1 Kings 19 — Coptic (Sahidic)

3 ϩⲏⲗⲓⲁⲥ ⲇⲉ ⲁϥⲣϩⲟⲧⲉ ⲁϥⲧⲱⲟⲩⲛ ⲁϥⲙⲟⲟϣⲉ ⲕⲁⲧⲁⲧⲉϥⲯⲩⲭⲏ ϣⲁⲛⲧϥⲉⲓ ⲉϩⲣⲁⲓ ⲉⲃⲏⲣⲥⲁⲃⲉⲉ ⲛⲧⲉⲓⲟⲩⲇⲁ ⲁϥⲕⲱ ⲙⲡⲉϥϣⲏⲣⲉ ϣⲏⲙ ϩⲙⲡⲙⲁ ⲉⲧⲙⲙⲁⲩ

4 ⲁⲩⲱ ⲛⲧⲟϥ ⲁϥⲉⲓ ⲉϩⲣⲁⲓ ⲉⲧⲉⲣⲏⲙⲟⲥ ⲛⲁⲡϣⲁⲩ ⲛⲟⲩϩⲟⲟⲩ ⲙⲙⲟⲟϣⲉ ⲁϥⲉⲓ ⲁϥϩⲙⲟⲟⲥ ϩⲁⲟⲩϣⲏⲛ ⲉϣⲁⲩⲙⲟⲩⲧⲉ ⲉⲣⲟϥ ϫⲉϩⲣⲁⲧⲛ ⲁⲩⲱ ⲁϥⲁⲓⲧⲉⲓ ⲉⲧⲣⲉⲧⲉϥⲯⲩⲭⲏ ⲙⲟⲩ ⲉϥϫⲱ ⲙⲙⲟⲥ ϫⲉϩⲱ ⲧⲉⲛⲟⲩ ϫⲓ ⲛⲧⲁⲯⲩⲭⲏ ⲛⲧⲟⲟⲧⲡϫⲟⲉⲓⲥ ϫⲉⲛⲉⲓⲥⲟⲧⲡ ⲁⲛ ⲁⲛⲟⲕ ⲉⲛⲁⲉⲓⲟⲧⲉ

5 ⲁⲩⲱ ⲁϥⲛⲕⲟⲧⲕ ⲁϥⲱⲃϣ ϩⲙⲡⲙⲁ ⲉⲧⲙⲙⲁⲩ ϩⲁⲡⲡϣⲏⲛ ⲁⲩⲱ ⲉⲓⲥ ⲟⲩⲁ ⲁϥϫⲱϩ ⲉⲣⲟϥ ⲉϥϫⲱ ⲙⲙⲟⲥ ⲛⲁϥ ϫⲉⲧⲱⲟⲩⲛ ⲛⲅⲟⲩⲱⲙ

6 ⲁϥⲕⲟⲧϥ ⲇⲉ ⲛϭⲓϩⲏⲗⲓⲁⲥ ⲁⲩⲱ ⲉⲓⲥ ϩⲏⲏⲧⲉ ⲛⲉϥⲕⲏ ⲉϩⲣⲁⲓ ϩⲁϫⲱϥ ⲛϭⲓⲟⲩⲟⲉⲓⲕ ⲛⲃⲱⲧⲉ ⲛⲁⲧⲑⲁϥ ⲙⲛⲟⲩⲕⲁⲯⲁⲕⲏⲥ ⲙⲙⲟⲟⲩ ⲁϥⲧⲱⲟⲩⲛ ⲇⲉ ⲁϥⲟⲩⲱⲙ ⲁⲩⲱ ⲁϥⲕⲟⲧϥ ⲟⲛ ⲁϥⲕⲟⲧⲕ

7 ⲡⲁⲅⲅⲉⲗⲟⲥ ⲇⲉ ⲙⲡϫⲟⲉⲓⲥ ⲁϥϫⲱϩ ⲉⲣⲟϥ ⲙⲡⲙⲉϩⲥⲟⲡ ⲥⲛⲁⲩ ⲉϥϫⲱ ⲙⲙⲟⲥ ϫⲉⲧⲱⲟⲩⲛ ⲛⲅⲟⲩⲱⲙ ϫⲉⲧⲉϩⲓⲏ ⲟⲩⲏⲩ ⲙⲙⲟⲕ

8 ⲁϥⲧⲱⲟⲩⲛ ⲇⲉ ⲁϥⲟⲩⲱⲙ ⲁⲩⲱ ⲁϥⲥⲱ ⲁϥⲙⲟⲟϣⲉ ϩⲛⲧϭⲟⲙ ⲛⲧⲉϩⲣⲉ ⲉⲧⲙⲙⲁⲩ ⲛϩⲙⲉ ⲛϩⲟⲟⲩ ⲙⲛϩⲙⲉ ⲛⲟⲩϣⲏ ϣⲁⲭⲱⲣⲏⲃ ⲡⲧⲟⲟⲩ ⲙⲡⲛⲟⲩⲧⲉ

9 ⲁϥⲉⲓ ⲁϥϩⲙⲟⲟⲥ ϩⲙⲡⲙⲁ ⲉⲧⲙⲙⲁⲩ ⲁϥϭⲱ ϩⲙⲡⲉⲥⲡⲏⲗⲁⲓⲟⲛ ⲛϩⲏⲧϥ ⲁⲩⲱ ⲡϣⲁϫⲉ ⲙⲡϫⲟⲉⲓⲥ ⲁϥⲡⲱϩ ϣⲁϩⲏⲗⲓⲁⲥ ⲉϥϫⲱ ⲙⲙⲟⲥ ϫⲉⲉⲕⲣⲟⲩ ⲛⲧⲟⲕ ⲙⲡⲉⲓⲙⲁ

10 ⲡⲉϫⲉϩⲏⲗⲓⲁⲥ ϩⲛⲟⲩⲕⲱϩ ⲁⲓⲕⲱϩ ⲡϫⲟⲉⲓⲥ ⲡⲛⲟⲩⲧⲉ ⲛⲛϭⲟⲙ ⲡⲡⲁⲛⲧⲟⲕⲣⲁⲧⲱⲣ ⲉⲃⲟⲗ ϫⲉⲛϣⲏⲣⲉ ⲙⲡⲓⲥⲣⲁⲏⲗ ⲁⲩⲕⲁⲁⲕ ⲛⲥⲱⲟⲩ ⲛⲉⲕⲑⲩⲥⲓⲁⲥⲧⲏⲣⲓⲟⲛ ⲁⲩϣⲣϣⲱⲣⲟⲩ ⲁⲩⲱ ⲛⲉⲕⲡⲣⲟⲫⲏⲧⲏⲥ ⲁⲩⲙⲟⲟⲩⲧⲟⲩ ϩⲛⲧⲥⲏϥⲉ ⲁⲛⲟⲕ ⲇⲉ ⲙⲁⲩⲁⲁⲧ ⲁⲓⲥⲉⲉⲡⲉ ⲁⲩⲱ ⲥⲉⲕⲱⲧⲉ ϩⲱ ⲛⲥⲁⲧⲁⲯⲩⲭⲏ

11 ⲡⲉϫⲉⲡϫⲟⲉⲓⲥ ⲛⲁϥ ϫⲉⲉⲕⲉⲉⲓ ⲉⲃⲟⲗ ⲛⲣⲁⲥⲧⲉ ⲛⲅⲁϩⲉⲣⲁⲧⲕ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ϩⲙⲡⲧⲟⲟⲩ ⲉⲓⲉⲡϫⲟⲉⲓⲥ ⲛⲁⲡⲁⲣⲁⲅⲉ ⲙⲛⲟⲩϭⲟⲙ ⲙⲡⲛⲉⲩⲙⲁ ⲉϥⲧⲁϫⲣⲏⲩ ϥⲛⲁⲃⲱⲗ ⲉⲃⲟⲗ ⲛⲛⲧⲟⲩⲉⲓⲏ ⲁⲩⲱ ϥⲛⲁⲟⲩⲱϣⲃ ⲛⲙⲡⲉⲧⲣⲁ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲛⲉⲣⲉⲡϫⲟⲉⲓⲥ ⲁⲛ ϩⲙⲡⲉⲡⲛⲉⲩⲙⲁ ⲁⲩⲱ ⲙⲛⲛⲥⲁⲡⲉⲡⲛⲁ ⲟⲩⲕⲙⲧⲟ

12 ⲁⲩⲱ ⲙⲛⲛⲥⲁⲡⲕⲙⲧⲟ ⲟⲩⲕⲱϩⲧ ⲛⲉⲣⲉⲡϫⲟⲉⲓⲥ ⲁⲛ ϩⲙⲡⲕⲱϩⲧ ⲙⲛⲛⲥⲁⲡⲕⲱϩⲧ ⲟⲩϩⲣⲟⲟⲩ ⲛⲧⲏⲩ ⲉϥϣⲟⲙⲉ ⲙⲛⲟⲩⲛⲟϭ ⲛϭⲣⲉϩⲧ ⲉⲣⲉⲡϫⲟⲉⲓⲥ ⲙⲙⲁⲩ

13 ⲁⲥϣⲱⲡⲉ ⲇⲉ ⲛⲧⲉⲣⲉϩⲏⲗⲓⲁⲥ ⲥⲱⲧⲙ ⲁϥϩⲱⲃⲥ ⲙⲡⲉϥϩⲟ ϩⲛⲧⲉϥⲙⲉⲗⲱⲧⲏ ⲁϥⲉⲓ ⲉⲃⲟⲗ ⲁϥⲁϩⲉⲣⲁⲧϥ ϩⲁⲣⲁⲧϥ ⲙⲡⲉⲥⲡⲏⲗⲁⲓⲟⲛ ⲁⲩⲱ ⲉⲓⲥ ⲡⲉϩⲣⲟⲟⲩ ⲙⲡϫⲟⲉⲓⲥ ⲁϥⲡⲱϩ ϣⲁⲣⲟϥ ⲉϥϫⲱ ⲙⲙⲟⲥ ⲛⲁϥ ϫⲉⲁϩⲣⲟⲕ ⲛⲧⲟⲕ ⲙⲡⲉⲓⲙⲁ ϩⲏⲗⲓⲁⲥ

14 ⲡⲉϫⲉϩⲏⲗⲓⲁⲥ ⲇⲉ ϩⲛⲟⲩⲕⲱϩ ⲁⲓⲕⲱϩ ⲡϫⲟⲉⲓⲥ ⲡⲡⲁⲛⲧⲟⲕⲣⲁⲧⲱⲣ ⲡϫⲟⲉⲓⲥ ⲛⲛϭⲟⲙ ⲡⲛⲟⲩⲧⲉ ⲙⲡⲓⲥⲣⲁⲏⲗ ⲉⲃⲟⲗ ϫⲉⲛϣⲏⲣⲉ ⲙⲡⲓⲥⲣⲁⲏⲗ ⲁⲩⲕⲱ ⲛⲥⲱⲟⲩ ⲛⲧⲉⲕⲇⲓⲁⲑⲏⲕⲏ ⲁⲩⲱ ⲛⲉⲕⲑⲩⲥⲓⲁⲥⲧⲏⲣⲓⲟⲛ ⲁⲩϣⲣϣⲱⲣⲟⲩ ⲛⲉⲕⲡⲣⲟⲫⲏⲧⲏⲥ ⲁⲩⲙⲟⲟⲩⲧⲟⲩ ϩⲛⲟⲩⲥⲏϥⲉ ⲁⲛⲟⲕ ⲇⲉ ⲙⲁⲩⲁⲁⲧ ⲁⲓⲥⲉⲉⲡⲉ ⲁⲩⲱ ⲥⲉⲕⲏⲧⲉ ⲛⲥⲁⲧⲁⲯⲩⲭⲏ ⲉϥⲓⲧⲥ