1 ܐܢܬܘܢ ܕܝܢ ܐܢ ܡܥܬܕܝܢ ܐܢܬܘܢ ܠܒܝܟ̈ܘܢ ܕܬܙܪܥܘܢ ܒܗܘܢ ܦܐܪ̈ܘܗܝ ܕܢܡܘܣܐ ܡܓܢ ܥܠܝܟܘܢ ܒܗ̇ܘ ܙܒܢܐ ܕܥܬܝܕ ܚܝܠܬܢܐ̇ ܕܢܙܝܥ ܠܟܘܠܗ̇ ܒ̣ܪܝܬܐ
2 ܡܛܘܠ ܕܡܢ ܒܬܪ ܩܠܝܠ ܙ̣ܒܢܐ ܢܬܬܙܝܥ ܒܢܝܢܗ̇ ܕܨܗܝܘܢ ܕܢܬܒܢܐ ܬܘܒ
3 ܐܠܐ ܠܐ ܡܩܘܐ ܗ̣ܘ ܗ̇ܘ ܒܢܝܢܐ ܐܠܐ ܬܘܒ ܡܢ ܒܬܪ ܙܒܢܐ ܡܬܥܩܪ ܘܡܩܘܝܐ ܟܕ ܚܪܒܐ̣ ܥܕܡܐ ܠܙܒܢܐ
4 ܘܡܢ ܒܬܪܟܢ ܡܬܒܥܝܐ ܠܡܬܚܕܬܘ ܒܬܫܒܘܚܬܐ ܘܡ̣ܫܬ̣̇ܟܠܠܐ ܠܥܠܡ
5 ܠܐ ܗܟܝܠ ܡܬܒܥܝܐ ܠܢ ܕܢܬܬܥܝܩ ܗܢܐ ܟܠܗ ܥܠ ܒܝܫ̣ܬܐ ܕܐܬܬ ܗܫܐ ܐܝܟ ܕܥܠ ܡܕܡ ܕܥܬܝܕ
6 ܡܢ̣ ܬܪ̈ܬܝܗܝܢ ܕܝܢ ܥܩ̈ܬܐ̣ ܪܒ ܗܘ ܐܓܘܢܐ ܐܡܬܝ ܕܥܬܝܕ ܚܝܠܬܢܐ ܕܢܚܕܬ ܒ̣ܪܝܬܗ
7 ܘܗܫܐ ܠܐ ܬܬܩܪܒܘܢ ܠܝ ܥܕܡܐ ܠܩܠܝܠ ܝܘܡ̈ܝܢ ܘܠܐ ܬܦܩܕܘܢܢܝ ܥܕܡܐ ܕܐ̇ܬܐ ܠܘܬܟܘܢ
8 ܘܗ̣ܘܐ ܕܟܕ ܐܡ̇ܪܬ ܠܗܘܢ ܟܠܗܝܢ ܗܠܝܢ ܡ̈ܠܐ̣ ܐ̇ܙܠܬ ܠܝ ܐܢܐ ܒܪܘܟ ܠܐܘܪܚܝ ܘܟܕ ܚܙܢܝ ܥܡܐ ܕܐ̇ܙܠ ܐܢܐ ܐܪܝܡܘ ܩܠܗܘܢ ܘܐܝܠܠܘ ܘܐܡ̣ܪܘ
9 ܠܐܝ̇ܟܐ ܐܙ̇ܠ ܐܢܬ ܠܟ ܡܢܢ ܒܪܘܟ ܘܫ̇ܒ̣ܩܬ ܠܢ ܐܝܟ ܐܒܐ ܕܫ̇ܒܩ ܒܢܘ̈ܗܝ ܝܬܡ̈ܐ ܘܐ̇ܙܠ ܡܢ ܠܘܬܗܘܢ ܀