1 ܫܡ̣ܥ ܗܟܝܠ ܦܘܫܩܐ ܕܡ̈ܝܐ ܐܘܟܡ̈ܐ ܐܚܪ̈ܝܐ ܗܠܝܢ ܕܥܬܝܕܝܢ ܕܢܐܬܘܢ ܡܢ ܒܬܪ ܐܘܟ̈ܡܐ ܗܕܐ ܗܝ ܡܠܬܐ
2 ܗܐ ܝܘܡ̈ܬܐ ܐܬ̇ܝܢ ܘܢܗܘܐ ܟܕ ܢܒܫܠ ܙܒܢܗ ܕܥܠܡܐ ܘܢܐܬܐ ܚܨܕܐ ܕܙܪ̈ܥܘܗܝ ܕܒ̈ܝ̣ܫܐ ܘܕܛ̈ܒܐ ܢܝܬܐ ܚܝܠܬܢܐ ܥܠ ܐܪܥܐ ܘܥܡܘܪ̈ܝܗ̇ ܘܥܠ ܡܕܒܪ̈ܢܝܗ̇ ܫܓܝܫܘܬܐ ܕܪ̈ܘܚܐ ܘܬܘܗܬܐ ܕܠܒܐ
3 ܘܢܣܢܘܢ ܚܕ ܠܚܕ ܘܢܬܓܪܓܘܢ ܚܕ ܥܠ ܚܕ ܠܩܪܒܐ ܘܢܫܬܠܛܘܢ ܡܨܥܪ̈ܐ ܥܠ ܡܝܩܪ̈ܐ ܘܢܬܬܪܝܡܘܢ ܒܨܝܪ̈ܐ ܥܠ ܡܫܒ̈ܚܐ
4 ܘܢܫܬܠܡܘܢ ܣܓ̈ܝܐܐ ܠܙܥܘܪ̈ܐ ܘܢܫܬܠܛܘܢ ܐܝܠܝܢ ܕܠܐ ܗܘܘ ܡܕܡ ܥܠ ܥܫܝ̈ܢܐ ܘܢܬܝܬܪܘܢ ܡܣ̈ܟܢܐ ܥܠ ܥܬܝܪ̈ܐ ܘܢܫܬܩܠܘܢ ܪ̈ܫܝܥܐ ܥܠ ܓܢܒܪ̈ܐ
5 ܘܢܫܬܩܘܢ ܚ̇ܟܝܡ̈ܐ ܘܣ̈ܟܠܐ ܢܡܠܠܘܢ ܘܠܐ ܬܫܬܪܪ ܗܝ̇ܕܝܢ ܡܚܫܒܬܐ ܕܒ̈ܢܝ ܐܢܫܐ ܐܦ ܠܐ ܬܪܥܝܬܐ ܕܚܝ̈ܠܬܢܐ ܘܠܐ ܢܫܬܪܪ ܣܒܪܗܘܢ ܕܐܝܠܝܢ ܕܡܣܒܪܝܢ
6 ܘܢܗܘܐ ܕܝܢ ܡܐ ܕܗ̈ܘܝ ܗܠܝܢ ܕܡܩ̈ܕܡܢ ܐܡܝܪ̈ܢ̣ ܢܦܠ ܚܒܟܐ ܒܟܘܠܗܘܢ ܒܢܝ̈ܢܫܐ ܘܡܢܗܘܢ ܒܩܪܒܐ ܢܦܠܘܢ ܘܡܢܗܘܢ ܒܥܩ̈ܬܐ ܢܬܚܒܠܘܢ ܘܡܢܗܘܢ ܡܢ ܐܝܠܝܢ ܕܕܝܠܗܘܢ ܐܢܘܢ ܢܬܥ̇ܘܟܘܢ
7 ܢܓܠܐ ܕܝܢ ܡܪܝܡܐ ܠܗܢܘܢ ܥܡܡ̈ܐ ܕܩ̇ܕܡ ܥܬܕ ܘܢܐܬܘܢ ܘܢܩܪܒܘܢ ܥܡ ܡܕܒܪ̈ܢܐ ܕܡܫܬܚܪܝܢ ܗܝ̇ܕܝܢ
8 ܘܢܗܘܐ ܕܟܠ ܡ̇ܢ ܕܡܬܦܨܐ ܡܢ ܩܪܒܐ ܒܙܘܥܐ ܢܡܘܬ ܘܕܡܬܦܨܐ ܡܢ ܙܘܥܐ ܒܢܘܪܐ ܢܐܩܕ ܘܐܝ̇ܢܐ ܕܡܬܦܨܐ ܡܢ ܢܘܪܐ ܒܟܦܢܐ ܢܣܘܦ
9 ܘܢܗܘܐ ܕܟܠ ܡ̇ܢ ܕܡܬܦܨܐ ܘܥ̇ܪܩ ܡܢ ܟܠܗܝܢ ܐܝܠܝܢ ܕܡܩ̈ܕܡܢ ܐܡܝܪ̈ܢ ܡܢ ܐܝܠܝܢ ܕܙܟܘ ܘܐܙܕܟܝܘ̣ ܢܫܬܠܡܘܢ ܠܐܝܕ̈ܘܗܝ ܕܥܒ̣ܕܝ ܡܫܝܚܐ̣
10 ܬܐܟܘܠ ܓܝܪ ܟܠ ܐܪܥܐ ܠܥ̈ܡܘܪܝܗ̇ ܀