Read 1 Chronicles 16 side by side with translations · The Final Bible
1 ܘܐܝܬܝܘܗ̇ ܠܩܒܘܬܗ ܕܡܪܝܐ ܘܣܡܘܗ̇ ܒܕܘܟܬܗ̇ ܒܓܘ ܡܫܟܢܐ ܕܢܩܫ ܠܗ̇ ܕܘܝܕ ܘܩܪܒܘ ܥܠܘ̈ܬܐ ܘܫܠܡ̈ܐ ܩܕܡ ܩܒܘܬܗ ܕܡܪܝܐ
2 ܘܟܕ ܫܠܡ ܕܘܝܕ ܠܡܩܪܒܘ ܥܠܘ̈ܬܐ ܘܫܠܡ̈ܐ ܒܪܟ ܠܥܡܐ ܕܐܝܣܪܝܠ ܒܫܡܗ ܕܡܪܝܐ ܚܝܠܬܢܐ
3 ܘܦܠܓ ܠܟܠܗ ܥܡܐ ܠܟܠܗܘܢ ܕܒܝܬ ܐܝܣܪܝܠ ܡܢ ܓܒܪ̈ܐ ܘܥܕܡܐ ܠܢܫ̈ܐ ܘܡܢ ܓܕܘ̈ܕܐ ܘܥܕܡܐ ܠܝܢܩ̈ܝ ܬܕ̈ܝܐ ܠܟܠ ܓܒܪ ܘܓܒܪ ܓܪܝܨܬܐ ܕܠܚܡܐ ܚܕܐ ܘܡܢܬܐ ܚܕܐ ܘܣܢܪܩܐ ܚܕ ܘܐܙܠܘ ܟܠܗ ܥܡܐ ܐܢܫ ܠܒܝܬܗ
4 ܘܝܗܒ ܩܕܡ ܠܘ̈ܝܐ ܕܡܫܡܫܝܢ ܩܕܡ ܡܪܝܐ ܘܡܕܟܪܝܢ ܘܡܘܕܝܢ ܘܡܫܒܚܝܢ ܠܡܪܝܐ ܐܠܗܐ ܕܐܝܣܪܐܝܠ
5 ܐܣܦ ܪܫܗܘܢ ܬܢܝܢܐ ܙܟܪܝܐ ܘܝܘܥܐܝܠ ܘܝܘܚܐܝܠ ܘܡܬܝܬܐ ܘܐܠܝܒ ܘܒܢܝܐ ܘܐܣܦ ܘܥܡܝܢܕܒ ܘܐܣܦ ܘܢܚܙܐܝܠ ܘܐܣܦ
6 ܗܠܝܢ ܟܠܗܘܢ ܟܗ̈ܢܐ ܕܩ̇ܪܝܢ ܒܩܪ̈ܢܬܐ ܐܡܝܢܐܝܬ ܩܕܡ ܩܒܘܬܗ ܕܡܪܝܐ
7 ܗܝܕܝܢ ܦܬܚ ܦܘܡܗ ܕܘܝܕ ܒܝܘܡܐ ܗ̇ܘ ܗܘ ܘܪ̈ܝܫܝ ܟܠܗܘܢ ܟܗ̈ܢܐ ܘܠܘ̈ܝܐ ܠܡܫܒܚܘ ܠܡܪܝܐ ܥܠ ܛܝܪܐ ܕܐܣܦ ܘܕܐܚ̈ܘܗܝ ܘܗܠܝܢ ܪ̈ܫܐ ܕܬܫܒ̈ܚܬܐ ܕܐܡܪ ܕܘܝܕ ܩܕܡ ܩܒܘܬܗ ܕܡܪܝܐ ܒܝܘܡܐ ܗ̇ܘ
8 ܐܘܕܘ ܠܡܪܝܐ ܘܩܪܘ ܫܡܗ ܐܘܕܥܘ ܒܝܬ ܥܡ̈ܡܐ ܥܒ̇ܕ̈ܘܗܝ
9 ܫܒܚܘ ܠܗ ܘܐܘܕܘ ܠܗ ܐܫܬܥܘ ܟܠܗܝܢ ܓܒܪ̈ܘܬܗ
10 ܐܫܬܒܚܘ ܒܫܡܐ ܕܩܘܕܫܗ ܢܚܕܐ ܠܒܐ ܕܟܘܠ ܕܒ̇ܥܝܢ ܠܡܪܝܐ
11 ܬܒܥܘ ܠܡܪܝܐ ܘܠܥܘܫܢܗ ܨܠܘ ܩܕܡܘܗܝ ܐܡܝܢܐܝܬ
12 ܐܬܕܟܪܘ ܓܢܒܪ̈ܘܬܗ ܕܥܒܕ ܓܢܒܪ̈ܘܬܗ ܘܕܝ̣ܢܐ ܕܦܘܡܗ
13 ܙܪܥܗ ܕܐܒܪܗܡ ܥܒ̣ܕܗ ܒܢܘ̈ܗܝ ܕܝܥܩܘܒ ܓܒ̈ܝܐ ܕܓܒܐ
14 ܗܘܝܘ ܡܪܝܐ ܐܠܗܢ ܕܒܟܠܗ̇ ܐܪܥܐ ܢܡܘ̈ܣܘܗܝ
15 ܐܬܕܟܪܘ ܠܥܠܡ ܕܝܬܩܐ ܕܝܠܗ ܡܠܬܐ ܕܦܩܕ ܠܐܠܦ ܕܪ̈ܝܢ
16 ܕܝܡܐ ܠܐܒܪܗܡ ܘܕܝܬܩܐ ܝܗܒ ܠܒܢ̈ܘܗܝ ܕܐܝܣܚܩ
17 ܘܓܙܪܗ ܠܝܥܩܘܒ ܠܥܠܡ ܘܠܐܝܣܪܝܠ ܝܗܒ ܠܗܘܢ ܕܝܬܩܐ ܠܥܠܡ ܥܠܡܝܢ
18 ܘܐܡܪ ܠܗܘܢ ܕܠܟܘܢ ܝܗ̇ܒ ܐܢܐ ܠܗ̇ ܐܪܥܐ ܕܟܢܥܢ ܦܨܬܐ ܕܝܪܬܘܬܟܘܢ
19 ܟܕ ܗܘܝܬܘܢ ܐܢ̈ܫܝ ܡܢܝܢܐ ܙܥܘܪ̈ܝܢ ܘܥܡܘܪ̈ܝܢ ܒܗ̇
20 ܘܐܫܬܒܝܬܘܢ ܡܢ ܥܡܐ ܠܥܡܐ ܘܡܢ ܡܠܟܘܬܐ ܠܡܠܟܘܬܐ ܐܚܪܬܐ
21 ܠܐ ܫܒܩ ܠܫܠܝ̈ܛܢܐ ܕܢܗܪܘܢܟܘܢ ܘܪܕܐ ܡܛܠܬܟܘܢ ܡ̈ܠܟܐ
22 ܘܐܡܪ ܠܗܘܢ ܠܐ ܬܩܪܒܘܢ ܠܡܫ̈ܝܚܝ ܘܠܢ̈ܒܝܝ ܠܐ ܬܒܐܫܘܢ
23 ܫܒܚܘ ܠܡܪܝܐ ܟܘܠܗ̇ ܐܪܥܐ ܣܒܪܘ ܟܠܝܘܡ ܒܝܘܡ ܦܘܪܩܢܗ
24 ܐܫܬܥܘ ܒܝܬ ܥܡ̈ܡܐ ܐܝܩܪܗ
25 ܡܛܠ ܕܪܒ ܗܘ ܡܪܝܐ ܘܫܒܝܚ ܛܒ ܘܕܚܝܠ ܗܘ ܥܠ ܟܠܗܘܢ ܥܡ̈ܡܐ
26 ܡܛܠ ܕܟܠܗܘܢ ܦܬܟܪ̈ܐ ܕܥܡ̈ܡܐ ܨܠܡ̈ܐ ܐܢܘܢ ܘܡܪܝܐ ܫܡܝܐ ܥܒ̣ܕ
27 ܘܬܫܒܘܚܬܐ ܘܝܐܝܘܬܐ ܩܕܡܘܗܝ ܥܘܫܢܐ ܘܪܒܘܬܐ ܒܡܩܕܫܗ
28 ܐܘܕܘ ܠܡܪܝܐ ܫܪ̈ܒܬܐ ܕܥܡ̈ܡܐ ܐܘܕܘ ܩܕܡ ܡܪܝܐ ܒܐܝܩܪܗ ܘܒܥܘܫܢܗ
29 ܐܘܕܘ ܠܡܪܝܐ ܒܐܝܩܪܐ ܕܫܡܗ ܫܩܘܠܘ ܩܘܪ̈ܒܢܐ ܘܐܘܕܘ ܩܕܡܘܗܝ ܒܨܠܘܬܐ ܕܦܘܡܟܘܢ ܘܣܓܘܕܘ ܠܡܪܝܐ ܒܬܫܒ̈ܚܬܐ ܕܩܘܕܫܗ
30 ܘܬܙܘܥ ܡܢ ܩܕܡܘܗܝ ܟܠܗ̇ ܐܪܥܐ ܘܬܬܩܢ ܬܒܝܠ ܕܠܐ ܬܙܘܥ
31 ܢܚܕܘܢ ܫܡܝܐ ܘܬܫܒܚ ܐܪܥܐ ܘܢܐܡܪܘܢ ܒܝܬ ܥܡ̈ܡܐ ܕܡܪܝܐ ܐܡܠܟ
32 ܢܫܒܚ ܝܡܐ ܒܡܠܐܗ ܘܢܚ̈ܕܝܢ ܚܩ̈ܠܬܐ ܘܟܠ ܕܐܝܬ ܒܗܝܢ
33 ܗܝܕܝܢ ܢܫܒܚܘܢ ܐܝ̈ܠܢܐ ܕܥܒܐ ܡܢ ܩܕܡ ܡܪܝܐ ܕܐܬܐ ܠܡܕܢܗ̇ ܠܐܪܥܐ ܢܕܘܢ ܬܒܝܠ ܒܟܐܢܘܬܐ ܘܢܟܣ ܥܡ̈ܡܐ ܒܗܝܡܢܘܬܐ
34 ܘܐܡܪ ܐܘܕܘ ܠܡܪܝܐ ܕܛܒ ܗܘ ܘܠܥܠܡ ܛܝܒܘܬܗ
35 ܦܪܘܩܝܢܝ ܡܪܝܐ ܦܪܘܩܝܢܝ ܘܟܢܫܝܢ ܘܩܪܒܝܢ ܡܢ ܒܝܬ ܥܡ̈ܡܐ ܠܡܘܕܝܘ ܠܫܡܐ ܕܩܘܕܫܟ ܘܠܡܫܒܚܘ ܒܬܫܒ̈ܚܬܟ
36 ܒܪܝܟ ܗܘ ܡܪ̈ܐ ܡܪ̈ܘܬܐ ܕܐܝܣܪܝܠ ܡܢ ܥܠܡ̈ܐ ܘܥܕܡܐ ܠܥܠܡ̈ܐ ܘܢܐܡܪ ܟܠܗ ܥܡܐ ܐܡܝܢ ܒܦܘܡܐ ܒܣܝܡܐ ܘܕܟܝܐ ܢܫܒܚܘܢ ܠܐܠܗܗܘܢ
37 ܘܫܒܩ ܬܡܢ ܩܕܡ ܩܒܘܬܐ ܕܕܝܬܩܐ ܕܡܪܝܐ ܠܐܣܦ ܘܠܐ̈ܚܘܗܝ ܠܡܫܡܫܘ ܩܕܡ ܡܪܝܐ ܐܡܝܢܐܝܬ ܐܢܫ ܐܢܫ ܕܝܘܡܗ
38 ܘܥܘܒܪ ܐܕܘܡ ܘܐܚ̈ܘܗܝ ܫܬܝܢ ܘܬܡܢܝܐ ܘܥܘܒܪ ܐܕܘܡ ܙܥܘܪܐ ܒܪܗ ܕܝܪܬܘܡ ܘܚܣܘ ܗܠܝܢ ܟܠܗܘܢ ܢ̇ܛܪ̈ܝ ܬܪ̈ܥܐ ܒܪ̈ܝܐ
39 ܘܚܨܪܘܢ ܟܗܢܐ ܘܐܚ̈ܘܗܝ ܟܗ̈ܢܐ ܗܠܝܢ ܟܠܗܘܢ ܟܗ̈ܢܐ ܕܡܫܡܫܝܢ ܩܕܡ ܡܫܟܢܗ ܕܡܪܝܐ ܒܒܘܡܣܐ ܪܒܐ ܕܐܝܬ ܒܩܘܪܝܬ ܓܒܥܘܢ
40 ܠܡܩܪܒܘ ܥܠܘ̈ܬܐ ܠܡܪܝܐ ܥܠ ܡܕܒܚܐ ܕܥܠܬܐ ܐܡܝܢܐܝܬ ܒܨܦܪܐ ܘܒܪܡܫܐ ܘܠܡܥܒܕ ܟܠ ܡܐ ܕܟܬܝܒ ܒܢܡܘܣܐ ܕܡܪܝܐ ܕܝܗܒ ܥܠ ܐܝܕܐ ܕܡܘܫܐ ܠܡܠܦܘ ܠܒ̈ܢܝ ܐܝܣܪܝܠ
41 ܘܗܠܝܢ ܫܡ̈ܗܐ ܕܓܒܪ̈ܐ ܕܩ̇ܝܡܝܢ ܒܬܫܒ̈ܚܬܐ ܗܡܢ ܘܐܪܝܬܘܢ ܘܫܪܟܐ ܕܐܢܫܐ ܙܕܝܩ̈ܐ ܐܝܠܝܢ ܕܐܬܟܣܝܘ ܫܡܗ̈ܝܗܘܢ ܠܡܘܕܝܘ ܠܡܪܝܐ ܡܛܘܠ ܕܠܥܠܡ ܛܝܒܘܬܗ
42 ܘܗܢܘܢ ܗܠܝܢ ܐܢܫܐ ܙܕܝܩ̈ܐ ܡܫܒܚܝܢ ܗܘܘ ܠܐ ܗܘܐ ܒܡܐ̈ܢܝ ܬܫܒܚ̈ܬܐ ܘܠܐ ܒܦ̈ܠܓܐ ܘܠܐ ܒܪ̈ܒܝܥܐ ܘܠܐ ܒܩܪ̈ܢܬܐ ܟܦ̈ܝܦܬܐ ܘܐܦ ܠܐ ܒܦܫ̈ܝܛܬܐ ܘܐܦ ܠܐ ܒܨܨ̈ܠܐ ܡܫܒܚܝܢ ܗܘܘ ܐܠܐ ܒܦܘܡܐ ܒܣܝܡܐ ܘܒܨܠܘܬܐ ܕܟܝܬܐ ܘܡܫܡܠܝܬܐ ܘܒܟܐܢܘܬܐ ܘܒܬܡܝܡܘܬܐ ܠܡܪܝܐ ܐܠܗܐ ܚܝܠܬܢܐ ܡܪܗ ܕܐܝܣܪܝܠ ܡܪܐ ܕܟܠܗܘܢ ܥ̇ܒ̈ܕܐ
43 ܘܫܪܐ ܕܘܝܕ ܠܥܡܐ ܘܐܙܠܘ ܥܡܐ ܐܢܫ ܐܢܫ ܠܒܝܬܗ ܘܗܦܟ ܕܘܝܕ ܠܒܝܬܗ ܠܡܒܪܟܘ ܠܒ̈ܢܝ ܒܝܬܗ
1 Chronicles 15 · 1 Chronicles 17 · Hebrew (Masoretic) · Greek (Septuagint / SBLGNT) · Latin (Vulgate)