ̣ܙܝܬ ܕܡܡܠܟܐ ܗܫܐ ܘܢܚܙܘܢܗ̇ ܠܐܪܥܐ ܗܕܐ ܟܕ ܚܪܒܐ
4 ܐܢ ܕܝܢ ܢܬܠ ܠܟ ܡܪܝܡܐ ܚܙܘܐ̣ ܚ̇ܙܐ ܐܢܬ ܠܗ̇ܝ ܕܒܬܪ ܬܠܝܬܝܬܐ ܕܡܫܬܓܫܐ ܘܢܬܚܙܐ ܡܢ ܫܠܝܐ ܫܡ̣ܫܐ ܒܠܠܝܐ ܘܣܗܪܐ ܒܐܝܡܡܐ
5 ܘܩܝܣܐ ܢ̇ܛܦ ܕܡܐ ܘܟܐܦܐ ܬܬܠ ܩܠܗ̇ ܘܥܡ̈ܡܐ ܢܬܙܝܥܘܢ ܘܐܐܪ̈ ܢܬܚܠܦܘܢ
6 ܘܢܡܠܟ ܗ̇ܘ ܕܠܐ ܣܒ̇ܪܝܢ ܥܠܘܗܝ ܣܓܝܐ̈ܐ ܘܦܪܚܬܐ ܬܫܢܐ
7 ܘܝܡܐ ܕܣܕܘܡ ܢܥܒܕ ܢܘ̈ܢܐ ܣܓ̈ܝܐܐ ܘܢܬܠ ܩܠܗ ܒܠܠܝܐ ܗ̇ܘ ܕܠܐ ܝܕ̇ܥܝܢ ܠܗ ܣ̈ܓܝܐܐ ܘܟܠܗܘܢ ܢܫܡܥܘܢܗ̇
8 ܘܦܚ̈ܬܐ ܢܬܥܒܕܘܢ ܒܕܘ̈ܟܝܬܐ ܣܓܝܐ̈ܬܐ ܘܬܟܝܒܐܝܬ ܢܘܪܐ ܬܗܘܐ ܡܫܬܕܪܐ ܘܚܝ̈ܘܬܐ ܕܕܒܪܐ ܢܫ̈ܢܝܢ ܡܢ ܐܬܪܗܝܢ ܘܐܬ̈ܘܬܐ ܡܢ ܢܫ̈ܐ ܢܬܚ̈ܙܝܢ ܢܬܝܠܕܘܢ ܓܝܪ ܥܘ̣̈ܠܐ ܟܕ ܠܐ ܡܫܡܠܝܢ
9 ܘܒܡ̈ܝܐ ܚ̈ܠܝܐ ܢܫܬܟܚܘܢ ܡܠ̈ܝܚܐ ܘܪ̈ܚ̇ܡܐ ܥܠ ܪ̈ܚܡ̇ܝܗܘܢ ܡܢ ܫܠܝܐ ܢܥܒܕܘܢ ܩܪܒܐ ܘܬܬܟܣܐ ܗܝ̇ܕܝܢ ܚܟܡܬܐ ܘܣܟܘܠܬܢܘܬܐ ܬܐܙܠ ܠܗ̇ ܠܐܘܨܪ̈ܝܗ̇
10 ܘܬܬܒܥܐ ܠܘܬ ܣܓܝܐ̈ܐ ܘܠܐ ܬܫܬܟܚ ܘܢܣܓܐ ܛܠܘܡܝܐ ܘܫܪܝܚܘܬܐ ܥܠ ܐܪܥܐ
11 ܘܢܫܐ̇ܠ ܐܬܪܐ ܠܐ̇ܝܢܐ ܕܩܪܝܒ ܠܗ ܘܢܐܡܪ ܠܗ ܕܠܡܐ ܥܒ̣ܪܬ ܥܠܝܟ ܙܕܝܩܘܬܐ ܐܘ ܓܒܪܐ ܕܥ̇ܒܕ ܙܕܝܩܘܬܐ ܘܗ̣ܘ ܕܝܢ ܐܬܪܐ ܢܟܦܘܪ
12 ܘܢܗܘܐ ܒܗ̇ܘ ܙܒܢܐ ܢܣܒܪܘܢ ܒ̈ܢܝ ܐܢܫܐ ܘܠܐ ܢܣܒܘܢ ܘܢܠܐܘܢ ܘܠܐ ܢܫܟܚܘܢ ܘܢܥܡܠܘܢ ܘܠܐ ܬܬܩܢ ܐܘܪܚܗܘܢ
13 ܗܠܝܢ ܐܬܘ̈ܬܐ ܐܬܦܩܕ ܠܝ ܕܐܡ̇ܪ ܠܟ ܘܐܢ ܕܝܢ ܬܨܠܐ ܬܘܒ ܘܬܒܥܐ ܐܝܟ ܕܗܫܐ ܘܬܨܘܡ ܫܒܥܐ ܝܘܡ̈ܝܢ ܫܡ̇ܥܬ ܕܪ̈ܘܪܒܢ ܡܢ ܗܠܝܢ
14 ܘܐܬ̇ܬܥܝܪܬ ܘܦܓܪܝ ܪܐ̇ܬ ܗܘܐ ܣ̇ܓܝ ܘܢܦܫܝ ܠܐܝܐ ܗܘܬ ܐܝܟ ܕܬܦܘܩ
15 ܘܐܚܕܢܝ ܡܠܐ̇ܟܐ ܗ̇ܘ ܕܡܡܠܠ ܒܝ ܘܚܝܠܢܝ ܘܐܩܝܡܢܝ ܥܠ ܪ̈ܓܠܝ ܀ ܀
16 ܘܗ̣ܘܐ ܒܠܠܝܐ ܕܬܪܝܢ ܘܐ̣ܬܐ ܠܘܬܝ ܦܣܠܛܐܝܠ ܪܝܫܗ ܕܥܡܐ ܘܐܡ̣ܪ ܠܝ ܐܝ̇ܟܐ ܗ̣ܘܝܬ ܘܠܡܢܐ ܟܡܝܪ̈ܢ ܐ̈ܦܝܟ
17 ܐܘ ܠܐ ܝܕ̇ܥ ܐܢܬ ܕܐܢܬ ܗܘ ܕܐܬܗ̣ܝܡܢܬ ܥܠ ܐܝܣܪܝܠ ܒܐܬܪܐ ܕܫܒܝܬܗܘܢ
18 ܩܘܡ ܗܟܝܠ ܘܐܟܘܠ ܠܚܡܐ ܩܠܝܠ ܕܠܐ ܬܫܒܘܩ ܐܢܘܢ ܐܝܟ ܪܥ̇ܝܐ ܠܡܪܥܝܬܗ ܒܐܝ̣ܕܐ ܕܕܐ̈ܒܐ ܚ̈ܒܠܐ
19 ܘܐܢܐ ܐܡ̇ܪܬ ܠܗ ܙܠ ܠܟ ܡܢܝ ܘܠܐ ܬܬܩܪܒ ܨܐܕܝ ܥܕܡܐ ܠܫܒܥܐ ܝܘܡ̈ܝܢ ܘܗܝ̇ܕܝܢ ܬܐܬܐ ܠܘܬܝ ܘܐܫܡ̇ܥܟ ܡ̈ܠܐ ܘܟܕ ܐܡ̇ܪܬ ܠܗ ܐܙ̣ܠ ܠܗ ܡܢ ܠܘܬܝ ܀
20 ܘܐܢܐ ܨܡ̇ܬ ܫܒܥܐ ܝܘܡ̈ܝܢ ܟܕ ܡܬܬܢܚ ܗ̇ܘܝܬ ܘܒܟ̇ܐ̣ ܐܝܟ ܕܦܩܕܢܝ ܪܡܐܝܠ ܡܠܐܟܐ
21 ܘܗ̣ܘܐ ܡܢ ܒܬܪ ܫܒܥܐ ܝܘ̈ܡܝܢ ܘܗܐ ܬܘܒ ܡܚ̈ܫܒܬܗ ܕܠܒܝ ܐ̈ܠܨܢ ܗ̈ܘܝ ܠܝ ܣ̇ܓܝ
22 ܘܢܣ̣ܒܬ ܢܦܫܝ ܪܘܚܐ ܕܒܘܝܢܐ ܘܬܘܒ ܫ̇ܪܝܬ ܠܡܡܠܠܘ ܩܕܡ ܡܪܝܡܐ ܡ̈ܠܐ ܗܠܝܢ ܕܒܥܘܬܐ ܘܕܬܟܫܦܬܐ
23 ܘܥ̇ܢܝܬ ܘܐܡ̇ܪܬ ܐܘ ܡܪܝܐ ܡܪܝ ܡܢ ܟܘܠܗܘܢ ܥܒ̈ܝܗ̇ ܕܐܪܥܐ ܘܐ̈ܝܠܢܝܗ̇ ܓܒܝܬ ܠܟ ܓܦܬܐ ܚܕܐ
24 ܘܡܢ ܟܠܗܝܢ ܐܪ̈ܥܬܐ ܕܬܒܝܠ ܓ̣ܒܝܬ ܠܟ ܐܬܪܐ ܚܕ
25 ܘܡܢ ܟܘܠܗܘܢ ܬܗ̈ܘܡܐ ܕܝܡܐ ܐܣܓܝܬ ܠܟ ܚܕ ܢܚܠܐ ܘܡܢ ܟܘܠܗܘܢ ܗܒ̈ܒܐ ܕܬܒܝܠ ܓܒ̣ܝܬ ܠܟ ܗܒܒܐ ܚܕ ܘܡܢ ܟܠܗܝܢ ܡ̈ܕܝܢܬܐ ܕܐܬܒܢܝ ܩܕ̣ܫܬ ܠܟ ܠܨܗܝܘܢ
26 ܘܡܢ ܟܘܠܗ̇ ܦܪܚܬܐ ܕܐܬܒ̣ܪܝܬ ܫܡ̣ܗܬ ܠܟ ܝܘܢܐ ܚܕܐ ܘܡܢ ܟܠܗ̇ ܥܢܐ ܕܐܬܒ̣ܪܝܬ ܨܒ̣ܝܬ ܒܢܩܝܐ ܚܕܐ
27 ܘܡܢ ܣܘܓܐܐ ܕܥܡ̈ܡܐ ܩ̣ܪܒܬ ܠܟ ܥܡܐ ܚܕ ܘܢܡܘܣܐ ܗ̇ܘ ܕܐܬܒܚܪ ܡܢ ܟܠ̣ ܝܗ̣ܒܬ ܠܥܡܐ ܗ̇ܘ ܕܪܚ̣ܡܬ
28 ܘܗܫܐ ܡܪܝܐ ܠܡܢܐ ܐܫܠ̣ܡܬ ܚܕ ܠܣܓ̈ܝܐܐ ܘܒܣܪܬܝܗܝ ܠܚܕ ܥ̇ܩܪܐ ܝܬܝܪ ܡܢ ܣܓ̈ܝܐܐ ܘܒ̣ܕܪܬ ܘܕ̣ܪܝܬ ܠܝܚܝܕܝܟ ܒܝܢܬ ܣ̈ܓܝܐܐ
29 ܘܕ̇ܫܘ ܗܠܝܢ ܕܩܝ̇ܡܝܢ ܠܘܩܒܠ ܦܘ̈ܩܕܢܝܟ ܠܐܝܠܝܢ ܕܗܝܡܢܘ ܒܕܝܬܩܐ ܕܝܠܟ
30 ܘܐܢܕܝܢ ܡܣ̣ܢܐ ܣܢܝܬܝܗܝ ܠܥܡܟ ܒܐܝ̈ܕܝܟ ܕܝܠܟ ܚܝܒ ܗܘܐ ܕܢܬܪܕܐ ܀ ܀
31 ܘܡܢ ܒܬܪ ܕܡ̇ܠܠܬ ܡ̈ܠܐ ܗܠܝܢ̣ ܐܫܬܠܚ ܠܘܬܝ ܡܠܐܟܐ ܗ̇ܘ ܕܐܫܬܠܚ ܗܘܐ ܠܘܬܝ ܒܠܠܝܐ ܕܥ̣ܒܪ
32 ܘܐܡ̣ܪ ܠܝ ܨܘܬܝܢܝ ܥܙܪܐ ܘܐܫ̇ܡܥܟ ܘܚܘܪ ܒܝ ܘܐܣܝܡ ܩܕܡܝܟ ܡ̈ܠܐ ܀
33 ܘܥ̇ܢܝܬ ܘܐܡ̇ܪܬ ܠܗ ܡܠܠ ܡܪܝ̇̇ ܘܐܡ̣ܪ ܠܝ ܣ̇ܓܝ ܐܬܬܙܝܥܬ ܥܠ ܐܝܣܪܝܠ ܐܘ ܛܒ ܪܚܡܬܝܗܝ ܝܬܝܪ ܡܢ ܥܒ̇ܘܕܗ
34 ܘܐܡ̇ܪܬ ܠܐ ܡܪܝ̇̇ ܐܠܐ ܡܚܫ ܗܘ ܚ̇ܫܬ ܘܡ̇ܠܠܬ ܡܛܘܠ ܕܡܢܓ̈ܕܢ ܠܝ ܟܘ̈ܠܝܬܝ ܟܘܠ ܫܥܐ ܕܒ̇ܥܐ ܐܢܐ ܕܐܕܪܟ ܓܙܪ ܕܝܢ̣ܐ ܕܡܪܝܡܐ ܘܐܥ̇ܩܒ ܡܕܡ ܡܢ ܕܝܢ̣ܗ
35 ܘܐܡ̣ܪ ܠܝ ܠܐ ܡܫܟܚ ܐܢܬ ܘܐܡ̇ܪܬ ܠܗ ܡܛܠ ܡܢܐ ܡܪܝ ܡ̇ܨܠܐ ܐܢܐ ܐܘ ܠܡܢܐ ܐܬ̣̇ܝܠܕܬ ܘܠܡܢܐ ܠܐ ܗ̣ܘܐ ܠܝ ܡܪܒܥܗ̇ ܕܐܡܝ ܩܒܪܐ ܕܠܐ ܐܚܙܐ ܥܡܠܗ ܕܝܥܩܘܒ ܘܠܐܘܬܗ ܕܙܪܥܗ ܕܐܝܣܪܝܠ ܀
36 ܘܥܢ̣ܐ ܘܐܡ̣ܪ ܠܝ ܡܢܝ ܠܝ ܐܝܠܝܢ ܕܥܕܟܝܠ ܠܐ ܐܬܘ ܘܟ̇ܢܫ ܠܝ ܛܘ̈ܦܐ ܐܝܠܝܢ ܕܐܬܒܕܪ ܘܐܘܪܩ ܠܝ ܗ̈ܒܒܐ ܕܝܒ̣ܫܘ
37 ܘܦ̣ܬܚ ܠܝ ܐܘܨܪ̈ܐ ܕܐܚܝܕܝܢ ܘܐܦܩ ܠܝ ܪ̈ܘܚܐ ܕܚܒܝܫܝܢ ܒܗܘܢ ܘܚܘܢܝ ܕܡܘܬܐ ܕܦܪ̈ܨܘܦܐ ܐܝܠܝܢ ܕܥܕܟܝܠ ܠܐ ܚܙ̣ܝܬ ܐܘ ܚܘܢܝ ܕܡܘܬܐ ܕܩܠܐ̣ ܘܗ̇ܝܕܝܢ ܐܘܕܥܟ ܥܠ ܥܡܠܐ ܘܙܒܢܐ ܕܒܥ̣ܝܬ ܕܬܚܙܐ ܀
38 ܘܐܡ̇ܪܬ ܡܪܝܐ ܡܪܝ̣ ܡ̣ܢܘ ܕܡ̣ܨܐ ܕܢܕܥ ܐ̈ܢܝܢ ܠܗܠܝܢ ܐܠܐ ܐܝ̇ܢܐ ܕܥܡ ܒܢܝ̈ܢܫܐ ܠܐ ܥܡ̇ܪ
39 ܐܢܐ ܕܝܢ ܣܟܠܐ ܘܕܘ̇ܝܐ ܐ̇ܝܟܢ ܡܫܟܚ ܐܢܐ ܕܐܡܪ ܥܠ ܐܝܠܝܢ ܕܫܐܠܬܢܝ
40 ܘܐܡ̣ܪ ܠܝ ܐܝܟ ܕܠܐ ܡܫܟܚ ܐܢܬ ܠܡܥܒܕ ܚܕܐ ܡܢ ܗܠܝܢ ܕܐܬܐܡܪ ܗܟܢܐ ܠܐ ܡ̣ܨܐ ܐܢܬ ܕܬܫܟܚܝܘܗܝ ܠܕܝ̣ܢܝ ܐܘ ܠܫܘܠܡܐ ܕܚܘܒܐ ܐܝ̇ܢܐ ܕܠܥܡܝ ܐܫܬܘܕܝܬ
41 ܘܐܡܪܬ ܐܠܐ ܡܪܝ ܗܐ ܐܫ̇ܬܘܕܝܬ ܠܐܝܠܝܢ ܕܒܫܘܠܡܐ ܐܢܘܢ ܘܡܢܐ ܢܥܒܕܘܢ ܐܝܠܝܢ ܕܡܢ ܩܕܡܝܢ ܐܢܘܢ ܐܘ ܚܢܢ ܐܘ ܐܝܠܝܢ ܕܡܢ ܒܬܪܢ
42 ܘܥ̣ܢܐ ܘܐܡ̣ܪ ܠܝ ܠܟܠܝܠܐ ܕܡܝܬܗ ܠܕܝ̣ܢܝ ܐܝܟ ܕܠܐ ܐܝܬ ܠܐܚܪ̈ܝܐ ܫܘܘܚܪ̈ܐ̣ ܗܟܢܐ ܐܦܠܐ ܠܩܕܡ̈ܝܐ ܩܘܕܡܐ
43 ܘܥܢܝ̇ܬ ܘܐܡ̇ܪܬ ܕܠܡܐ ܓܝܪ ܠܐ ܡܫܟܚ ܗ̇ܘܝܬ ܠܡܥܒܕ ܠܐܝܠܝܢ ܕܗܘܘ ܘܠܐܝܠܝܢ ܕܐܝܬܝܗܘܢ ܘܠܐܝܠܝܢ ܕܗ̇ܘܝܢ ܐܟܚܕܐ ܕܒܥܓܠ ܕܝ̣ܢܟ ܬܘܕܥ
44 ܘܥ̣ܢܐ ܘܐܡ̣ܪ ܠܝ ܠܐ ܡܣܬܪܗܒܐ ܒ̣ܪܝܬܐ̣ ܝܬܝܪ ܡܢ ܒܪܘܝܗ̇ ܘܐܠܐ ܠܐ ܛ̇ܥܢ ܗܘܐ ܥܠܡܐ ܠܐܝܠܝܢ ܕܗ̈ܘܝܢ ܗ̈ܘܝ ܒܗ ܐܟܚܕܐ
45 ܘܬܘܒ ܥܢ̇ܝܬ ܘܐܡ̇ܪܬ ܘܐܝܟ̇ܢܐ ܐܡܪܬ ܠܥܒ̣ܕܟ ܕܡܚܝܘ ܬܚ̇ܝܗ̇ ܠܒ̣ܪܝܬܐ ܗ̇ܝ ܕܐܬ̣ܒܪܝܬ ܡܢܟ ܐܟܚܕܐ ܐܢ ܗܟܝܠ ܡܚܐ ܚ̈ܝܝܢ ܐܟܚܕܐ ܘܡܣܝܒܪܐ ܒܪ̣ܝܬܐ ܡܫܟܚܐ ܗܘܬ̇ ܐܦ ܗܫܐ ܕܬܣܝܒܪ ܐܢܘܢ ܠܐܝܠܝܢ ܕܗ̇ܘܝܢ ܐܟܚܕܐ
46 ܘܥܢ̣ܐ ܘܐ̣ܡܪ ܠܝ ܫܐܠ ܠܡܪܒܥܐ ܕܐܢܬܬܐ ܘܐܡ̣ܪ ܠܗ ܕܐܢ ܥܣܪܐ ܝ̇ܠܕ ܐܢܬ ܠܡܢܐ ܒܙܒܢ ܙܒܢ ܝ̇ܠܕ ܐܢܬ ܠܗܘܢ ܒܥܝ ܗܟܝܠ ܡܢܗ ܐܝܟ ܕܢܬܠ ܐܢܘܢ ܠܥܣܪ̈ܬܝܗܘܢ
47 ܘܐܡ̇ܪܬ ܕܠܐ ܡܫܟܚ ܡܪܝ ܐܠܐ ܐܢ ܒܙܒܢ ܙܒܢ
48 ܘܐܡ̣ܪ ܠܝ ܐܦ ܐܢܐ ܝܗܒܬܗ̇ ܠܐܪܥܐ ܡܪܒܥܐ ܠܐܝܠܝܢ ܕܐ̇ܬܝܢ ܥܠܝܗ̇ ܒܙܒܢ ܙܒܢ
49 ܐ̇ܝܟܢܐ ܓܝܪ ܕܝܠܘܕܐ ܠܐ ܝ̇ܠܕ ܐܦ ܠܐ ܗ̇ܝ ܕܣܐܒܬ ܬܘܒ ܗܟܢܐ ܐܦ ܐܢܐ ܐܬܩ̇ܢܬ ܠܥܠܡܐ ܕܒ̇ܪܝܬ
50 ܘܫܐܠܬܗ ܘܐܡ̇ܪܬ ܡܢ ܗܫܐ ܕܝܗ̣ܒܬ ܠܝ ܐܘܪܚܐ ܐܡ̇ܠܠ ܩܕܡܝܟ ܗ̣ܝ ܐܡܢ ܨܗܝܘܢ ܕܐܡ̣ܪܬ ܠܝ ܥܠܝܗ̇ ܐܝܢ ܡܪܝ ܥܠܝܡܬܐ ܗܝ ܥܕܟܝܠ̣ ܐܘ ܡܢ ܟܕܘ ܩܪܝܒܐ ܗܝ ܠܣܝܒܘܬܐ
51 ܘܥ̣ܢܐ ܘܐܡ̣ܪ ܠܝ ܫܐ̇ܠ ܠܗ̇ܝ ܕܝܠ̇ܕܐ ܘܬܐܡܪ ܠܟ
52 ܐܡ̣ܪ ܠܗ̇ ܡܛܠ ܡܢܐ ܐܝܠܝܢ ܕܝܠ̇ܕܐ ܐܢܬܝ ܗܫܐ ܕܡ̇ܝܢ ܠܩܕܡ̈ܝܐ ܐܠܐ ܒܨܝܪܝܢ ܐܢܘܢ ܒܪܒܘܬܐ
53 ܘܬܐܡܪ ܠܟ ܐܦ ܗ̣ܝ ܕܐܚܪ̈ܢܐ ܐܢܘܢ ܐܝܠܝܢ ܕܒܚܝܠܐ ܕܥܠܝܡܘܬܐ ܐܬܝܠܕܘ ܘܐܚܪ̈ܢܐ ܐܢܘܢ ܗܠܝܢ ܕܒܣܝܒܘܬܐ ܡܬܝܠܕܝ̇ܢ ܡܐ ܕܒܨ̇ܪ ܡܪܒܥܐ
54 ܚܘܪ ܐܦ ܐܢܬ ܘܚܙܝ ܕܒܨܝܪܝܢ ܐܢܬܘܢ ܗܘ ܒܪܒܘܬܐ ܡܢ ܗ̇ܢܘܢ ܕܡܢ ܩܕܡܝܟܘܢ
55 ܐܦ ܐܝܠܝܢ ܕܡܢ ܒܬܪܟܘܢ ܐܬ̇ܝܢ ܗܘ̇ܝܢ ܒܨܝܪ ܝܬܝܪ ܡܢܟܘܢ ܡܛܠ ܕܡܢ ܟܕܘ ܣܐ̣ܒܬ ܠܗ̇ ܒ̣ܪܝܬܐ ܘܥܘܙܐ ܕܥܠܝܡܘܬܗ̇ ܥ̣ܒܪ ܠܗ
56 ܘܥ̇ܢܝܬ ܘܐܡܪܬ ܒܥ̇ܐ ܐܢܐ ܡܢܟ ܡܪܝ ܐܢ ܐܫܟܚ̇ܬ ܪ̈ܚ̣ܡܐ ܩܕܡܝܟ̣ ܐܘܕܥܝܗܝ ܠܥܒ̣ܕܟ ܕܒܝܕ ܡܢ̣ܘ ܦܩ̇ܕ ܐܢܬ ܒ̣ܪܝܬܟ