2 Baruch 61 — Aramaic (Peshitta)

1 ܘܡ̈ܝܐ ܫܬܝܬ̈ܝܐ ܢܗܝܪ̈ܐ ܕܚ̣ܙܝܬ ܗ̇ܘ ܗܘ ܙܒܢܐ ܕܐܬܝܠܕ ܒܗ ܕܘܝܕ ܘܫܠܝܡܘܢ

2 ܘܗ̣ܘܐ ܒܗ̇ܘ ܙܒܢܐ ܒܢܝܢܗ̇ ܕܨܗܝܘܢ ܘܚܘܕܬܐ ܕܒܝܬ ܡܩܕܫܐ ܘܐܫ̣ܕ ܕܡܐ ܣܓܝܐܐ ܕܥܡ̈ܡܐ ܕܚܛܘ ܗܝ̇ܕܝܢ ܘܩܘܪ̈ܒܢܐ ܣܓܝ̈ܐܐ ܕܐܬܩܪܒܘ ܗܝ̇ܕܝܢ ܒܚܘܕܬܐ ܕܒܝܬ ܡܩܕܫܐ

3 ܘܫܠܡܐ ܘܫܝܢܐ ܒܗ̇ܘ ܙܒܢܐ ܩܐ̇ܡ ܗܘܐ

4 ܘܚܟܡܬܐ ܒܟܢܘܫܬܐ ܡܫܬܡܥܐ ܗܘܬ ܘܥܘܬܪܐ ܕܣܟܘܠܬܢܘܬܐ ܒܟܢ̈ܫܐ ܡܬܪܘܪܒ ܗܘܐ

5 ܘܥܐܕ̈ܐ ܕܩܕܝܫܘܬܐ ܒܛܒܘܬܐ ܘܒܒܘܣܡܐ ܣܓܝܐܐ ܡܫܬܠܡܝܢ ܗܘܘ

6 ܘܕܝܢ̣ܐ ܕܡܕܒܪ̈ܢܐ ܗܝ̇ܕܝܢ ܕܠܐ ܢܟܠܐ ܡܬܚܙܐ ܗܘܐ ܘܙܕܝܩܘܬܐ ܕܦܘܩܕܢ̈ܘܗܝ ܕܚܝܠܬܢܐ ܒܫܪܪܐ ܡܫܬܡܠܝܐ ܗܘܬ

7 ܘܐܪܥܐ ܕܐܬܪܚܡܬ ܗ̇ܝܕܝܢ ܒܗ̇ܘ ܙܒܢܐ ܘܡܛܠ ܕܠܐ ܚ̇ܛܝܢ ܗܘܘ ܥܡܘܪ̈ܝܗ̣̇ ܝܬܝܪ ܡܢ ܟܠܗܝܢ ܐܪ̈ܥܬܐ ܡܫܬܒܚܐ ܗܘܬ ܘܨܗܝܘܢ ܡܕܝܢܬܐ ܗܝ̇ܕܝܢ ܫܠܝܛܐ ܗܘܬ ܥܠ ܟܠ ܐܪ̈ܥܬܐ ܘܐܬܪ̈ܘܬܐ

8 ܗܠܝܢ ܐܢܘܢ ܡ̈ܝܐ ܢܗܝܪ̈ܐ ܕܚܙ̣ܝܬ ܀ ܀