1 ܘܥ̣ܢܐ ܘܐܡ̣ܪ ܠܝ ܒܪܘܟ̣ ܗܢܘ ܦܘܫܩܗ ܕܚܙܘܐ ܕܚ̣ܙܝܬ
2 ܐܝܟ ܕܚܙ̣ܝܬ ܥܒܐ ܣܓܝܐܐ ܗ̇ܘ ܕܚܕܝܪܝܢ ܗܘܘ ܠܗ ܛܘ̣ܪ̈ܐ ܪ̈ܡ̇ܐ ܘܩܫ̈ܝܐ ܗܕܐ ܗܝ ܡܠܬܐ
3 ܗܐ ܝܘܡ̈ܬܐ ܐܬ̇ܝܢ ܘܬܬܚܒܠ ܗܕܐ ܡ̇ܠܟܘܬܐ ܗ̇ܝ ܕܒܙܒܢ ܚܒܠ̣ܬ ܠܨܗܝܘܢ ܘܬܫܬܥܒܕ ܠܗ̇ܝ ܕܐܬ̇ܝܐ ܒܬܪܗ̇
4 ܬܘܒ ܕܝܢ ܐܦ ܗ̇ܝ ܒܬܪ ܙܒܢܐ ܡܬܚܒܠܐ ܘܬܩܘܡ ܐܚܪܬܐ ܬܠܝܬܝܬܐ ܘܬܫܬܠܛ ܐܦ ܗ̇ܝ ܒܙܒܢܗ̇ ܘܬܬܚܒܠ
5 ܘܡܢ ܒܬܪ ܗܠܝܢ ܬܩܘܡ ܡܠܟܘܬܐ ܪܒܝܥܝܬܐ ܕܐܘܚܕܢܗ̇ ܗ̇ܘܐ ܩܫ̣ܐ ܘܒܝܫ ܝܬܝܪ ܡܢ ܕܗܠܝܢ ܕܗ̈ܘܝ ܩܕܡܝܗ̇ ܘܡܕܒܪܐ ܙܒ̈ܢܐ ܣܓܝܐ̈ܐ ܐܝܟ ܥܒ̈ܐ ܕܦܩܥܬܐ ܘܐܚ̇ܕܐ ܙܒܢ̈ܐ ܘܬܬܪܝܡ ܝܬܝܪ ܡܢ ܐܪ̈ܙܐ ܕܠܒܢܢ
6 ܘܢܬܛܡܪ ܒܗ̇ ܫܪܪܐ ܘܢܥܪܩܘܢ ܠܘܬܗ̇ ܟܘܠܗܘܢ ܐܝܠܝܢ ܕܡܦܠܦܠܝܢ ܒܥܘ̣ܠܐ ܐܝܟ ܕܥܪ̈ܩܢ ܚܝܘ̈ܬܐ ܒܝܫ̣̈ܬܐ ܘܚ̈ܠܕܢ ܒܥܒܐ
7 ܘܢܗܘܐ ܡܐ ܕܩ̣ܪܒ ܙܒܢܐ ܕܫܘ̇ܠܡܗ̇ ܕܬܦܠ ܗܝ̇ܕܝܢ ܬܬܓܠܐ ܪܝܫܝܬܗ ܕܡܫܝܚܝ ܗ̇ܝ ܕܕܡܝܬ ܠܡܒܘܥܐ ܘܠܓܦܬܐ ܘܡܐ ܕܐܬܓܠ̣ܝܬ ܬܥܩܘܪ ܣܘܓܐܐ ܕܟܢܫܗ
8 ܘܗ̇ܝ ܕܚ̣ܙܝܬ ܐܪܙܐ ܕܪܡ̇ܐ ܗܘ ܕܐܫܬܚܪ ܡܢ ܗ̇ܘ ܥܒܐ ܘܥܠ ܗܕܐ ܕܡܠ̣ܠܬ ܥܡܗ ܓܦܬܐ ܡ̈ܠܐ ܗܠܝܢ ܕܫܡ̣ܥܬ ܗܕܐ ܗܝ ܡܠܬܐ ܀ ܀