Read 1 Esdras 9 side by side with translations · The Final Bible
1 ܘܟܕ ܩܡ ܥܙܪܐ ܡܢ ܕܪܬܐ ܕܗܝܟܠܐ ܐܙܠ ܠܒܝܬܓܙܐ ܕܝܘܢܬܢ ܒܪܗ ܕܐܠܝܫܒ
2 ܘܒܬ ܬܡܢ ܟܕ ܠܚܡܐ ܠܐ ܛܥ̣ܡ ܘܠܐ ܡܝ̈ܐ ܐܫܬܝ ܟܕ ܐܒܝܠ ܚܠܦ ܠܐ ܢܡܘܣ̈ܝܘܬܐ ܗܠܝܢ ܪ̈ܘܪܒܬܐ ܕܣܘܓܐܐ
3 ܘܗܘ̣ܬ ܟܪܘܙܘܬܐ ܒܟܠܗ̇ ܝܗܘܕ ܘܒܐܘܪܝܫܠܡ ܠܟܠܗܘܢ ܗ̇ܢܘܢ ܕܡܢ ܫܒܝ̣ܬܐ ܕܢܥܠܘܢ ܠܐܘܪܝܫܠܡ
4 ܘܟܠܗܘܢ ܗ̇ܢܘܢ ܕܐܢ ܠܐ ܢܦܓܥܘܢ ܒܗܠܝܢ ܬܪ̈ܝܢ ܐܘ ܬܠܬܐ ܝܘ̈ܡܬܐ ܐܝܟ ܕܝ̣ܢܐ ܕܩܫܝ̈ܫܐ ܘܪ̈ܝܫܝ ܡܘܬܒܐ ܢܬܟ̇ܗܢܘܢ ܒܥܝܪ̈ܐ ܕܝܠܗܘܢ ܘܗ̣ܘ ܢܬܢ̇ܟܪܐ ܡܢ ܣܘܓܗ̇ ܕܫܒܝ̣ܬܐ
5 ܘܐܬܟ̇ܢܫܘ ܟܠܗܘܢ ܗ̇ܢܘܢ ܕܡܢ ܫܪܒܬܐ ܕܝܗܘܕܐ ܘܕܒܢܝܡܢ ܒܬܠܬܐ ܝܘ̈ܡܬܐ ܠܐܘܪܝܫܠܡ ܗܢܐ ܗܘ ܝܪܚܐ ܬܫܝܥܝܐ ܒܥܣܪܝܢ ܒܝܪܚܐ
6 ܘܝܬܒ̣ܘ ܐܟܚܕܐ ܟܠܗ ܣܘܓܐܐ̣ ܒܐܘܪ̈ܚܬܐ ܕܗܝܟܠܐ ܟܕ ܪܥܠܝܢ ܗܘܘ ܡܛܠ ܕܣܬܘܐ ܩ̇ܐܡ ܗܘܐ ܀
7 ܘܟܕ ܩ̣ܡ ܥܙܪܐ̣ ܐܡ̣ܪ ܠܗܘܢ ܐܢܬܘܢ ܐܥ̣ܘܠܬܘܢ ܘܐܥܡܪܬܘܢ ܥܡܟܘܢ ܢܫ̈ܐ ܐܚܪ̈ܢܝܬ ܓܢܣܐ ܠܡܘܣܦܘ ܚܛܗ̈ܐ ܕܐܝܣܪܝܠ
8 ܐܦܢ ܗܫܐ ܗܒܘ ܬܘܕܝܬܐ ܘܬܫܒܘܚܬܐ ܠܡܪܝܐ ܐܠܗܐ ܕܐܒ̈ܗܐ ܕܝܠܢ
9 ܘܥܒܕܘ ܨܒܝܢܐ ܕܝܠܗ ܘܐܬܦܪܫܘ ܡܢ ܥܡ̈ܡܐ ܕܐܪܥܐ ܘܡܢ ܢܫ̈ܐ ܗܠܝܢ ܐܚܪ̈ܢܝܬ ܓܢܣܐ
10 ܘܐܙܥܩܘ ܗܘܘ ܣܘܓܐܐ ܘܐܡ̣ܪܘ ܒܩܠܐ ܪܡܐ ܗܟܢܐ ܐܝܟ ܕܐܡ̣ܪܬ ܢܥ̣ܒܕ
11 ܐܠܐ ܗ̣ܘ ܣܘܓܐܐ ܣ̇ܓܝ ܘܫ̇ܥܬܐ ܣܬܘܝܬܐ ܗܝ ܘܠܐ ܡܨ̣ܝܢܢ ܠܡܩܡ ܬܚܝܬ ܐܬܝܪ ܘܥ̇ܒܕܐ ܠܐ ܐܝܬܘܗܝ ܠܢ ܝܘܡܐ ܚܕ ܘܠܐ ܬܪ̈ܝܢ ܣܘܓܐܐ ܓܝܪ ܚܛܝܢܢ ܒܗܠܝܢ
12 ܢܩܘܡܘܢ ܗܟܝܠ ܪ̈ܝܫܢܐ ܩܕܡܝ̈ܐ ܕܣܘܓܐܐ ܘܟܠܗܘܢ ܗ̇ܢܘܢ ܕܡܢ ܒܝܬ ܡܥܡܪܐ ܕܝܠܢ ܗܢܘܢ ܕܐܝܬ ܠܗܘܢ ܢܫ̈ܐ ܐܚܪ̈ܢܝܬ ܓܢܣܐ ܢܐܬܘܢ ܟܕ ܢܣܒܝܢ ܙܒ̣̇ܢܐ
13 ܘܡܢ ܟܠ ܕܘܟܬܐ ܩܫܝ̈ܫܐ ܘܕܝ̈ܢܐ ܥܕܡܐ ܕܢܫ̣ܪܐ ܠܪܘܓܙܐ ܕܡܪܝܐ ܕܣܘܥܪܢܐ ܗܢܐ
14 ܝܘܢܬܢ ܕܝܢ ܗ̇ܘ ܕܚܙܐܝܠ ܘܚܙܝܐ ܗ̇ܘ ܕܬܘܩܢܐ ܩ̇ܒ̣ܠܘ ܕܐܝܟ ܗܠܝܢ ܘܡܘܫܐ ܘܝܢܐܒ ܘܠܘܝ ܘܫܒܛܝܐ ܐܡܨܥܘ ܒܝܢܬܗܘܢ
15 ܘܥܒ̣ܕܘ ܐܝܟ ܟܠܗܝܢ ܗܠܝܢ ܗܢܘܢ ܕܡܢ ܫܒܝ̣ܬܐ
16 ܘܓܒ̣ܐ ܠܗ ܥܙܪܐ ܗ̇ܘ ܟܗܢܐ ܓܒܪ̈ܐ ܪ̈ܝܫܢܐ ܕܫܪ̈ܒܬܐ ܕܝܠܗܘܢ ܟܠܗܘܢ ܒܫܡܐ ܘܝܬܒ̣ܘ ܐ̇ܟܚܕܐ ܒܢܘܡܢܝܐ ܕܝܪܚܐ ܕܥܣܪܐ ܠܡܩܡܘ ܣܘܥܪܢܐ
17 ܘܐܬ̣ܝ̈ ܠܐ̈ܦܝ ܫܘ̈ܠܡܐ ܗܠܝܢ ܕܝܠܗܘܢ ܓܒܪ̈ܐ ܗ̇ܢܘܢ ܕܐܚܝܕܝܢ ܗܘܘ ܢܫ̈ܐ ܐܚܪ̈ܢܝܬ ܓܢܣܐ ܥܕܡܐ ܠܢܘܡܢܝܐ ܕܝܪܚܐ ܩܕܡܝܐ
18 ܘܐܫܬܟܚܘ ܡܢ ܟܗ̈ܢܐ ܗ̇ܢܘܢ ܕܐܬܟܢܫܘ ܕܢܫ̈ܐ ܐܚܪ̈ܢܝܬ ܓܢܣܐ ܐܝܬ ܠܗܘܢ
19 ܡܢ ܒ̈ܢܝܐ ܕܝܫܘܥ ܗܘ ܕܝܘܙܕܩ ܘܡܢ ܐܚ̈ܐ ܕܝܠܗ ܡܬܝܐ ܘܐܠܝܥܙܪ ܘܝܘܪܝܒܐ ܘܝܘܢܕܒ
20 ܘܐܪܡܝܘ ܐܝܕܐ ܠܡ̇ܦܩܘ ܠܢܫ̈ܐ ܕܝܠܗܘܢ ܘܠܚܘܣܝܐ ܕܟܪ̈ܐ ܚܠܦ ܠܐ ܝܕܥܬܐ ܕܝܠܗܘܢ
21 ܘܡܢ ܒ̈ܢܝܐ ܕܐܡܪܝܐ ܚܢܢܝܐ ܘܙܒܕܝܐ ܘܡܐܢܝ ܘܫܡܥܝܐ ܘܡܢ ܒ̈ܢܝܐ ܕܐܘܡܢ ܡܥܣܝܐ ܘܡܥܢܐ ܘܫܡܥܝܐ ܘܢܪܝܐܝܠ ܘܥܙܪܝܐ
22 ܡܢ ܒ̈ܢܝܐ ܕܦܫܚܘܪ ܐܠܚܢܢ ܘܡܥܣܝܐ ܐܝܫܡܥܠ ܘܢܬܢܐܝܠ ܘܩܝܢܝܪܘܣ ܘܫܥܐܬܐ
23 ܘܡܢ ܠܘ̈ܝܐ ܘܙ̣ܒܕܐ ܘܫܡܥܝ ܘܩܘܠܝܐ ܗܢܐ ܐܝܬܘܗܝ ܩܠܝܐܛܝܘܣ ܘܦܬܘܫ ܘܝܗܘܕܐ ܘܝܘܢܢ
24 ܘܡܢ ܡܙܡܪ̈ܢܐ ܟܗ̈ܢܝܐ ܐܠܝܣܒ ܒܟܘܪܐ
25 ܘܡܢ ܒ̈ܢܬܐ ܕܫܘܠܡ ܘܛܘܒܠܢ
26 ܡܢ ܐܝܣܪܝܠ ܀ ܡܢ ܒ̈ܢܝܐ ܕܦܪܘܨ ܐܝܪܝܡܝܐ ܝܕܥܝܐ ܘܡܠܟܝ ܘܡܝܚܐܝܠ ܐܠܝܥܙܪ ܘܚܫܒܠܝܐ ܘܒܢܝܐ ܀
27 ܡܢ ܒ̈ܢܝܐ ܕܐܘܠܥ ܘܕܡܬܢܝܐ ܘܕܙܟܪܝܐ ܥܙܘܪܐܝܠ ܘܝܐܘܥܕܝܐ ܘܝܪܝܡܘܬ ܘܝܕܥܝܐ
28 ܘܡܢ ܒ̈ܢܝܐ ܕܬܬܘܡ ܐܠܝܕܥ ܐܠܝܫܡܥ ܥܘܬܢܝܐ ܛܪܝܡܘܣ ܘܫܟܬܝܐ ܘܙܪܕܝܐ
29 ܘܡܢ ܒ̈ܢܝܐ ܕܒܝܒܠ ܝܘܚܢܢ ܘܚܢܢܝܐ ܘܙܟܪܝܐ ܘܚܡܬܝܐ
30 ܘܡܢ ܒܢܝܡܢ ܘܠܡ ܡܠܘܟܘܣ ܝܕܥܝܐ ܝܫܘܒ ܘܐܓܝܠܘܫ ܘܝܪܝܡܘܬ
31 ܘܡܢ ܒ̈ܢܝܐ ܕܥܕܝ ܢܚܬܘܫ ܒܣܐܘܣ ܐܝܣܡܘ ܘܣܝܣܐܝܠ ܘܒܥܢܐ ܘܡܢܫܐ
32 ܘܡܢ ܒ̈ܢܝܐ ܕܚܢܢ ܐܠܝܘܢܐ ܘܐܘܫܝܐ ܘܡܠܟܝ ܘܫܒܐܐ ܘܣܝܡܘܢܝܟܘܢܘܣ ܚܡܝܐ
33 ܘܡܢ ܒ̈ܢܝܐ ܕܢܚܫܘܡ ܡܛܬܢܝܐ ܘܡܛܬܢܐ ܘܒܢܝܐ ܘܐܠܝܦܠܛ ܘܡܢܫܐ ܘܫܘܡܥܝ
34 ܘܡܢ ܒ̈ܢܝܐ ܕܒܥܢܝ ܐܝܪܝܡܝܐ ܘܡܘܥܕܫ ܐܝܫܡܥܐܝܠ ܒܪܗ ܕܐܠܡܕܐ ܘܦܝܫܝܐ ܘܚܙܘ ܘܐܒܝܨܗܝܘܢ ܘܐܠܝܬܫܘܥ ܘܐܡܛܝܠܝܡܘܣ ܐܠܝܫܝܫ ܒܥܢܘܣ ܐܠܝܫܡܝܫ ܫܠܡܝܐ ܢܬܢܝܐ ܀ ܘܡܢ ܒܢܝ̈ܐ ܕܙܪܚ ܫܝܫܝ ܐܨܒܪܝܐ ܚܙܐܝܠ ܫܡܘܛ ܙܡܪܝ ܝܘܣܦ ܀
35 ܡܢ ܒ̈ܢܝܐ ܕܢܘܥܡܐ ܡܪܛܝܐ ܙܒܕܝܐ ܚܕܝܐ ܝܘܐܬܪ ܒܢܝܐ
36 ܟܠܗܘܢ ܗܠܝܢ ܐܥܡ̣ܪܘ ܥܡܗܘܢ ܢ̈ܫܐ ܐܚܪ̈ܢܝܬ ܓܢܣܐ ܘܫ̇ܡ̣ܗܘ ܐܢܝ̈ܢ ܥܡ ܒܢܝܗ̈ܝܢ
37 ܘܥܡ̣ܪܘ ܟܗ̈ܢܐ ܘܠܘ̈ܝܐ ܗ̇ܢܘܢ ܕܡܢ ܐܝܣܪܝܠ ܒܐܘܪܝܫܠܡ ܒܢܘܡܝܢܝܐ ܕܝܪܚܐ ܫܒܝܥܝܐ ܘܒ̈ܢܝܐ ܕܐܝܣܪܝܠ ܒܒܝܬ ܡܥܡܪܐ ܕܝܠܗܘܢ
38 ܘܐܬܟܢܫܘ ܟܠܗ ܣܘܓܐܐ ܐܟܚܕܐ ܥܠ ܐܪܘܚܬܐ ܗ̇ܝ ܕܠܘܬ ܡܕܢܚܐ ܕܣܦܐ ܟܗܢܝܐ
39 ܘܐܡ̣ܪܘ ܠܥܙܪܐ ܪܝܫ ܟ̈ܗܢܐ ܘܩ̇ܪܘܝܐ ܐܝܬܐ ܢܡܘܣܐ ܕܡܘܫܐ܇ ܗ̇ܘ ܕܐܬܝܗܒ ܡܢ ܡܪܝܐ ܐܠܗܐ ܕܐܝܣܪܝܠ ܀
40 ܘܐܝܬܝ ܥܙܪܐ ܪܝܫ ܟ̈ܗܢܐ ܠܢܡܘܣܐ ܠܟܠܗ ܣܘܓܐܐ ܕܝܠܗܘܢ ܡܢ ܒܪܢܫܐ ܥܕܡܐ ܠܐܢܬܬܐ ܘܠܟܠܗܘܢ ܟܗ̈ܢܐ ܠܡܫܡܥ ܠܢܡܘܣܐ ܒܢܘܡܝܢܝܐ ܕܝܪܚܐ ܫܒܝܥܝܐ
41 ܘܩ̣ܪܐ ܗܘܐ ܒܐܪܘܚܬܐ ܘܩܕܡ ܬܪܥܐ ܟܗܢܝܐ ܡܢ ܨ̇ܦܪܐ ܥܕܡܐ ܠܛܗܪܐ ܩܕܡ ܓܒܪ̈ܐ ܘܢܫ̈ܐ ܘܝܗ̣ܒܘ ܟܠܗ ܣܘܓܐܐ ܠܗܘܢܗܘܢ ܒܢܡܘܣܐ
42 ܘܩ̣ܡ ܥܙܪܐ ܗ̇ܘ ܟܗܢܐ ܘܩܪܘܝܐ ܕܢܡܘܣܐ ܥܠ ܒܐܝܡܐ ܕܩܝܣܐ ܗ̇ܝ ܕܐܬ̣ܥܬܕܬ̇
43 ܘܩܡܘ ܥܡܗ ܡܬܝܐ ܫܡܘܥ ܚܢܢܝܐ ܥܙܪܝܐ ܐܘܪܝܐ ܚܙܩܝܐ ܒܥܠܫܡܘܫ ܡܢ ܝܡܝܢܐ
44 ܘܡܢ ܣܡܠܐ ܦܥܠܕܢܐ ܡܝܫܐܝܠ ܡܠܟܝܐ ܕܘܬܐ ܬܣܘܒ ܢܒܪܐܠܫ ܙܟܪܝܐ
45 ܘܟܕ ܢܣ̣ܒ ܥܙܪܐ ܠܟܬܒܐ ܕܢܡܘܣܐ ܩܕܡܘܗܝ ܕܣܘܓܐܐ ܝܬܝ̣ܒ ܗܘܐ ܓܝܪ ܒܪܝܫܐ ܡܫܒܚܐܝܬ ܩܕܡ ܟܠܗܘܢ
46 ܘܟܕ ܫܪܐ ܗܘܐ ܠܗ ܠܢܡܘܣܐ̣ ܟܠܗܘܢ ܬܪ̈ܝܨܐ ܩܡܘ ܀ ܘܒ̣̇ܪܟ ܥܙܪܐ ܠܡܪܝܐ ܡܪܝܡܐ ܐܚܝܕ ܟܠ
47 ܘܐܙܥܩܘ ܟܠܗ ܥܡܐ ܐܡܝܢ ܐܡܝܢ ܘܟܕ ܐܪܝܡܘ ܠܥܠ ܐܝܕܝ̈ܐ ܢܦ̣ܠܘ ܥܠ ܐܪܥܐ ܣܓܕܘ ܠܡܪܝܐ
48 ܝܫܘܥ ܘܒܢܝܐ ܘܫܪܒܝܐ ܘܢܪܥܢܝܐ ܥܘܩܒܝܐ ܫܒܛܝܐ ܚܘܕܝܐ ܡܥܢܐ ܘܩܠܝܛܐ ܥܙܪܝܐ ܓܘܙܒܕ ܚܢܢܝܐ ܦܐܬܘܫ ܠܘ̈ܝܐ ܡܠܦܝܢ ܗܘܘ ܢܡܘܣܐ ܕܡܪܝܐ ܘܠܘܬܗ ܕܣܘܓܐܐ ܩܪܝܢ ܗܘܘ ܠܢܡܘܣܗ ܕܡܪܝܐ ܟܕ ܡܬܢܦܚܝܢ ܗܘܘ ܐܟܚܕܐ ܘܠܩܪܝܢܐ
49 ܘܐܡ̣ܪ ܐܦܪܐܛܝܣ ܠܥܙܪܐ ܗ̇ܘ ܪܝܫ ܟ̈ܗܢܐ ܘܩܪܘܝܐ ܘܠܠܘ̈ܝܐ ܗ̇ܢܘܢ ܕܡܠܦܝܢ ܗܘܘ ܠܣܘܓܐܐ ܥܠ ܟܠ
50 ܝܘܡܐ ܗܢܐ ܩܕܝܫܐ ܐܝܬܘܗܝ ܠܡܪܝܐ ܘܟܠܗܘܢ ܒ̇ܟܝܢ ܗܘܘ ܟܕ ܫܡ̣ܥܘ ܠܢܡܘܣܐ
51 ܗܠܟܘ ܐܟܘܠܘ ܫܘ̈ܡܢܐ ܘܐܫܬܘ ܚ̈ܠܝܐ ܘܫ̇ܕܪܘ ܫܘܕܪ̈ܐ ܠܗ̇ܢܘܢ ܕܠܐ ܐܝܬ ܠܗܘܢ
52 ܩܕܝܫܐ ܗܘ ܓܝܪ ܝܘܡܐ ܠܡܪܝܐ ܘܠܐ ܬܬܥܝܩܘܢ ܡܪܝܐ ܓܝܪ ܡܫܒܚ ܠܟܘܢ
53 ܘܠܘ̈ܝܐ ܦܩܕܝܢ ܗܘܘ ܠܟܠܗ ܟܢܫܐ ܟܕ ܐܡ̇ܪܝܢ ܝܘܡܐ ܗܢܐ ܩܕܝܫܐ ܗܘ ܠܐ ܬܬܥܝܩܘܢ
54 ܘܐ̇ܙܠܝܢ ܗܘܘ ܟܠܗܘܢ ܠܡܐܟܠ ܘܠܡܫܬܐ̣ ܘܠܡܬܒܣܡܘ ܘܠܡܬܠ ܫܘܕܪ̈ܐ ܠܗ̇ܢܘܢ ܕܠܐ ܐܝܬ ܠܗܘܢ ܘܠܡܚܕܐ ܪܘܪܒܐܝܬ
55 ܡܛܠ ܓܝܪ ܕܐܬܢܦܚܘ ܗܘܘ ܒܡ̈ܠܐ ܗܠܝܢ ܕܝܠܦܘ ܗܘܘ̣ ܘܐܬܟܢ̣ܫܘ ܫܠ̣ܡ ܘܗܢܐ ܟܬܒܐ ܕܐܝܬܘܗܝ ܗ̇ܘ ܩܕܡܝܐ ܕܥܙܪܐ ܕܡܛܠ ܕܠܐ ܐܫܬܟܚ ܠܢ ܒܨܚܚܐ ܦܫܝܛܐ̣ ܟܬܒܢܝܗܝ ܐܝܟ ܫܒܥܝܢܝܐ