Read 1 Esdras 1 side by side with translations · The Final Bible
1 ܘܥܒܕ ܝܘܫܝܐ ܠܦܨܚܐ ܒܐܘܪܝܫܠܡ ܠܡܪܝܐ ܕܝܠܗ ܘܕܒܚ ܠܦܨܚܐ ܐܪܒܥܣܪ̈ܐ ܕܝܪܚܐ ܩܕܡܝܐ
2 ܟܕ ܐܩܝܡ ܠܟܗ̈ܢܐ ܥܠ ܦܘܠܚܢ ܝܘ̈ܡܬܗܘܢ ܟܕ ܡܥܛܦܝܢ ܒܐܣ̈ܛܠܐ ܒܒܝܬܗ ܕܡܪܝܐ
3 ܘܐܡܪܘ ܠܠܘ̈ܝܐ ܟܗ̈ܢܐ ܓ̈ܒܪܐ ܕܐܝܣܪܝܠ ܩܕܫܘ ܐܢܬܘܢ ܠܟܘܢ ܠܡܪܝܐ ܒܣܝܡܐ ܕܩܐܒܘܬܐ ܩܕܝܫܬܐ ܕܡܪܝܐ ܘܣܡܘ ܠܩܐܒܘܬܐ ܩܕܝܫܬܐ ܒܒܝܬܐ ܗܘ ܕܒܢܐ ܫܘܠܘܡܘܢ ܡܠܟܐ ܒܪܗ ܕܕܘܝܕ ܀
4 ܘܐܡܪ ܝܘܫܝܐ ܠܐ ܐܝܬ ܠܟܘܢ ܠܡܫܩܠܗ ܥܠ ܟܬܦ̈ܬܐ ܘܗܫܐ ܗܟܝܠ ܦܠܘܚܘ ܠܡܪܝܐ ܐܠܗܐ ܕܝܠܟܘܢ ܘܐܢܝܚܘ ܠܥܡܐ ܕܝܠܗ ܕܐܝܣܪܝܠ ܘܛܝܒܘ ܠܒܝܬܐ ܐܝܟ ܫܪ̈ܒܬܐ ܕܝܠܟܘܢ ܐܝܟ ܦܘܠܚܢ ܝܘ̈ܡܬܐ ܕܝܠܟܘܢ ܐܝܟ ܟܬܒܐ ܕܕܘܝܕ ܡܠܟܐ ܕܐܝܣܪܝܠ ܘܒܝܕ ܐܝܕܐ ܕܫܘܠܘܡܘܢ ܡܠܟܐ ܒܪܐ ܕܝܠܗ
5 ܘܩܘܡܘ ܒܝܬ ܩܘܕܫܐ ܐܝܟ ܦܘܠܓܐ ܕܒ̈ܬܐ ܕܫܪ̈ܒܬܐ ܕܝܠܟܘܢ ܕܠܘ̈ܝܐ ܗܢܘܢ ܕܡܢ ܩܕܝܡ ܕܐܚ̈ܐ ܕܝܠܟܘܢ ܒܢܝ̈ܐ ܕܐܝܣܪܝܠ ܘܡܢܬܐ ܕܒܝܬܐ ܕܫܪܒܬܐ ܕܠܘ̈ܝܐ ܒܛܟܣܐ
6 ܘܬܕܒܚܘܢ ܦܨܚܐ ܐܝܟ ܕܒ̈ܚܐ ܛܝܒܘ ܠܐܚ̈ܐ ܕܝܠܟܘܢ ܘܥܒܕܘ ܦܨܚܐ ܐܝܟ ܦܘܩܕܢܐ ܕܡܪܝܐ ܗܘ ܕܐܬܝܗܒ ܠܡܘܫܐ
7 ܘܪܫܝ ܝܘܫܝܐ ܠܥܡܐ ܗܘ ܕܐܫܬܟܚ ܥܪ̈ܒܐ ܘܐܡܪ̈ܐ ܘܡܢ ܒܢܝ̈ܐ ܕܥ̈ܙܐ ܠܦܨܚܐ̣ ܬܠܬܝܢ ܐܠܦ̈ܝܐ ܬܘܪ̈ܐ ܬܠܬܐ ܐܠܦ̈ܝܐ ܘܐܬܝܗܒܘ ܡܪ̈ܗܛܐ ܗܠܝܢ ܡܢ ܕܡܠܟܐ ܘܪܝܫܢܐ ܕܝܠܗ ܪܫܝܘ ܠܥܡܐ̣ ܘܠܟܗ̈ܢܐ ܘܠܠܘ̈ܝܐ ܀
8 ܝܗܒܘ ܚܠܩܝܐ ܘܙܟܪܝܐ ܘܚܙܐܝܠ ܪ̈ܝܫܢܐ ܕܒܝܬܐ ܕܐܠܗܐ ܠܟ̈ܗܢܐ ܘܝܗܒܘ ܠܦܨܚܐ ܥܪ̈ܒܐ ܘܐܡܪ̈ܐ ܘܓ̈ܕܝܐ ܬܪ̈ܝܢ ܐܠܦ̈ܝܐ ܘܫܬܡܐܐ ܘܬܘܪ̈ܐ ܬܠܬܡܐܐ
9 ܘܒܢܝܐ ܘܫܡܥܝܐ ܘܢܬܢܝܐܝܠ ܐܚܘܗܝ ܘܚܫܟܝܐ ܘܐܚܝܐܝܠ ܘܝܘܙܒܪ ܪ̈ܝܫܢܐ ܕܠܘ̈ܝܐ ܪܫܝܘ ܠܠܘ̈ܝܐ ܠܦܨܚܐ ܥܪ̈ܒܐ ܐܠܦܐ ܬܘܪ̈ܐ ܫܒܥܡܐܐ
10 ܘܟܕ ܗܠܝܢ ܗܘܝ ܫܦܝܪ̣ ܦܐܝܬ ܩܡܘ ܟܗ̈ܢܐ ܘܠܘ̈ܝܐ̣ ܟܕ ܐܝܬ ܠܗܘܢ ܦܛܝܪ̈ܐ ܐܝܟ ܫܪ̈ܒܬܐ ܘܐܝܟ ܪܝܫܢܘܬ ܡܢܘ̈ܬܐ ܕܐܒܗ̈ܬܐ ܩܕܡ ܥܡܐ ܠܡܩܪܒܘ ܠܡܪܝܐ ܐܝܟ ܗܠܝܢ ܕܟܬܝܒ̈ܢ ܒܟܬܒܐ ܕܡܘܫܐ ܘܗܟܢܐ ܒܨܦܪܐ ܀
11 ܘܛܘܝܘܗܝ ܠܦܨܚܐ ܒܢܘܪܐ ܐܝܟ ܕܙܕܩ ܗܘܐ ܘܠܕܒ̈ܚܐ ܒܫܠܘ ܒܩܪ̈ܕܠܐ ܘܒܩ̈ܕܣܐ ܥܡ ܒܣܝܡܘܬ ܪܝܚܐ ܘܐܘܒܠܘ ܠܟܠܗܘܢ ܒܢܝ̈ܐ ܕܥܡܐ
12 ܒܬܪ ܕܝܢ ܗܠܝܢ ܛܝܒܘ ܘܗܢܘܢ ܠܗܘܢ ܘܠܟܗ̈ܢܐ ܐܚ̈ܐ ܕܝܠܗܘܢ ܒܢܝ̈ܐ ܕܐܗܪܘܢ
13 ܟܗ̈ܢܐ ܓܝܪ ܡܣܩܝܢ ܗܘܘ ܠܬܪܒܐ ܥܕܡܐ ܠܠܠܝܐ ܘܠܘ̈ܝܐ ܛܝܒܘ ܗܢܘܢ ܠܗܘܢ ܘܠܟ̈ܗܢܐ ܐܚ̈ܐ ܕܝܠܗܘܢ ܒܢܝ̈ܐ ܕܐܗܪܘܢ
14 ܘܡܙܡܪ̈ܢܐ ܟܗ̈ܢܐ ܒܢܝ̈ ܐܣܦ ܐܝܬܝܗܘܢ ܗܘܘ ܥܠ ܛܟܣܐ ܕܝܠܗܘܢ ܐܝܟ ܗܠܝܢ ܕܡܢ ܕܘܝܕ ܡܛܟܣܝܢ ܘܐܣܦ ܘܙܟܪܝܐ ܘܐܝܕܝܢܘܣ ܗܢܘܢ ܕܡܢ ܒܝܬ ܡܠܟܐ
15 ܘܬܪ̈ܥܐ ܥܠ ܟܠܚܕ ܡܢ ܒܝܬ ܬܪ̈ܥܐ ܠܐ ܐܝܬ ܗܘܐ ܕܢܥܒܪ ܟܠܚܕ ܡܢ ܦܘܠܚܢ ܝܘ̈ܡܬܐ ܕܝܠܗ ܗܢܘܢ ܓܝܪ ܐܚ̈ܐ ܕܝܠܗܘܢ ܠܘ̈ܝܐ ܛܝܒܘ ܠܗܘܢ
16 ܘܐܫܬܡܠܝܝܢ ܗܠܝܢ ܕܕܒܚܬܗ ܕܡܪܝܐ ܒܗܘ ܝܘܡܐ ܠܡܗܘܐ ܦܨܚܐ ܘܠܡܬܩܪܒܘ ܕܒ̈ܚܐ ܩܕܡ ܡܕܒܚܗ ܕܡܪܝܐ ܐܝܟ ܐܦܝܛܓܐ ܕܡܠܟܐ ܝܘܫܝܐ
17 ܘܥܒܕܘ ܒ̈ܢܝܐ ܕܐܝܣܪܝܠ ܗܢܘܢ ܕܐܫܬܟܚܘ ܒܙܒܢܐ ܗܢܐ ܠܦܨܚܐ ܘܠܥܐܕܐ ܕܦܛܝܪ̈ܐ ܝܘ̈ܡܬܐ ܫܒܥܐ
18 ܘܠܐ ܗܘܐ ܦܨܚܐ ܕܐܝܟ ܗܢܐ ܒܐܝܣܪܝܠ ܡܢ ܝܘ̈ܡܬܐ ܕܙܒܢܐ ܕܫܡܘܐܝܠ ܢܒܝܐ
19 ܘܟܠܗܘܢ ܡ̈ܠܟܐ ܕܐܝܣܪܝܠ ܠܐ ܥܒܕܘ ܦܨܚܐ ܕܐܝܟ ܗܢܐ ܕܥܒܕ ܝܘܫܝܐ ܘܟܗ̈ܢܐ ܘܠܘ̈ܝܐ ܘܝܘ̈ܕܝܐ ܘܟܠܗ ܐܝܣܪܝܠ ܗܘ ܕܐܫܬܟܚ ܒܝܬ ܡܠܟܘܬܐ ܕܝܠܗܘܢ ܒܐܘܪܝܫܠܡ
20 ܒܫܢܬܐ ܕܬܡܢܥܣܪ̈ܐ ܟܕ ܡܡܠܟ ܗܘܐ ܝܘܫܝܐ ܗܘܐ ܦܨܚܐ ܗܢܐ
21 ܘܐܬܬܪܨܘ ܥܒ̈ܕܐ ܕܝܘܫܝܐ ܩܕܡ ܡܪܝܐ ܕܝܠܗ ܒܠܒܐ ܡܠܝܐ ܕܫܦܝܪܘܬ ܕܚܠܬܐ
22 ܘܗܠܝܢ ܕܥܠܘܗܝ ܕܝܢ ܟܬܝܒ̈ܢ ܒܙܒ̈ܢܐ ܕܡܢ ܩܕܝܡ ܡܛܠ ܗܢܘܢ ܕܚܛܘ ܘܐܪܫܥܘ ܒܡܪܝܐ ܘܝܬܝܪ ܡܢ ܟܠ ܥܡܐ ܘܡܠܟܘܬܐ ܘܗܠܝܢ ܕܐܥܝܩܘܗܝ ܒܡܪܓܫܢܘܬܐ ܘܡ̈ܠܐ ܕܡܪܝܐ ܩܡܝܢ ܥܠ ܐܝܣܪܝܠ
23 ܘܒܬܪ ܟܠܗ ܥܒܝܕܬܐ ܗܕܐ ܕܝܘܫܝܐ ܓܕܫܬ ܠܦܪܥܘܢ ܡܠܟܐ ܕܡܨܪܝܢ ܕܟܕ ܐܬܐ ܩܪܒܐ ܢܩܝܡ ܒܟܪܟܡܘܫ ܥܠ ܦܪܬ ܘܢܦܩ ܠܐܘܪܥܐ ܕܝܠܗ ܝܘܫܝܐ
24 ܘܫܕܪ ܡܠܟܐ ܕܡܨܪܝܢ ܠܘܬܗ ܟܕ ܐܡܪ ܡܢܐ ܠܝ ܘܠܟ ܡܠܟܐ ܕܝܗܘܕ
25 ܠܘ ܠܘܬܟ ܡܫܕܪ ܐܢܐ ܡܢ ܡܪܝܐ ܐܠܗܐ ܥܠ ܓܝܪ ܦܪܬ ܩܪܒܐ ܠܝ ܐܝܬܘܗܝ ܘܗܫܐ ܡܪܝܐ ܥܡܝ ܐܝܬܘܗܝ ܐܪܚܩ ܘܠܐ ܬܗܘܐ ܣܩܘܒܠܐ ܠܡܪܝܐ
26 ܘܠܐ ܐܗܦܟ ܗܘ ܠܗ ܝܘܫܝܐ ܥܠ ܡܪܟܒܬܐ ܕܝܠܗ ܐܠܐ ܠܡܩܪܒܘ ܠܩܘܒܠܗ ܒ̇ܥܐ ܗܘܐ ܟܕ ܠܐ ܢܛܪ ܗܘܐ ܒܡ̈ܠܐ ܕܐܪܡܝܐ ܢܒܝܐ ܕܡܢ ܦܘܡܗ ܕܡܪܝܐ
27 ܐܠܐ ܐܩܝܡ ܠܘܬܗ ܩܪܒܐ ܒܦܩܥܬܐ ܕܡܓܕܘ ܘܢܚܬܘ ܪ̈ܝܫܢܐ ܠܘܬ ܡܠܟܐ ܝܘܫܝܐ
28 ܘܐܡܪ ܡܠܟܐ ܠܥܒ̈ܕܐ ܕܝܠܗ ܐܪܚܩܘܢܢܝ ܡܢ ܬܟܬܘܫܐ ܐܬܡܚܠܬ ܓܝܪ ܣܓܝ ܘܡܚܕܐ ܐܪܚܩܘܗܝ ܥܒ̈ܕܐ ܕܝܠܗ ܡܢ ܣܕܝܪܘܬ ܩܪܒܐ
29 ܘܣܠܩ ܥܠ ܡܪܟܒܬܐ ܬܪܝܢܝܬܐ ܕܝܠܗ ܘܟܕ ܐܬܬ̇ܦܢܝ ܠܐܘܪܝܫܠܡ̣ ܚܠܦ ܠܚܝ̈ܐ ܕܝܠܗ ܘܐܬܩܒܪ ܒܩܒܪܐ ܐܒܗܝܐ
30 ܘܒܟܠܗ ܝܗܘܕ ܐܬܐܒܠ ܠܝܘܫܝܐ ܘܐܠܐ ܐܪܡܝܐ ܢܒܝܐ ܚܠܦ ܝܘܫܝܐ ܘܐܝܠܝܢ ܕܩܕܡܝܢ ܝܬܒܝܢ ܥܡ ܢܫ̈ܝܗܘܢ ܐܠܝܢ ܗܘܘ ܠܗ ܥܕܡܐ ܠܝܘܡܐ ܗܢܐ ܘܐܬܝܗܒܬ ܗܕܐ ܠܡܗܘܐ ܐܡܝܢܐܝܬ ܒܟܠܗ ܓܢܣܐ ܕܐܝܣܪܝܠ
31 ܗܠܝܢ ܕܝܢ ܟܬܝܒ̈ܢ ܒܟܬܒܐ ܕܬܫ̈ܥܝܬܐ ܕܡ̈ܠܟܐ ܕܝܗܘܕ ܘܟܠ ܚܕܐ ܚܕܐ ܕܐܣܬܥܪܬ ܕܥܒܝܕܬܐ ܕܝܘܫܝܐ ܘܕܬܫܒܘܚܬܐ ܕܝܠܗ ܘܕܣܟܘܠܬܢܘܬܐ ܕܒܢܡܘܣܗ ܕܡܪܝܐ ܘܗܠܝܢ ܕܩܕܡ̈ܝ ܐܣܬܥܪ̈ܝܢ ܡܢܗ ܘܗܠܝܢ ܕܗܫܐ ܪ̈ܫܝܡܢ ܒܟܬܒܐ ܕܡ̈ܠܟܐ ܕܝܣܪܝܠ ܘܕܝܗܘܕܐ
32 ܘܟܕ ܢܣܒܘ ܗܢܘܢ ܕܡܢ ܥܡܐ ܠܝܗܘܐܚܙ ܒܪܗ ܕܝܘܫܝܐ ܚܘܝܘܗܝ ܡܠܟܐ ܚܠܦ ܝܘܫܝܐ ܐܒܐ ܕܝܠܗ ܟܕ ܐܝܬܘܗܝ ܗܘܐ ܒܪ ܫܢܝ̈ܐ ܥܣܪ̈ܝܢ ܘܬܠܬ
33 ܘܐܡܠܟ ܒܐܝܣܪܝܠ ܘܒܐܘܪܝܫܠܡ ܝܪ̈ܚܐ ܬܠܬܐ ܘܐܗܦܟܗ ܡܠܟܐ ܕܡܨܪܝܢ ܡܢ ܕܠܡܡܠܟܘ ܒܐܘܪܝܫܠܡ
34 ܘܚܣܪܗ ܠܥܡܐ ܟܟܪ̈ܐ ܕܣܐܡܐ ܡܐܐ ܘܕܕܗܒܐ ܟܟܪܐ ܚܕܐ
35 ܘܚܘܝ ܡܠܟܐ ܕܡܨܪܝܢ ܡܠܟܐ ܠܝܘܝܩܝܡ ܐܚܐ ܕܝܠܗ ܡܠܟܐ ܕܝܗܘܕ ܘܕܐܘܪܝܫܠܡ
36 ܘܐܣܪ ܝܘܝܩܝܡ ܠܪ̈ܘܪܒܢܐ ܠܙܗܪܝܘܢ ܕܝܢ ܐܚܐ ܕܝܠܗ ܟܕ ܐܚܝܕ ܐܣܩܗ ܡܢ ܡܨܪܝܢ
37 ܒܪ ܫܢܝ̈ܐ ܕܝܢ ܐܝܬܘܗܝ ܗܘܐ ܥܣܪ̈ܝܢ ܘܚܡܫ ܝܘܝܩܝܡ ܟܕ ܐܡܠܟ ܒܝܗܘܕ ܒܐܘܪܝܫܠܡ ܘܥܒܕ ܗܝ ܕܒܝܫܐ ܩܕܡ ܡܪܝܐ
38 ܒܬܪ ܟܢ ܣܠܩ ܢܒܘܟܕܢܨܪ ܡܠܟܐ ܕܒܒܝܠ ܘܐܣܪܗ ܒܐܣܘܪܐ ܕܢܚܫܐ ܘܐܘܒܠܗ ܠܒܒܝܠ
39 ܘܡܢ ܡܐܢ̈ܐ ܟܗ̈ܢܝܐ ܕܡܪܝܐ ܟܕ ܢܣܒ ܢܒܘܟܕܢܨܪ ܐܘܒܠ ܣܡ ܒܗܝܟܠܐ ܕܝܠܗ ܒܒܒܝܠ
40 ܗܠܝܢ ܕܝܢ ܕܐܬܪܫܡܝܢ ܡܛܠܬܗ ܘܡܛܠ ܛܡܘܐܬܐ ܕܝܠܗ ܘܒܝܫܘܬ ܪܘܫܥܗ ܟܬܝܒ̈ܢ ܒܟܬܒܐ ܕܙܒ̈ܢܐ ܕܡ̈ܠܟܐ
41 ܘܐܡܠܟ ܚܠܦܘܗܝ ܝܘܝܩܝܡ ܒܪܐ ܕܝܠܗ ܟܕ ܓܝܪ ܐܬܚܘܝ ܐܝܬܘܗܝ ܗܘܐ ܒܪ ܫܢܝ̈ܐ ܬܡ̈ܢܐ
42 ܡܡܠܟ ܕܝܢ ܝܪ̈ܚܐ ܬܠܬܐ ܘܝܘ̈ܡܬܐ ܥܣܪ̈ܐ ܒܐܘܪܝܫܠܡ ܥܒܕ ܗܝ ܕܒܝܫ ܩܕܡ ܡܪܝܐ
43 ܘܒܬܪ ܫܢܬܐ ܫܕܪ ܢܒܘܟܕܢܨܪ ܐܥܒܪܗ ܠܒܒܝܠ ܥܡ ܡܐܢ̈ܐ ܟܗ̈ܢܝܐ ܕܡܪܝܐ
44 ܘܚܘܝܗ ܠܨܕܩܝܐ ܡܠܟܐ ܕܝܗܘܕ ܘܕܐܘܪܝܫܠܡ ܟܕ ܐܝܬܘܗܝ ܗܘܐ ܒܪ ܫܢܝ̈ܐ ܥܣܪ̈ܝܢ ܘܚܕܐ ܡ̇ܡܠܟ ܕܝܢ ܫ̈ܢܝܐ ܚܕ ܥܣܪ̈ܐ
45 ܘܥܒܕ ܗܝ ܕܒܝܫܐ ܩܕܡ ܡܪܝܐ ܘܠܐ ܐܬܟܚܕ ܡܢ ܡ̈ܠܐ ܗܠܝܢ ܕܐܬܐܡܪ̈ܝܢ ܡܢ ܐܪܡܝܐ ܗܘ ܢܒܝܐ ܡܢ ܦܘܡܗ ܕܡܪܝܐ
46 ܘܟܕ ܐܬܬܘܡܝ ܡܢ ܢܒܘܟܕܢܨܪ ܒܫܡܗ ܕܡܪܝܐ ܟܕ ܕܓܠ ܒܡ̈ܘܡܬܗ ܐܪܚܩ ܘܟܕ ܩܫܝ ܠܩܕܠܐ ܘܠܠܒܐ ܕܝܠܗ ܥܒܪ ܥܠ ܢܡܘ̈ܣܝܘܬܐ ܕܡܪܝܐ ܐܠܗܐ ܕܐܝܣܪܝܠ
47 ܘܪ̈ܝܫܢܐ ܕܝܢ ܕܥܡܐ ܘܕܟܗ̈ܢܐ ܣ̈ܓܝܐܬܐ ܐܪܫܥܘ ܘܐܥܘܠܘ ܝܬܝܪ ܡܢ ܟܠܗܝܢ ܛܢܦ̈ܘܬܐ ܕܟܠܗܘܢ ܥܡ̈ܡܐ ܘܣܝܒܘ ܠܗܝܟܠܗ ܕܡܪܝܐ ܗܘ ܕܐܬܩܕܫ ܒܐܘܪܝܫܠܡ
48 ܘܫܕܪ ܐܠܗܐ ܕܐܒ̈ܗܐ ܕܝܠܗܘܢ ܒܝܕ ܡܠܐܟܐ ܕܝܠܗ ܠܡܦܢܝܘ ܐܢܘܢ ܒܗܝ ܕܚܐܣ ܗܘܐ ܥܠܝܗܘܢ ܘܥܠ ܡܫܟܢܐ ܕܝܠܗ
49 ܘܗܢܘܢ ܕܝܢ ܡܝܩܘ ܒܡܠܐܟܐ ܕܝܠܗ ܘܒܝܘܡܐ ܗܘ ܕܡܠܠ ܡܪܝܐ ܐܝܬܝܗܘܢ ܗܘܘ ܕܡܓܚܟܝܢ ܒܢ̈ܒܝܐ ܕܝܠܗ ܥܕܡܐ ܕܟܕ ܐܬܚܡܬ ܥܠ ܥܡܐ ܕܝܠܗ ܡܛܠ ܒܝܫܘܬ ܪܘܫܥܗ ܦܩܕ ܠܡܣܩܘ ܥܠܝܗܘܢ ܠܡ̈ܠܟܐ ܕܟ̈ܠܕܝܐ
50 ܗܢܘܢ ܩܛܠܘ ܠܝܢܣ̈ܩܐ ܕܝܠܗܘܢ ܒܣܝܦܐ ܘܒܚ̈ܘܕܪܐ ܕܗܝܟܠܐ ܩܕܝܫܐ ܕܝܠܗ ܘܠܐ ܚܣ ܥܠ ܝܢܣܩܐ ܘܒܬܘܠܬܐ ܘܩܫܝܫܐ ܘܛܠܝܐ ܐܠܐ ܟܠܗܘܢ ܐܫܠܡ ܒܐܝ̈ܕܝܐ ܕܝܠܗܘܢ
51 ܘܠܟܠܗܘܢ ܡ̈ܐܢܐ ܟܗ̈ܢܝܐ ܕܡܪܝܐ ܠܪ̈ܘܪܒܐ ܘܠܙܥܘܪ̈ܐ ܘܠܩܐܒܘܬܗ ܕܡܪܝܐ ܘܠܐܦܘ̈ܕܝܩܣ ܡܠܟ̈ܝܬܐ ܟܕ ܢܣܒܘ ܘܐܘܒܠܘ ܠܒܒܝܠ
52 ܘܐܘܩܕܘ ܠܒܝܬܗ ܕܡܪܝܐ ܘܫܪܘ ܠܫܘܪ̈ܝܗ ܕܐܘܪܝܫܠܡ ܘܠܦܘܪ̈ܩܣܐ ܕܝܠܗ ܐܘܩܕܘ ܒܢܘܪܐ
53 ܘܓܡܪܘ ܠܟܠܗܝܢ ܡܫܒ̈ܚܬܐ ܕܝܠܗ ܠܡܣܪܚܘ ܘܠܗܠܝܢ ܕܫܪܟܐ ܐܘܒܠܘ ܥܡ ܣܝܦܐ ܠܒܒܝܠ
54 ܘܐܝܬܝܗܘܢ ܗܘܘ ܥܒ̈ܕܐ ܠܗ ܘܠܒ̈ܢܝܐ ܕܝܠܗ ܥܕܡܐ ܕܐܡܠܟܘ ܦܪ̈ܣܝܐ ܠܫܘܡܠܝܐ ܕܡܠܬܗ ܕܡܪܝܐ ܕܐܪܡܝܐ
55 ܥܕܡܐ ܕܬܨܛܒܐ ܐܪܥܐ ܒܫܒ̈ܐ ܕܝܠܗ ܟܠܗ ܙܒܢܐ ܕܨܕܝܘܬܐ ܕܝܠܗ ܬܫܒܬ ܠܫܘܡܠܝܐ ܕܫܢܝ̈ܐ ܫܒܥܝܢ