1 Chronicles 13 — Aramaic (Peshitta)

1 ܘܐܬܡܠܟ ܕܘܝܕ ܥܡ ܪ̈ܘܪܒܢܐ ܕܐ̈ܠܦܐ ܘܡܐ̈ܘܬܐ ܘܟܠܗܘܢ ܪ̈ܘܪܒܢܐ ܘܡܕܒܪ̈ܢܐ ܘܫ̈ܠܝܛܢܐ ܕܐܝܣܪܝܠ

2 ܘܐܡܪ ܕܘܝܕ ܠܟܠܗܝܢ ܟܢܘ̈ܫܬܐ ܕܐܝܣܪܝܠ ܐܢܗܘ ܕܫܦܝܪ ܒܥܝ̈ܢܝܟܘܢ ܢܒܥܐ ܡܢ ܡܪܝܐ ܐܠܗܢ ܕܢܣܝܓ ܠܢ ܬܘܪ̈ܥܬܐ ܕܐܚ̈ܝܢ ܕܩ̇ܝܡܝܢ ܒܟܠܗܝܢ ܩܘܪ̈ܝܐ ܕܐܝܣܪܝܠ ܘܢܘܬܒ ܥܡܗܘܢ ܟܗ̈ܢܐ ܘܠܘ̈ܝܐ ܒܩܘܪ̈ܝܗܘܢ ܘܒܟܦܪ̈ܘܢܝܗܘܢ ܘܢܬܟܢܫܘܢ ܘܢܐܬܘܢ ܠܘܬܢ

3 ܘܢܨܠܘܢ ܩܕܡ ܡܪܝܐ ܐܠܗܢ ܘܢܒܥܐ ܡܢܗ ܥܠ ܚ̈ܛܗܝܢ ܡܛܠ ܕܠܐ ܨ̇ܠܝܢ ܗܘܝܢ ܩܕܡܘܗܝ ܒܝܘܡ̈ܬܐ ܕܫܐܘܠ

4 ܘܐܡܪ̈ܢ ܟܠܗܝܢ ܟܢܘܫ̈ܬܐ ܠܡܥܒܕ ܗܟܢܐ

5 ܘܟܢܫ ܕܘܝܕ ܠܟܠܗ ܐܝܣܪܝܠ ܡܢ ܢܗܪܐ ܕܡܨܪܝܢ ܘܥܕܡܐ ܠܡܥܠܢܐ ܕܐܢܛܝܘܟܝ ܠܡܝܬܝܘ ܩܒܘܬܗ ܕܡܪܝܐ ܡܢ ܩܘܪܝܬ ܢܥܪ̈ܝܢ

6 ܘܣܠܩ ܕܘܝܕ ܘܟܠܗ ܐܝܣܪܝܠ ܠܩܘܪܝܬ ܢܥܪ̈ܝܢ ܕܐܝܬ ܒܬܚܘܡ ܐܪܥ ܫܒܛܐ ܕܝܗܘܕܐ ܠܡܣܩܘ ܡܢ ܬܡܢ ܠܩܒܘܬܗ ܕܡܪܝܐ ܐܠܗܐ ܕܝܬ̇ܒ ܥܠ ܟܪ̈ܘܒܐ ܥ̈ܠܝܐ ܕܐܬܩܪܝ ܫܡܗ ܥܠܘܗܝ

7 ܘܣܡ ܩܒܘܬܗ ܕܡܪܝܐ ܒܥܓܠܬܐ ܚܕܬܐ ܘܫܩܠܘܗ̇ ܘܢܦܩܘ ܡܢ ܒܝܬ ܐܒܝܢܕܒ ܘܥܐܙܐ ܘܐܚܘܗܝ ܕܒ̇ܪܝܢ ܗܘܘ ܥܓܠܬܐ

8 ܘܕܘܝܕ ܘܟܠܗ ܐܝܣܪܝܠ ܡܫܒܚܝܢ ܗܘܘ ܩܕܡ ܡܪܝܐ ܒܥܫܝܢܘܬܐ ܘܒܬܫ̈ܒܚܬܐ ܘܒܟܢܪ̈ܐ ܘܒܪ̈ܒܝܥܐ ܘܒܨ̈ܨܠܐ

9 ܘܐܬܘ ܠܐܕܪ̈ܐ ܕܪ̈ܡܝܢ ܘܐܘܫܛ ܥܐܙܐ ܐܝܕܗ ܠܡܣܡܟܗ̇ ܠܩܒܘܬܐ ܡܛܠ ܕܪܗܛܘ ܗܘܘ ܠܗܘܢ ܬܘܪ̈ܐ ܠܐܕܪ̈ܐ

10 ܘܐܬܚܡܬ ܡܪܝܐ ܥܠ ܥܐܙܐ ܘܡܚܝܗܝ ܗܘܐ ܬܡܢ ܥܠ ܕܐܘܫܛ ܗܘܐ ܐܝܕܗ ܥܠ ܩܒܘܬܐ ܘܡܝܬ ܗܘܐ ܬܡܢ ܩܕܡܝܗ̇ ܕܩܒܘܬܐ

11 ܘܟܪܝܬ ܗܘܬ ܠܕܘܝܕ ܡܛܠ ܕܬܪܥ ܗܘܐ ܡܪܝܐ ܬܘܪܥܬܐ ܒܥܐܙܐ ܘܐܬܩܪܝ ܫܡܗ̇ ܕܕܘܟܬܐ ܗ̇ܝ ܬܘܪܥܬܐ ܕܥܐܙܐ ܥܕܡܐ ܠܝܘܡܢܐ

12 ܘܕܚܠ ܗܘܐ ܕܘܝܕ ܡܢ ܡܪܝܐ ܒܝܘܡܐ ܗ̇ܘ ܘܐܡܪ ܐܝܟܢܐ ܐܥܠ ܠܘܬܝ ܩܒܘܬܗ ܕܡܪܝܐ

13 ܘܠܐ ܨܒܐ ܗܘܐ ܕܘܝܕ ܠܡܥܠܘ ܠܘܬܗ ܩܒܘܬܗ ܕܡܪܝܐ ܠܩܪܝܬܗ ܕܕܘܝܕ ܘܐܡܪ ܗܘܐ ܕܘܝܕ ܕܢܘܒܠܘܢܗ̇ ܠܒܝܬܗ ܕܥܘܒܪ ܐܕܘܡ ܓܬܝܐ

14 ܘܝܬܒܬ ܩܒܘܬܗ ܕܡܪܝܐ ܒܒܝܬܗ ܕܥܘܒܪ ܐܕܘܡ ܓܬܝܐ ܬܠܬܐ ܝܪ̈ܚܝܢ ܘܒܪܟ ܡܪܝܐ ܠܒܝܬܗ ܕܥܘܒܪ ܐܕܘܡ ܓܬܝܐ ܘܠܟܠܡܕܡ ܕܐܝܬ ܠܗ