Read 1 Maccabees 10 side by side with translations · The Final Bible
1 ܘܒܫܢܬ ܡܐܐ ܘܫܬܝܢ ܣܠܩ ܐܠܟܣܢܕܪܘܣ ܒܪ ܐܢܛܝܟܘܣ ܐܦܝܦܢܘܣ ܒܪܗ ܕܐܢܛܝܟܘܣ ܘܐܚܕܗ ܠܦܛܘܠܡܐܝܣ ܘܟܒܫܗ ܘܩܒܠܘܗܝ ܘܐܡܠܟ ܬܡܢ
2 ܘܫܡܥ ܕܡܛܪܝܘܣ ܡܠܟܐ ܘܟܢܫ ܚܝܠܐ ܣܓܝܐܐ ܘܢܦܩ ܠܐܘܪܥܗ ܠܩܪܒܐ
3 ܘܫܕܪ ܕܡܛܪܝܘܣ ܐܓܪ̈ܬܐ ܠܘܬ ܝܘܢܬܢ ܒܡ̈ܠܐ ܕܫܠܡܐ ܐܝܟ ܕܢܫܒܚܝܘܗܝ
4 ܐܡܪ ܓܝܪ ܕܡܛܪܝܘܣ ܢܩܕܡ ܘܢܥܒܕ ܥܡܗ ܪܚܡܘܬܐ ܡܢ ܩܕܡ ܕܠܐ ܢܐܙܠ ܘܢܥܒܕ ܥܡ ܐܠܟܣܢܕܪܘܣ ܘܢܗܘܐ ܠܢ ܣܩܘܒܠܐ
5 ܡܬܕܟܪ ܓܝܪ ܟܠܗܝܢ ܒܝܫ̈ܬܐ ܕܥܒܕܢ ܠܗ ܘܠܐܚ̈ܘܗܝ ܘܠܥܡܗ
6 ܘܝܗܒ ܠܗ ܫܘܠܛܢܐ ܕܢܟܢܫ ܚܝܠܐ ܘܢܥܬܕ ܙܝܢܐ ܘܢܗܘܐ ܡܥܕܪܢܗ ܘܗܡܝܪ̈ܐ ܕܐܝܬ ܗܘܐ ܒܡܪܕܐ ܐܡܪ ܕܢܬܝܗܒܘܢ ܠܗ
7 ܘܐܬܐ ܝܘܢܬܢ ܠܐܘܪܫܠܡ ܘܩܪܐ ܐܓܪ̈ܬܐ ܒܐ̈ܕܢܘܗܝ ܕܟܠܗ ܥܡܐ ܘܕܝܬ̈ܒܝ ܡܪܕܐ
8 ܘܕܚܠܘ ܕܚܠܬܐ ܪܒܬܐ ܕܫܡܥܘ ܕܝܗܒ ܠܗ ܫܘܠܛܢܐ ܡܠܟܐ ܠܡܟܢܫܘ ܚܝܠܐ
9 ܘܐܫܠܡܘ ܝܬ̈ܒܝ ܡܪܕܐ ܗܡܝܪ̈ܐ ܠܝܘܢܬܢ ܘܐܫܠܡ ܐܢܘܢ ܠܐܢܫܝܗܘܢ
10 ܘܥܡܪ ܝܘܢܬܢ ܒܐܘܪܫܠܡ ܘܫܪܝ ܗܘܐ ܡܒܢܐ ܘܡܚܕܬ ܠܡܕܝܢܬܐ
11 ܘܐܡܪ ܝܘܢܬܢ ܠܥܒ̈ܕܝ ܥܒܕܐ ܕܢܒܢܘܢ ܫܘܪܐ ܘܛܘܪܐ ܕܨܗܝܘܢ ܟܕ ܚܕܪ ܒܟܐ̈ܦܐ ܡܪ̈ܒܥܬܐ ܠܚܣܢܐ ܘܥܒܕܘ ܗܟܢܐ
12 ܘܥܪܩܘ ܒܢ̈ܝ ܢܘܟܪ̈ܝܐ ܐܝܠܝܢ ܕܐܝܬ ܗܘܘ ܒܚ̈ܣܢܐ ܗܢܘܢ ܕܒܢܐ ܗܘܐ ܒܝܟܪܝܘܣ
13 ܘܫܒܩܘ ܟܠܢܫ ܕܘܟܬܗ ܘܐܙܠܘ ܠܐܬܪܗܘܢ
14 ܒܪܡ ܕܝܢ ܒܒܝܬ ܫܘܪ̈ܐ ܐܫܬܚܪܘ ܡܢ ܐܝܠܝܢ ܕܫܒܩܘ ܢܡܘܣܐ ܘܦܘ̈ܩܕܢܐ ܐܝܬܝܗ ܗܘܬ ܠܗܘܢ ܓܝܪ ܒܝܬ ܥܪܘܩܝܐ
15 ܘܫܡܥ ܐܠܟܣܢܕܪܘܣ ܡܠܟܐ ܟܠܡܕܡ ܕܫܠܚ ܘܐܫܬܘܕܝ ܕܡܛܪܝܘܣ ܠܝܘܢܬܢ ܘܐܫܬܥܝܘ ܠܗ ܥܠ ܩܪ̈ܒܐ ܘܓܢܒܪ̈ܘܬܐ ܘܢܨ̈ܚܢܐ ܕܥܒܕ ܗܘ ܘܐ̈ܚܘܗܝ
16 ܘܐܡܪ ܕܠܡܐ ܡܫܟܚܝܢ ܐܢܚܢܢ ܐܝܟ ܗܢܐ ܓܒܪܐ ܐܠܐ ܗܫܐ ܢܥܒܕܝܘܗܝ ܠܢ ܪܚܡܐ ܘܡܥܕܪܢܐ
17 ܘܟܬܒ ܐܓܪܬܐ ܘܫܠܚ ܠܗ ܐܝܟ ܗܠܝܢ ܡ̈ܠܐ
18 ܐܠܟܣܢܕܪܘܣ ܡܠܟܐ ܠܝܘܢܬܢ ܐܚܝ ܫܠܡ
19 ܫܡܥܢܢ ܥܠܝܟ ܕܓܒܪܐ ܐܢܬ ܚܝܠܬܢܐ ܘܚܫܚ ܐܢܬ ܠܢ ܕܬܗܘܐ ܠܢ ܪܚܡܐ
20 ܘܗܫܐ ܐܩܝܡܢܟ ܝܘܡܢܐ ܪܒ ܟܗ̈ܢܐ ܕܥܡܟ ܕܬܗܘܐ ܡܬܩܪܐ ܪܚܡܗ ܕܡܠܟܐ ܘܫܕܪ ܠܗ ܐܪ̈ܓܘܢܐ ܘܟܠܝܠܐ ܕܕܗܒܐ ܘܐܡܪ ܬܗܘܐ ܠܗ ܫܠܡܘܬܐ ܠܘܬ ܬܪܥܝܬܢ ܘܢܛܪ ܪܚܡܘܬܐ ܕܨܐܕܝܢ
21 ܘܐܬܟܣܝ ܝܘܢܬܢ ܐܣܛܠܐ ܩܕܝܫܬܐ ܒܝܪܚܐ ܫܒܝܥܝܐ ܒܫܢܬ ܡܐܐ ܘܫܬܝܢ ܒܥܕܥܕܐ ܕܡ̈ܛܠܐ ܘܟܢܫ ܚܝܠܐ ܘܥܬܕ ܙܝܢܐ ܣܓܝܐܐ
22 ܘܫܡܥ ܕܡܛܪܝܘܣ ܗܠܝܢ ܡ̈ܠܐ ܘܐܬܬܥܝܩ ܘܐܡܪ
23 ܡܢܐ ܥܒܕܢ ܕܩܕܡܢ ܐܠܟܣܢܕܪܘܣ ܠܡܥܒܕ ܪܚܡܘܬܐ ܥܡ ܝܗ̈ܘܕܝܐ ܕܢܗܘܘܢ ܠܗ ܡܥܕܪ̈ܢܐ
24 ܐܟܬܘܒ ܠܗܘܢ ܐܦ ܐܢܐ ܡ̈ܠܐ ܕܒܥܘܬܐ ܘܕܪܘܡܪܡܐ ܘܕܡܘܗ̈ܒܬܐ ܕܢܗܘܘܢ ܠܢ ܠܥܘܕܪܢܐ
25 ܘܫܠܚ ܠܗܘܢ ܐܝܟ ܗܠܝܢ ܡ̈ܠܐ ܕܡܛܪܝܘܣ ܡܠܟܐ ܠܥܡܐ ܕܝܗ̈ܘܕܝܐ ܫܠܡ
26 ܡܛܠ ܕܩܘܝܬܘܢ ܒܩܝܡܐ ܕܥܡܢ ܘܢܛܪܬܘܢ ܪܚܡܘܬܐ ܕܠܘܬܢ ܘܠܐ ܢܩܦܬܘܢ ܠܒ̈ܥܠܕܒܒܝܢ ܫܡܥܢ ܘܚܕܝܢ
27 ܘܗܫܐ ܩܘܘ ܒܬܪܥܝܬܐ ܕܠܘܬܢ ܘܢܦܪܘܥܟܘܢ ܛܒ̈ܬܐ ܣܓܝܐ̈ܬܐ ܐܝܟ ܕܥܒܕܬܘܢ ܥܡܢ
28 ܘܢܫܒܘܩ ܠܟܘܢ ܫܩ̈ܠܐ ܣܓ̈ܝܐܐ ܘܢܬܠ ܠܟܘܢ ܡܘܗ̈ܒܬܐ ܪ̈ܘܪܒܬܐ
29 ܘܗܫܐ ܫܪܐ ܐܢܐ ܠܟܘܢ ܘܡܪܦܐ ܐܢܐ ܠܟܠܗܘܢ ܝܗ̈ܘܕܝܐ ܡܢ ܫܩ̈ܠܐ ܘܡܢ ܕܡܝܗ ܕܡܠܚܐ ܘܡܢ ܟ̈ܠܝܠܐ
30 ܘܚܕܐ ܡܢ ܬܠܬ ܡܢ̈ܘܬܐ ܕܙܪܥܐ ܘܡܕܡ ܕܗܘܐ ܗܘܐ ܠܝ ܡܢ ܦܐܪ̈ܐ ܕܐܝ̈ܠܢܐ ܫܒܩ ܐܢܐ ܡܢ ܝܘܡܢܐ ܘܠܗܠ ܕܠܐ ܐܣܒ ܡܢ ܐܪܥܐ ܕܝܗܘܕܐ ܘܬܘܒ ܫܒܩ ܐܢܐ ܬܠܬܐ ܫܩ̈ܠܝܢ ܕܐܬܬܣܝܡܘ ܥܠܝܗ ܡܢ ܫܡܪܝܢ ܘܡܢ ܓܠܝܠܐ ܡܢ ܝܘܡܢܐ ܘܠܗܠ
31 ܘܐܘܪܫܠܡ ܬܗܘܐ ܩܕܝܫܐ ܘܡܚܪܪܐ ܘܟܠܗܘܢ ܬܚܘ̈ܡܝܗ ܘܡܥܣܪ̈ܐ ܘܡܟ̈ܣܐ ܫܒܩ ܐܢܐ
32 ܘܫܘܠܛܢܐ ܝܗܒ ܐܢܐ ܠܪܒ ܟܗ̈ܢܐ ܥܠ ܡܪܕܐ ܕܒܐܘܪܫܠܡ ܕܢܩܝܡ ܥܠܘܗܝ ܓܒܪ̈ܐ ܕܢܛܪܘܢܝܗܝ ܐܝܠܝܢ ܕܗܘ ܨܒܐ
33 ܘܟܠ ܢܦܫܐ ܕܝܗܘ̈ܕܝܐ ܕܐܫܬܒܝܬ ܡܢ ܐܪܥܐ ܕܝܗܘܕ ܒܟܠܗ ܡܠܟܘܬܝ ܫܒܩ ܐܢܐ ܒܪܬ ܚܐܪ̈ܐ ܡܓܢ ܘܟܠܢܫ ܢܫܒܩܘܢ ܫܩ̈ܠܝܗܘܢ ܘܕܒܥܝܪܗܘܢ
34 ܘܟܠܗܘܢ ܥܕܥ̈ܕܝܗ ܘܫܒ̈ܝܗ ܘܪܝܫ ܝܪ̈ܚܝܗ ܘܝܘ̈ܡܬܐ ܐܝ̈ܕܝܥܐ ܘܬܠܬܐ ܝܘ̈ܡܝܢ ܡܢ ܩܕܡ ܥܕܥܕܐ ܘܬܠܬܐ ܝܘ̈ܡܝܢ ܡܢ ܒܬܪ ܥܕܥܕܐ ܢܗܘܘܢ ܡܚܪܪܝܢ ܘܫܒܝܩܝܢ ܡܢ ܡܟ̈ܣܐ ܟܠܗܘܢ ܝܗ̈ܘܕܝܐ ܕܥܡܪܝܢ ܒܡܠܟܘܬܝ
35 ܘܠܐ ܐܝܬ ܫܘܠܛܢܐ ܠܐܢܫ ܕܢܬܒܥ ܐܘ ܕܢܐܠܘܨ ܠܚܕ ܡܢܗܘܢ ܥܠ ܟܠ ܨܒܘ ܕܐܝܬ
36 ܘܢܬܟܬܒܘܢ ܡܢ ܝܗܘ̈ܕܝܐ ܒܚ̈ܝܠܘܗܝ ܕܡܠܟܐ ܬܠܬܐ ܐ̈ܠܦܝܢ ܘܢܬܝܗܒܢ ܠܗܘܢ ܡܘܗ̈ܒܬܐ ܐܝܟ ܕܙܕܩ ܠܚܝ̈ܠܘܗܝ ܕܡܠܟܐ
37 ܘܢܩܘܡܘܢ ܡܢܗܘܢ ܥܠ ܚܣ̈ܢܘܗܝ ܪ̈ܘܪܒܐ ܕܡܠܟܐ ܘܡܢܗܘܢ ܬܘܒ ܢܩܘܡܘܢ ܥܠ ܨܒܘ̈ܬܐ ܡܗܝ̈ܡܢܬܐ ܕܡܠܟܐ ܘܡܕܒܪ̈ܢܝܗܘܢ ܘܪ̈ܫܢܝܗܘܢ ܢܗܘܘܢ ܡܢܗܘܢ ܘܢܬܕܒܪܘܢ ܒܢܡܘ̈ܣܝܗܘܢ ܐܝܟ ܕܦܩܕ ܡܠܟܐ ܒܐܪܥܐ ܕܝܗܘܕ
38 ܘܬܠܬܐ ܫܩ̈ܠܝܢ ܕܐܬܬܣܝܡܘ ܥܠ ܝܗܘܕܐ ܡܢ ܐܪܥܐ ܕܫܡܪܝܢ ܘܡܢ ܕܓܠܝܠܐ ܢܬܝܗܒܘܢ ܠܗ ܠܝܗܘܕܐ ܕܢܗܘܘܢ ܟܠܗܘܢ ܬܚܝܬ ܚܕ ܫܘܠܛܢܐ ܕܠܐ ܐܢܫ ܐܚܪܝܢ ܢܫܬܠܛ ܥܠܝܗܘܢ ܐܠܐ ܐܢ ܪܒ ܟܗ̈ܢܐ ܒܠܚܘܕ
39 ܘܠܦܛܘܠܡܐܝܣ ܕܝܢ ܘܠܟܠܗ ܫܘܠܛܢܗ ܝܗܒܬ ܠܩܕ̈ܝܫܐ ܕܒܐܘܪܫܠܡ ܠܢܦܩܬܐ ܕܒܝܬ ܡܩܕܫܐ
40 ܘܐܢܐ ܝܗܒ ܐܢܐ ܒܟܠ ܫܢܐ ܚܡܫܬܥܣܪ ܐ̈ܠܦܝܢ ܕܟܣܦܐ ܡܢ ܓܙܗ ܕܡܠܟܐ
41 ܘܟܠ ܡܕܡ ܕܡܬܬܚܝܒ ܠܝ ܡܢ ܨܒܘ̈ܬܐ ܐܝܠܝܢ ܕܠܐ ܐܬܝܗܒ ܠܝ ܐܝܟ ܕܠܥܡ̈ܡܐ ܩܕܡ̈ܝܐ ܡܢ ܗܫܐ ܢܬܝܗܒܢ ܠܥܒܕܗ ܕܒܝܬܐ
42 ܘܬܘܒ ܚܡܫܐ ܐܠܦܝܢ ܟܣܦܐ ܗܢܘܢ ܕܢܣܒ ܗܘܝܬ ܡܢ ܨܒܘ̈ܬܐ ܕܒܝܬ ܡܩܕܫܐ ܒܟܠ ܫܢܐ ܘܫܢܐ ܫܒܩ ܐܢܐ ܡܛܠ ܕܠܟܗ̈ܢܐ ܗܘ ܙܕܩ ܕܡܫܡܫܝܢ ܗܝܟܠܐ
43 ܘܟܠ ܐܝܠܝܢ ܕܢܥܪܩܘܢ ܘܢܬܓܘܣܘܢ ܒܗܝܟܠܐ ܕܒܐܘܪܫܠܡ ܘܒܟܠܗܘܢ ܬܚܘ̈ܡܘܗܝ ܕܚܝܒܝܢ ܚܘܒܬܐ ܕܡܠܟܐ ܐܘ ܟܠ ܨܒܘ ܢܗܘܘܢ ܡܫܬܪܝܢ ܘܟܠܡܕܡ ܕܐܝܬ ܠܗܘܢ ܒܡܠܟܘܬܝ
44 ܘܕܗܘܐ ܡܬܒܢܐ ܘܡܬܚܕܬ ܒܝܬ ܡܩܕܫܐ
45 ܘܕܢܬܒܢܐ ܫܘܪܗ ܕܐܘܪܫܠܡ ܘܢܬܥܫܢ ܟܕ ܚܕܪ ܘܢܦܩܬܐ ܬܬܝܗܒ ܠܗܘܢ ܡܢ ܒܝܬܗ ܕܡܠܟܐ ܘܕܢܒܢܘܢ ܫܘܪ̈ܝܗ ܕܝܗܘܕܐ
46 ܘܟܕ ܫܡܥ ܕܝܢ ܝܘܢܬܢ ܘܥܡܐ ܗܠܝܢ ܡ̈ܠܐ ܕܫܠܚ ܕܡܛܪܝܘܣ ܠܐ ܗܝܡܢܘܗܝ ܘܠܐ ܩܒܠܘ ܡܢܗ ܐܬܕܟܪܘ ܓܝܪ ܠܟܠܗ ܒܝܫܬܐ ܕܥܒܕ ܒܐܝܣܪܝܠ ܘܕܐܠܨ ܐܢܘܢ ܪܘܪܒܐܝܬ
47 ܐܠܐ ܐܨܛܒܝܘ ܒܐܠܟܣܢܕܪܘܣ ܡܛܠ ܕܗܘ ܗܘܐ ܠܗܘܢ ܪܫܐ ܕܡ̈ܠܐ ܕܫܠܡܐ ܘܡܥܕܪܝܢ ܗܘܘ ܠܗ ܟܠܗܘܢ ܝܘܡ̈ܬܐ
48 ܘܟܢܫ ܐܠܟܣܢܕܪܘܣ ܡܠܟܐ ܚܝܠܐ ܪܒܐ ܘܫܪܐ ܠܘܩܒܠ ܕܡܛܪܝܘܣ
49 ܘܫܪܝܘ ܠܡܩܪܒܘ ܬܪ̈ܝܗܘܢ ܡ̈ܠܟܐ ܘܥܪܩܬ ܡܫܪܝܬܗ ܕܕܡܛܪܝܘܣ ܘܪܕܦ ܐܢܘܢ ܐܠܟܣܢܕܪܘܣ ܘܐܬܥܫܢ ܥܠܝܗܘܢ
50 ܘܥܫܢ ܩܪܒܐ ܣܓܝ ܥܕܡܐ ܕܥܪܒ ܫܡܫܐ ܘܢܦܠ ܕܡܛܪܝܘܣ ܒܗܘ ܝܘܡܐ
51 ܘܫܕܪ ܐܠܟܣܢܕܪܘܣ ܒܗܘ ܝܘܡܐ ܠܘܬ ܦܛܘܠܡܐܘܣ ܡܠܟܐ ܕܡܨܪܝܢ ܐܝ̈ܙܓܕܐ ܒܗܠܝܢ ܡ̈ܠܐ
52 ܡܛܠ ܕܗܦܟܬ ܠܡܠܟܘܬܝ ܘܝܬܒܬ ܥܠ ܟܘܪܣܝܐ ܕܐܒ̈ܗܝ ܘܐܚܕܬ ܪܫܢܘܬܐ ܘܬܒܪܬܗ ܠܕܡܛܪܝܘܣ ܘܐܬܥܫܢܬ ܘܐܚܕܬ ܐܪ̈ܥܬܢ
53 ܐܩܪܒܬ ܓܝܪ ܥܡܗ ܘܐܬܬܒܪ ܗܘ ܘܡܫܪܝܬܗ ܩܕܡܝܢ ܘܝܬܒܬ ܥܠ ܟܘܪܣܝܐ ܕܡܠܟܘܬܗ
54 ܘܗܫܐ ܢܩܝܡ ܚܕ ܥܡ ܚܕ ܪܚܡܘܬܐ ܘܗܒ ܠܝ ܒܪܬܟ ܠܐܢܬܬܐ ܘܐܗܘܐ ܠܟ ܚܬܢܐ ܘܐܬܠ ܠܟ ܘܠܗ ܡܘܗ̈ܒܬܐ ܕܫ̈ܘܝܢ ܠܟ
55 ܘܥܢܐ ܦܛܘܠܡܐܘܣ ܡܠܟܐ ܘܐܡܪ ܫܦܝܪ ܢܗܘܐ ܝܘܡܐ ܕܗܦܟܬ ܠܐܪܥܐ ܕܐܒ̈ܗܝܟ ܘܝܬܒܬ ܥܠ ܟܘܪܣܝܐ ܕܡܠܟܘܬܐ
56 ܘܗܫܐ ܐܥܒܕ ܠܟ ܟܠܡܕܡ ܕܫܠܚܬ ܐܠܐ ܬܐ ܠܦܛܘܠܡܐܝܣ ܕܬܡܢ ܢܚܙܐ ܚܕ ܠܚܕ ܘܐܬܠ ܠܟ ܠܒܪܬܝ ܐܝܟ ܕܐܡܪܬ
57 ܘܢܦܩ ܦܛܘܠܡܐܘܣ ܡܢ ܡܨܪܝܢ ܗܘ ܘܩܠܐܘܦܛܪܐ ܒܪܬܗ ܘܐܬܘ ܠܦܛܘܠܡܐܝܣ ܒܫܢܬ ܡܐܐ ܘܫܬܝܢ ܘܬܪ̈ܬܝܢ
58 ܘܐܪܥܗ ܐܠܟܣܢܕܪܘܣ ܡܠܟܐ ܘܝܗܒ ܠܗ ܠܩܠܐܘܦܛܪܐ ܒܪܬܗ ܘܥܒܕ ܡܫܬܘܬܐܬ ܒܦܛܘܠܡܐܝܣ ܐܝܟ ܡ̈ܠܟܐ ܒܬܫܒܘܚܬܐ ܪܒܬܐ
59 ܘܟܬܒ ܐܠܟܣܢܕܪܘܣ ܡܠܟܐ ܠܝܘܢܬܢ ܕܢܐܬܐ ܠܐܘܪܥܗ
60 ܘܐܙܠ ܝܘܢܬܢ ܒܬܫܒܘܚܬܐ ܪܒܬܐ ܠܦܛܘܠܡܐܝܣ ܘܐܪܥ ܐܢܘܢ ܠܬܪ̈ܝܗܘܢ ܡ̈ܠܟܐ ܘܝܗܒ ܠܗܘܢ ܕܗܒܐ ܘܣܐܡܐ ܘܡܘܗ̈ܒܬܐ ܘܠܪ̈ܚܡܝܗܘܢ ܘܐܫܟܚ ܪ̈ܚܡܐ ܩܕܡ ܥܝ̈ܢܝܗܘܢ
61 ܘܐܬܟܢܫܘ ܠܘܬܗ ܐܢܫܐ ܒܝ̈ܫܐ ܡܢ ܐܝܣܪܝܠ ܓܒܪ̈ܐ ܥܘ̈ܠܐ ܠܡܩܒܠ ܥܠ ܝܘܢܬܢ ܘܠܐ ܚܪ ܒܗܘܢ ܡܠܟܐ ܘܠܐ ܩܒܠ ܡܢܗܘܢ
62 ܘܦܩܕ ܡܠܟܐ ܘܐܫܠܚܘܗܝ ܠܝܘܢܬܢ ܢܚ̈ܬܘܗܝ ܘܐܠܒܫܘܗܝ ܐܪ̈ܓܘܢܐ ܘܟܕ ܥܒܕܘ ܠܗ ܗܟܢܐ
63 ܐܘܬܒܗ ܥܡܗ ܡܠܟܐ ܘܐܡܪ ܠܪ̈ܘܪܒܢܘܗܝ ܦܘܩܘ ܥܡܗ ܠܡܨܥܬ ܡܕܝܢܬܐ ܘܐܟܪܙܘ ܕܠܐ ܐܢܫ ܢܩܒܘܠ ܥܠܘܗܝ ܥܠ ܟܠ ܨܒܘ ܕܐܝܬ ܘܠܐ ܐܢܫ ܢܗܪܝܘܗܝ ܥܠ ܟܠ ܡܠܐ ܕܐܝܬ
64 ܘܟܕ ܚܙܘ ܗܠܝܢ ܕܩܒܠܝܢ ܗܘܘ ܥܠ ܝܘܢܬܢ ܬܫܒܘܚܬܗ ܐܝܟ ܕܐܟܪܙܘ ܩܕܡܘܗܝ ܟܪ̈ܘܙܐ ܟܕ ܡܟܣܐ ܐܪ̈ܓܘܢܐ ܥܪܩܘ ܟܠܗܘܢ
65 ܘܫܒܚܗ ܡܠܟܐ ܠܝܘܢܬܢ ܘܟܬܒܗ ܡܢ ܪ̈ܫܐ ܕܪ̈ܚܡܘܗܝ ܘܣܡܗ ܪܝܫ ܚܝܠܐ ܘܪܒ ܥܡܐ
66 ܘܗܦܟ ܝܘܢܬܢ ܠܐܘܪܫܠܡ ܒܫܠܡܐ ܘܒܒܘܣܡܐ
67 ܘܒܫܢܬ ܡܐܐ ܘܫܬܝܢ ܘܚܡܫ ܐܬܐ ܕܡܛܪܝܣ ܒܪܗ ܕܕܡܛܪܝܘܣ ܡܢ ܩܪܛܐ ܠܐܪܥܐ ܕܐܒܗ̈ܘܗܝ
68 ܘܫܡܥ ܐܠܟܣܢܕܪܘܣ ܡܠܟܐ ܘܐܬܬܥܝܩ ܣܓܝ ܘܗܦܟ ܠܐܢܛܝܘܟܝܐ
69 ܘܐܩܝܡ ܕܡܛܪܝܘܣ ܠܐܦܠܘܢܝܘܣ ܗܘ ܕܥܒܝܕ ܗܘܐ ܥܠ ܣܘܪܝܐ ܘܟܢܫ ܚܝܠܐ ܣܓܝܐܐ ܘܫܪܐ ܥܠ ܝܡܢܝܢ ܘܫܕܪ ܠܘܬ ܝܘܢܬܢ ܪܒ ܟܗ̈ܢܐ ܘܐܡܪ ܠܗ
70 ܐܢܬ ܒܠܚܘܕܝܟ ܡܬܪܝܡ ܐܢܬ ܥܠܝܢ ܘܐܢܐ ܗܘܝܬ ܠܚܣܕܐ ܘܠܒܘܙܚܐ ܡܛܠܬܟ ܘܠܡܢܐ ܡܫܬܠܛ ܐܢܬ ܥܠܝܢ ܒܬܚܘ̈ܡܝܢ
71 ܗܫܐ ܐܢܗܘ ܕܬܟܝܠ ܐܢܬ ܥܠ ܚܝܠܟ ܚܘܬ ܠܘܬܢ ܠܦܩܥܬܐ ܘܢܩܒܠ ܐ̈ܦܐ ܚܕ ܕܚܕ ܬܡܢ ܡܛܠ ܕܥܡܝ ܐܝܬ ܚܝܠܐ ܕܡܕܝܢ̈ܬܐ
72 ܫܐܠ ܘܚܙܝ ܕܡܢܘ ܐܢܐ ܘܡܢ ܐܢܘܢ ܡܥܕܪ̈ܢܝܢ ܗܠܝܢ ܕܐܡܪܝܢ ܕܠܝܬ ܠܟܘܢ ܩܝܡ ܪ̈ܓܠܐ ܩܕܡܝܢ ܡܛܠ ܕܬܪ̈ܬܝܢ ܙܒ̈ܢܝܢ ܐܙܕܟܝܘ ܐܒ̈ܗܝܟ ܒܐܪܥܗܘܢ
73 ܘܗܫܐ ܠܐ ܡܬܡܨܐ ܐܢܬ ܚܝܠܐ ܠܡܩܡ ܩܕܡ ܚܝܠܢ ܘܦܪ̈ܫܘܗܝ ܒܦܩܥܬܐ ܐܝܟܐ ܕܠܝܬ ܠܐ ܟܐܦܐ ܘܠܐ ܛܪܢܐ ܐܦܠܐ ܐܬܪܐ ܠܡܥܪܩ
74 ܘܟܕ ܫܡܥ ܝܘܢܬܢ ܡ̈ܠܘܗܝ ܕܐܦܠܘܢܝܘܣ ܐܬܚܡܬ ܘܐܬܥܙܙ ܒܪܥܝܢܗ ܘܓܒܐ ܥܣܪܐ ܐ̈ܠܦܝܢ ܓܒܪ̈ܐ ܡܢ ܐܘܪܫܠܡ ܘܐܪܥܗ ܫܡܥܘܢ ܐܚܘܗܝ ܠܥܘܕܪܢܗ
75 ܘܫܪܐ ܝܘܢܬܢ ܥܠ ܝܘܦܐ ܘܐܚܕܘܗ ܥܡܘܪ̈ܝܗ ܠܡܕܝܢܬܐ ܡܛܠ ܕܡܛܪܬܐ ܕܐܦܠܘܢܝܘܣ ܐܝܬ ܗܘܐ ܒܗ ܘܐܩܪܒܘ ܥܡܗ
76 ܘܕܚܠܘ ܥܡܘܪ̈ܝܗ ܕܡܕܝܢܬܐ ܘܦܬܚܘ ܠܗܘܢ ܘܐܫܬܠܛ ܝܘܢܬܢ ܥܠ ܝܘܦܐ
77 ܘܫܡܥ ܐܦܠܘܢܝܘܣ ܘܕܒܪ ܬܠܬܐ ܐ̈ܠܦܝܢ ܦܪ̈ܫܐ ܘܚܝܠܐ ܣܓܝܐܐ ܘܐܙܠ ܠܙܘܛܘܣ ܐܝܟ ܥܒܘܪܐ ܘܩܕܡ ܗܘܐ ܠܗܘܢ ܠܦܩܥܬܐ ܡܛܠ ܚܝܠܐ ܕܦܪ̈ܫܐ ܕܐܝܬ ܗܘܐ ܥܡܗ ܘܬܟܝܠ ܗܘܐ ܥܠܝܗܘܢ
78 ܘܪܕܦ ܝܘܢܬܢ ܒܬܪܗ ܠܙܘܛܘܣ ܘܩܪܒ ܡܫܪ̈ܝܬܐ ܐܟܚܕܐ ܠܩܪܒܐ
79 ܘܫܒܩ ܐܦܠܘܢܝܘܣ ܐܠܦ ܦܪ̈ܫܝܢ ܡܢ ܒܣܬܪܗܘܢ ܒܟܡܐܢܐ
80 ܘܝܕܥ ܝܘܢܬܢ ܕܟܡܐܢܐ ܐܝܬ ܒܣܬܪܗ ܘܐܬܟܪܟܘܗ ܠܡܫܪܝܬܗ ܘܫܕܘ ܘܛܠܩܘ ܓܐܪ̈ܝܗܘܢ ܒܥܡܐ ܡܢ ܨܦܪܐ ܘܥܕܡܐ ܠܦܢܝܐ
81 ܥܡܐ ܕܝܢ ܩܐܡ ܗܘܐ ܐܝܟ ܕܦܩܕ ܝܘܢܬܢ ܘܠܐܝܘ ܦܪ̈ܫܝܗܘܢ
82 ܘܢܓܕ ܫܡܥܘܢ ܠܚܝܠܗ ܘܐܩܪܒ ܥܡ ܦ̈ܠܓܐ ܥܕܡܐ ܕܐܫܬܪܝܘ ܦܪ̈ܫܐ ܘܚܝ̈ܠܐ ܘܐܬܬܒܪܘ ܘܥܪܩܘ ܡܢ ܩܕܡܘܗܝ
83 ܘܦܪ̈ܫܐ ܐܬܒܕܪܘ ܒܦܩܥܬܐ ܘܥܪܩܘ ܠܙܘܛܘܣ ܘܥܠܘ ܠܒܝܬ ܕܓܘܢ ܦܬܟܪܗܘܢ ܕܢܫܬܘܙܒܘܢ
84 ܘܐܘܩܕܗ ܝܘܢܬܢ ܠܒܝܬ ܦܬܟܪܗܘܢ ܘܠܐܝܠܝܢ ܕܥܪܩܘ ܠܡܬܓܘܣܘ ܒܝܬ ܕܓܘܢ ܐܘܩܕ ܐܢܘܢ ܥܡܗ ܘܠܙܘܛܘ̇ܣ ܘܠܡܕܝ̈ܢܬܐ ܕܚܕܝܪܢ ܠܗ ܐܘܩܕ ܐܢܝܢ ܒܢܘܪܐ ܘܢܣܒ ܒܙܬܗܝܢ
85 ܘܗܘܘ ܐܝܠܝܢ ܕܢܦܠܘ ܒܚܪܒܐ ܥܡ ܐܝܠܝܢ ܕܐܝܩܕܘ ܐܝܟ ܬܡܢܝܐ ܐܠܦܝܢ ܓܒܪ̈ܝܢ
86 ܘܫܩܠ ܡܢ ܬܡܢ ܝܘܢܬܢ ܘܫܪܐ ܥܠ ܐܫܩܠܘܢ ܘܢܦܩܘ ܝܬܒ̈ܝܗ ܕܡܕܝܢܬܐ ܠܐܘܪܥܗ ܒܬܫܒܘܚܬܐ ܪܒܬܐ
87 ܘܗܦܟ ܝܘܢܬܢ ܠܐܘܪܫܠܡ ܥܡ ܐܝܠܝܢ ܕܥܡܗ ܟܕ ܐܝܬ ܥܡܗܘܢ ܒܙܬܐ ܣܓܝܐܬܐ
88 ܘܟܕ ܫܡܥ ܐܠܟܣܢܕܪܘܣ ܡܠܟܐ ܗܠܝܢ ܡ̈ܠܐ ܐܘܣܦ ܠܡܫܒܚܘܬܗ ܠܝܘܢܬܢ
89 ܘܫܕܪ ܠܗ ܦܝܒܠܐ ܕܕܗܒܐ ܐܝܟ ܕܐܝܬ ܥܝܕܐ ܠܡܬܝܗܒܘ ܠܒ̈ܢܝ ܛܘܗܡܗܘܢ ܕܡ̈ܠܟܐ ܘܝܗܒ ܠܗ ܠܥܩܪܘܢ ܘܠܟܠܗܘܢ ܬܚܘ̈ܡܝܗ ܠܝܪܬܘܬܐ
1 Maccabees 9 · 1 Maccabees 11 · Greek (Septuagint / SBLGNT) · Latin (Vulgate)