1 ܘܟܕ ܐܡ̇ܪܬ ܗܠܝܢ ܕܡ̇ܟܬ ܬܡܢ ܘܚܙ̇ܝܬ ܒܠܠܝܐ ܚܙܘܐ̣
2 ܘܗܐ ܥܒܐ ܕܐܝ̈ܠܢܐ ܕܢܨܝܒ ܒܦܩܥܬܐ ܘܚܕܝܪܝܢ ܗܘܘ ܠܗ ܛܘܪ̈ܐ ܪ̈ܡ̇ܐ ܘܩܫ̈ܝܐ ܕܫܩܝ̈ܦܐ ܘܐܬܪܐ ܣܓܝܐܐ ܐܚܝܕ ܗܘܐ ܗ̇ܘ ܥܒܐ
3 ܘܗܐ ܡܢ ܠܩܘܒܠܗ ܣܠ̣ܩܬ ܓܦܬܐ ܚܕܐ ܘܡܢ ܬܚܘܬܝܗ̇ ܢܦܩ̇ ܗܘܐ ܡܒܘܥܐ ܒܢܝܚܐ
4 ܘܡ̣ܛܐ ܕܝܢ ܗ̇ܘ ܡܒܘܥܐ ܥܕܡܐ ܠܥܒܐ ܘܗ̣ܘܐ ܠܓ̈ܠܠܐ ܪ̈ܘܪܒܐ ܘܐܛܝܦܘ ܗܠܝܢ ܓ̈ܠܠܐ ܠܗ̇ܘ ܥ̇ܒܐ ܘܡܢ ܫܠܝܐ ܥܩ̣ܪܘ ܠܣܘܓܐܗ ܕܥܒܐ ܗ̇ܘ ܘܣܚ̣ܦܘ ܠܟܠܗܘܢ ܛܘ̣ܪ̈ܐ ܕܚܕܪ̈ܘܗܝ
5 ܘܪܘܡܗ ܕܥܒܐ ܡܬܡܟܟ ܗܘܐ ܘܪܝܫܗܘܢ ܕܛܘ̣ܪ̈ܐ ܐܬܡܟܟ ܘܛܒ ܐܬܚܝܠ ܡܒܘܥܐ ܗ̇ܘ ܕܠܐ ܢܫܒܘܩ ܡܕܡ ܡܢ ܗ̇ܘ ܥ̇ܒܐ ܣܓܝܐܐ ܐܠܐ ܚܕ ܐܪ̇ܙܐ ܒܠܚܘܕ
6 ܐܦ ܠܗ ܟܕ ܐܪܡܝ ܘܠܣܘܓܐܗ ܕܥܒܐ ܗ̇ܘ ܐܘܒܕ ܘܥ̣ܩܪ ܕܡܕܡ ܠܐ ܢܫܬܒܩ ܡܢܗ ܐܦ ܠܐ ܐܬܪܗ ܢܬܝܕܥ ܗ̣ܝ ܕܝܢ ܗ̇ܝ ܓܦܬܐ ܐ̇ܬܝܐ ܗܘܬ ܥܡ ܡܒܘܥܐ ܒܫܠܝܐ ܘܒܢܝܚܐ ܣܓܝܐܐ ܘܐܬܬ ܥܕܡܐ ܠܐܬܪܐ ܚܕ ܕܠܐ ܪܚܝܩ ܗܘܐ ܡܢ ܐܪܙܐ ܘܠܐܪܙܐ ܟܕ ܪܡ̣ܐ ܩܪܒܘܗܝ ܠܘܬܗ̣̇
7 ܘܚ̇ܙܝܬ ܘܗܐ ܦܬ̣ܚܬ ܦܘܡܗ̇ ܓܦܬܐ ܗ̇ܝ ܘܡܠ̣ܠܬ ܘܐܡ̣ܪܬ ܠܐܪ̇ܙܐ ܗ̇ܘ ܠܐ ܗܘܐ ܐܢܬ ܗܘ ܐܪܙܐ ܕܐܫܬ̣ܚܪܬ ܡܢ ܥܒܐ ܕܒܝ̣ܫܬܐ ܘܒܐ̣ܝܕܟ ܐܡܝܢܐ ܗܘܬ ܒܝ̣ܫܬܐ ܘܡܬܥܒܕܐ ܗܠܝܢ ܟܘܠܗܝܢ ܫܢ̈ܝܐ ܘܛ̇ܒܬܐ ܠܐ ܡܡܬܘܡ
8 ܘܡܬܚܝܠ ܗ̣ܘܝܬ ܥܠ ܕܠܐ ܕܝܠܟ ܐܦ ܠܐ ܥܠ ܕܝܠܟ ܡܢ ܡܬܘܡ ܪܚܡܬ ܘܡ̇ܬܚ ܗ̣ܘܝܬ ܐܘܚܕܢܟ ܥܠ ܐܝܠܝܢ ܕܪܚܝܩܝܢ ܡܢܟ ܘܠܐܝܠܝܢ ܕܡܬܩܪܒܝܢ ܠܟ ܒܡܨܝ̈ܕܬܐ ܕܪܘܫܥܟ ܐܚ̇ܕ ܗ̣ܘܝܬ ܘܡܪܝܡ ܗ̣ܘܝܬ ܢܦܫܟ ܒܟܠ ܙܒܢ ܐܝܟ ܗ̇ܘ ܕܠܐ ܡܫܟܚ ܕܢܬܥܩܪ
9 ܗܫܐ ܕܝܢ ܣܪܗܒ ܙܒܢܟ ܘܡܛܝ ܥܕܢܟ
10 ܙܠ ܗܟܝܠ ܐܦ ܐܢܬ ܐܪ̇ܙܐ ܒܬܪ ܥܒܐ ܕܐܙ̣ܠ ܩܕܡܝܟ ܘܗ̣ܘܝ ܥܡܗ ܚܠ̣ܐ ܘܥܦܪܟܘܢ ܢܬܚܠܛ ܐܟܚܕܐ ܘܕܡ̣ܟܘ ܗܫܐ ܒܥܩܬܐ ܘܫܠܘ ܒܬܫܢܝܩܐ ܥܕܡܐ ܕܢܐܬܐ ܙܒܢܟ ܐܚܪܝܐ ܕܒܗ ܬܘܒ ܬܐܬܐ ܘܝܬܝܪܐܝܬ ܬܫܬܢܩ ܀