1 ܘܐ̇ܙܠܬ ܡܢ ܬܡܢ ܐܢܐ ܒܪܘܟ ܘܐܬ̇ܝܬ ܠܘܬ ܥܡܝ ܘܩ̇ܪܝܬ ܠܒܪܝ ܒܘܟܪܝ ܘܠܓܕܠܝܐ ܪܚ̇ܡܝ ܘܠܫܒܥܐ ܡܢ ܣ̈ܒܐ ܕܥܡܐ ܘܐܡ̇ܪܬ ܠܗܘܢ
2 ܗܐ ܐܢܐ ܐܙܠ ܐܢܐ ܠܝ ܠܘܬ ܐܒܗ̈ܝ ܐܝܟ ܐܘܪܚܐ ܕܟܘܠܗ̇ ܐܪܥܐ
3 ܐܢܬܘܢ ܕܝܢ ܠܐ ܬܪܚܩܘܢ ܡܢ ܐܘܪܚܗ ܕܢܡܘܣܐ ܐܠܐ ܢܛ̇ܪܘ ܘܙܗܪܘ ܠܥܡܐ ܕܐܫܬܚܪ ܕܠܐ ܢܪܚܩܘܢ ܡܢ ܦܘܩܕܢ̈ܘܗܝ ܕܚܝܠܬܢܐ
4 ܚ̇ܙܝܢ ܐܢܬܘܢ ܓܝܪ ܕܙܕܝܩ ܗܘ ܗ̇ܘ ܕܠܗ ܦ̇ܠܚܝܢ ܚܢܢ ܘܒܐ̈ܦܐ ܠܐ ܢܣ̇ܒ ܓܒܘܠܢ
5 ܘܚܙܘ ܡܕܡ ܕܓܕܫܗ̇ ܠܨܗܝܘܢ ܘܡܢܐ ܡܛܗ̇ ܠܐܘܪܫܠܡ
6 ܡܛܠ ܕܢܬܝܕܥ ܕܝܢ̣ܗ ܕܚܝܠܬܢܐ̇ ܘܐܘܪ̈ܚܬܗ ܕܠܐ ܡܬܥ̈ܩܒܢ ܘܬܪ̈ܝܨܢ ܐ̇ܢ̈ܝܢ
7 ܐܢ ܓܝܪ ܬܣܝܒܪܘܢ ܘܬܩܘܘܢ ܒܕܚܠܬܗ ܘܠܐ ܬܛܥܘܢ ܢܡܘܣܗ ܡܬܚܠܦܝܢ ܥܠܝܟܘܢ ܙܒ̈ܢܐ ܠܛ̇ܒ̈ܬܐ ܘܬܚܙܘܢ ܒܒܘܝܐܗ̇ ܕܨܗܝܘܢ
8 ܡܛܠ ܕܡܕܡ ܕܗ̇ܘܐ ܗܫܐ ܠܐ ܗܘܐ ܡܕܡ ܡܕܡ ܕܝܢ ܕܥܬܝܕ ܕܢܗܘܐ̣ ܗܘ̣ܝܘ ܪܒ ܣܓ̇ܝ
9 ܥ̇ܒܪ ܓܝܪ ܟܠܡܕܡ ܕܡܬܚܒܠ ܘܐܙ̇ܠ ܟܠ ܡܐ ܕܡܐ̇ܬ ܘܡܬܛܥܐ ܟܘܠܗ ܙܒܢܐ ܕܗܫܐ ܘܠܐ ܗ̇ܘܐ ܕܘܟܪܢ ܠܙܒܢܐ ܕܗܫܐ ܕܡܦܠܦܠ ܒܒ̣ܝ̈ܫܬܐ
10 ܗ̇ܘ ܓܝܪ ܕܪܗ̇ܛ ܗܫܐ ܠܣܪܝܩܘܬܐ ܗܘ ܪܗ̇ܛ ܘܗ̇ܘ ܕܡܨܠܚ ܒܥܓܠ ܢܦ̇ܠ ܘܡܬܡܟܟ
11 ܡܕܡ ܓܝܪ ܕܥܬܝܕ̣ ܗ̇ܘ ܗܘ ܡܬܒܥܐ ܘܡܕܡ ܕܒܬܪ ܟܢ ܐܬ̇ܐ̣ ܥܠ ܗ̇ܘ ܗܘ ܡ̇ܣܒܪܝܢܢ ܐܝܬ ܓܝܪ ܙܒܢܐ ܕܠܐ ܥ̇ܒܪ
12 ܘܐ̇ܬܐ ܥܕܢܐ ܗ̇ܘ ܕܡܩܘܐ ܠܥܠܡ ܘܥܠܡܐ ܚܕܬܐ ܗ̇ܘ ܕܠܐܝܠܝܢ ܕܒܪܫܗ ܐܙ̇ܠܝܢ ܠܐ ܡܗܦܟ ܠܗܘܢ ܠܚܒ̇ܠܐ ܘܥܠ ܐܝܠܝܢ ܕܐ̇ܙܠܝܢ ܠܬܫܢܝܩܐ ܠܐ ܡܪܚܡ ܘܠܐܝܠܝܢ ܕܚ̈ܝܝܢ ܒܗ ܠܐ ܡܘܒܠ ܠܐܒܕܢܐ
13 ܗܠܝܢ ܐܢܘܢ ܓܝܪ ܕܥܬܝܕܝܢ ܕܢܐܪܬܘܢ ܗܢܐ ܙܒܢܐ ܕܐܡܝܪ ܘܕܝܠܗܘܢ ܗܝ ܝܪܬܘܬܐ ܕܙܒܢܐ ܕܡ̇ܠܝܟ
14 ܗܠܝܢ ܐܝܠܝܢ ܕܐܬܩܢܘ ܠܗܘܢ ܐܘܨܪ̈ܐ ܕܚܟܡܬܐ ܘܣܝ̈ܡܬܐ ܕܣܟܘܠܬܢܘܬܐ ܠܘܬܗܘܢ ܐܫܬܟܚ ܘܡܢ ܪ̈ܚܡ̣ܐ ܠܐ ܐܪܚܩܘ ܘܫܪܪܗ ܕܢܡܘܣܐ ܢܛ̣ܪܘ
15 ܠܗܘܢ ܓܝܪ ܠܗܠܝܢ ܡܬܝܗܒ ܥܠܡܐ ܕܐܬ̇ܐ ܡܥܡܪܗܘܢ ܕܝܢ ܕܫܪܟܐ ܕܣܓ̈ܝܐܐ ܒܢܘܪܐ ܗ̇ܘܐ ܀