1 ܘܗ̣ܘܐ ܡܢ ܒܬܪ ܝܘܡܐ ܫܒܝܥܝܐ̣ ܨ̇ܠܝܬ ܩܕܡ ܚܝܠܬܢܐ ܘܐܡ̇ܪܬ
2 ܐܘ ܡܪܝܐ ܩ̇ܪܐ ܐܢܬ ܡܐܬܝܬܗܘܢ ܕܙܒ̈ܢܐ ܘܩܝܡܝܢ ܩܕܡܝܟ̣ ܡܥܒܪ ܐܢܬ ܐܘܚܕܢܗܘܢ ܕܥ̈ܠܡܐ ܘܠܐ ܥܨ̇ܝܢ ܠܟ ܡܦܪܢܣ ܐܢܬ ܕܘܒܪܗܘܢ ܕܥ̈ܕܢܐ ܘܡܫܬܡܥܝܢ ܠܟ
3 ܐܢܬ ܒܠܚܘܕܝܟ ܝܕ̇ܥ ܐܢܬ ܡܬܚܗܘܢ ܕܕܪ̈ܐ ܘܠܐ ܓ̇ܠܐ ܐܢܬ ܪ̈ܐܙܝܟ ܠܣܓܝܐ̈ܐ
4 ܡܘܕܥ ܐܢܬ ܣܘܓܐܐ ܕܢܘܪܐ ܘܩܠܝܠܘܬܐ ܕܪܘܚܐ ܬ̇ܩܠܬ
5 ܒܕܩ̇ ܐܢܬ ܣܘܦܗܘܢ ܕܪ̈ܘܡܐ ܘܥܡܝ̈ܩܬܐ ܕܚܫܘܟܐ ܒܨ̇ܐ ܐܢܬ
6 ܦܩ̇ܕ ܐܢܬ ܠܡܢܝܢܐ ܕܥܒ̇ܪ ܘܡܬܢܛܪ̣ ܘܡܥܬܕܬ ܒܝܬ ܡܫܪܝܐ ܠܐܝܠܝܢ ܕܥܬܝܕܝܢ ܕܢܗܘܘܢ
7 ܐܢܬ ܥܗܝܕ ܐܢܬ ܪܝܫܝܬܐ ܕܥ̣ܒܕܬ ܘܐܒܕܢܐ ܕܥܬܝܕ ܠܐ ܛܥܐ ܐܢܬ
8 ܦܩ̇ܕ ܐܢܬ ܒܪ̈ܡܙܐ ܕܕܚܠܬܐ ܘܕܙܥܝܦܘܬܐ ܠܫܠܗܒ̈ܝܬܐ ܘܡܬܚ̈ܠܦܢ ܠܪ̈ܘܚܐ ܘܒܡܠܬܐ ܡܩܝܡ ܐܢܬ ܡܕܡ ܕܠܝܬ ܗܘܐ ܘܐܚܝܕ ܐܢܬ ܠܡܕܡ ܕܥܕܟܝܠ ܠܐ ܐܬ̣ܐ ܒܚܝܠܐ ܪܒܐ
9 ܡܠܦܬ ܒ̣ܪ̈ܝܬܐ ܒܣܟܘܠܬܢܘܬܟ ܘܡܚܟܡ ܐܢܬ ܡܘ̈ܙܠܐ ܕܢܫܡܫܘܢ ܒܛܟܣܝ̈ܗܘܢ
10 ܡܫܪ̈ܝܬܐ ܕܠܐ ܡܢ̈ܝܢ ܩܝܡܝܢ ܩܕܡܝܟ ܘܡܫܡܫܝܢ ܒܛܟܣܝ̈ܗܘܢ ܢܝܚܐܝܬ ܠܪܡܙܟ
11 ܫܡ̣ܥ ܠܥܒ̣ܕܟ ܘܨܘܬ ܠܒܥܘܬܝ
12 ܡܛܠ ܕܒܩܠܝܠ ܙܒܢܐ ܐܬ̇ܝܠܕܢܢ ܘܒܙܒܢܐ ܩܠܝܠܐ ܗ̇ܦܟܝܢܢ
13 ܠܘܬܟ ܕܝܢ ܫ̈ܥܐ ܐܝܟ ܙܒ̈ܢܐ ܘܝܘܡ̈ܬܐ ܐܝܟ ܕܪ̈ܐ
14 ܠܐ ܗܟܝܠ ܬܪܓܙ ܥܠ ܒܪܢܫܐ ܡܛܠ ܕܠܐ ܗܘܐ ܡܕܡ ܗܘ ܘܠܐ ܬܬܚܫܒ ܥܠ ܥ̇ܒ̈ܕܝܢ
15 ܡܢܐ ܓܝܪ ܐܝܬܝܢ ܚܢܢ ܗܐ ܓܝܪ ܒܡܘܗܒܬܟ ܐ̣ܬܝܢ ܠܥܠܡܐ ܘܐܙ̇ܠܝܢܢ ܕܠܐ ܒܨܒܝܢܢ
16 ܠܐ ܓܝܪ ܐܡ̇ܪܢܢ ܠܐܒ̈ܗܝܢ ܕܐܘ̈ܠܕܢ ܐܦܠܐ ܫܕܪܢ ܠܫܝܘܠ ܘܐܡܪ̈ܢ ܕܩ̇ܒܠܝܢ
17 ܡܢܐ ܗܘ ܗܟܝܠ ܚܝܠܢ ܕܢܛܥܢ ܪܘܓܙܟ ܐܘ ܡܢܐ ܚܢܢ ܕܢܣܝܒܪ ܕܝ̣ܢܟ
18 ܐܢܬ ܐܓܢ ܥܠܝܢ ܒܪ̈ܚܡܝܟ̣ ܘܒܚܢܢܟ ܣܝܥܝܢ
19 ܚܘܪ ܒܙܥܘܪ̈ܐ ܕܐܫܬܥܒܕܘ ܠܟ ܘܦܪܘܩ ܠܟܠ ܐܝܠܝܢ ܕܡܬܩܪܒܝܢ ܠܟ ܘܠܐ ܬܦܣܘܩ ܣܒܪܗ ܕܥܡܢ ܘܠܐ ܬܩܛܘܥ ܙܒ̈ܢܐ ܕܥܘܕܪܢܢ
20 ܗܢܘ ܓܝܪ ܥܡܐ ܕܓܒ̣ܝܬ ܘܗܠܝܢ ܐܢܘܢ ܥܡܐ ܕܠܐ ܡܫܟܚܬ ܐܟܘܬܗ
21 ܐܠܐ ܐܡܠܠ ܩܕܡܝܟ ܗܫܐ ܘܐ̇ܡܪ ܐܝܟ ܕܡܬܚܫܒ ܠܒܝ
22 ܥܠܝܟ ܬܟ̇ܝܠܝܢܢ ܕܗܐ ܢܡܘܣܟ ܠܘܬܢ ܘܝܕ̇ܥܝܢܢ ܕܠܐ ܢܦ̇ܠܝܢܢ ܟܡܐ ܕܩܝ̈ܡܝܟ ܐܚܝܕܝܢ ܚܢܢ
23 ܒܟܠܙܒܢ ܛܘܒܝܢ ܐܦܢ ܒܗܕܐ ܕܠܐ ܐܬܚ̈ܠܛܢ ܒܥܡܡ̈ܐ
24 ܟܠܢ ܓܝܪ ܐܝ̇ܬܝܢ ܚܕ ܥܡܐ ܡܫܡܗܐ ܕܢ̇ܣܒܢ ܚܕ ܢܡܘܣܐ ܡܢ ܚܕ ܘܗ̇ܘ ܢܡܘܣܐ ܕܒܝܢܬܢ ܡܥܕܪ ܠܢ ܘܚܟܡܬܐ ܡܝܬܪܬܐ ܕܐܝܬ ܒܢ ܬܣܝܥܢ
25 ܘܟܕ ܨܠܝ̇ܬ ܘܐܡܪܬ ܗܠܝܢ ܐ̇ܬܪܫܠܬ ܣ̇ܓܝ
26 ܘܥ̣ܢܐ ܘܐܡܪ ܠܝ ܐܢܬ ܦܫܝܛܐܝܬ ܨܠ̣ܝܬ ܐܘ ܒܪܘܟ ܘܐܫܬܡܥ ܟܘܠܗܝܢ ܡ̈ܠܝܟ
27 ܐܠܐ ܕܝܢ̣ܝ ܬܒ̇ܥ ܕܝܠܗ ܘܢܡܘܣܝ ܬܒ̇ܥ ܙܕܩܗ
28 ܡܢ ܡ̈ܠܝܟ ܓܝܪ ܡܬܝܒ ܐܢܐ ܠܟ ܘܡܢ ܨܠܘܬܟ ܐܡܠܠ ܥܡܟ
29 ܗ̣ܝ ܗܝ ܓܝܪ ܗܕܐ ܕܠܐ ܗ̣ܘܐ ܡܕܡ ܗ̇ܘ ܕܡ̇ܬܚܒܠ ܘܐܪܫܥ ܐܝܟ ܗ̇ܘ ܕܡ̣ܨܐ ܕܢܥܒܕ ܡܕܡ ܘܠܐ ܐܬܕܟܪ ܛܝܒܘܬܝ ܘܠܐ ܩ̇ܒܠ ܢܓܝܪܘܬ ܪܘܚܝ
30 ܡܛܠ ܗܢܐ ܡܬܢܣܒܘ ܡܬܢܣܒ ܐܢܬ ܐܝܟ ܕܩ̇ܕܡܬ ܐܡܪܬ ܠܟ ܘܐ̇ܬܐ ܙܒܢܐ ܕܐܡ̇ܪܬ ܠܟ
31 ܘܢܩܘܡ ܗ̇ܘ ܙܒܢܐ ܕܐ̇ܠܨ ܢܐܬܐ ܓܝܪ ܘܢܥܒܪ ܒܚܐܦܐ ܚܪܝܦܐ ܘܢܬܕܠܚ ܟܕ ܐܬ̇ܐ ܒܚܡܬܐ ܕܙܥܝܦܘܬܐ
32 ܘܢܗܘܐ ܒܗ̇ܢܘܢ ܝܘܡ̈ܬܐ ܢܬܬܢܝܚܘܢ ܟܘܠܗܘܢ ܥܡܘܪ̈ܝܗ̇ ܕܐܪܥܐ ܚܕ ܥܠ ܚܕ ܡܛܠ ܕܠܐ ܝܕ̇ܥܝܢ ܕܩ̣ܪܒ ܕܝܢ̣ܝ
33 ܠܐ ܗܘܐ ܓܝܪ ܣܓܝܐ̈ܐ ܚܟܝܡ̈ܐ ܡܫܬܟܚܝܢ ܒܗ̇ܘ ܙܒܢܐ ܘܣܟ̈ܘܠܬܢܐ ܚܕܚ̈ܕܢܐ ܢܗܘܘܢ ܐܠܐ ܐܦ ܐܝܠܝܢ ܕܝܕ̇ܥܝ̣ܢ ܝܬܝܪܐܝܬ ܢܫܬܩܘܢ
34 ܘܢܗܘܘܢ ܫܡ̈ܥܐ ܣܓ̈ܝܐܐ ܘܛܒ̈ܐ ܕܠܐ ܙܥܘܪܝܢ ܘܥ̇ܒ̈ܕܐ ܕܦܢ̈ܛܣܝܐ ܢܬܚܘܘܢ ܘܢܬܬܢܘܢ ܡܘ̈ܠܟܢܐ ܠܐ ܙܥܘܪܝܢ ܡܢܗܘܢ ܣܪܝܩܝܢ ܘܡܢܗܘܢ ܢܫܬܪܪܘܢ
35 ܘܢܗܦܘܟ ܐܝܩܪܐ ܠܨܥܪܐ ܘܢܬܡܟܟ ܥܘܫܢܐ ܠܫܝܛܘܬܐ ܘܬܫܬܪܐ ܬܩܢܘܬܐ ܘܫܦܝܪܘܬܐ ܬܗܘܐ ܠܒܣܝܘܬܐ
36 ܘܢܐܡܪܘܢ ܣ̈ܓܝܐܐ ܠܣܓ̈ܝܐܐ ܒܗ̇ܘ ܙܒܢܐ ܐܝ̇ܟܐ ܐܬܟܣ̣ܝܬ ܠܗ̇ ܣܘܓܐܐ ܕܣܟܘ̇ܠܬܢܘܬܐ ܘܠܐܝ̇ܟܐ ܫܢ̣ܝܬ ܠܗ̇ ܣܘܓܐܐ ܕܚܟܡܬܐ
37 ܘܟܕ ܗ̣ܢܘܢ ܡܬܚܫܒܝܢ ܗܠܝܢ̣ ܗܝ̇ܕܝܢ ܢܕܢܚ ܛܢܢܐ ܒܐܝܠܝܢ ܕܠܐ ܣ̇ܒܪܝܢ ܗܘܘ ܥܠܝܗܘܢ ܘܚܫܐ ܢܐܚܘܕ ܠܐܝ̇ܢܐ ܕܫܠ̣ܐ ܗܘܐ ܘܢܬܬܙܝܥܘܢ ܣܓ̈ܝܐܐ ܒܪܘܓܙܐ ܕܢܟܘܢ ܠܣܓܝܐ̈ܐ ܘܢܥܝܪܘܢ ܠܚܝ̈ܠܘܬܐ ܕܢܐܫܕܘܢ ܕܡܐ ܘܥܡܗܘܢ ܠܚܪܬܐ ܐܟܚܕܐ ܢܐܒܕܘܢ
38 ܘܢܗܘܐ ܒܗ ܒܗ̇ܘ ܙܒܢܐ ܢܬܚܙܐ ܓܠܝܐܝܬ ܠܟܠܢܫ ܚܘܠܦܗܘܢ ܕܙܒܢ̈ܐ ܚܠܦ ܕܒܟܘܠܗܘܢ ܗܠܝܢ ܙܒܢ̈ܐ ܡܬܛܢܦܝܢ ܗܘܘ ܘܥ̇ܠܒܝܢ ܘܐ̇ܙܠܝܢ ܗܘܘ ܐܢܫ ܐܢܫ ܒܥ̇ܒ̈ܕܘܗܝ ܘܢܡܘܣܗ ܕܚܝܠܬܢܐ ܠܐ ܡܬܕܟܪܝܢ ܗܘܘ
39 ܡܛܠ ܗܢܐ ܢܘܪܐ ܡܚܫ̈ܒܬܗܘܢ ܐܟܠܐ ܘܒܫܠܗܒܝܬܐ ܢܬܒܚܪ̈ܢ ܡܪ̈ܢܝܬܗܝܢ ܕܟܘ̈ܠܝܬܗܘܢ ܢܐܬܐ ܓܝܪ ܕܝ̇ܢܐ ܘܠܐ ܢܫܬܘܚܪ
40 ܡܛܠ ܕܟܠ ܚܕ ܚܕ ܡܢ ܥܡܘܪ̈ܝܗ̇ ܕܐܪܥܐ ܝܕ̇ܥ ܗܘܐ ܟܕ ܡܥܘܠ ܘܢܡܘܣܝ̣ ܠܐ ܝܕܥܘ ܡܛܠ ܪܡܘܬܗܘܢ
41 ܣܓܝܐ̈ܐ ܕܝܢ ܗܝ̇ܕܝܢ ܢܒܟܘܢ ܫܪܝܪܐܝܬ ܥܠ ܚ̈ܝܐ ܕܝܢ ܝܬܝܪ ܕܥܠ ܡܝ̈ܬܐ
42 ܘܥ̇ܢܝܬ ܘܐܡ̇ܪܬ ܐܘ ܡܢܐ ܥܒܕܬ ܐܕܡ ܠܟܘܠܗܘܢ ܐܝܠܝܢ ܕܐܬܝܠܕܘ ܡܢܟ ܘܡܢܐ ܢܬܐܡܪ ܠܚܘܐ ܩܕܡܝܬܐ ܕܠܚܘܝܐ ܐܫܬ̣ܡܥܬ
43 ܕܗܢܐ ܟܠܗ ܣܘܓܐܐ ܐܙ̣ܠ ܠܚ̣ܒܠܐ ܘܠܝܬ ܡܢܝܢܐ ܠܐܝܠܝܢ ܕܢܘܪܐ ܐܟ̇ܠܐ
44 ܐܠܐ ܬܘܒ ܐܡ̇ܪ ܩܕܡܝܟ
45 ܐܢܬ ܡܪܝܐ ܡܪܝ ܝܕ̇ܥܬ ܡܕܡ ܒܒ̣ܪܝܬܟ
46 ܐܢܬ ܓܝܪ ܡܢ ܩܕܝܡ ܦܩ̣ܕܬ ܠܥܦܪܐ ܕܢܬܠ ܠܐܕܡ ܘܐܢܬ ܝܕ̇ܥ ܐܢܬ ܡܢܝܢܗܘܢ ܕܐܝܠܝܢ ܕܐܬܝܠܕܘ ܡܢܗ ܘܟܡܐ ܚܛܘ ܩܕܡܝܟ ܐܝܠܝܢ ܕܗܘܘ ܘܠܐ ܐܘܕܝܘ ܠܟ ܠܥ̇ܒ̇ܘܕܗܘܢ
47 ܘܥܠ ܟܠܗܝܢ ܗܠܝܢ ܚܪܬܗܘܢ ܡܟܣܐ ܠܗܘܢ ܘܢܡܘܣܟ ܗ̇ܘ ܕܥ̣ܒܪܘ̣ ܦ̇ܪܥ ܠܗܘܢ ܒܝܘܡܟ
48 ܗܫܐ ܕܝܢ ܢܪܦܐ ܠܪ̈ܫܝܥܐ ܘܥܠ ܙܕܝ̈ܩܐ ܢܒܥܐ
49 ܘܐܬܢܐ ܛܘܒܗܘܢ ܘܠܐ ܐܫܬܘܩ ܬܫܒܘܚܬܗܘܢ ܠܡܫ̇ܒܚܘ ܗ̇ܝ ܕܢܛܝܪܐ ܠܗܘܢ
50 ܫܪܝܪܝܬ ܓܝܪ ܐܝܟ ܕܒܙܒܢܐ ܩܠܝܠ ܒܗܢܐ ܥܠܡܐ ܕܥܒ̇ܪ ܕܚܝܝܢ ܐܢܬܘܢ ܒܗ ܠܐܘܬܐ ܣܓܝܐܬܐ ܣܝܒܪܬܘܢ ܗܟܢܐ ܒܥܠܡܐ ܗ̇ܘ ܕܣܘܦ ܠܝܬ ܠܗ ܬܩܒܠܘܢ ܢܘܗܪܐ ܪܒܐ ܀